بعد ما أسعار الموبايلات رفعت .. بقى لو معاك 3000 جنية ونزلت علشان تشتري موبايل جديد، مش هتلاقي موبايل كويس .. موبايل ينفع تستخدمه بشكل يومي، لكن دلوقتي شاومي أعلنت عن Redmi 10A .. أصغر فرد في عائلة Redmi في فئة 3000 جنية .. والنهارده هنقدملكم مراجعة Xiaomi Redmi 10A الجديد.
التصميم :-
لما تمسك الموبايل في إيدك هتلاقي مفيش خامات رديئة .. الموبايل أه من البلاستيك لكن جودته كويسة وفي إهتمام بالتقفيل والمتانة .. والظهر مصنفر علشان ميظهرش فيه خدوش وبصمات.
تصميم الموبايل معقول وشيك خاصًة في اللون الأزرق .. ووزن الموبايل معقول حوالي 194 جرام وتخانه 9 مللي .. حجمه مش كبير أوي ووزنه في الإيد معقول.
الفريم الأسود الكبير اللي في الظهر ده فيه الكاميرات وكلمة REDMI والبصمة .. مكان غريب للبصمة لكن لازم نقول ان وجود البصمة في الموبايل حاجه كويسة جدًا .. خاصًة ان Redmi 9A اللي فات مكانش بيجي ببصمة.
وبشكل عام موبايل Redmi 10A يعتبر نسخة طبق الأصل من Redmi 10C في التصميم .. نفس التصميم بالظبط لكن أبعاد أصغر ووزن أثقل بفرق غير ملحوظ.
الشاشة :-
شاشة IPS LCD بحجم 6.53 بوصة بدقة HD+ بنوتش للسيلفي وبتردد 90 هيرتز.
هنا احنا بنتكلم عن موبايل إقتصادي .. مينفعش نستنى كتير من الشاشة، مينفعش نستنى انها تكون FHD+ مثلًا .. الشاشة في Redmi 10A هتقدملك المطلوب منها بدون ما تبهرك او تدايقك.
ألوان الشاشة مش أفضل حاجه وده الطبيعي بتاع الفئة .. دقة الشاشة متواضعه وكثافة البيكسلات قليلة .. السطوع تحت الشمس المباشرة مش أفضل حاجه.
الأداء :-
المعالج الموجود هنا هو ميدياتك Helio G25 بتكنولوجيا 12 نانو ميتر .. معالج إقتصادي في المقام الأول، وده نفس المعالج اللي كان مستخدم في Redmi 10A القديم بدون تطوير.
الأداء مش وحش لكن مش سريع .. ممكن يتأخر معاك في الإستجابة لو تقلت عليه لإنه موجه للإستخدام البسيط .. سوشيال ميديا ومكالمات والمهام اليومية البسيطة بس.
الموبايل هيقدملك تجربة عادية لإستخدام عادي مش سريع .. لو انت حابب تعمل كل حاجه على الموبايل بسرعة وعايز معالج أقوى لازم تزود المبلغ اللي هتدفعه وتجيب Redmi 10C بمعالج أقوى بفرق كبير.
لعبة ببجي بتشتغل على إعدادات جرافيك Medium .. أكيد هتلاقي في تسقيط في الفريمات لكن مجملًا هتعرف تلعب.
عوامل الأمان وعناصر اخرى :-
بصمة الإصبع اللي على الظهر بتتأخر شوية على ما تفتح .. فيها لاج خفيف، والـFace Unlock متعتمدش عليه أوي علشان الكاميرا السيلفي متواضعه بشكل كبير.
الموبايل بيجي بنظام تشغيل Android 11 مع واجهة شاومي MIUI 12.5 .. وفي إمكانية انك تعمل نسختين من برامج التواصل الإجتماعي بالرغم من إنه موبايل إقتصادي.
مفيش ميكروفون اضافي لعزل الضوضاء .. ومفيش مستشعر IR Blaster .. لكن موجود مدخل الـ3.5 مللي .. في مستشعر تقارب حقيقي شغال ممتاز وبيقفل الشاشة في الوقت المطلوب.
مفيش مستشعر جيروسكوب .. والصوت هنا Mono مش Stereo وأداءه متوسط مقبول في الفئة السعرية دي.
البطارية :-
البطارية هنا بسعة 5000 مللي امبير أداءها كويس جدًا .. بتوصل لـ9 ساعات شاشة مفتوحة مستريح أوي .. بس اللي مش لطيف ان مدخل الشحن MicroUSB 2.0 المنفذ القديم .. والشاحن اللي في العلبة 10 وات.
الكاميرات :-
الكاميرا الخلفية بدقة 13 ميجا بيكسل بفتحة عدسة F/2.2 .. والكاميرا السيلفي 5 ميجا بيكسل .. من الأرقام كده الموضوع واضح .. كاميرات إقتصادية متواضعه جدًا.
مفيش موبايل جديد في الفئة دي بيطلع صور كويس .. ريدمي 10A زيه زي اللي معاه في الفئة السعرية دي .. لازم إضاءه عالية علشان تاخد صورة معقولة بكمية تفاصيل وجودة محدودة.
والسيلفي كمان نفس القصة .. الأداء متواضع جدًا .. لازم إضاءه عالية علشان تشوف شوية تفاصيل في الصورة .. الإضاءه لو نزلت هتلاقي الدنيا مش حلوه خالص.
الموبايل بيدعم تصوير فيديوهات بجودة 1080p مع 30 فريم في الثانية .. طبعًا مفيش مثبت بصري او إلكتروني .. ومفيهوش ميكروفون اضافي لعزل الضوضاء.
سعر Xiaomi Redmi 10A :-
- نسخة 32 جيجا مع 2 جيجا رام بسعر 3000 جنية
- نسخة 64 جيجا مع 3 جيجا رام بسعر 3500 جنية
- نسخة 128 جيجا مع 4 جيجا رام بسعر 4000 جنية
تقدر تركب شريحتين إتصال من الجيل الرابع مع كارت ميموري في نفس الوقت.
الرأي النهائي :-
مميزات Redmi 10A :-
- تصميم حلو
- بطارية كويسة
- مساحة ورام معقولين
- الوظائف الرئيسية بسرعة معقولة
- بصمة وجودها ميزة بالفئة دي
عيوب Redmi 10A :-
- منفذ الشحن قديم
- معالج ضعيف جدًا
- البصمة أداءها متواضع
طبعًا متشتريش الموبايل ده بأغلى من سعره الرسمي .. وأنصحك بالنسخة الـ64 جيجا مع 3 جيجا رام، نسخة متوازنه .. ولو محتاج أداء أفضل زود وهات Redmi 10C .. أداءه أقوى بفرق ضخم.
Comments