مراجعة Galaxy Z Flip 4 – موبايل صغير بس عبقري !

النهارده هنقدملكم مراجعة Galaxy Z Flip 4 الرائد من سامسونج، موبايل مختلف شوية .. ممكن تكون شايفه بيقدم تجربة فريدة من نوعها، وممكن تكون شايف ان فكرته ملهاش لازمه ومتقتنعش بيها .. لكن المهم انك تتعرف على الموبايل خاصًة انه مخصص بشكل اكبر للشباب .. وكمان هخليك تعرف الفرق بينه وبين سلسلة Galaxy S22.

التصميم :-

فكرة الموبايل تعتمد على انك يبقى معاك موبايل حجمه صغير وهو موجود في جيبك ومش مدايقك، نص حجم اي موبايل عادي .. لكن تقدر تفتح الموبايل ويكون موبايل بحجم كامل وتاخد منه تجربة موبايل رائد، مع شوية تنازلات بسيطة علشان فكرة المفصلة والفتحة والقفلة.

الناس كلها بتنبهر بفكرة انك تتني الموبايل وتفتحه وتقفله .. تصميم الموبايل حلو ولطيف وخفيف وفي وجهة نظري هو مختلفش كتير عن Galaxy Z Flip 3 .. الموبايل واخد نفس الشكل مع إختلاف وتطوير في المفصلة والفريم بتوع الموبايل علشان يقدملك تجربة أحسن وأقوى.

المفصلة بقت أقوى وبقى صعب انك تفتح الموبايل بإيد واحده زي الأول .. وده بيخلي الموبايل اعتمادي اكثر ومتين اكثر .. لكن الفكرة ان الشاشة بتثبت على أي زاوية تفتحها عليها .. مش زاوية محددة زي الجيل اللي فات.

الموبايل لسه وهو مقفول على بعضه بيكون في تجويف صغير باين بين الشاشة على نفسها .. ودي حاجه مش لطيفة أوي لانها كده مش بتكون محمية 100% .. وطبعًا الظهر الزجاجي محمي بطبقة حماية Gorilla Glass Victus Plus مع فريم ألومنيوم قوي .. كمان مع حماية IPX8 ضد الماء والغبار.

الموبايل شبابي أكثر وموجه للـInfluencers اللي بيصوروا vLogs كتير.

الشاشة :-

الشاشة الخارجية :-

الشاشة الخارجية حجمها 1.9 بوصة وده لسه حجم صغير .. لكنها Super AMOLED وبتقدر تعمل بيها حاجات كتير .. تسحب من فوق علشان الـWi Fi والصوت والبلوتوث وحاجات تانيه .. تسحب من الشمال علشان تشوف الاشعارات .. تسحب من اليمين عشان تشوف Widgets تقدر تختار بينهم وترتبهم براحتك.

اهم استخدام بقى للشاشة الخارجية هي لما تدوس دوستين بسرعة على زرار الباور هتفتحلك الكاميرا .. وبالتالي تقدر تاخد صور سيلفي ممتازة بالكاميرا الخلفية وانت شايف نفسك في الشاشة الصغيرة .. وكمان تقدر تغير ما بين 3 أوضاع في الكاميرا، تسحب يمين او شمال تتنقل بين الصور العادية والبورترية والفيديو.

أخر حاجه في الشاشة الخارجية هي شكل الساعة اللي بتظهرلك .. والـClock Style اللي بتقدر تختار فيها ما بين اشكال كتير، او حتى تحط صورتك او أي فيديو انت منزله عندك .. او حتى تخليه يغيرلك الشكل كل شوية وانت بتفتح وتقفل .. علشان يكمل لك التجربة الروشة اللي الموبايل ده بيقدمها.

الشاشة الداخلية :-

شاشة 6.7 بوصة Dynamic AMOLED الجيل الثاني بدقة FHD+ وبتردد من 1 هيرتز الى 120 هيرتز .. شاشة محترمة ومش صغيرة تمامًا .. ألوانها كويسة جدًا متقلش حاجه عن باقي الموبايلات الرائدة .. سطوعها معقول 1200 شمعة، يمكن مش أقوى حاجه بالنسبة لباقي الموبايلات الرائدة لكنه مش هيكون أزمة تحت الشمس.

لكن علشان فكرة الـFlip والشاشة اللي بتتني هيكون عندك بعض التنازلات .. اولًا حواف الشاشة الكبيرة بسبب الفريم البارز اللي حول الشاشة علشان لما تقفل على نفسها يحميها .. ثانيًا الجزء اللي بيتقفل ويتفتح عند المفصلة لسه ظاهر وانت بتستخدم الموبايل خاصًة لو في لون فاتح مكانها.

طبعا الشاشة عليها سكرينة ويُفضل انها تفضل موجودة لإنها ليها دور كبير في حماية الشاشة.

أهم وأفضل استخدام للشاشة الكبيرة لما تتنيها وتخليها بزاوية 90 درجة هي الكاميرا .. هتقدر تحط موبايلك في أي حته وتصور فيديو من غير ما تحتاج ترايبود او انك تسند الموبايل على حاجه .. وانت Outdoor حط موبايلك على أي سور وصور .. كمان ممكن تصور بالكاميرا الأمامية وانت شايف نفسك على نص الشاشة الكبيرة.

وتقدر تقلب الكاميرا على الخلفية وتشغل الشاشة الصغيرة وبكده هتاخد فيديو بجودة أحسن بكتير وبرده الموبايل ثابت بسهولة وبرده شايف نفسك في الشاشة .. علشان كده الموبايل بيخاطب الشباب.

كمان في Flex Mode اللي بيشتغل في نفس وضعية الشاشة وبيخلي الشاشة مقسومة نصين .. النصف اللي فوق محتوى والنصف اللي تحت كيبورد أكنك معاك لاب توب صغير .. وتقدر كمان تستخدم النصف اللي تحت كإنه Touch Pad ودي حاجه لطيفة جدًا.

وأكيد في Split Screen ولاحظت ان سامسونج ضايفه Option انك تعمل Full Screen وانت عامل Split Screen علشان تاخد مساحة أكثر من الشاشة وتخفي الاشعارات والساعة من فوق.

الأداء :-

موبايل Galaxy Z Flip 4 بيجي بمعالج كوالكوم سناب دراجون 8 بلس جين 1 بتكنولوجيا 4 نانو ميتر والداعم لشبكات الجيل الخامس .. وده معالج جامد جدًا، مع نوع ذاكرة تخزين UFS 3.1 سريع.

أداء الموبايل العادي اليومي حلو جدًا لو استخدامك متوسط او فوق المتوسط .. لكن لو استخدامك شديد وعندك ألعاب وبرامج تقيلة .. فا اختيارك غلط وموبايل Z Flip 4 مش ليك .. ثانيًا البطارية الصغيرة والحجم الصغير اللي المعالج موجود فيه مخلي سامسونج تظبط السوفت وير ان اول ما الموبايل يحس بالضغط يقلل ترددات المعالج.

ده هيخليك تاخد أداء من المعالج أقل شوية من نفس المعالج في موبايلات تانيه .. لان فرق في الحجم بينهم كبير .. والكلام ده بيظهر مع الضغط الشديد .. في الإستخدام العادي مش هتحس بأي حاجه .. ولعبة ببجي بتشتغل على أعلى إعدادات جرافيك وتجربتها كانت ممتازة ومفيش اي مشاكل.

عوامل الأمان وعناصر اخرى :-

البصمة موجودة على زرار الباور وأداءها كويس بس لو فاتح الموبايل هتحسها بعيدة علشان هي في الجزء العلوي من الموبايل .. اما الـFaceunlock فا سرعته متوسطة كعادة سامسونج.

صوت الموبايل Stereo ودرجة وقوة الصوت أقل حاجه بسيطة من Galaxy S22 Ultra .. ودي حاجه كويسة ان الصوت ده بيطلع من الحجم ده.

شبكات الـWi Fi لاحظت انها احسن حاجه بسيطة من S22 Ultra .. بس لسه الأداء فوق المتوسط موصلش لدرجة الممتاز.

البطارية :-

البطارية بقت سعتها 3700 مللي امبير .. أكبر شوية عن Z Flip 3 .. مع الشاشة اللي بتنزل لـ1 هيرتز والمعالج الموفر والسوفت وير اللي بيحكم الموبايل في الإستهلاك.

أداء البطارية بقى أفضل كتير عن الجيل اللي فات وممكن مع إستخدام متوسط او اقل من المتوسط يوصل لـ يوم شاشة مفتوحة .. لكن طبعًا منقدرش نقارنه ببطاريات الموبايلات الرائدة.

الكاميرات :-

مفيش تطوير على جانب الكاميرات .. نفس المستشعرات القديمة بتاعت سامسونج .. الخلفية الأساسية 12 ميجا بيكسل F/1.8 مع مثبت بصري .. العدسة الثانية 12 ميجا بيكسل F/2.2 للتصوير الواسع .. والكاميرا السيلفي بدقة 10 ميجا بيكسل بفتحة عدسة F/2.4.

مستوى التصوير في الموبايل متوسط .. هتلاحظ انه بين Galaxy S21 FE 5G وعائلة Galaxy S22 .. حاجه كده في النصف ما بينهم .. واللي هو بالمناسبة مش وحش خالص .. بالعكس ممتاز جدًا على حجم الموبايل.

في معظم الصور النتائج قريبة جدًا من بعضها لما جربت الموبايل مع S22 Ultra .. لكن مش لدرجة ان الموبايلين يكونوا نفس المستوى .. الـS22 Ultra فيه مميزات اقوى كتير منها الزوم والبورترية.

بالنسبة للسيلفي فا هو يقضي الغرض لكن مش أفضل حاجه .. لما بتاخد سيلفي بالكاميرا الخلفية بتاخد صور أفضل بكتير ومشبعة أكثر بالألوان بشكل جامد جدًا .. اعتقد محدش هيسيب الكاميرا الخلفية ويستخدم الأمامية.

بالنسبة لتصوير الفيديوهات فا الموبايل بيدعم تصوير بجودة 4K مع 60 فريم في الثانية .. وتقدر تتنقل بين العدسات وانت بتصور الفيديو .. والكاميرا الأساسية فيها مثبت بصري.

سعر Galaxy Z Flip 4 :-

• نسخة 256 جيجا مع 8 جيجا رام بسعر 27 الف جنية

وتقدر تشغل شريحة إتصال واحدة فقط .. والموبايل بيجي بضمان محلي من الوكيل في مصر.

الرأي النهائي :-

مميزات Galaxy Z Flip 4 :-

• تصميم عصري جدًا
• فكرة الشاشة اللي بتقفل وتفتح وإستغلاله ممتاز
• خامات تصنيع ممتازة ومقاومة للماء ووزن خفيف
• شاشة أداءها ممتاز في الإستخدام اليومي
• صوت عالي ممتاز
• كاميرات على مستوى المنافسة

عيوب Galaxy Z Flip 4 :-

• بطارية مش الأفضل
• سرعة الشحن 25 وات فقط
• العلبة مفيهاش شاحن
• أداء الموبايل ممتاز لكن مش تحت ضغط
• التجويف اللي في الشاشة وهي مقفولة مش لطيف
• سعر الموبايل غالي

لو انت استخدامك تقيل .. بتحب التصوير الكثير والزوم والبورترية، عايز شاشة متكاملة فائقة .. محتاج قلم ومش فارق معاك ان الموبايل يكون كبير .. ساعتها هات S22 Ultra هيكون مثالي بالنسبالك.

لكن لو عايز وزن خفيف وموبايل صغير وروش وفي نفس الوقت بيقدملك تجربة متكاملة رائدة في الإستخدام اليومي .. استخدامك مش عنيف اوي وهتقدر تحافظ على الموبايل .. فا Z Flip 4 هيكون ممتاز.