شركة سامسونج تعتبر أقوى شركة بتنتج موبايلات اندرويد .. وسلسلة S من سامسونج هي السلسلة اللي بتقدم فيها الـFlagships او الموبايلات الرائدة بتاعتها .. النهارده هنقدملكم مراجعة Galaxy S22 Ultra واللي يعتبر أقوى موبايل اندرويد موجود حاليًا، وهنعرف ايه هي أهم عيوبه وايه مميزاته.
التصميم :-
الموبايل مش صغير تمامًا .. أبعاد كبيرة وتخانه كبيرة ووزن مش قليل، وزن حوالي 228 جرام .. الأبعاد الكبيرة دي في ناس بتحبها، وفي ناس تانية بتفضل الأبعاد الصغيرة.
ممكن تصميم الموبايل يظهر مش أفضل حاجه في الصور .. لكن في الحقيقة هو جميل جدًا وملفت ولما تتعود عليه هتشوفه فخم جدًا وهتحبه أكبر.
الكاميرات اللي كل كاميرا لوحدها بتلم تراب بشكل كبير في الألوان الغامقة زي الأسود، اما الأبيض فا مفيش تراب هيظهر خالص .. والـFinish المط اللي على الموبايل حلو.
وأكيد سامسونج بتقدم أفضل ما عندها كخامات، الموبايل بالكامل محمي بـGorilla Glass Victus Plus مع فريم ألومنيوم قوي، والكاميرات عليها حماية زجاج قوي وحواليها فريم بيمنع دخول التراب للعدسات.
وطبعًا الموبايل مقاوم للماء والغبار بشهادة IP68 .. فريم الموبايل العلوي والسفلي المستطيل هيفكرك بـNote 20 Ultra لإن فعلًا S22 Ultra يعتبر الخليفة بتاعه .. وده لإن الـsPen جوه جسم الموبايل.
ولما تشوف الـsPen وتستخدمه هتاخد بالك انه بقى اسرع من القديم بتاع Note 20 Ultra اللي كان حلو بالمناسبة، لكنه بقى أفضل والتأخير بتاعه وصل لـ2.8 مللي ثانية .. وطبعًا كل إستخدامات sPen القديمة موجودة .. والـAir Actions موجودة علشان تتحكم في الكاميرا والـMusic.
الشاشة :-
شاشة S22 Ultra هي شاشة مبهرة عملاقة 6.8 بوصة من نوع Dinamic AMOLED الجيل الثاني بدقة بتوصل لـQHD+ مع تردد بيوصل لـ120 هيرتز وسطوع بيوصل لـ1750 شمعة .. تجربة ممتازة تضاهي وتتفوق على شاشة iPhone 13 Pro في بعض الحالات.
شاشة S22 Ultra فيها Curves قوية، بتحسن من مسكة الموبايل في الإيد وبيقدملك فخامة غير عادية لشكل الشاشة، الحافة اللي فوق قد الحافة اللي تحت وثقب السيلفي صغير جدًا .. بس للأسف بيتزحلق بسهولة.
الشاشة بتنزل لـ1 هيرتز وبتطلع لـ120 هيرتز علشان تحسن من إستهلاك البطارية وفي نفس الوقت تقدملك أداء Smooth في الوقت اللي انت محتاج فيه معدل تحديث عالي.
لكن للأسف ده محسنش من إستهلاك البطارية اللي مش أفضل حاجه .. واللي يمنعك من انك تستمتع بالدقة الـQHD+ وتكتفي بالـFHD+ .. هنتكلم بالتفصيل عن البطارية في الفقرة بتاعتها.
وعمومًا هتاخد تجربة شاشة مثالية في S22 Ultra .. تحت الشمس هتشوف كل حاجه، شاشة مبهرة لو انت من محبي الشاشات الكبيرة .. وهتعرف تتعايش مع الموبايل بالحجم ده.
الأداء :-
تجربتنا مع نسخ موبايلات سامسونج الرائدة في مصر كانت بمعالجات Exynos ومكنتش أفضل حاجه .. دلوقتي سامسونج نزلت سلسلة Galaxy S22 كلها بمعالج كوالكوم سناب دراجون 8 جين 1 تكنولوجيا 4 نانو.
تجربة مثالية، الموبايل أداءه ثابت ومفيش أي تقطيعات في الفريمات .. تجربة قوية جدًا وإختيار موفق من سامسونج انها تنزل معالج سناب دراجون في الموبايل هنا.
خلينا نتفق ان معالج S22 Ultra أضعف من الموجود في iPhone 13 Pro .. بس في المهام اللي بنعملها على الموبايل الاتنين ممتازين، والـS22 Ultra مش هيقصر معاك تمامًا.
لما تضغط على الموبايل حاجه بسيطة في الإستخدام هتلاقي الظهر بتاعه بقى دافي شوية .. بالرغم من ان سامسونج مهتمة بالتبريد في الموبايل وبالرغم من تكنولوجيا التصنيع الـ4 نانو ميتر .. وبالرغم من ده برده استهلاك البطارية مش لطيف في الموبايل.
عوامل الأمان وعناصر اخرى :-
الموبايل بيجي بـAndroid 12 مبني على واجهة One UI 4.1 .. والموبايل هيوصل له 4 سنوات من التحديثات ودي حاجه عظيمة جدًا.
البصمة Ultra Sonic وأداءها مُبهر، الفكرة في الـAnimation لسه موجود في خفيف .. والـFace Unlock كويس نقدر نقول فوق المتوسط بشوية.
الموبايل صوته Stereo، صوت عالي والـBass معقول بس حاسس ان كان في أعلى من كده، صوت يكون مناسب لحجم الموبايل العملاق ده.
البطارية :-
رقم البطارية كبير، 5000 مللي امبير .. لكن أداءها القعلي مش أفضل حاجه .. البطارية بتخلص بسرعة، اعمل حسابك لو انت مستخدم تقيل شوية لموبايلك هتحتاج انك تشحنه في أخر اليوم .. مش هيكمل معاك لليوم الثاني .. ولو تقلت أكثر وإستخدمت الكاميرا كتير هتلاقي نفسك محتاج تشحنه في نص اليوم.
البطارية هي أكثر حاجه رخمت التجربة في S22 Ultra .. وعمومًا جايز يوصل Update للسوفت وير يحل الدنيا شوية.
تاني حاجه هي الشاحن .. S22 Ultra بيدعم الشحن بقدرة 45 وات .. اشتريت شاحن 45 وات وجربت اشحن وشحن البطارية بالكامل في ساعة .. مفرقش كتير عن الشاحن الـ25 وات اللي موجود في العلبة .. والموبايل بيدعم الشحن الـWireless بقدرة 15 وات وبيشحن في حوالي ساعتين.
الكاميرات :-
العدسة الأساسية 108 ميجا بيكسل بفتحة عدسة F/1.8 .. عدسة بدقة 10 ميجا بيكسل بفتحة عدسة F/2.4 وهي Telephoto للعزل 3X والثانية 10 ميجا بيكسل بفتحة عدسة F/4.9 وهي Telephoto للزوم الحقيقي 10X .. والأخيرة 12 ميجا بيكسل بفتحة عدسة F/2.2 للتصوير الواسع .. والكاميرا السيلفي 40 ميجا بيكسل بفتحة عدسة F/2.2
بشكل عام Look صور ايفون 13 برو بيكون Warm أكثر او دافي أكثر، اما Look صور جالاكسي S22 الترا بيكون Cold أو بارد، او بمعنى أوضح مايل للزرقان أكثر .. في معظم الصور بميل أكثر لمعالجة سامسونج للصور، طبيعية أكثر .. بس انت لو بتحب الـLook الدافي بتاع ايفون 13 برو هتفضله بالتأكيد.
جالاكسي S22 الترا الزوم فيه هو أقوى زوم انا جربته في موبايل في مصر لحد دلوقتي .. الـProssecing اللي بيحصل للصور غريب وبيقدر فعلًا يجيبلك تفاصيل قوية، العدستين المُخصصين للزوم 10 ميجا بيكسل والاتنين فيهم مثبت بصري ولكن حقيقي مستواهم الفعلي اتطور جدًا.
وكمان الزوم بالليل قوي جدًا وبرده بيقدر يجيبلك تفاصيل حاجات عينك مستحيل تشوفها .. لما قارنت الزوم مع ايفون 13 برو لاقيت تفوق رهيب لصالح S20 Ultra بفرق كبير جدًا.
اللي رهيب فعلًا في الموبايلين هو البورترية الـ3X .. حرفيًا دول أفضل موبايلين في تصوير البوروريه، لما تجربة وتاخد عليه هتلاقي نفسك علطول بتصور بيه لإنه بيقدم Look مختلف للصورة.
صعب نقول ان في موبايل أفضل من التاني في التصوير .. بس نقدر نقول ان دي موبايلات قوية في التصوير، وفي كل ظرف تصوير هتلاقي نتيجة مختلفة، مره هيعجبك S22 Ultra ومره هيعجبك iPhone 13 Pro .. الحاجه اللي بيتفوق فيها ايفون 13 برو هو البورتريه الليلي.
سامسونج طورت Galaxy S22 Ultra في التصوير بطريقة مُبهرة، عجبني جدًا ان الموبايل قادر يسد ويتفوق على ايفون 13 برو في بعض السيناريوهات.
بالنسبة للسيلفي فا الموضوع محسوم برده لـ الـLook اللي انت بتحبه، الـSkinToon البرونزي اللي ايفون 13 برو بيطلعه ولا الـSkinToon الطبيعي اللي جالاكسي S22 الترا بيطلعه ؟ مع العلم ان الـHDR في صور البورتريه بتاعت S22 الترا أفضل شوية، وفي الظروف الصعبة InDoor عجبني أكثر Look صور بورتريه سامسونج عن ابل.
بالنسبة لتصوير الفيديوهات فالموبايل بيدعم تصوير فيديوهات بجودة 8K مع 24 فريم في الثانية .. او 4K مع 60 فريم في الثانية .. وبيدعم تصوير فيديوهات HDR10+ وبيدعم المثبت الإلكتروني في كل العدسات، والمثبت البصري في العدسة الأساسية وعدسات الزوم.
شركة سامسونج ضافت الـPortrait Video في الـS22 Ultra لمنافسة الـCinematic Mode في الـiPhone 13 Pro .. وتقدر تصور بالـPortrait بالكاميرا الخلفية او الأمامية.
سعر Galaxy S22 Ultra :-
- نسخة 256 جيجا مع 12 جيجا رام بسعر 25.700 جنية
- نسخة 512 جيجا مع 12 جيجا رام بسعر 28.000 جنية
وبينفع تركب شريحتين إتصال من الجيل الخامس .. لكن مينفعش تركب كارت ميموري للأسف.
الرأي النهائي :-
مميزات S22 Ultra :-
- كاميرات محترمة جدًا سواء صور او فيديوهات تصوير نهاري لو ليلي
- شاشة عملاقة أداءها قوي جدًا
- تجربة سلسلة الـNote من خلال الـsPen
- أداء سريع جدًا ومفيش أي تقصير
عيوب S22 Ultra :-
- بطارية مش أفضل حاجه
- الموبايل بيسخن لما بتضغط عليه في الإستخدام
- الشاحن مش سريع اوي
ده أفضل موبايل اندرويد موجود حاليًا .. وهيفضل الأفضل لفترة طويلة .. دي أول مرة أحس فيها ان سامسونج بتتفوق في سيناريوهات كتيرة على ابل في التصوير .. نتمنى سامسونج تدعم الموبايل بتحديثات مستمرة علشان تحل المشاكل اللي موجودة فيه وتحسن من أداءه العام.
Comments