مراجعة Xiaomi Poco F3 – جوكر شاومي في الفئة المتوسطة .. ولكن !

النهارده هنقدملك مراجعة Poco F3 الجديد من شاومي .. موبايل لما جربناه سميناه “الجوكر”، وده بإختصار لإنه بيقدملك كل حاجه .. أداء رائد موجود .. شاشة ممتازة موجود .. بطارية ضخمة موجود .. خامات وتصميم موجود .. ولكن مفيش موبايل مفيهوش عيوب، وده اللي هتعرفه النهارده في المراجعة.


التصميم :-

شاومي بقالها غيرت الفكر بتاعها في تصميم الـRedmi والـMi .. شوفنا ده في عائلة Redmi Note 10 و في Mi 11 Lite مثلًا .. الموبايلات كلها بقت ارفع واخف من المعتاد.

وده دور فئة الـPoco .. وده اول موبايل نراجعه من بوكو السنة دي ويبقى تصميمه مش عيب فيه .. تصميم شيك .. تخانه 7.8 مللم .. وزنه 196 جرام مش خفيف ولكن مش تقيل .. توزيع الوزن فيه محترم.

شكل كاميرا خلفية راقي .. بروز كاميرا قليل .. الجراب مرفق في العلبة .. كل ده مع تصميم ظهر زجاجي عليه حماية Gorilla Glass الجيل الخامس .. وفعلا الظهر Premium وشيك.

ولكن الحاجة الوحيدة اللي بخلوا علينا فيها هي الفريم لإنه بلاستيك مش معدن .. عشان يفرقوا الموبايلات بتاعتهم عن الفئة الأعلى في السعر .. مفهومة طبعًا.

ولكن لما تيجي تبص على الأزرار بتاعت الصوت والـPower من على الشمال لو باصص لظهر الموبايل .. هتلاقي فيه زيادة في حجم الفريم حاجه بسيطة علشان يضيفوا زرار الباور وازرار الصوت والزيادة ديه داخله جوه كرف الموبايل .. وجايه بشكل لطيف.


الشاشة :-

الشاشة برده كانت من أكبر عيوب موبايلات بوكو اللي راجعتها .. اخرهم Poco X3 Pro .. ولكن المرة دي لما تبص على شاشة بوكو F3 .. شاشة بحجم 6.67 بوصة AMOLED بدقة FHD+ بتردد بيوصل لـ120 هيرتز مع ثقب صغير للسيلفي.

الشاشة دي حلوة .. حلوة لأسباب كتير .. أولها في سمترية في الحواف حوالين الشاشة فوق وتحت .. موبايلات شاومي دايمًا كانت بتفقد حتة التناسق والسمترية بين الحواف دي.

تاني سبب مخليني اقولك الشاشة دي انها حلوة فيها خيارات لطيفة جدًا .. اول Option هو انك تقدر تخلي الموبايل يجتهد ويحولك المحتوى الـSDR والـHDR علشان تاخد درجات ألوان احسن .. لإن الشاشة بتدعم HDR10+ طبعًا.

تاني Option لطيف في إعدادات الشاشة إنك تقدر تخلي الموبايل يجتهد برده ويزود الـFrame Rate بتاع الفيديو اللي انت بتشوفه علشان ميقطعش وانت بتعمله Record .. والـOption ده بيشتغل في حالة انك مشغل الـVideo Toolbox بس .. ودي كلها إجتهادات علشان تستغل قوة المعالج والشاشة.

الـOptions دي مخلية الشاشة فيها مميزات حقيقية عن موبايلات شاومي التانية زي Mi 11 Lite و Redmi Note 10 Pro.

بالنسبة لألوان الشاشة ودرجة السطوع فا الوضع ممتاز جدًا ومفيش أي مشاكل نهائيًا .. وزوايا الرؤيا ممتازة جدًا .. والشاشة عليها حماية Corning Gorilla Glass الجيل الخامس ومتركب عليها سكرينة.


الأداء :-

المعالج اللي هنا كوالكوم سناب دراجون 870 تكنولوجيا 7 نانو وكمان داعم لشبكات الجيل الخامس .. بس كان الأفضل نظبط قوة الشبكة في الموبايل قبل ما نفكر في الجيل الخامس يا شاومي 😁

أداء المعالج ده حكاية .. لو اتفرجت على مراجعة Poco X3 Pro اللي بمعالج سناب دراجون 860 .. هتلاقيني كنت مبسوط من الأداء بس حذرتك من نقطة وهي اختناق المعالج اللي كان بيوصل لرقم كبير بعد الضغط عليه لفترة .. وقلتلك ساعتها برده حتى بعد الإختناق الأداء بيبقى كويس جدًا.

ما بالك هنا في بوكو F3 .. بمعالج أقوى اساسًا والاختناق بتاعه أقل .. بيفقد 20% من قوته أثناء الضغط عليه لفترات .. مش 40% ولا 50% زي بوكو X3 برو .. فا الأداء في الموبايل ده سريع جدًا .. الـ120 هيرتز محسوسين جدًا.

أما بقا لو انت من محبي التعديل واللعب في الواجهات .. ساعتها ممكن يقابلك Bugs في الواجهة .. ودي خارج قوة المعالج .. غير كدا تمام .. والموبايل موصلوش MIUI 12.5 وقت تجربتنا ليه.

طبعا نوع ذاكرة التخزين هنا UFS 3.1 .. علشان سرعة الذاكرة تقدر تجاري وتواكب سرعة المعالج اللي هنا.

أنا دايما بشغلكوا الالعاب على اعدادات رسمية من غير برامج خارجية اللي ممكن تشغلك اعدادات اعلى .. ببجي على Ultra HDR .. وفريمات Ultra .. او ممكن تنزل الجودة لـHDR علشان تلاقي الـUltra .. وكول اوف ديوتي بتشتغل على جرافيك Very High وفريمات Max.

وطبعًا مش محتاج أقولك المعالج مشغل الألعاب بكل قوة .. ولا كأنه مشغل حاجة .. ومعدل اللمس على الشاشة هنا 360 هيرتز سريع اوي وهيفيدك في اللعب بس لازم الاول تاخد عليه.

تبدأ العيوب تظهر بقى وهي السخونية .. الموبايل ده بيسخن نفس سخونية Mi 11 Lite .. وانت شغال عليه عادي مش هيسخن، هتبدأ تضغط عليه في الألعاب التقيلة هتلاقيه سخن بسرعه في خلال 5 دقائق .. وبعد ربع ساعة هتلاقي السخونية زادت .. لكن ليها Limit .. بتوصل لحد مُعين مش بتزيد عنه.

والأداء مش بيتأثر .. المعالج مش هيحصله أي إختناق ولا هيفقد قوته .. ولكن هتحس السخونية ناحية الكاميرات كده .. والعيب ده راجل بسبب التصميم الزُجاجي والتخانة القُليلة فا التبريد مش بيقدر يسد قصاد كل ده وبالتالي اي سخونية بتسمع في إيدك بسرعه.

الموضوع محلول نسبيًا بالجراب اللي هيقدر يشتت جزء كبير من الحرارة .. وأرجع وأقولك ان الـGaming الحقيقي بيحتاج تبريد أقوى وبالتالي بتدفع مبالغ أكبر، عايز أداء قوي بسعر قليل يبقى لازم تتحمل العواقب.


عوامل الأمان وعناصر اخرى :-

بصمة الموبايل على زرار الباور .. مش في الشاشة، بصمة عملية .. سريعة جدا .. نقول عليها Super .. مفيش حتى وقت تجميع بيحصل في ايقونات الواجهة .. والـFace Unlock برده ممتاز مفهوش مشاكل.

أول ما تفتح الموبايل ده لما تشتريه هتلاقي تحديث .. اعمله علشان تاخد التجربة اللي نقلتهالك في مراجعة Poco F3 ولكن ده مش تحديث MIUI 12.5 زي ما قولتلك.

الموبايل كعادة شاومي فيه الـCombo المُعتاد :-

  • ميزة الـAlways On Display
  • مستشعر الـNFC
  • مستشعر الـIR Blaster
  • ميكروفون اضافي لعزل الضوضاء

الصوت في الموبايل Stereo .. الصوت عالي مُجسم ومفيش هزة بتحصل في الظهر .. ولكن للأسف مدخل الـ3.5 مللي متشال زي مي 11 لايت .. معاك وصلة تحويل من Type-C لـ3.5 مللي في العلبة.

بالنسبة لمُستشعر التقارب “المسؤل عن قفل الشاشة اثناء المكالمات والموبايل على اذنك” فا اول ما تحط الموبايل على ودنك بأي حركة خفيفة هيقفل الشاشة .. ولكن لما عملت منه مكالمه طويلة شوية فتح في النص .. علق شوية وحركته حركه خفيف رجع اشتغل وقفل الشاشة .. فا تقييم المستشعر هيكون متوسط.

وعلشان تبقى فاهم المستشعر الهاردوير اللي بيشتغل لو الموبايل واخد أي وضع هو أكتر مستشعر امن يخليك مطمن ان مستحيل الشاشة تفتح والموبايل على ودنك.

الـWiFi في الموبايل ده مُمتاز .. مداه قوي وسريع.

اما شبكة الإتصال فأنا بتجربتي شايف انها كويسة جدًا مفيهاش مشاكل .. بس أنا بقولك إني جربت اكتر من موبايل شاومي قبل كدا ولاقيت الشبكة حلوة .. والاقي مستخدم يقابلني يقولي الشبكة مش حلوه .. انا معرفش فين المشكلة بصراحة .. هل الموبايلات كلها مش زي بعضها ؟


البطارية :-

البطارية هنا 4520 مللي أمبير .. البطارية مكبرتش اوي علشان التخانة تبقى قليلة .. وأداء البطارية هنا نفس أداء مي 11 لايت .. متوسط من 6 لـ7 ساعات شاشة مفتوحة بإستخدام متوسط بالمعالج القوي اللي هنا مع الـ120 هيرتز شغالين علطول .. أنا شايفه معقول مش وحش قصاد الأداء اللي بتاخده.

الشاحن المرفق 33 واط شحن البطارية معايا في ساعة إلا 10 دقايق .. مش هقول ممتاز لإن في موبايلات أسرع في نفس الفئة من مجموعة BBK زي Oppo Reno5 4G ولكن هقول مقبول.


الكاميرات :-

الموبايل جاي بكاميرا خلفية ثلاثية الأساسية 48 ميجا بيكسل فتحة عدسة F/1.8 بمستشعر مش غالي سوني IMX582 .. العدسة التانية 8 ميجا بيكسل فتحة عدسة F/2.2 للتصوير الواسع .. التالتة 5 ميجا بيكسل ماكرو فتحة عدسة F/2.4 .. والسيلفي 20 ميجا بيكسل فتحة عدسة F/2.5.

الموبايل بيدعم جوجل كاميرا .. وتقدر تحمل جوجل كاميرا ليه من هنا.

الموبايل ده مش بيقدملك أفضل كاميرا في سعره .. ولكن اقدر أقولك الوضع ممكن يكون مقبول جدًا باستخدام جوجل كاميرا .. انا عارف إنه تحايل إني استخدم برنامج خارجي علشان اطلع صور حلوة .. بس ده الموقف حاليًا.

الكاميرات بتعاني شوية مع الاشخاص .. ولكن في الظروف التانيه الكاميرا بتأدي كويس جدا.

قارنت F3 مع Mi 11 Lite اللي أرخص منه بس كاميرته حلوه .. لاقيت مي 11 لايت مطلع ألوان أحسن وتفاصيل اكتر نسبيًا ولون بشرة مظبوط اكتر نسبيًا .. والـF3 وراه بفرق بسيط مش كبير .. وفي الـNight Mode الأداء بيتساوى قريبًا.

الكاميرا زي ما وضحتلك هي متوسطة جدًا، مش أحسن حاجه في الموبايل خالص .. ومتعتبرش نقطة تركيز .. بس ممكن بـ جوجل كاميرا تعرف تاخد صور حلوه تقدر تستخدمها.

السيلفي كعادة شاومي مش أفضل سيلفي .. ولكن لاحظت ان المعالجة هنا أحسن شوية .. الموبايل بيعرف يظبط الإضاءات والألوان أكتر من الموبايلات التانية اللي جربتها من شاومي .. في الإضاءات المتوسطة هتلاقي الصور بقت سايحة .. إستخدم جوجل كاميرا علشان تاخد صور أحسن بكتير وابقا ظبط اللوانها براحتك باي برنامج صور .. لكن في الإضاءات الضعيفة الوضع بيكون صعب حتى مع جوجل كاميرا.

بالنسبة بقى لتصوير الفيديوهات فالموبايل بيصور 4K مع 30 فريم في الثانية وطبعًا في تثبيت إلكتروني على الجودة دي .. والموبايل فيه ميكروفون اضافي لعزل الضوضاء.

شوف تجربة التصوير صور وفيديوهات بالموبايل في فيديو المراجعة !


سعر Poco F3 :-

الموبايل بيتقدم في السوق المصري بنسختين :-

  • النسخة الـ128 جيجا مع 6 جيجا رام بسعر 6400 جنية
  • النسخة الـ256 جيجا مع 8 جيجا رام بسعر 7000 جنية

وبينفع تركب شريحتين إتصال من الجيل الخامس وللأسف مبينفعش تركب كارت ميموري.


الرأي النهائي :-

مميزات Poco F3 :-

  • أداء ممتاز من المعالج الرائد بالاضافة لدعم لشبكات الجيل الخامس
  • شاشة أموليد 120 هرتز ممتازة جدًا
  • بطارية مقبولة
  • تصميم شيك وخامات ممتازة
  • صوت Stereo قوي

عيوب Poco F3 :-

  • مستشعر التقارب المسؤل عن غلق الشاشة اثناء المكالمات مش الأفضل
  • سخونية واضحة جدًا لكن مش مؤثرة إطلاقًا
  • مفيش مدخل 3.5 مللي لتركيب السماعات
  • مفيش دعم لتركيب كارت ميموري
  • كاميرات متوسطة الأداء

بالنسبة لنقطة الكاميرات فهي متوسطة وممكن متحسبهاش عيب في حالة إستخدام جوجل كاميرا هتطلعلك صور ممتازة لإن أصلًا المعالج نفسه قوي في المعالجة.

قد يعجبك أيضا...

Comments

جاري التحميل...