مراجعة Xiaomi 12 Pro – محاولة من شاومي لمُنافسة الكُبار !

النهارده هنقدملكم مراجعة Xiaomi 12 Pro .. ده أغلى موبايل من شاومي في السوق المصري .. الموبايل الرائد الجديد اللي شاومي بتنافس بيه مع موبايلات ابل وموبايلات سامسونج الرائدة .. واللي بيتقدم بتسعير غالي جدًا .. وهنعرف هل الموبايل ده يستاهل انه يتدفع فيه مبلغ ضخم ولا المنافس من سامسونج هيكون أقوى!


التصميم :-

تصميم Premium جدًا .. ظهر زُجاجي مع فريم من الألومنيوم، والظهر مصنفر علشان ميظهرش فيه البصمات والخدوش .. مسكة الموبايل في الإيد محترمة جدًا .. وزن الموبايل مش خفيف لكن متوزع صح.

كمان تخانة الموبايل 8.2 مللي وفي Curves في الظهر وفي الشاشة علشان تخلي إحساس انه جهاز Premium أوضح .. والكاميرات موجودة في مستطيل معدني بارز عن جسم الموبايل، لكن خامته ممتازة.

في جراب في العلبة بيعالج موضوع البروز ده .. لكن للأسف الموبايل مش مقاوم للماء والغبار .. ده موبايل رائد غالي مش رخيص، بينافس مع ابل وسامسونج، شهادة مقاومة الماء والغبار أساسية.


الشاشة :-

شاشة AMOLED بحجم 6.73 بوصة بدقة QHD+ بتردد بيوصل لـ120 هيرتز مع دعم مليار لون وثقب معقول للكاميرا السيلفي .. والشاشة فيها Edges بسيطة بتقدم إحساس Premium مُميز، وزوايا الشاشة دائرية.

معدل التحديث هنا تقدر تسمح للسوفت وير انه يتحكم فيه علشان يوفر أكثر في البطارية .. وتقدر تثبته على رقم محدد، والسطوع بيوصل لـ1500 شمعة وده رقم ممتاز .. أقل حاجه بسيطة عن Galaxy S22 Ultra.

درجة الألوان وتشبعها ممتازين جدًا في شاشة الموبايل .. قارنتها مع S22 Ultra ومحستش بأي عجز أو تقصير في الشاشة .. ممكن يكون توليد الألوان أفضل حاجه بسيطة في شاشة S22 Ultra بس الفرق مش ملحوظ.

الشاشة عليها طبقة حماية Corning Gorilla Glass Victus ومتركب عليها سكرينه.


الأداء :-

أقوى معالج من كوالكوم .. سناب دراجون 8 جين 1 بتكنولوجيا 4 نانو ميتر .. مع ذاكرة تخزين UFS 3.1 .. نظام تشغيل Android 12 مع واجهة MIUI 13 من شاومي.

أداء الموبايل ممتاز جدًا .. هيقدملك أحسن تجربة ممكن تاخدها من MIUI 13 بسبب المعالج القوي .. مش هتحس بأي تفصير في الأداء بأي شكل من الأشكال.

يمكن الـAnimation بتاع الواجهة مش أفضل حاجه .. جربنا الموبايل مع S22 Ultra والفرق بينهم تقريبًا مش موجود يمكن الـAnimation بتاع سامسونج أنعم حاجه بسيطة.

ببجي بتشتغل طبعًا على أعلى إعدادات جرافيك بدون أي تقطيع او Lag .. لكن الموبايل بيسخن بسرعه شوية .. ولما بيسخن تردد المعالج بيقل علشان السخونية متزيدش.


عوامل الأمان وعناصر اخرى :-

بصمة الإصبع موجودة تحت الشاشة مع Haptic Feedback لطيف .. البصمة مش أسرع حاجه بس سرعتها كويسة ومعقولة زي S22 Ultra تقريبًا .. والـFace Unlock برده سرعته كويسة جدًا.

طبعًا الموبايل داعم لمستشعر الـNFC والـIR Blaster وبيدعم الـAlways On Display .. وفيه ميزة حلوه وهي انك ممكن تقيس نبض القلب بتاعت بالبصمة.

صوت الموبايل Stereo من Harman Kardon والصوت عالي ومحترم بس بالمقارنة مع S22 Ultra لاقيت الـ12 Pro أقل حاجه بسيطة أوي في الـBass .. ومفيش مدخل 3.5 مللي.

مستشعر التقارب في الموبايل المفروض انه سوفت وير .. بس الغريبة انه شغال ممتاز جدًا ومش بيعلق خالص .. مش نفس أداء موبايلات شاومي في الفئة المتوسطة.

والشبكات فوق الممتاز .. أقوى من شبكات S22 Ultra لو بتقارن بينهم.


البطارية :-

بطارية 4600 مللي امبير أداءها ممتاز على الحجم ده .. أقل حاجه بسيطة من المعدل الفعلي للبطارية الـ5000 مللي امبير بتاعت S22 Ultra .. هتكمل معاك اليوم بالعافيه بإستخدام متوسط.

لكن الفكرة في الشاحن الممتاز فائق السرعة الـ120 وات اللي بيجي في علبة الموبايل .. ده أسرع موبايل رائد بيشحن في مصر، الموبايل هيشحن بالكامل في 20 دقيقة فقط .. وممكن تشحنه في نص ساعه بسخونيه أقل.

والموبايل بيدعم الشحن اللاسلكي بقدرة 50 وات وبيدعم الشحن اللاسلكي العكسي بقدرة 10 وات .. ودي سرعات شحن ممتازة جدًا.


الكاميرات :-

3 عدسات كلهم بدقة 50 ميجا بيكسل .. الأساسية بفتحة عدسة F/1.9 بمثبت بصري .. الثانية Telephoto للزوم F/1.9 .. الثالثة Ultra Wide بفتحة عدسة F/2.2 للتصوير الواسع .. والسيلفي 32 ميجا بيكسل بفتحة عدسة F/2.5.

العدسة الرئيسية أداءها أبهرني .. ده أحسن موبايل شاومي جربته في التصوير حتى الأن .. الكاميرا الخلفية الرئيسية قوية جدًا وتقدر تنافس وبقوة مع S22 Ultra .. معظم صوت Xiaomi 12 Pro مُشبعة بالألوان وشكلها لطيف جدًا .. لكنها مش واقعية أوي بالمقارنة مع صور S22 Ultra اللي بتنقل الألوان الواقعية بالظبط.

العدسة الـUltra Wide Angle مش أفضل حاجه .. معالجة الصور بتقل فيها كتير .. والـS22 Ultra بيكسب .. وكمان الـTelephoto بتاعت الزوم مش حلوه .. اخرها 20X وتفاصيلها بتقل كتير .. يمكن لو صورت 2X بس هتاخد نتيجة كويسة الى حد ما .. لكن مُجملًا سامسونج أفضل وفيه مثبت بصري.

التصوير في إضاءه داخلية هتلاقي الموبايل قادر يسد وبقوة قصاد جالاكسي S22 الترا .. وبيطلع صور ممتاز فيها تفاصيل كتير في ظروف تصوير مش الأفضل .. والـNight Mode كمان ممتاز جدًا.

بالنسبة للسيلفي فا هو ممتاز جدًا في Xiaomi 12 Pro في الإضاءات العالية مُقارنًة بـS22 Ultra اللي بيخلي الصور دافيه أكثر خاصًة لون البشرة .. وفي الشمس الصعبة هتلاقي تفوق بسيط لصالح S22 الترا .. لكن في الإضاءات الضعيفة فا S22 الترا بيكتسح في الكاميرا السيلفي.

بالنسبة لتصوير الفيديوهات فالموبايل بيدعم تصوير بجودة 8K مع 24 فريم في الثانية .. وبيدعم تصوير بجودة 4K مع 30 فريم في الثانية .. العدسة الأساسية فيها مثبت بصري حقيقي بيقدم أداء ممتاز جدًا .. وباقي العدسات بيشتغل معاها المثبت الإلكتروني .. والموبايل فيه ميكروفون اضافي لعزل الضوضاء.


Xiaomi 12 Pro Price

سعر Xiaomi 12 Pro :-

  • نسخة 256 جيجا مع 12 جيجا رام بسعر 25 ألف جنية

تقدر تركب شريحتين إتصال من الجيل الخامس لكن مينفعش تركب كارت ميموري.


الرأي النهائي :-

مميزات Xiaomi 12 Pro :-

  • شاشة محترمة بدقة ومعدل تحديث ممتازين
  • أداء فائق بمعالج هو الأقوى من كوالكوم
  • صوت كويس الى حد كبير
  • شبكات ممتازة
  • كاميرا خلفية أساسية محترمة جدًا
  • أسرع شحن في فئة الموبايلات الرائدة

عيوب Xiaomi 12 Pro :-

  • الكاميرا السيلفي أداءها مش الأفضل
  • الـZoom والـUltra Wide متواضعين
  • بطارية أداءها مش الأفضل
  • سوفت وير مش سلس مع موبايل رائد
  • الموبايل بيسخن بسرعه

كنت أتمنى ان الموبايل سعره ينزل تحت الـ20 ألف جنية من غير هدايا .. كان هيبقى سعره أفضل شوية خاصًة انه هيكون أرخص من S22 الترا وكمان S22 Plus .. لكن بشكل عام الموبايل مفيهوش حاجه مُبهرة كموبايل رائد غير الشحن الـ120 وات .. لكن كتجربة عامة من حيث الأداء والشاشة والصوت والبطارية فا مفيش حاجه جديدة.

وللأسف مش هنقدر نقول انه قيمة مقابل سعر في الوقت الحالي بسبب الجمارك والضرائب الزيادة .. سعره قريب من موبايلات ابل وسامسونج بعد الحرق.

قد يعجبك أيضا...

Comments

جاري التحميل...