النهاردة معادنا مع مراجعة جديدة لتاني موبايل من فيفو في الأسواق المصرية وهو Vivo S1 وهو يعتبر تاني أغلى موبايل من فيفو حاليا بعد الـ Vivo V17 Pro الي عملنا ليه مراجعة من كام يوم , عموما الـ Vivo S1 يتميز ببطارية ضخمة 4500 مللي أمبير و شاشة أموليد مدمج بها مستشعر بصمة سريع مع بعض الخواص الأخرى ولكن مع تسعير مبالغ فيه نسبيا من فيفو .. في المقالة ديه هتعرف كل حاجة عن موبايل فيفو الجديد مع موبيزل .
التصميم :-
اول ما مسكت الموبايل ف ايدي افتكرت علاطول الـ Oppo F9 .. نفس الخامة البولي كربونيت بالظبط تقريبا .. موبايل فيفو S1 جاي بنقشة الـ Diamond اللامعة .. بتنور وتغير لونها مع انعاكس الضوء عليها .. تصميم شباب شيك واللون كمان بيتدرج من اسود لموف لازرق على حسب الاضاءة عليه .. وكمان الفريم من فوق لونه موف ومن تحت لونه ازرق .
عموما الفئة السعرية ديه فيها موبايلات بلاستيك وفيها موبايلات من الزجاج .. فمش عيب كبير ان Vivo S1 من البلاستيك ولكن طبعا كان من الأفضل لو كان التصميم من الزجاج زي اخوه الأكبر V17 برو .
الموبايل وزنه ف الايد خفيف حوالي 180 جرام وتخانة 8 ملم ومش هيواجهك اي مشاكل في استخدام الموبايل ده بايد واحدة .
فيفو S1 فيه بروز متوسط للكاميرا الخلفية الي ملفوف حواليها فريم ذهبي شيك .. ولما بتركب الجراب الشفاف الي جاي مع الموبايل .. البروز ده هيغطي بالكامل .
الموبايل فيه زرار ذكي لتشغيل مساعد جوجل .. ولكن مينفعش للاسف تخلي الزرار يتفتح برنامج معين ولكن ممكن تقفل ان الزرار يشتغل خالص .
الشاشة :-
وهنا فيفو مبخلتش علينا وحطت شاشة أموليد .. الجودة بتاعتها قريبة من Realme XT الموبايل الأغلى من فيفو S1 .. شاشة S1 بحجم 6.4 بوصة بدقة FHD+ بكثافة بيكسلات محترمة فوق الـ 400 بيكسل .
والشاشة اداءها حلو وسطوعها كويس جدا تحت اشعة الشمس .. يمكن الشاشة من المميزات القوية الي ف الموبايل ده .. برغم ان الالوان بتاعتها فاتحة شوية عن الطبيعي .. ديه ملاحظتي الوحيدة عليها .
طبعا الشاشة فيها نوتش للسيلفي مينفعش تلغيه من الاعدادات .
مفيش اعلان رسمي عن طبقة الحماية بس الموبايل جاي في العلبة متركب عليه سكرينة .
الأداء :-
وهنا فيفو استخدمت معالج من ميدياتيك وهو P65 معالج ثماني النواة تكنولوجيا 12 نانو .. المعالج ده قريب جدا من اداء P60 القديم بتاع Oppo F9 و Realme 3 .. الفرق بس ان الانوية في معالج P65 أحدث شوية من أنوية معالج P60 .
عموما اداء الموبايل كالمعتاد مع سوفت وير فيفو FunTouch OS .. حلو جدا لان اصلا الواجهة ممتازة ومعمولها تحسينات كتير علشان ادائها يبقا سريع .. مش هتحس باي تهنيجات او اي تقطيعات في استخدامك للموبايل ده في برامج السوشيال والمكالمات والتنقل بين البرامج .
بالنسبة للاداء الرسومي .. ببجي اشتغلت على High HD بدون اي مشاكل وشغالة كويس وممكن تحتاج تنزلها لاعدادات جرافيك متوسطة علشان تشتغل بدون تسقيط اي فريمات .
وبالنسبة لـ لعبة كول اوف ديوتي فللاسف شغالة ع اقل اعدادات جرافيك لان اللعبة تقريبا مش مظبوطة مع معالج ميدياتيك P65 … ولعبة فورت نايت مش بتشتغل بشكل رسمي على Vivo S1 .
عموما لازم تبقا فاهم .. ان موبايل Vivo S1 مش بيقدم افضل معالج في الفئة السعرية ديه خالص .
عوامل الأمان وعناصر أخرى :-
الموبايل فيه بصمة مدمجة بالشاشة سرعتها كويسة جدا .. ع الفئة السعرية ديه .
وكمان الـ Face Unlock سريع جدا ومفيهوش اي مشاكل ف الاستخدام .
الموبايل مفيهوش لمبة اشعارات .. بس ايقونات الاشعارات بتظهر فوق جمب النوتش والعدد بتاعهم قليل شوية وكمان في خاصية Always on Display بتعرضلك الساعة وايقونات اشعارات المكالمات والمسجات والماسنجر والواتساب ع الشاشة المطفية .
الموبايل فيه اوبشن انك تعمل نسختين من برامج التواصل .. وكمان في مميزات كتير في الواجهة شرحناها في مراجعة Vivo V17 Pro ممكن تقرأ المقالة وتعرف كل حاجة عن الواجهة بالتفصيل زي الدارك مود والكلام ده كله .
بالنسبة للمستشعرات .. مستشعر الضوء والتقارب موجودين بشكل حقيقي وشغالين بكل كفاءة في الموبايل ده وهو بيدعم الجيروسكوب بدون اي مشاكل .
الصوت و الشبكة :-
صوت الموبايل للاسف اديله تقييم ضعيف او اقل من المتوسط لان الصوت فعلا مش عالي ومقدرش ينافس مع الهواتف المنافسة بنفس السعر زي ريلمي 5 برو مثلا .
انما صوت سماعات المكالمات كويس وعالي وصوت سماعات الاذن بردة كويس جدا .
وأخيرا شبكة الفيفو اس 1 كويسة جدا ومفيش فيها اي مشاكل في الاستخدام .
البطارية :-
بطارية ضخمة 4500 مللي أمبير هتستحمل معاك حوالي يوم ونص من الاستخدام .. والبطارية من اهم مميزات القوة في الموبايل ده .. بس للاسف منفذ الشحن قديم ميكرو يو اس بي بس معاك شاحن سريع 18 واط سريع جدا شحن البطارية الضخمة ديه بالكامل في اقل من ساعتين .
الكاميرات :-
وديه اكتر حاجة معجبتنيش ف الموبايل ده خصوصا الكاميرا الخلفية الثلاثية .. الاساسية 16 ميجا بيكسل فتحة عدسة 1.8 والتانية 8 ميجا بيكسل للتصوير الواسع فتحة عدسة 2.2 والاخيرة 2 ميجا بيكسل للعزل .
والسيلفي الموجود ف النوتش 32 ميجا بيكسل فتحة عدسة 2.0 .
سوفت وير الكاميرا معجبنيش حاسه قديم شوية كدا فكرني بسوفت كاميرا الـ Oppo F9 .. مش منظم وتحسه عاوز يتوهك كدا ع ما توصل للبورترية مثلا .. مش عارف ليه يعني ؟!
الموبايل بيقدر يصور فيديوهات بجودة 1080p بالكاميرا الخلفية 30 فريم في الثانية وللأسف مش بيقدر يصور 4K .
اداء الكاميرات الخلفية مش مناسب ع الفئة السعرية , الكاميرات الصبح وفي الاضاءات القوية بتطلع صور كويسة بتفاصيل مقبولة ولكن لما الاضاءة بتقل شوية وفي التصوير الليلي الاداء مش مناسب والصور بتفقد تفاصيل كتير خصوصا ان مفيش نايت مود في سوفت وير الكاميرا .
انما الكاميرا السيلفي اداءها كويس جدا ويقدر ينافس في الفئة السعرية ديه لان اصلا الموبايل موجه لعشاق السيلفي والصور السيلفي مليانة تفاصيل .. والتفاصيل بتقل شوية مع الاضاءات القليلة ولكنها على مستوى المنافسة بالسعر ده .
ممكن تشوف الصور والفيديوهات المتصورة بالموبايل ده في فيديو المراجعة في أخر المقالة .
سعر الموبايل :-
موبايل Vivo S1 بنسخة واحدة 128 جيجا مع 6 جيجا رام بسعر 4400 جنية وينفع تركب كارت ميموري وشريحتين اتصال مع بعض … وممكن تلاقي الموبايل في المحلات بسعر 4000 جنية .
علبة الموبايل فيها جراب شفاف وشاحن 18 واط و وصلة شحن Micro USB وسماعات أذن والموبايل جاي متركب عليه سكرينة .
التقييم النهائي :-
موبايل Vivo S1 متميز في فئته السعرية في انه بيقدملك شاشة أموليد وبصمة ف الشاشة سريعة مع بطارية ضخمة وتصميم شباشي شيك وسيلفي مقبول وشبكة كويسة مع مساحة محترمة 128 جيجا و 6 جيجا رام .
بس للأسف الموبايل مش بيقدم أفضل معالج في الفئة السعرية ديه ولا أفضل كاميرا خلفية .. والي بالسعرده في بدائل كتير اقوى في النقط ديه زي مثلا ريلمي 5 برو و Xiaomi Note 8 Pro .
مميزات Vivo S1
- يدعم تركيب كارت ميموري وشريحتين اتصال معا .
- شبكة الموبايل ممتازة .
- اداء جيد من الكاميرا السيلفي .
- سوفت وير فيفو ممتاز وسلس جدا في الاستخدام .
- شاشة أموليد ادائها ممتاز .
- بصمة مدمجة في الشاشة سريعة جدا .
- بطارية ضخمة مع دعم شحن سريع 18 واط .
عيوب Vivo S1
- اداء المعالج غير مناسب في فئته السعرية خصوصا الاداء الرسومي في الألعاب الثقيلة .
- لا يدعم لمبة اشعارات ولكن يقدم خاصية Always on Display .
- خامات تصنيع من البلاستيك .
- منفذ شحن قديم Micro USB .
- انخفاض صوت الهاتف نسبيا .
- ضعف اداء الكاميرا الخلفية ليلا .
Comments