النهارده هنقدملك مراجعة تابلت جديد .. التابلت هو Samsung Galaxy Tab S6 Lite من سامسونج .. تابلت شيك مُحترم كده .. وفي المراجعة دي هنعرف ايه اللي التابلت ده بيقدمه وايه الحاجات اللي ممكن تخليك تفكر تشتريه !
التصميم :-
أول ما تفتح الـBox بتاع التابلت ده وتمسك التابلت في إيدك هتنبهر .. خامات محترمه بتيجي بظهر معدني قوي وفريم الومنيوم .. حاجة نظيفة مفيهاش أي تنازل خالص .. التابلت ده رفيع اوي .. تخانته بتيجي 7 ملم .. والطبيعي بتاع تخانة الموبايلات 8 ملم .. فلك أن تتخيل إن التابلت أرفع من الموبايلات.
بس طبعا التابلت 10 بوصة وبطارية ضخمة ومعدن .. كل ده مترجم لوزن 467 جرام .. وزن كبير جدًا قرب من النصف كيلو .. بس اصلًا ده تابلت مش موبايل .. مش هتحطه في جيبك كتير يعني .. واصلًا مش هتمسكه بإيدك كتير، ليه بقى ؟
علشان الجراب اللي هتلاقيه في بوكس التابلت .. جراب جامد اوي .. والجراب ده لو هيتباع لوحده هيبقى غالي مش رخيص .. الجراب فيه مغناطيس بيقدر يمسك التابلت من غير أي تثبيت فيه .. مش هيقع منك، وبيبقى ماسك التابلت كويس جدًا .. وبيغطي كل جُزء في التابلت .. علشان تحطه في شنطتك أو شنطة اللاب توب زي ما تكون شايل الـNoteBook بتاعتك.
مش بس كده .. الجراب فيه أكتر من حركة تانيه كويسه .. اولًا تقدر تعكس الجراب وتخلي التابلت يسند عليه .. علشان لو هتتفرج على حاجة مثلًا .. وعندك زاويتين كمان مش زاوية واحدة .. وكمان في مكان للـsPen اللي بيجي بردة جوا بوكس التابلت .. وبرده Magnetic .. مجرد ما تقربة من مكانة هتلاقيه لزق فيه وثابت مش هيقع.
وكمان في مغناطيس على فريم التابلت لو قربت منه القلم هيلزق فيه .. وإنت مش محتاج تدوس على زرار الباور كتير في التابلت ده .. لإن مسافة بس ما تفتح الجراب .. هتلاقي التابلت فتح زي ما تكون دوست على زرار الـPower .. وبردة أما بتقفل الجراب التابلت بيقفل.
الشاشة :-
شاشة عملاقة، بتيجي بحجم 10.4 بوصة بدقة مُختلفة شوية علشان الشاشة الكبيرة .. 2000×1200 بيكسل .. نقدر نقول انها FHD+ .. بس الدقة دي على شاشة كبيرة زي دي قدمت لنا كثافة بيكسلات 224 بيكسل لكل بوصة.
لو قربت من شاشة التابلت هتشوف البيكسلات بعينك .. بس محدش هيقرب شاشة تابلت بالحجم ده من عينة اوي .. اكيد هتبقى بعيد شوية .. وانت بعيد عنه شوية متقلقش .. هتاخد تجربة محترمة من الشاشة.
بس اللي إتخدعت فيه نوع الشاشة .. من غير ما تبص على المواصفات مُمكن تفتكر إنها اموليد من Quality الشاشة وسطوعها العالي .. بس هي للأسف TFT LCD .. علشان لو حطوا شاشة AMOLED بالحجم ده .. سعر التابلت هيزيد أكتر.
بس متقلقش .. الشاشة زي ما بقولك جودتها حلوة جدًا ومش هتضايقك في أي حاجة .. وأكيد إنت لازم تستغل الشاشة الكبيرة دي في إنك تتفرج على محتوى عليه او إنك تعرض Presentation في Meeting .. او ممكن كمان تزاكر عليه.
حواف شاشة التابلت هنا كبيرة شوية .. كان نفسي تبقى أصغر من كده .. بس يعني علشان متلمسش التاتش بالغلط وانت ماسك التابلت بالحجم ده في إيديك.
مفيش إعلان رسمي من سامسونج عن طبقة الحماية اللي موجوده على الشاشة .. ولا في سكرينة عليها .. بس سهل تفصله سكرينه عند محل موبايلات.
الأداء :-
التابلت ده بيجي بمعالج سامسونج المعروف في الفئة المتوسطة .. معالج Exynos 9611 وده معالج ثُماني النواة بيشتغل بتكنولوجيا 10 نانو .. ده المعالج الموجود في Galaxy A51 وGalaxy M31.
مش هقولك الأداء خيالي .. لا خالص .. الأداء معقول ومقبول في الإستخدام الخفيف .. بس مع الإستخدام الشاق .. هتحس بتقصير أكيد من المعالج .. بس اصلًا التابلت مش معمول علشان إستخدام شاق في العاب تقيله وكده.
وبالنسبة للأداء الرسومي فا انا جربت لعبة ببجي عليه .. بتشتغل على Ultra HDR .. اما لعبة كول اوف ديوتي فهي شغالة على إعدادات جرافيك Very High .. واللعبة بتشتغل كويس بدون مشاكل.
بس طبعًا الحجم الكبير ده والشاشة الكبيرة ديه لما تمسكها في إيدك علشان تلعب الموضوع هيبقى مُتعب شوية .. بشكل عام لو عايز حاجه للألعاب متجيبش تابلت بالحجم ده ولا بالسعر ده .. هات موبايل أفضل بمعالج قوي والعب براحتك يا معلم.
عوامل الأمان وعناصر اخرى :-
التابلت مفيش فيه بصمة إصبع، بس فية Face Unlock وللأسف بطيء جدًا ولازم تظبط وشك قدام الكاميرا.
والتابلت جاي بسوفت وير سامسونج One UI 2.0 اللي مليان مميزات زي ما إنت عارف .. والـDark Mode موجود في التابلت هنا عادي خالص.
التابلت فيه مُستشعر جيروسكوب بس للأسف الـAuto Rotate بيتأخر او بيعلق شوية في التابلت على ما يستجيب .. فيه حساس ضوء حقيقي موجود في طرف التابلت على اليمين.
وأكيد مفيهوش مُستشعر تقارب لإن كدا كدا أما بيجيلك مُكالمة بتعتمد على الـSpeaker او بتعتمد على سماعات هاند فري تركبها انت بنفسك في التابلت .. وصوت السماعة اللي جايه مع التابلت في العلبة مُمتاز جدًا.
و والتجربة الصوتية هنا مُمتازة .. عندك سماعة فوق وسماعة تحت من شركة AKG .. هيديلك صوت Stereo عالي جدًا ومُجسم جدًا جدًا .. هتحس إنك جبت Sound System في البيت عندك .. يمكن صوته أعلى من اللاب توب كمان.
بالنسبة للشبكات .. سوفت وير سامسونج بيفلتر شبكات الـWiFi الضعيفة .. ومش هتلاقيها ظاهره .. بيظهرك بس الشبكات اللي يقدر يشغلها لك كويس جدًا .. وشبكات الإتصال كويسة مفيهاش مشاكل.
الـsPen :-
وأكيد الـsPen اللي بيجي في العلبة هتستخدمه كتير .. وعلى فكرة مش بيحتاج يتشحن ولا فيه بطاريات .. هيفيدك القلم ده لو عاوز تكتب Notes او ترسم او حتى تستخدم التابلت وهو مسنود على الجراب عن طريق القلم .. والقلم كمان حساسيته حلوة جدًا جدًا على الشاشة .. مش هتحس باي تأخير وانت بتكتب او بترسم على شاشة التابلت.
وكمان تقدر تكتب Notes بسرعة وهي الشاشة مقفولة .. عن طريق إنك هتمسك القلم وتدوس على الزرار اللي فيه .. وتكتب على الشاشة هتلاقي الـNote فتحت تلقائي .. إكتب زي ما أنت عايز.
وكمان الـPointer موجود وشغال في القلم ده .. وتقدر كمان تستخدم القلم في الكتابة بدل ما تكتب على الكيبورد .. وشغالة عربي وانجليزي زي الفل.
طبعا الـFunctions او الخواص اللي في القلم هنا أقل من الموجود في سلسلة موبايلات نوت من سامسونج .. لإن القلم هنا مفيهوش بطاريات ولا فيه مُستشعرات.
البطارية :-
بطارية ضخمة بتيجي بحجم 7040 مللي أمبير .. هتديلك أداء فعلي حوالي 8 ~ 9 ساعات شاشة مفتوحة علشان شاشة التابلت كبيرة جدًا زي ما انت عارف.
والشاحن المُرفق سريع .. بيجي بقوة 25 واط .. وبيشحن التابلت في 3 ساعات وربع بالكامل وده وقت شحن مُحترم.
الكاميرات :-
التابلت مش موجه للتصوير عمومًا .. الكاميرا الخلفية 8 ميجا بيكسل والأمامية 5 ميجا بيكسل .. والإتنين بيصوروا فيديوهات بدقة FHD+ وهتلاقي Live Focus او التصوير البورترية .. والصور اللي بتطلع من التابلت هتقضي الغرض .. بس لازم إضاءة عالية .. مش هتاخد يعني أداء رهيب من الكاميرات.
بس في ميزة لذيذة أوي .. لإن ده تابلت مُوجه اكتر للشغل او للمذاكرة .. لو الكاميرا حست إنك بتصور كلام مكتوب زي ورقة محاضرات مثلًا .. هتلاقي ظهرلك كلمة Scan .. لو دوست عليها هتصور الورقة بـQuality حلو أوي فعلًا وهتعرف تقرأ الكلام اللي مكتوب في الورقة كويس جدًا.
سعر التابلت :-
سعر التابلت ده هيكون في حدود 7000 جنية للنسخة الوحيدة المتوفرة منه واللي بتيجي بمساحة تخزين 64 جيجا مع 4 جيجا رام .. وبينفع تركب كارت ميموري وشريحة إتصال واحدة في نفس الوقت.
الرأي النهائي :-
مميزات Galaxy S6 Lite :-
- تصميم شيك وخامات محترمه وتقفيل ممتاز
- القلم والجراب موجودين في العلبة
وتجربة القلم هنا مُحترمة جدًا - شاشة كبيرة ممتازة
- تجربة صوتية مُحترمة جدًا
عيوب Galaxy S6 Lite :-
- مساحة تخزين صغيرة
- أداء مقبول بس مش الأفضل مع 4 جيجا رام فقط
- مفيش مُستشعر بصمة
- سعر التابلت غالي وكان من الافضل لو كان أرخص 1000 جنيه من سعره الحالي
Comments