مراجعة Xiaomi Redmi 9T – شاومي بتنافس نفسها !

شاومي خلاص بقت بتنافس نفسها .. بعد ما نزلت Poco M3 بمواصفات معقولة جدًا على الفئة الإقتصادية .. مفيش كام يوم وأطلقت Redmi 9T بنفس المواصفات مع فروقات بسيطة جدًا بينهم هتعرفها في مراجعة Xiaomi Redmi 9T النهارده .. شاومي بتعمل كده علشان تحقق مبيعات بسلسلة الـPoco وفي نفس الوقت متخسرش فئة الـRedmi اللي تعتبر مهمة جدًا وعندها شعبية ضخمة وإنتشار كبير.

شاومي كمان بقالها فترة بتعمل حركة ذكية جدًا .. بتخلينا غصب عننا نقارن موبايل جديد لسه نازل عندها بموبايل نازل من عندها برده بقاله فتره .. وده بيحصرك في موبايلات شاومي فقط وبيخليك تحتار في الإختيار بين موبايلاتها مش بين موبايل منها وموبايل من شركة تانية.


التصميم :-

موبايل Redmi 9T جاي بتصميم بلاستيكي بالكامل كعادة الفئة الاقتصادية .. ولكن كالعادة البلاستيك اللي على الظهر مصنفر علشان ميتخربش بسهولة ويحسسك انك ماسك موبايل مش رخيص .. الحركة اللي شفناها في Redmi 9 و Poco M3 وبنشوفها تاني في Redmi 9T.

في انعكاسات بتحصل لما الضوء بيجي على ظهر الموبايل في صورة اشعة كده طالعة من الكاميرا الخلفية .. مدياله ستايل وطابع خاص بيه .. مع شكل كاميرا خلفية جديد مواكب الترندات الجديدة .. وفي نفس الوقت الكاميرا مش بازرة اوي عن جسم الموبايل علشان ميدخلش تراب والكلام ده .. وكلمة REDMI المكتوبة على الظهر بشكل شيك.

مُجملا التصميم هنا انا شايفه أشيك من بوكو M3 .. ممكن نقول انه هيعجب ناس اكتر .. ونقطة التصميم دي اذواق .. المهم الموبايل وزنه مش خفيف، حوالي 196 جرام علشان بطاريته ضخمة ولكن توزيع الوزن معقول جدًا .. التخانه كبيرة شوية 9.6 ملم .. وأكيد ديه نفس ابعاد ووزن بوكو M3 لانهم الاتنين واحد تقريبا.

Redmi 9T

بالنسبة لموضوع ان Redmi 9T مقاوم لطرطشة المايه الخفيفة فا ده راجع من تقفيل الموبايل كويس مش اكتر .. وانا منصحكش خالص انك تفكر تقرب الموبايل من الميه او تعتبره ضد المايه .. والموبايل جاي معاه جراب شفاف في العلبة كعادة موبايلات شاومي.


الشاشة :-

شاشة بتيجي بحجم 6.53 بوصة من نوع IPS LCD بدقة FHD+ مع نوتش Water Drop للسيلفي .. الشاشة اللي حفظناها .. نفس شاشة ريدمي 9 ونفس شاشة بوكو M3 بنفس مميزاتها وعيوبها.

من مميزاتها ان ألوانها معقولة ودقتها عالية .. ولكن عيبها سطوعها قليل لإنه حوالي 400 شمعة .. ممكن يضايقك تحت الشمس المباشرة.

كان نفسي شاومي تغير نوع الشاشة على الأقل هنا في ريدمي 9T وتميزه شوية عن الـM3 ولكن واضح ان عندهم كميات كبيرة من الشاشات القديمة لسه مخصلتش .. عامة الشاشة عليها حماية Corning Gorilla Glass الجيل التالت وبتيجي في العلبة متركب عليها سكرينة.


الأداء :-

معالج ريدمي 9T هو كوالكوم سناب دراجون 662 بتكنولوجيا 11 نانو .. وده نفس المعالج المستخدم في بوكو M3 .. والموبايل بنفس اداء Poco M3 بالظبط بدون أي إختلاف.

من كام يوم كنت بجرب Oppo A73 الأغلى بنفس المعالج .. لاقيت الأداء أحسن شوية من أداء M3 وريدمي 9T .. وده بسبب فرق تقل الواجهة .. الواجهة ليها سحر وتأثير مباشر على اداء الموبايل .. وواجهة شاومي حاليًا من اتقل الواجهات.

المهم .. الأداء مش نشيط أوي مش سريع اوي .. لو هتقارنه بـ ريدمي 9 القديم اللي كان بيجي بمعالج Helio G80 هتلاقي ريدمي 9 اسرع شوية او شويتين .. وطبعًا أول ما تشتري الموبايل هتلاقي تحديث وصلك .. اعمله علشان توصل للتجربة اللي انا بنقلها لك في مراجعة Xiaomi Redmi 9T النهارده.

ولكن أرجع واقولك الاداء مش أزمة يعني .. مش السبب اللي يخليك تقول لا مش هشتريه .. مقارنتا بالمنافسين في فئته السعريه فالأداء معقول جدًا جدًا وده اللي دايمًا شاومي بتلعب عليه.

نوع ذاكرة التخزين زي بوكو M3 بالظبط UFS 2.1 في النسخة الـ64 جيجا وUFS 2.2 في النسخة الـ128 جيجا .. ومازالت شاومي تسبق المنافسين في الفئة السعرية دي في جزئية سرعة نقل وقراءة الملفات على الموبايل.

طبعًا الأداء الرسومي أقل عن ريدمي 9 بفرق واضح .. الألعاب التقيلة زي ببجي وكول اوف ديوتي بيشغلوا على اعدادات جرافيك متوسطة وممكن تحتاج تقللها لأقل اعدادات علشان تاخد تجربة ناعمة جدًا .. وبالنسبة للسخونية متقلقش .. المعالج هنا بيسخن أقل من معالجات ميدياتيك فئة الـG والموبايل بيسخن اقل من ريدمي 9 بفرق ملحوظ.

من الأخر لو يهمك العاب الأندرويد أكتر من اي حاجة تانية والمبلغ المتاح معاك تحت 3000 جنية مش هينفع تزود .. فا خليك في ريدمي 9 القديم لو لاقيته او Infinix Note 8i.


عوامل الأمان وعناصر اخرى :-

البصمة مدمجة على زرار الباور متوسطة السرعة .. والـFace Unlock متوسط السرعة برده .. زي بوكو M3 بالظبط .. مفيش لمبة إشعارات في الموبايل .. والنسخة اللي وصلت مصر مفيهاش NFC زي بوكو M3 .. الموبايل كالعادة فيه كل المستشعرات وفيه مستشعر IR Blaster المميز بتاع شاومي.

صوت الموبايل ستيريو بيطلع من سماعة المكالمات والسماعة السفلية .. والصوت عالي على فئته السعريه .. تقريبًا نفس درجة علو صوت Poco M3 الـStereo .. ولو هنقارنه بموبايل ستريو سعره رخص شوية وهو Infinix Note 7 .. فا لأ ريدمي 9T وبوكو M3 صوتهم الـStereo مجسم اكتر وافضل.

للأسف برده التكرار العجيب .. في فتحه او سماعة صوت في الفريم العلوي للموبايل هتتسب في إنك لو بتعمل مكالمة ممكن لو حد جمبك هيسمع الصوت .. هتحتاج توطي الصوت لأقل درجة ممكنة علشان اللي جمبك ميسمعش الصوت اوي .. وديه نفس الملحوظة اللي قابلتها في بوكو M3.

شبكات الـWiFi كويسة في الموبايل ده .. وشبكات الإتصال أديها تقييم متوسط او فوق المتوسط .. وبرده هأكد واقول لو الشبكة عندك فيها أزمة كبيرة .. فا موبايلات اوبو وموبايلات هواوي مُميزين جدا في الشبكات.


البطارية :-

البطارية الضخمة الـ6000 مللي أمبير اللي شوفناها في M3 بنشوفها في ريدمي 9T تاني .. بتستحمل اكتر من 10 ساعات شاشة مفتوحة يعني يوم ونص يومين استخدام مستريح اوي.

منفذ الشحن USB Type C والشاحن المرفق في العلبة 22.5 واط بيشحن الموبايل بقدرة 18 واط عادي بدون مشاكل والبطارية بتشحن في حوالي ساعتين وربع.


الكاميرات :-

الكاميرا الخلفية رباعية .. الأساسية 48 ميجا بيكسل فتحة عدسة F/1.8 والتانية 8 ميجا بيكسل للتصوير الواسع فتحة عدسة F/2.2 وديه اللي مش موجودة في بوكو M3 .. والتالتة 2 ميجا بيكسل ماكرو والرابعة 2 ميجا بيكسل عزل .. والسيلفي بدقة 8 ميجا بيكسل فتحة عدسة F/2.1 .. وكالعادة سطبت برنامج جوجل كاميرا واشتغل بكفاءة.

في مراجعة Xiaomi Redmi 9T قارنت بين Redmi 9T و Poco M3 .. لاقيت نفس النتايج .. نفس ملاحظات وعيوب بوكو M3 في الكاميرات موجودة في ريدمي 9T .. هتلاقي الصور بتلسع لوحدها .. ولكن طول ما جوجل كاميرا معاك اتطمن .. هتقدر تطلع صور إحترافية في أي وقت بدون أي مجهود ومن غير ما تحتاج تصور الصورة كذا مره.

وكمان الصور اللي طالعه من جوجل كاميرا هي نفسها في الموبايلين بدون أي إختلاف .. وعمومًا أنا معجب جدًا بنتايج الكاميرا على الموبايلات دي بإستخدام تطبيق جوجل كاميرا.

الفرق الجوهري هو العدسة الـUltra Wide Angle الموجودة بس في ريدمي 9T مش موجودة في بوكو M3 وهي عدسة متواضعة جدًا وتفاصيلها وألوانها أقل بفرق ملحوظ عن العدسة الرئيسية .. وفعلًا مفيش فرق بين الموبايلين في أي شيء .. ولما تصور بـ جوجل كاميرا بتاخد صورة أحسن من التصوير بتطبيق الكاميرا بتاع شاومي.

السيلفي كالعادة مش حلو تمامًا بتطبيق الكاميرا بتاع شاومي في ريدمي 9T زيه زي بوكو M3 بالظبط .. ولكن جوجل كاميرا بيحاول يطلعلك صور أفضل من ناحية التفاصيل ومعالجة الألوان.

عمومًا لو هتشتري بوكو M3 او ريدمي 9T وعايز تتصور سيلفي فا انسى انك تاخد صورة محترمة بتطبيق التصوير بتاع شاومي .. إستخدم جوجل كاميرا علطول علشان تاخد صور سيلفي معقولة.

بالنسبة بقى لتصوير الفيديوهات فا الموبايل بيدعم تصوير على جودة 1080p ومفيش أي ثبات إلكتروني .. وفي ميكروفون اضافي لعزل الضوضاء .. وفعليًا مفيش أي إختلاف في الـRedmi 9T عن الـPoco M3 .. بشكل عام الاتنين بيقدموا أداء مقبول في الفئة دي في تصوير الفيديوهات.

شوف تجربة التصوير فيديوهات وصور بالموبايلات في فيديو المراجعة في بداية المقال !


سعر Xiaomi Redmi 9T :-

  • نسخة 64 جيجا مع 4 جيجا رام بسعر 2700 جنية
  • نسخة 128 جيجا مع 4 جيجا رام بسعر 2900 جنية

بينفع طبعًا تركب شريحتين إتصال من الجيل الرابع مع كارت ميموري بحجم 512 جيجا في نفس الوقت.

Xiaomi Redmi 9T Price


الرأي النهائي :-

الفرق بين Redmi 9T و Poco M3 :-

  • تصميم مًختلف .. أشيك شوية في ريدمي 9T
  • عدسة Ultra Wide للتصوير الواسع في 9T
  • سعر أغلى حوالي 100 جنية في ريدمي 9T

فا بإختصار وبعد مراجعة Xiaomi Redmi 9T لو فارق معاك العدسة الـUltra Wide زود واشتري ريدمي 9T .. لو مش فارقة معاك وفر الـ100 جنية وهات Poco M3 هيكون أفضل ليك.

مميزات Redmi 9T :-

  • تصميم شيك
  • كاميرات قوية بإستخدام جوجل كاميرا
  • صوت Stereo ممتاز
  • بطارية قوية مع شحن سريع
  • شاشة بدقة كويسة

عيوب Redmi 9T :-

  • معالج كويس لكن السوفت وير تقيل
  • الأداء الرسومي مش الأفضل
  • سطوع الشاشة ضعيف تحت الشمس
  • الجيروسكوب سوفت وير وليس حقيقي

قد يعجبك أيضا...

Comments

جاري التحميل...