مراجعة Vivo Y33A – أول موبايل من فيفو صنع في مصر !

موبايل Vivo Y33A هو أول موبايل من فيفو يتم إنتاجه في مصر .. وعلشان كده احنا محتاجين نعرف مجموعة حاجات عن الموبايل ده، منها هل في مشاكل في جودة تقفيل الموبايل ؟ هل فيفو بتستهدف التسعير القوي ولا هتكتفي بتوفير الموبايلات بكميات كبيرة ؟ هنعرف كل ده في مراجعة Vivo Y33A الجديد.

التصميم :-

موبايل فيفو Y33A واحد من أشيك الموبايلات في فئة الـ5000 جنية .. مفيش غيره هو و Huawei Nova Y70 اللي بيقدمولك تصميم شيك مش تقليدي.

الموبايل بيجي بظهر من البلاستيك زي كل موبايلات الفئة دي .. لكن الظهر مصنفر علشان ميظهرش فيه خدوش وبصمات، فريم الكاميرات شيك وفي فريم ألومنيوم خفيف بيدي شكل لطيف.

الموبايل تقفيله كويس جدًا .. زيه زي تقفيل باقي موبايلات فيفو المتصنعة في الصين، وده بيرجع لوجود مراقبة الجودة كويسة في المصنع اللي في مصر .. التقفيل فعلًا كويس، تقفيل الشاشة على الظهر، تقفيل الظهر نفسه، أزرار الصوت وزِر الباور .. كل ده كويس وممتاز ومفيش فيه أي مشكلة.

الموبايل وزنه خفيف، حوالي 182 جرام، وتخانته 8 مللي .. والفريم مسطح شوية علشان يحسن من المسكة في الإيد .. وبيجي في العلبة سماعات وشاحن وجراب شفاف .. وفي سكرينة موجودة على الشاشة.

الشاشة :-

شاشة IPS LCD عادية 6.58 بوصة بدقة FHD+ بتردد 60 هيرتز مع نوتش للسيلفي .. كنت اتمنى نوع الشاشة يكون أفضل او معدل التحديث يكون أعلى .. لكن فيفو مسكت العصاية من النص.

بمقارنة الموبايل مع باقي المنافسين زي Oppo A55 او Galaxy A13 او Redmi 10C او Realme C25s .. كل الموبايلات دي شاشاتهم عادية أو أقل من العادي في الفئة دي .. مفيش غير إستثنائين بس في الفئة دي وهما Infinix Note 11 بشاشة AMOLED وكمان Redmi 10 بشاشة بتردد 90 هيرتز.

الشاشة كويسة من ناحية الألوان كشاشة IPS LCD .. سطوعها أقل من المتوسط الطبيعي بتاع النوع ده من الشاشات، جودتها كويسة .. هي شاشة متوازنه مش مبهرة ولا ضعيفة.

لما قارنتها مع شاشة Redmi 10C و Infinix Note 11 لاقيت تفوق واضح للـY33A على ريدمي 10C .. ولاقيت تفوق في الألوان الحقيقية عن انفينكس نوت 11.

الأداء :-

معالج ميدياتك Helio G80 بتكنولوجيا 12 نانو ميتر .. كلنا عارفين أداء المعالج ده كويس، هو الموجود في Galaxy A22 .. أداءه ميقلش حاجه عن G88 الموجود في انفينكس نوت 11 وريدمي 10.

السوفت وير كويس .. أداء الموبايل معقول، مش أسرع حاجه، ومش بطيء .. الـAnimations معقولة، ممكن تحس بتقطيع شوية فيها لو انت واخد على موبايلات أسرع .. هتحس ان الموبايل كان محتاج معدل تحديث اعلى .. كمان اول لما بتفتح الموبايل بتحس انه بطيء وبياخد وقت على ما يبقى طبيعي معاك.

الموبايل بيجي بـ4 جيجا رام .. مع 1 جيجا رام إضافية عن طريق السوفت وير، لكن للأسف نوع الذاكرة قديم كنت أتمنى يكون الـUFS 2.1 .. كانت هتفرق في السرعة.

الموبايل مش بتاع ألعاب وأسرع أداء وما الى ذلك .. هو موبايل عادي بيقدملك أداء متوازن، مش بيقدم طفرة من ناحية الأداء في الفئة السعرية دي .. لو عايز أداء قوي زود وهات Redmi Note 10 5G او Infinix Note 11 Pro .. دي الموبايلات اللي بتقدم أداء أقوى بسعر قريب.

الأداء الرسومي معقول .. ببجي بتشتغل على High HD والأداء متوسط، مش أقوى حاجه ولا بيقطع جامد .. وفي Game Turbo بيظهرلك الـCPU والـGPU وتقدر تعمل Performance Mode علشان تاخد أداء مستقر أكثر.

عوامل الأمان وعناصر اخرى :-

البصمة موجودة على زِر الباور .. أداءها سريع ومفيش أي مشاكل، والـFace Unlock سرعته معقولة برده.

الموبايل مفيهوش NFC .. مفيش ميكروفون اضافي لعزل الضوضاء .. بيجي بـAndroid 12 مع واجهة فيفو Funtouch 12 وفيه عمل نسختين من برامج التواصل الإجتماعي .. وفيه كمان انك تقدر تعمل أكثر من USER للموبايل .. وتقدر تتحكم في شكل Animations الواجهة ودي ميزة مش بنشوفها كتير.

الموبايل ممتاز من ناحية المستشعرات ومفيش ولا غلطة .. مستشعر جيروسكوب شغال كويس .. بوصلة وشغالة كويس .. مستشعر تقارب حقيقي وأداءه ممتاز.

أما بالنسبة للصوت فا للأسف الصوت Mono مش Stereo والصوت أقل من المتوسط .. وبالنسبة لشبكات الإتصال والـWi Fi فا هما ممتازين لأقصى درجة مُمكنة !

البطارية :-

بطارية 5000 مللي امبير ممتازة تكمل معاك 7 ~ 8 ساعات شاشة مفتوحة مستريح .. ومعاك شاحن 18 وات معقول في الفئة دي بيشحن البطارية في ساعتين .. كويس ومفيش أي مشاكل.

الكاميرات :-

3 كاميرات خلفية .. الأساسية 50 ميجا بيكسل بفتحة عدسة F/1.8 .. الثانية 2 ميجا بيكسل ماكرو والأخيرة 2 ميجا بيكسل للعزل .. والسيلفي 16 ميجا بيكسل بفتحة عدسة F/2.0.

مستوى كاميرات الموبايل هنا معقول جدًا، التفاصيل والألوان كويسة .. والمعالجة معقولة جدًا في تعزيز الألوان وظبط لون البشرة .. بس هو مش مثالي، ساعات بيغلط في الـHDR .. وبشكل عام الموبايل يجي في المركز الثاني بعد Galaxy A22 لكنه يقدر ينافس كويس جدًا.

الـNight Mode في الكاميرا الخلفية والأمامية وممتاز جدًا .. لكن تطبيق الكاميرا نفسه مش أسرع حاجه.

لما قارنت الموبايل مع Redmi 10C لاقيت تفوق رهيب لصالح Vivo Y33A معادا صور الـHDR اللي الـY33A مش بيشتغل فيها كويس .. لكن الباقي تفوق تام للـY33A بالرغم من ان الاتنين 50 ميجا بيكسل.

بالنسبة للكاميرا السيلفي فا هي أداءها محترم جدًا في الفئة السعرية دي .. كمية تفاصيل كويسة وظبطة لون البشرة والتفاصيل معقولة زيها زي الكاميرا الخلفية .. السيلفي في الموبايل ده يقدر ينافس سامسونج بكل سهولة ويتفوق على موبايلات شاومي.

بالنسبة لتصوير الفيديوهات فالموبايل بيدعم تصوير فيديوهات بجودة 1080p مع 30 فريم في الثانية .. والموبايل بيدعم المثبت الإلكتروني .. لكن للأسف مفيش ميكروفون اضافي لعزل الضوضاء.

سعر Vivo Y33A :-

• نسخة 128 جيجا مع 4 جيجا رام بسعر 5290 جنية

وتقدر تركب شريحتين إتصال من الجيل الرابع مع كارت ميموري بحجم 128 جيجا.

الرأي النهائي :-

مميزات Vivo Y33A :-

• تصميم شيك مع وزن خفيف
• بطارية كويسة وشحن معقول
• كاميرا سيلفي ممتازة
• مستشعرات كويسة
• عوامل أمان سريعة
• أفضل شبكات في الفئة دي
• علبة متكاملة فيها كل حاجه سماعات و شاحن و جراب و سكرينة

عيوب Vivo Y33A :-

• صوت الموبايل ضعيف
• كان من الأفضل لو تم استخدام معالج أقوى
• مفيش ميكروفون اضافي لعزل الضوضاء
• الشاشة لو كانت AMOLED او 90 هيرتز كان هيكون افضل

الموبايل يعتبر إعادة تصنيع Vivo Y33S اللي كان بيتصنع في الصين .. هو هو لكن بإسم مختلف .. وفيفو بتستهدف من خطوة الإنتاج المحلي دي انها توفر الموبايلات بكميات كبيرة، على عكس المنافسين اللي مش بيقدروا يوفروا موبايلاتهم الفترة دي بسبب مشاكل الإستيراد .. ولازم نفتكر ان الأسعار المنافسة مش ضمن سياسة فيفو.

اما عن البدائل فا لو لاقيت النسخة الصغيرة من Redmi Note 11 او Realme 9i بسعر كويس هيكونوا أفضل بفرق مش قليل .. اما لو يهمك نقطة الأداء زود وهات Note 10 5G او Infinix Note 11 Pro .. لكن لو بتقارن الموبايل مع منافسينه زي Redmi 10C و Galaxy A13 فا الـVivo Y33A هو افضل موبايل فيهم!