شركة فيفو دخلت السوق المصري بشكل رسمي أخيرا .. هي تعتبر شركة جديدة ع السوق المصري .. بس هي شركة ليها وزنها بالخارج .. فهي تعتبر رقم 2 في الصين .. وهي واحدة من مجموعة BBK الي بتضم اوبو و ريلمي و OnePlus .. فيفو نازلة بنفسها في مصر وبدأت في الانتشار وعملت اول مركز صيانة معتمد ليها قريب من سيتي ستارز .. فيفو دخلت مصر باكتر من فئة اقلهم الـ S وبعدها الـ Y واعلى حاجة حاليا فئة الـ V .. بس لسه فئة الـ Nex الي هي الفلاج شيب بتاعتهم منزلتش مصر .
خلينا نبدأ دلوقتي بمراجعة اول موبايل جربناه من فيفو وهو Vivo V17 Pro ونقلكم رأينا في الموبايل ده وموقفه بالنسبة للمنافسين !
التصميم :-
تصميم موبايل V17 Pro ميشدكش او ميخطفكش .. اللون الاسود او الجراي الي معايا ده مفيهوش اي انبهار او تجديد .. تحس الموبايل كلاسيك كدا .. وعموما في ناس كتير بتحب التصميم التقليدي ده .. المختلف هنا رصة الاربع كاميرات بالطريقة الجديدة ديه والفلاش في النص .. علشان يدي الموبايل شخصية مختلفة وتقدر تعرف الموبايل بسهولة من بعيد من رصة الكاميرات ديه .
الموبايل الظهر بتاعه من الزجاج وعليه حماية جوريلا الجيل السادس والموبايل جاي في العلبة متركب عليه سكرينة على الظهر .. والتصميم متين كدا وفخم في الايد برغم ان الفريم من البلاستيك .. بردة مش عارف ليه فريم بلاستيك بالسعر ده .. الموبايل وزنه 200 جرام تقيل كدا شوية ف الايد وكمان تخانته كبيرة حبتين حوالي 10 ملم .
مفيش بروز للكاميرات تقريبا وكمان الموبايل جاي معاه جراب عجيب كدا تحسه بلاستيك منقوش ومقوى بيمسك الموبايل ويحميه جامد جدا ومدي الموبايل فخامة كدا عن الجرابات الشفافة العادية .
طبعا الموبايل فيه سلايدر للسيلفي كبير حبتين علشان فيه كاميرتين وفلاش هنتكلم عنهم كمان شوية .. اسلايدر السيلفي بتقدر تتحكم في الصوت الي بيعمله وهو طالع وهو نازل .. ومتقلقش منه هو متين جدا ولو حصل اي حاجة والموبايل وقع من ايديك والاسلايدر مفتوح هتلاقيه بيقفل لوحده .
الموبايل فيه ازرار التحكم ف الصوت وزر الباور ع اليمين .. ع الشمال بقا تلاقي زرار تاني اسمه Smart Buttom تقدر تختار بين “بحث جوجل” و “مساعد جوجل” لما تدوس على الزرار علشان يفتحوا وكمان لما تدوس دوستين تفتح حاجات تانية تبع جوجل بردة .. او تقدر تلغي الزرار خالص .. انما للاسف مينفعش تخلي الزرار ده يفتح برامج تانية .. مش عارف ليه ؟
الشاشة :-
شاشة Vivo V17 Pro شاشة كاملة بدون نوتش .. 6.4 بوصة من نوع سوبر أموليد بدقة FHD+ .. شاشة ممتازة في الفئة السعرية ديه بأقل حواف ممكنة حتى الحافة السفلية قليلة جدا .
الوان الشاشة محترمة وتحس انها بجد شاشة اموليد .. والسطوع تحت الشمس بتاعها كويس جدا .
وكمان تقدر تتحكم في درجات الوان الشاشة لو بتحتبها تبقا مايلة للازرق او مايلة للاصفر ع حسب ما عينك تحب .
الشاشة عليها حماية جوريلا الجيل السادس وكمان الموبايل جاي ف العلبة متركبة عليه سكرينة .
الأداء :-
الموبايل جاي بمعالج سناب دراجون 675 .. والي هو يعتبر نفس معالج Samsung A70 الي حاليا موجود بسعر ارخص من Vivo V17 Pro .
المعالج ده ثماني النواة تكنولوجيا 11 نانو .. طبعا هو مش افضل معالج ف الفئة السعرية ديه .. في موبايلات تانية بسناب دراجون 730 و 712 .
بس الغريبة ان اداء الموبايل حلو جدا .. ده و راجع للسوفت وير المنظم العاقل الراسي ده .. بيديك سرعة وسلاسة وفي نفس الوقت في اوبشنز كتير هتكلم عليها كمان شوية .. يعني من الاخر انا مش حاسس باي تقصير في الاداء بعيدا عن لعبة الأرقام الي كل الشركات بقت بتلعب عليها .
بالنسبة للاداء الرسومي .. الموبايل بيشغل ببجي على High HD واللعبة شغالة زي الفل بدون اي مشاكل وكمان في اوبشن ان يبقا في فيبريشن بسيط كدا لما تقتل تضرب نار والكلام ده .. حلو وبيديلك تجربة لعب احسن .
و لعبة كول اوف ديوتي شغالة على فري هاي بردة كويس جدا ومفيش اي مشاكل فيها .
واخيرا فورت نايت شغالة بشكل رسمي ع الموبايل ده وبتشتغل على اقل اعدادات جرافيك بدون اي مشاكل .
عوامل الأمان وعناصر أخرى :-
الموبايل فيه بصمة مدمجة بالشاشة .. سريعة جدا جدا .. تكاد تكون اسرع من Realme XT الي هو سريع اصلا .. فيعني بصراحة عجباني جدا البصمة ديه .
الموبايل مفيهوش Face Unlock كميزة اساسية لفتح الموبايل .. بس تقدر تسجل وشك ولو دخلت البصمة 3 مرات غلط الاسلايدر هيطلع ويتعرف عليك ويفتح .. ميزة كويسة علشان تحافظ على عمر الاسلايدر بردة .
بالنسبة للسوفت وير فهو مختلف تماما عن اوبو و ريلمي .. فيفو بيجي بسوفت وير اسمه FunTouch OS .. وده يا سيدي قصة تانية خالص بقا ركز معايا .
مبدئيا اول ما تفتح الموبايل وتيجي تنزل القائمة من فوق .. هتلاقي فيها اشعارات بس .. اومال فين يعم الواي فاي والكلام ده .. لا اسحب من تحت .. ده اول تجديد .
وكمان شكلها جامد جدا ومنظمة افضل مية مرة من القايمة العلوية بتاعت الـ Colors OS وبتوصل لكل حاجة بسهولة .
طبعا هيشدك في المنيو الدارك مود .. ايوة صح هو جامد جدا شغله بسرعة .. وبالمناسبة الفيس بوك كمان بيبقا دارك او اسود .
وطبعا ميزة عمل نسختين من برامج التواصل موجودة وشغالة في الموبايل ده .
تقدر تخلي الموبايل يفتح او يقفل لما تعمل ضغطتين ع الشاشة علشان يعني لو مكسل تدوس ع زرار الباور وكمان ممكن والشاشة مطفية ترسم حرف يفتحلك حاجة زي الكاميرا مثلا .
بالنسبة للاشعارات بقا .. فمفيش لمبة اشعارات ومتعوضة باولويز اون ديسبلي تقدر تختار اكتر من شكل للساعة وكمان تختار بين 4 حاجات يظهر ليهم ايقونات الاشعارات .. المكالمات والمسجات والواتساب والماسنجر .. كل ده ايقوناته تظهر ع الشاشة المطفية .
وفوق كل ده ممكن تخلي الفلاش يشتغل لما يجيلك اشعار او الموبايل يرن .. اوبشن كويس جدا وهيساعدك لو حاطط الموبايل ع وشة .
الموبايل فيه مستشعر ضوء حقيقي .. مستشعر التقارب فهو موجود سوفت وير زي Oppo Reno 2F الي شرحته قبل كدا .. وعموما اداءه مش بطال .
الصوت والشبكة :-
وبالنسبة لصوت الموبايل فهو جاي من سماعة واحدة تحت ع اليمين صوتها متوسط الجودة .. مش اعلى حاجة ف الفئة السعرية ديه .
صوت سماعات المكالمات عالي وممتاز وصوت سماعات الاذن بردة كويس .
واخيرا بالنسبة للشبكة فهو ممتازة زي موبايلات اوبو و ريلمي بالظبط .. مفيش اي مشاكل في الشبكة في الموبايل ده ممكن تواجهك .
البطارية :-
بطارية فيفو V17 برو بحجم 4100 مللي أمبير هتستحمل معاك يوم كامل من الاستخدام .. مفيش في الواجهة هنا عدد ساعات شاشة مفتوحة .. بس تقدر تقول 6 او 7 ساعات شاشة مفتوحة استخدام متوسط .
الموبايل جاي معاه شاحن سريع 18 واط والمنفذ بتاعه Type C بيشحن لحد 90% في ساعة وربع .. انما اخر 10% بياخدوا حوالي ساعة الا ربع و يبقا الوقت كله ساعتين .. انصحك اشحن لحد 90% بس .
الكاميرات :-
الموبايل جاي بـ 4 كاميرات في الظهر .
الاساسية 48 ميجا بيكسل فتحة عدسة 1.8 مستشعر سوني IMX 582 .. والتانية 8 ميجا بيكسل فتحة عدسة 2.2 للتصوير الواسع .. والتالية 2 ميجا بيكسل للماكرو .. والاخيرة 2 ميجا بيكسل للعزل .
والسيلفي هنا مختلف عن اي موبايل فئة متوسطة هو موجود ف اسلايدر خاص بالسيلفي .. فيه عدستين الي ع اليمين الاساسية 32 ميجا بيكسل فتحة عدسة 2.0 والي ع الشمال وايد انجل لتصوير سيلفي واسع فتحة عدسة 2.2 وفي النص في فلاش .
الموبايل بيصور فيديوهات 4K بالكاميرا الخلفية وكمان فيه ثبات الكتروني في الجودة ديه .
بشكل عام انا شخصيا معجب جدا بأداء كاميرات ريلمي V17 برو ومعالجة الصور الي بتطلع ألوان وتفاصيل حقيقية بشكل كبير على عكس أوبو وريلمي خالص .
الكاميرا الخلفية ممتازة وبتطلع صور محترمة جدا وبتفاصيل كتير في مختلف اوضاع التصوير وكمان النايت مود ممتاز وسريع وبيعمل معالجة حقيقية للصورة علشان متبقاش كرتونية .
بالنسبة للسيلفي فحرفيا ده أحسن موبايل ممكن تجرب السيلفي عليه لان معاك عدستين , عدسة أساسية للتصوير العادي بتطلع صور ممتازة وكمان في نايت مود بيطلع صور أفضل وأفضل بليل حتى من غير ما تشغل فلاش السيلفي الموجود في الأسلايدر .
وكمان معاك عدسة وايد أنجل للسيلفي بتطلع صور محترمة جدا بس لازم تكون الاضاءة قوية .
لو عاوز تشوف صور متصورة بالموبايل ومقارنة مع ريلمي XT , شوف الفيديو الموجود في أخر المقالة .
سعر الموبايل :-
موبايل Vivo V17 Pro وصل مصر بسعر رسمي 6700 جنية للنسخة الوحيدة 128 جيجا مع 8 جيجا وينفع تركب شريحتين اتصال ومينفعش تركب كارت ميموري .. وممكن تلاقيه في المحلات بحوالي 6000 جنية .
علبة الموبايل بيجي فيها سماعات أذن و جراب أسود و الموبايل نفسه على سكرينة على الوش و على الظهر و شاحن 18 واط و وصلة Type C .
اقرأ على موبيزل .. مراجعة Realme XT .
تقييم الموبايل النهائي :-
الموبايل ده كان يبقا ممتاز لو نزل تحت الـ 6000 جنية لان ديه الفئة السعرية الموجود فيها كل المنافسين بتوع الموبايل ده .
بس عموما فيفو V17 برو بيديلك خامات محترمة جدا لان اهم حاجة عند فيفو الخامات .. وبيدلك تجربة سيلفي جامدة جدا جدا .. بيديلك شاشة محترمة وبطارية كويسة .
ولو انت شايف ان الموبايل ده مفيهوش افضل معالج .. فانصحك تجرب السوفت وير مع المعالج ده وتقولي رأيك ايه .. لان السوفت وير له دور كبير جدا بعيدا عن الأرقام .
مميزات
- أداء ممتاز من الكاميرات خصوصا السيلفي .
- خامات تصنيع محترمة .
- شاشة كاملة بجودة ممتازة بدون اي حواف أو نوتش .
- بطارية ممتازة مع شحن سريع .
- شبكة الهاتف قوية جدا .
- مستشعر بصمة سريع جدا مدمج بالشاشة .
- يدعم Dark Mode و Always On Display .
عيوب
- لا يدعم تركيب كارت ميموري .
- صوت الهاتف ليس الأعلى وسط المنافسين .
- ارتفاع سعر الهاتف بالنسبة للمنافسين .
- ثقل وزن الهاتف وتخانته الكبيرة .
Comments