أهم موبايلين في فئة الـ 6 الاف جنيه أو أقل حاجة بسيط دلوقتي هما Xiaomi Mi 9T و Realme XT مقارنة طلبتوها مننا كتير, جربنا الموبايلات مع بعض أكتر من مرة و حدثنا كمان الـ Mi 9T لأخر اصدار من شاومي اللي هو MIUI 11.
خلينا نبدأ المراجعة علشان تكتشف أدائهم و مميزاتهم و عيوبهم و نساعدك تختار اللى يناسبك بينهم.
التصميم :-
الاتنين تصميمهم من الزجاج بس لما تمسك الموبايلين بايديك هتحس كدا احساس ان Mi 9T خاماته الخارجية أفضل و الملحوظة دي وضحناها لما عملنا ريفيو لموبايل Realme XT … قولنا ان خاماته من الزجاج بس تحسها مخلوط عليها شوية بولي كربونيت بنسبة كبيرة شوية.
وخلي بالك فخامة الشاومي الزيادة هتخليه عنده قابليه للكسر أسرع لو وقع وقعة كبيرة عن الريلمي.
سيبك من كل دا, الاطار بتاع الشاومي من المعدن و ده خلاه يتقشر مع ناس كتير حتى و هو محطوط في الجراب ريلمي بقي محبتش تتفلزك وعملت الفريم بلاستيك علشان ميتقشرش.
بروز الكاميرات مش موجود تقريبا في الشاومي البروز صغير جدا انما الريلمي البروز كبير شوية و اللي بيتغطى عن طريق الجراب الشفاف اللي جاي معاه في العلبة و بالنسبة لجودته كويسة جدا و مش بيطلع من الموبايل انما الشاومي جاي معاه جراب أسود مش شفاف بس بيطلع من الموبايل مش ثابت فيه.
بالنسبة للوزن في الايد الشاومي وزنه أثقل 191 جرام بسبب طبعا الموتور اللي موجود في الموبايل والخامات الأفضل و ريلمى 183 جرام.
ولما نتكلم بقا ع الموتور, الشاومي بيقدم شاشة كاملة مع سلايدر سيلفي اللي جربناه قبل كدا كتير و قولنا عليه انه متين و كويس و مفيش فيه مشاكل بس طبعا لو مش حابب تاخد Risk عندك الريلمي XT مفيش فيه موتور و لا الكلام ده كله.
الريلمى بألوان الأبيض و الأزرق وأبعاد 158.7×75.2×8.6 ملم و الشاومى بألوان الأحمر و الأسود و الأزرق بأبعاد 156.7×74.3×8.8 ملم.
الشاشة :-
الاتنين حجمهم 6.4 بوصة و الاتنين بدقة Full HD+ بجودة 1080*2340 بيكسل مع كثافة بيكسلات 403 بيكسل لكل بوصة سيبك من كل ده الشاومي الشاشة نوعها أموليد و الريلمي سوبر أموليد.
شاشة الشاومي اتفاجئت إن ألوانها أحسن شوية في الفيديوهات عن الريلمي و اللي قولنا عن شاشة ريلمي في مراجعته إنه مش أفضل شاشة أموليد في الفئة السعرية دي.
الفرق بس في إن الشاومي شاشة كاملة مفيش نوتش زي الموجود في ريلمي XT و كمان الحواف بتاعة الشاشة أقل في الشاومي حاجة بسيطة عن الريلمي خصوصا الحافة السفلية.
الشاشتين عليهم حماية جوريلا الجيل الخامس لكن الشاومي مبيجيش عليه اسكرينة بس الريلمي جاي في العلبة متركب عليه اسكرينة.
الأداء :-
الشاومي بيجي بمعالج سناب دراجون 730 بتكنولوجيا 8 نانو مع تردد بيوصل لحد 2.3 جيجا هرتز انما الريلمي اكس تي بيجي بمعالج أقل شوية و هو سناب دراجون 712 تكنولوجيا 10 نانو تردده بيوصل لحد 2.2 جيجا هرتز.
خلينا فى الأداء الفعلي, في الشاومي في سرعة فتح تطبيقات عجيبة و غريبة أسرع من الريلمي اللي هو اصلا سريع بصراحة هنا الشاومي زي الطلقة مفيش غبار عليه.
بس لما جربنا نضغط علي الموبايلين برامج مفتوحة كتير في الخلفية و اجرب افتح برنامج ف الخلفية … الشاومي بصراحة خذلني مرة يعيد تحميل و مرة هنج في اعادة تحميل لعبة Subway علي عكس الريلمي اللي شغال زي القطر هو أة الريلمي 8 رام و الشاومي 6 رام بس القصة كلها في التحكم فى الرام مش ف حجم الرام.
بالرغم إني كنت متوقع أداء مستقر أكتر من كدا في شاومي من MIUI 11 بس يعني هو مين هيفتح كل البرامج ديه ويتنقل ما بينهم بالشكل ده احنا بس بنضغط على الموبايلات اوي علشان نوضحلكم مين الافضل في حته البرامج المفتوحة الكتير.
و بالنسبة للأداء الرسومي الشاومى بمعالج رسومي Adreno 618 و الريلمى Adreno 616.
طبعا Mi 9T أدائه الرسومي أقوى بفضل المعالج الأقوى على الواقع الاتنين شغالين على نفس اعدادات الجرافيك في PUBG و في Call Of Duty و مع تجربة اللعب على الموبايلين هتحس إن الشاومي فيه سلاسة أكتر و Smooth بفرق بسيط مش هتحسه إلا لما تمسك الاتنين مع بعض.
هل ده معناه إن الأداء متساوي هقولك اكيد لا … جايز محستش فرق الأداء دلوقتي بس اكيد مع تطور الألعاب كل شوية تحس بفرق المعالج الرسومي الأفضل في الشاومي.
عوامل الأمان و حماية الخصوصية :-
الموبايلين فيهم شاشة اموليد و بالتالي فيهم بصمة مدمجة بالشاشة الاتنين يعتبروا من أسرع البصمات المدمجة في الشاشة بالسعر ده بس حسيت إن بصمة الريلمي أسرع , مع العلم إن بصمة الشاومي المدمجة بالشاشة سرعتها بتقل شوية لو في سكرينة ع الشاشة.
بالنسبة لخاصية Face Unlock في الشاومي لازم بعد ما تدوس ع زرار الباور Power تسحب لفوق علشان اسلايدر السيلفي يطلع ويفتح بوشك و ده بيخليه طبعا ابطأ بفرق ملحوظ عن Realme XT اللي أول ما تدوس علي زرار الباور بيفتح.
نظام التشغيل و واجهة المستخدم :-
الاتنين بيجوا بنظام أندرويد 9.0 Pie و الريلمي بواجهته Color OS 6 و الشاومي MIUI 11.
بالنسبة لاختلافات السوفت وير , أهم اختلاف عندك هو الـ Dark mood موجود في الموبايلين طبعا مفيش أي مشاكل و شغال زي الفل.
بس Dark mood بتاع ريلمي بيخلي كمان ابلكيشن الفيس بوك باللون الأسود إنما في الشاومي البرنامج بيقلب أبيض.
في الشاومي تقدر تعمل نسختين من كل البرامج Dual apps إنما في الريلمي نسختين من برامج السوشيال ميديا بس.
بالنسبة للاشعارات كالعادة الشاومي بيتفوق في وجود لمبة اشعارات موجودة فى أعلى سلايدر السيلفي و بتنور مع وجود اشعارات و كمان الشاشة الأموليد بيظهر عليها الساعة و اشعارات البرامج و الشاشة مطفية … إنما الريلمي مفيش فيه لمبة اشعارات و علي الشاشة المطفية بيظهر الساعة و ايقونة المكالمات الفائتة Missed call والرسائل بس مش بيظهر عليه اشعارات برامج.
و بالنسبة للمستشعرات فهي موجودة و شغالة في الموبايلين ومفيش أي اختلاف جوهري ما بينهم.
بالنسبة لقوة الشبكة جربناها كتير في الاتنين و كمان سألنا مستخدمين كتير معاهم Mi 9T بقاله فترة والريلمي XT كمان معانا بقاله فترة و مفيش فعلا أي شكاوي في الشبكات في الموبايلات دي و الاتنين ممتازين في الشبكات.
الصوت :-
صوت السماعة الخارجية من Mi 9T أعلى و مكانه تحت علي اليمين يعني مش بيتكتم مع الألعاب … صوت ريلمي XT بردو حلو جدا بس هو أقل حاجة بسيطة من الشاومي بس للأسف مكان السماعة علي الشمال و الي بيتكتم مع الألعاب.
صوت سماعة المكالمات عالي وممتاز في الاتنين.
و صوت سماعات الأٌذن أعلى بفرق بسيط في الشاومي عن الريلمي.
اقرأ على موبيزل .. مراجعة Realme XT الكاملة .
البطارية :-
الاتنين بطاريتهم 4000 مللي أمبير الاتنين بيستحملوا حوالي 6 الى 7 ساعات شاشة مفتوحة علي استخدام متوسط لمدة يوم و الاتنين طبعا منفذ شحن USB Type C.
الشاومي معاه شاحن 18 واط و الريلمي شاحن 20 واط و الاتنين بيشحنوا البطارية الى 100% في حوالي ساعة ونص.
الريلمي يمكن منظم أكتر في استهلاك البطارية عن الشاومي و انت بتلعب ألعاب عليه بحس إن البطارية استهلاكها أعلى في الشاومي.
اقرأ على موبيزل … مين أفضل موبايل بـ 2500 جنية ؟
الكاميرات :-
موبايل Realme XT فيه 4 كاميرات و هاتف Xiaomi Mi 9T فيه 3 كاميرات بعيدا عن الأرقام, الفرق بس إن ريلمي فيه كاميرا زيادة Macro و مستشعر الكاميرا الرئيسي 64 ميجا بيكسل Samsung GW1 إنما الشاومي بمستشعر Sony IMX 586.
والشاومي فيه كاميرا للتيلي فوتو او الزوم انما الريلمي مفيهوش وفيه عدسة للعزل مكانها والاتنيني فيهم عدسات للتصوير الواسع.
السيلفي في الريلمي 16 ميجا بيكسل و في الشاومي 20 ميجا بيكسل موجود في اسلايدر السيلفي.
من الأخر Mi 9T بعد تحديث السوفت وير قدر يتفوق في بعض الصور على الريلمي في الاضاءات المعتدلة بسبب الواقعية الأفضل والاكتر في الصورة ع عكس الريلمي الي بيلعب في الوان الصورة بشكل مبالغ فيه .. وبالنسبة للنايت مود فكل موبايل بيعدل ع الصور براحته ولكن عجبني اكتر النايت مود بتاع الريلمي.
بالنسبة للكاميرا السيلفي فهنا التفوق واضح وصريح لكاميرا سيلفي الريلمي XT بسبب مستشعر العدسة الأفضل وفتحة العدسة الأوسع.
تقدر تشوف الصور فى مراجعتنا علي الـ YouTube في أخر المقالة.
الأسعار :-
هاتف Realme XT
متوفر بنسخه واحدة 128 جيجا مع 8 جيجا بسعر 5390 جنيه مصري و ينفع تركب كارت ميموري وشريحتين اتصال مع بعض.
هاتف Xiaomi Mi 9T
متوفر بنسختين, الأولى نسخة 64 جيجا بايت مع 6 جيجا رام بسعر 5500 جنيه مصري بس بلاش النسخة دي.
خلينا فى النسخة التانية الأكبر 128 جيجا بايت مع 6 جيجا رام بـسعر 6000 جنية و ينفع تركب شريحتين اتصال و مينفعش تركب كارت ميموري اصلا.
الموبايلين بيجوا في العلبة مع جراب وشواحن سريعة و وصلاتهم ولكن بدون سماعات اذن في الموبايلين .
رأى موبيزل النهائي :-
شاومي بتقدملك خلطة جامدة جدا في Xiaomi Mi 9T معالج أقوى مع شاشة اموليد كاملة بدون نوتش مع موتور للسيلفى و صوت أعلى مع كاميرا خلفية بتطلع صور واقعية أكتر و لمبة اشعارات المهمة جدا بالنسبة ليا.
ريلمي بقي بتقدملك كاميرا سيلفي أحسن بمستشعر نظيف جدا و كاميرا خلفية رابعة زيادة بتاعت الـ Macro و صور بتطلع أجمل لو انت بتحب الصور اللي فيه تغيير في ألوانها شوية خصوصا في النايت مود … مفيش موتور بقي بيطلع من جسم الموبايل لو انت بتخاف من الكلام ده و معاك مكان كارت ميموري مع شريحتين اتصال في نفس الوقت و كمان بتاخد 8 جيجا رام بدل الـ 6 رام بتوع الشاومي بسعر أقل حوالي 600 جنية لنفس المساحة الـ 128 جيجا.
و طبعا شاومي مش هتسكت علي تسعير الريلمي و نزلت موبايل جديد ليها هو الـ Xiaomi Mi 9 Lite بسعر 5000 جنيه مصري .. المميز فيه ان منافس مباشر لريلمي لأنه بشاشة نوتش و معالج سناب دراجون 710 و بالتالي ده هيبقي المنافس الشرعي لريلمي XT.
Comments