مقارنة بين Samsung M30s و Realme 5 Pro – مين الأفضل تحت سعر 4000 جنية ؟!

فئة الاربع الاف جنية فيها موبايلات كتير أهمهم و افضلهم Realme 5 Pro النسخة الصغيرة الـ 128 جيجا و 4 رام لحد اما جربت موبايل Samsung M30s و اللي قولت في الريفيو بتاعه انه يقدر ينافس ويسد مع أقوى الموبايلات في فئته السعرية فهل تفتكر M30s هيسد فعلا قصاد الريلمي 5 برو ولا لا ؟

في مراجعة النهاردة هتعرف الفرق بين الاتنين علشان تختار الأفضل.


التصميم :-

الموبايلين الظهر بتاعهم من البولي كربونيت أو البلاستيك علشان كده مفيش خوف من واحد فيهم لو وقع وقعة كبيرة لأن البلاستيك فعلا بيستحمل.

الريلمي فيه فريم بلاستيك إنما السامسونج مفيش فريم اصلا ، الظهر كله حته واحدة بدون فريم.

لو هنتكلم عن الشياكة، الريلمي فيه نقشة diamond cut اللامعة اللي مخلية التصميم شكله أحلى علي عكس السامسونج اللي مفيش فيه شغل كتير و بهرجة في تصميم الظهر، عموما دي أذواق شوف مين اللي يريحك فيهم.

رصة الاربع كاميرات في الريلمي أشيك بس على​ حساب بروز كبير للكاميرات بيتغطى بالجراب اللي جاي معاه .. انما السامسونج شكل رصة الكاميرات التلاتة مش حلو أوي بس يتفوق في أن مفيش بروز للكاميرات و خلي بالك مفيش جراب مع السامسونج في العلبة بتاعته.

و الموبايلين نفس المسكة في الايد تقريبا الأبعاد قريبة جدا من بعض و الوزن قريب جدا السامسونج بأبعاد 159x 75.1×8.9 ملم و وزن 188 جرام و الريلمى 157×74.2×8.9 ملم و وزن 184 جرام مفيش اختلاف جوهري يعني.

الريلمى بألوان الأزرق و الأخضر و السامسونج بألوان الأسود و الأبيض.


الشاشة :-

و هنا اكتساح لشاشة السامسونج اللي حرفيا هتخليك شايف شاشة الريلمي بهتانة لأن شاشة الـ Samsung M30s حجمها 6.4 بوصة من نوع سوبر أموليد بدقة Full HD Plus إنما الريلمي شاشة 6.3 بوصة من نوع IPS LCD بدقة Full HD plus.

من الأخر شاشة السامسونج أفضل في كل حاجة الألوان وتشبعها و درجتها و زوايا الرؤية و حتى السطوع تحت الشمس، كل ده متفوق فيه السامسونج بجدارة و زي ما قلنا في مراجعة M30S سامسونج خدت لقب أفضل شاشة في الفئة السعرية دي.

الموبايلين فيهم نوتش فيه السيلفي تقدر تخفي النوتش دي من السامسونج لكن في الريلمي مينفعش تخفيه من الواجهة كلها زي السامسونج.

الريلمي 5 برو يتفوق في وجود حماية جوريلا الجيل الثالث على الشاشة وكمان الموبايل جاي متركب عليه اسكرينة إنما السامسونج مفيش اعلان رسمي عن الحماية و لا في اسكرينة و لازم تركب سكرينة اول ما تجيبه.


الاداء :-

و هنا يتفوق الريلمي بمعالج سناب دراجون 712 تكنولوجيا 10 نانو , المعالج ده أقوى من معالج Exynos 9611 بتكونولجيا 10 نانو الموجود في سامسونج M30s.

فرق الأداء ملحوظ في الاستخدام اليومي لو هتحط الموبايلين جمب بعض في سرعة التنقل بين التطبيقات و استجابة الموبايل للحاجات اللي انت عمال تعملها عليها و التنقل بين التطبيقات و كل الكلام ده محسوس.

بس هل ده معناه أن السامسونج سيء؟ لا خالص ده يمكن أول مرة اجرب موبايل من سامسونج في الفئة السعرية دي و مينفعش نقول علي أدائه وحش و أقول مقبول بل أفضل من المقبول كمان، الفكرة بس انك تقفل الانيميشن بتاعة​ الواجهة في سامسونج و هتلاقي الأداء مقبول جدا.

نتكلم عن الأداء الرسومي الـ M30s بمعالج رسومي رسوميات Mali-G72 MP3 بيقدر يشغل لعبة زي PUBG مثلا على Ultra HDR اعدادات جرافيك عالية جدا .. اللعبة بتشتغل كويس علي​ الاعدادات دي بس هتسقط فريمات مع الوقت و هتضطر تنزل لـ High HD و دي الاعدادات اللي بتشتغل بيها على الريلمي 5 برو اللى بمعالج Adreno 616.

و بالنسبة لـ لعبة Call of duty فهي بتشتغل على High جرافيك على الـ M30s و على Very high على Realme 5 Pro وبتشتغل بدون أي مشاكل علي​ الموبايلين.

يعني لو محتار من حته الأداء الرسومي دي فبصراحة الموبايلين مش هيقصروا معاك خالص في الألعاب و ممتازين جدا.


عوامل الأمان و حماية الخصوصية :-

always-on-m30s

الموبايلين فيهم بصمة في الظهر بدلكن بصمة الريلمي أسرع بفرق بسيط في استجابة البصمة الخلفية عن السامسونج.

و بالنسبة للـ Face Unlock فنفس الكلام الريلمي بردوا بيقدر يتعرف على​ وشك و يفتح أسرع بفرق بسيط عن السامسونج.

الموبايلين بواجهات تشغيل مختلفة وكل واجهة ليها مميزاتها مثلا الـ night mood او Dark mood موجود في الموبايلين المميز في واجهة ريلمي أن الدارك مود بيبقي شغال حتى ع الفيس, في السامسونج الفيس بيبقي ابيض وانت مشغل الـ dark mood انا مركز ع الدارك مود اليومين دول علشان كلكم بتسألوا عليه وبتحبوه.

بالنسبة للاشعارات، الموبايلين مفيش فيهم لمبة اشعارات بس السامسونج يتفوق بوجود خاصية Always on display اللي بيظهر عليها ايقونات اشعارات البرامج اللي جاتلك علي​ الشاشة المطفية إنما الريلمي مفيش.

إنما الريلمي مفيش أي حاجة تعرفك الاشعارات لازم كل شوية تفتح تطمن علي​ موبايلك.

بالنسبة للمستشعرات، للأسف السامسونج مفيش فيه مستشعر ضوء حقيقي و الموبايل بيستخدم السوفت وير و الكاميرا السيلفي علشان يحدد درجة سطوع الشاشة و اللي ممكن تضايقك و وتغلط كتير و كمان مستشعر التقارب بتاع المكالمات مش موجود هارد وير و بيعتمد على​ ذكاء السوفت وير في أنه يقفل الشاشة على​ ودنك و انت بتعمل مكالمة و اللي ممكن يعلق احيانا إنما كل المستشعرات دي موجودة حقيقية و شغالة بكفاءة في الريلمي 5 برو.


الصوت :-

بالنسبة لقوة الصوت الريلمي 5 برو صوته أعلى بفرق بسيط عن الام 30 اس بس بالنسبالي الاتنين ممتازين بصراحة و صوتهم كافي جدا.

و صوت سماعات المكالمات عالي و ممتاز في الموبايلين.

و صوت سماعات الأذن أعلى بفرق بسيط في الريلمي عن السامسونج.

بالنسبة لنقطة الجدل بقي و هي قوة الشبكة بعد تجارب تاني و تالت و رابع و خامس للموبايلين مع بعض، أحب اقولك إن الشبكتين كويسين مفيش فيهم مشاكل هتقدر تعمل مكالمات في الأماكن اللي شبكتها ضعيفة في الموبايلين عادي ، بالنسبة بقا لـ mobile data هتبقي أسرع شوية في الاستجابة في الريلمي عن السامسونج.


البطارية :-

تفوق واضح لسامسونج ببطارية 6000 مللي أمبير , بطارية ضخمة جدا هتستحمل متوسط 9 ساعات شاشة مفتوحة أما الريلمي ببطارية 4000 مللي أمبير بتستحمل متوسط 6 ساعات شاشة مفتوحة و لأول مرة نفضل بطارية موبايل سامسونج على موبايل منافس تاني.

الريلمي معاه شاحن 20 واط و السامسونج 15 واط والاتنين USB Type C الريلمي أسرع في الشحن بياخد حوالي ساعة ونص و السامسونج حوالي ساعتين و نص ، من الأخر السامسونغح بيستحمل وقت فعلي للشاشة أكتر بس مع زمن شحن أكبر.


الكاميرات :-

موبايل Realme 5 Pro بأربع كاميرات في الظهر انما سامسونج M30s مع 3 كاميرات في الظهر.

العدسة الرئيسية 48 ميجا بيكسل في الموبايلين الريلمي مع فتحة عدسة 1.8 و السامسونج مع فتحة عدسة 2.0 و الاتنين فيهم wide angel و عزل والريلمي بيزيد عدسة رابعة للتصوير الـmacro.

و السيلفي بجودة 16 ميجا بيكسل مع فتحة عدسة 2.0 في الموبايلين و موجود في نوتش أعلي الشاشة.

اعتدمت في المقارنة على برنامج التصوير العادي بتاع سامسونج و بتاع ريلمي لأن معالج Exynos الموجود في السامسونج، نسخة جوجل كاميرا اللي بتشتغل عليها مفيش فيها night mode و كمان الصور بتطلع منها وحشة علشان كده خلينا في برامج التصوير العادية بتاعة كل موبايل فيهم.

فى اضاءة الشمس الريلمى عمل فلتر أصفر على الصورة و السامسونج فتح ألوان الصورة و لما عملنا Zoom مفيش فرق فى التفاصيل.
في تصوير المناظر الطبيعية واقعى أكثر فى السامسونج.

فى التصوير بالليل احيانا ممكن تلاقي noise بسيطة فى الريلمي.

بالنسبة للسيلفي الريلمي أحسن مع تفاصيل أفضل و ممكن تحس ان ال HDR أحسن شوية فى السامسونج فى العموم الاتنين أدائهم متقارب جدا.

بالنسبة لتصوير الفيديوهات الاتنين بيصوروا بجودة 4K و بجودة 1080 بيكسل و بجودة 720 بيكسل مع Slow motion.

تقدر تشوف الصور و الفيديوهات على مراجعتنا على يوتيوب.

اقرأ على موبيزل .. مقارنة بين Realme XT و Xiaomi Mi 9T .


محتويات صندوق الهاتف :-

هاتف Samsung M30s مع الشاحن 15 واط مع كابل الشحن و سماعات الرأس.

هاتف Realme 5 pro و عليه اسكرينة للحماية مع الشاحن 20 واط مع كابل الشحن وجراب لحماية ظهر الهاتف ولا يوجد سماعات أذن في العلبة.


سعر الهاتف :-

هاتف Samsung M30s
متوفر نسخة واحدة 64 جيجا بايت مع 4 جيجا رام بـ 3666 جنيه مصري و ينفع تركب كارت ميموري وشريحتين اتصال مع بعض.

هاتف Realme 5 Pro
النسخة اللي بنتكلم عنها في المقارنة هي 128 جيجا بايت مع 4 جيجا رام بسعر 3800 جنيه مصري و ينفع تركب كارت ميموري وشريحتين اتصال مع بعض.


رأي موبيزل النهائي :-

موبايل M30s من سامسونج يتفوق في أنه أرخص حوالي 150 جنيه و اللي هتشتري بيهم اسكرينة و جراب لأنهم مش موجودين في العلبة و بيتفوق في الشاشة الأموليد الممتازة و اللي فعلا فارقة جدا في الاستخدام و بيتفوق كمان في البطارية الأكبر و اللي بتديلك وقت فعلا أحسن و خاصية الـ always on display اللي بتعرضلك الاشعارات اللي جاتلك.

الريلمي بيتفوق في الأداء اليومي العادي بفضل المعالج الأفضل و البصمة أسرع بفرق بسيط و في مستشعرات حقيقية للضوء و التقارب مبتعلقش و زمن شحن أسرع و اخيرا بيقدملك 128 جيجا بايت مساحة بدل الـ 64 جيجا بتوع الـSamsung M30s.


فيديو المقارنة على اليوتيوب :-

قد يعجبك أيضا...

Comments

جاري التحميل...