وأخيرًا موبايل متحمس اني أراجعه وهو Mi Note 10 Lite .. هل الموبايل ده يقدر ياخد الراية من الـMi 9T ويبقى موبايل قوي في فئة الـ5 الاف جنية من شاومي .. سياسة شاومي متغيرة جدًا جدًا في الموبايل ده .. هي بتلعب على حاجات أول مرة تلعب عليها في الفئة المتوسطة !
التصميم :-
وديه اول حاجة شاومي بتلعب عليها .. الموبايل جاي بتصميم Premium او فخم جدًا جدًا .. واحد من افخم الموبايلات في الفئة المتوسطة اللي ممكن تمسكها.
ظهر زجاج محمي بطبقة حماية Corning Gorilla Glass الجيل الخامس .. خلطة كدا هتحسسك بالفخامة .. حتى اللون الإسود اللي في الموبايل ده مايل للرمادي ومقبول شوية عن اي موبايل لونه اسود تاني.
الكاميرات موجوده في Frame او إطار بيضاوي كده .. مش مستطيل .. لازم طبعا إنحناءات في الظهر علشان تناسب الإنحناءات اللي في كل حته في الموبايل ده.
وطبعًا في كيرفات قوية جدًا في الظهر والشاشة .. واللي بتتقابل في فريم رُفيع من المعدن .. والفريم الرفيع ده هيخليك قلقان وانت ماسك الموبايل من غير جراب .. هتحس انه هيتزحلق من إيدك.
الموبايل وزنه تقيل شوية .. او شوتين تلاته، 204 جرام .. وتخانته كبيرة 9.7 مللم .. وده هيحسسك وانت ماسك الموبايل ده انك ماسك حاجة تقيله مع الخامات اللي هتحسسك ان الحاجه التقيله دي فخمة.
تقل الموبايل ده وخاماته الزجاجيه الخارجية .. هيخليه عُرضه اكتر انه لو وقع وقعه بسيطة يتكسر .. ده غير الشاشة اللي هنتكلم عنها كمان شوية.
واخيرًا الكاميرا الخلفية البروز بتاعها قليل جدًا جدًا جدًا .. حاجة حلوة اوي بصراحة .. والجراب اللي بيجي مع الموبايل ده بيخلي الكاميرا مش باينة خالص.
ومن الأخر الموبايل ده بيحسسني بواحد كده لسه واخد Shower ولابس بدلة ولابس كرافته ورايح Interview .. مينفعش ابدًا ابدًا يركب مواصلات ويتشعلق على الباب لإنه هيتبهدل .. يعني هو موبايل Premium بس محتاج منك انك تعامله معامله راقية.
الشاشة :-
هنا بقى شاومي ولأول مرة تحط شاشة Edge في موبايل فئة متوسطة .. الشاشة هنا حجمها 6.47 بوصة من نوع Super AMOLED بدقة FHD+ .. بتردد عادي 60 هيرتز ودعم للـHDR10.
الشاشة زي ما قولتلك محنية الأطراف او بتيجي بـEdges .. الإنحناء ده هيخليك وانت ماسك الموبايل تحس انك مبسوط اوي بالتجربة ديه .. بس حقيقي انت مش بتبقى عارف انت مبسوط ليه أصلًا !
يعني هل الـEdge ده ليه وظائف حقيقيه .. لا ملوش .. طيب الشاشة ديه ليها ظل من الـEdges .. اة ليها ظل كده بتشوفه بزاوية .. هو مش مؤثر بس ملحوظ .. هل الـEdge ده ممكن يعلق ويرخم والموبايل في إيديك وانت بتجربه .. حقيقي لا.
شاومي هنا في Setting الموبايل موفره لك كذا Option تختار ما بينهم علشان تمنع الأوامر الخاطئه اللي ممكن تحصل من بطن ايدك على Edge الموبايل.
طيب الـEdges دي خطر .. بص اللي قولته على تصميم الظهر هيتطبق هنا .. الشاشة محتاجه معامله شيك راقية .. مينفعش انت واحد يكون الموبايل بيتخبط في جيبك كتير او بيقع منك كتير وتروح تشتري الموبايل ده .. والشاشة اصلًا معرضه للكسر اسرع بسبب الـEdge.
طيب الشاشة الـEdge ديه مش هتلاقيلها سكرينات .. بص سكرينة الـHuawei P30 Pro هتركب عادي بس مش هتعيش كتير ولو جبتله جراب كبير شوية هيخلع الـ سكرينه وهيبقى حالته صعبة شوية.
افتكر كويس اني كنت ماشي بالـS7 Edge سنتين من غير سكرينه بعد ما جربت بتاع 10 سكرينات وكلهم اتشالوا .. وعمومًا شاشة الـMi Note 10 Lite عليها حماية Gorilla Glass الجيل الخامس !
المهم .. دورت كتير ورا انبساطي بالشاشة الـEdge مش لاقي غير إحساسي وانا بـScroll كده يمين وشمال وبشوف الايقونات كدا وهي داخلة في الـFrame في الحته بتاعت الـEdge .. بحس اني برتاح نفسيًا وكمان احساسي وانا ماسك الموبايل في ايدي كده وحاسس اني شايل موبايل غالي بس هو فئة متوسطة.
اداء الشاشة نفسه حلو .. درجة السطوع مش زي الموبايلات الفلاج شيب بس كويسه على الفئة المتوسطة هتشوف الشاشة كويس تحت الشمس .. وكمان درجات الوان الشاشة هنا تحفة .. هتتبسط جدا بالألوان المُشبعة بزيادة في الشاشة ديه !
طبعا ارخم حاجة شكل النوتش القديم نسبيًا اللي فوق .. بس هما ادولك Edge فلازم يحطولك نوتش مش هتاخد كل حاجة .. وينفع تلغي شكل النوتش من الإعدادات بتاعت واجهة الموبايل !
ومن الأخر .. الشاشة ديه حلوة ومميزة وهتديلك تجربة مختلفة .. بس محتاجة واحد بيحافظ على موبايله .. لإن الموبايل ده مش وش بهدله !
الأداء :-
في بداية المراجعة قولتلك .. شاومي غيرت سياستها .. الإهتمام في Mi Note 10 Lite بالتصميم والخامات والشاشة .. لإن المعالج هنا متغيرش عن الـMi 9T.
معالج كوالكوم سناب دراجون 730G .. بيقدم اداء متوازن ومعقول في الفئة المتوسطة .. ولكن مش أفضل اداء خلاص لوجود منافسين بيقدموا تجربة اداء أفضل.
عمومًا الموبايل هنا الأداء بتاعه مستقر .. مفيش تهنيجات كتير ولا تقطيعات كتير في السوفت وير زي الـNote 9S لما جربته .. وخلاصة الكلام .. الأداء هنا مش وحش .. ولكنه مش فلته ولا هو الحاجة المُميزة اللي في الموبايل ده.
الأداء الرسومي .. لعبة ببجي بتشتغل على اعدادات جرافيك High HD واللعبة بتشتغل زي الفل .. والـEdge مش هيدايقك في حاجة وانت بتلعب.
لعبة كول اوف ديوتي شغالة على Very High واللعبة برده بتشتغل Smooth جدا وسلسة جدًا ومفيش اي تقطيعات .. واخيرًا فورت نايت .. بتشتغل على اعدادات جرافيك Medium .. واللعبة بتشتغل بشكل مقبول جدًا جدًا على موبايل فئة متوسطة !
ولكن .. الموبايل بيدفى او بيسخن .. مش عارف ليه وانا بستخدمه بحسه بيدفى شوية عن الطبيعي .. هل علشان الجو حر مثلا … خلينا نشوف تجربتكم للموبايل ده هتبقى ازاي !
عوامل الأمان وعناصر اخرى :-
البصمة مُدمجة بالشاشة .. مكانها فوق شويه علشان توصلها بسهولة وانت ماسك الموبايل .. هي سريعة بس في بعض المرات القليلة كانت بتعلق معايا .. بس ملاحظتي عليها لازم اللمسة تبقى تقيلة شوية على الشاشة .. الـFace Unlock سريع ومفيهوش اي مشاكل.
الموبايل جاي بواجهة شاومي MIUI 11 .. واللي بتدعم الـDark Mode واللي ادائه بيبقى حلو على الشاشة الأموليد الممتازة الي هنا.
طبعا عندك Option عمل نسختين من كل البرامج .. وعندك مسشتشعر IR Blaster اللي بيخليك تقدر تتحكم في الأجهزة الكهربائية ودعم تشغيل الراديو FM .. كل ديه مميزات موجودة في معظم موبايلات شاومي اللي بنجربها .. والموبايل كمان بيدعم الـNFC.
الموبايل مفيهوش لمبة اشعارات .. بس بيدعم الـAlways On Display لعرض ايقونات إشعارات البرامج على الشاشة المطفية .. وكمان عندك Styles او اشكال كتير للساعة وممكن تحط توقيعك وحاجات تانية كتير لذيذة جدا ممكن تجربها.
بالنسبة للمستشعرات .. مستشعر الضوء موجود وشغال ومستشعر التقارب موجود وشغال .. لازم الموبايل حتى يبقا واقف كدا علشان السنسور يشتغل .. نوع من أنواع التأكيد ان السينسور يعمل بكفاءة .. وللأسف الموبايل مفيهوش تسجيل مكالمات.
بالنسبة للصوت .. جاي من سماعة واحدة تحت على الشمال .. المكان اللي بيتكتم وانت بتلعب العاب .. هتحتاج تلف الموبايل وانت بتلعب .. بس بالنسبة للصوت فهو عالي جدًا ومجسم جدًا .. وممتاز بصراحة .. وصوت سماعات المكالمات برده عالي وممتاز .. وصوت سماعات الاذن بردة كويس جدا !
بالنسبة لقوة الـWiFi .. تمام جدا مفيهوش اي مشاكل .. بالنسبة للشبكة فهي برده قوية ومفيهاش اي مشاكل.
البطارية :-
بطارية ضخمة بتيجي بحجم 5260 مللي أمبير .. استحملت معايا حوالي 6 ساعات شاشة مفتوحة إستخدام مكثف .. موصلتش لـ7 ساعات زي الـNote 9S على نفس الإستخدام ده .. مش عارف ليه.
الشاحن اللي بيجي مع الموبايل ده بقوة 30 وات .. بيشحن البطارية بالكامل في ساعة واحده بس !
الكاميرات :-
الموبايل بيجي بـ4 كاميرات في الضهر .. الأساسية 64 ميجا بيكسل بفتحة عدسة F/1.9 بمستشعر سوني IMX686 .. العدسة التانية 8 ميجا بيكسل بفتحة عدسة F/2.2 للتصوير الواسع Ultra Wide .. العدسة التالتة 5 ميجا بيكسل بفتحة عدسة F/2.4 للتصوير الـMacro .. والأخيرة 5 ميجا بيكسل بفتحة عدسة F/2.4 للعزل.
بالنسبة للكاميرا السيلفي فا هي بتيجي بدقة 16 ميجا بيكسل بفتحة عدسة ديقة شوية F/2.5 .. وبمستشعر من سامسونج.
شاومي في الكاميرا الخلفيه تخلت عن العدسة الـTelephoto المُخصصة للزوم واللي كانت موجوده في الـMi 9T وحطت عدستين ماكرو وعزل .. من وجهة نظري ملهومش لازمه !
الموبايل جاي بمعالج من كوالكوم وبالتالي بيدعم Google Camera اللي سطبناه وجربناه كتير والـNight Sight بتاعه شغال زي الفل.
في البداية كده جربنا وضع الـCinematic Portrait اللي كنا جربناه قبل كده في الـNote 9S .. الوضع ده ممتاز بصراحه، لازم لما تشتري موبايل من الموبايلات دي تجرب الوضع ده سواء في الشمس او الظل هيطلع لك صور حلوه جدًا.
بالنسبة للكاميرا الـUltra Wide وفي البداية كده برده .. بتطلع صور عادية جدًا من ناحية الألوان والتفاصيل، مش شايف فيها اي جديد .. وبالنسبة برده للعدسة الـMacro، اداءها مش اقوى اداء ممكن تاخده من عدسة ماكرو.
بالنسبة بقى للكاميرا الأساسية، صورت بالـNote 10 Lite جنب الـNote 9S والـRealme 6 Pro .. المي نوت 10 لايت هو والنوت 9 اس اداءهم قريب من بعض .. يمكن النوت 9 اس بيتفوق بفرق بسيط في بعض اوضاع التصوير .. اما الـRealme 6 Pro بعيد شوية عنهم بسبب معالجة السوفت وير المُختلفه فيه .. بس في بعض الأوضاع برده بيكسب الـNote 10 Lite.
بالنسبة للـNight Mode فا الريلمي 6 برو والنوت 9 اس بيقدروا ينوروا جزء أكبر من الصورة اكتر من المي نوت 10 لايت .. ولما استخدمت جوجل كاميرا في الـ9S والـNote 10 Lite لاقيت الاتنين طلعوا نفس الصورة تقريبًا واللي جزء كبير منها منور.
ولما جربت أصور شخص بالـNight Mode في إضاءه ضعيفه .. برده الريلمي 6 برو والنوت 9 اس طلعوا لي صورة احسن من الـMi Note 10 Lite .. الوان افضل وصورة منوره ومتوازنه اكتر وتفاصيل أكتر.
بإختصار كده .. الكاميرا الخلفيه مش أفضل حاجه في الموبايل ده زي ما توقعت .. الموبايل قريب من الـNote 9S في المعالجة والنوت 9 اس كمان بيكسب .. وفي جوجل كاميرا الاتنين زي بعض بالظبط واحيانًا بيكون في تفوق للـNote 9S في بعض الأوضاع .. وبالنسبة للريلمي 6 برو فهو معالجته للصور مُختلفه تمامًا وفي اوضاع تصوير كتيره الصور منه بتطلع احسن بتفاصيل اكتر والوان افضل.
بالنسبة بقى للكاميرا السيلفي .. جربت الـCinematic Portrait برده والصورة محترمه جدًا بس العزل برده مش أفضل حاجه .. ولما صورت بورتريه في الشمس جنب Realme 6 Pro لاقيت تفوق واضح للريلمي 6 برو .. وجنب الـNote 9S برده لاقيت النوت 9 اس صورته احسن .. في نفس الوضع بالظبط.
ولما جربت اصور في الظل .. الريلمي 6 برو تفوق واضح جدًا على الـNote 10 Lite .. ولما جربت الـNote 9S لاقيت ان الاتنين جابوا نفس الصورة واللي ريلمي 6 برو بيتفوق عليهم فيها.
في الإضاءه الداخليه .. جنب ريلمي 6 برو، تفوق واضح في التفاصيل والالوان وتوازن الاضاءه في الصورة لصالح الـRealme 6 Pro .. جنب الـNote 9S في نفس الوضع، الاتنين مش كويسين اوي، نفس المعالجة .. بالجوجل كاميرا بقى الموبايلين طلعوا صورة ممتازه جدًا جدًا.
في الإضاءه الضعيفه هتلاقي تفوق للريلمي 6 برو جنب الـMi Note 10 Lite .. طيب نوت 9 اس جنب النوت 10 لايت، تفوق للنوت 9 اس لإن معالجته للصورة طلعت احسن بالرغم من نفس السوفت وير ونفس العدسة .. التفاصيل والألوان احسن في النوت 9 اس.
بالنسبة بقى لتصوير الفيديوهات .. الموبايل بيصور 4K بـ30 فريم في الثانيه وبيصور 1080p مع 120 فريم في الثانيه وبيصور Slow Motion .. والمُميز هنا انه بيصور 4K مع ثبات إلكتروني، احنا شوفنا القصه دي قبل كده في Nova 5T وMi 9T القديم.
الموبايل برده فيه الـVlog Mode لو عايز تصور فـلوجات بالموبايل ده .. وفيه الـBeauty Mode لو عايز تجمل حد بتصوره .. العدسة الـUltra Wide اللي هنا بتدعم تصوير فيديوهات 1080p والعدسة الماكرو كمان بتصور فيديوهات 1080p.
وبالنسبة لتصوير الفيديوهات بالكاميرا السيلفي فا هو اخره 1080p .. والـQuality كويسه جدًا .. سواء تصوير الفيديوهات الصبح او في مكان ضلمه الـQuality طالعه كويسه رغم فتحة العدسة الديقه شوية .. بس طبعًا مفيش ثبات إلكتروني رغم ان المنافسين زي ريلمي 6 برو وReno 3 بيقدموا ثبات إلكتروني في تصوير الفيديوهات بالكاميرا السيلفي.
ممكن تشوف الصور والفيديوهات المتصورة بالموبايل في فيديو المراجعة في أخر المقالة !
سعر الموبايل :-
الموبايل بيجي بنسختين في مصر .. نسخة 128 جيجا مع 6 جيجا رام ونسخة 128 جيجا مع 8 جيجا رام.
- النسخة الصغيره 128 جيجا مع 6 جيجا رام بسعر 5555 جنيه مصري
- النسخة الكبيره 128 جيجا مع 8 جيجا رام بسعر 5888 جنيه مصري
والموبايل بيدعم تركيب شريحتين إتصال بس مش بيدعم كارت ميموري.
الرأي النهائي :-
تشتري الـMi Note 10 Lite عشان :-
- تصميم زُجاجي فخم محترم مع فريم معدني
- شاشة مُنحنية او بتيجي بـEdges من الأطراف .. مشوفناهاش قبل كده في الفئة دي
- الوان وسطوع الشاشة ممتازين جدًا
- بطارية كويسه والشاحن بتاعهم سريع
- جودة تصوير الفيديوهات سواء بالكاميرا الخلفيه او الأماميه .. ممتازين جدًا
- مميزات تانيه زي الـIR Blaster والـAlways On Display والـNFC
متشتريش الـMi Note 10 Lite عشان :-
- معالج كان نفسي يبقى احسن من كده بالرغم من انه اداءه قوي
- مش بيدعم تركيب كارت ميموري
- وزن الموبايل تقيل وسماكته كبيره شوية ومحتاج معاملة خاصة علشان ميتبهدلش منك
- الكاميرا سواء الأماميه او الخلفيه ( صور ) مش افضل حاجه في الفئة دي
Mi Note 10 Lite مقارنتا بـ Redmi Note 9S :-
- اداء مُتقارب
- كاميرات قريبين جدًا من بعض
- بطارية افضل شوية في الـNote 9S
بس الـMi Note 10 Lite بيقدم خامات وتصميم افضل مع شاشة افضل بكتير وشاحن أسرع ودعم الـ NFC .. وكمان سلسلة الـMi من شاومي مشاكلها اقل من فئة الـRedmi.
Comments