شاومي تعلن في الصين عن Xiaomi Redmi K20 نسخة عادية و برو – هل هينزلوا مصر ؟!

شاومي اعلنت “في الصين” عن سلسلة جديد تحت اسم Xiaomi Redmi K20 , واعلنت عن نسختين من الموبايل نسخة عادية ونسخة برو , ميزة السلسلة دي انها جاية تكمل ورا شاومي بوكوفون الي حقق نجاح كبير ولكن شاومي قالت انها مش ناوية تكمل في اسم البوكوفون وهتستبدله باسم تاني وهو K20 في الصين , عموما المواصفات ممتازة فعلا والاسعار تنافسية جدا جدا زي ما شوفنا في البوكوفون , تعالوا نعرفوا مواصفات النسختين العادية الاول وبعدها البرو ونعرف الاسعار و هل الموبايلات ديه هتنزل مصر ولا لا ؟


مواصفات Xiaomi Redmi K20 :-

تصميم K20 هو نفس تصميم K20 برو
  • شاشة 6.39 بوصة امولد بدقة FHD+ مع حماية جوريلا الجيل الخامس و مفيش نوتش لان السيلفي محطوط في بوب اب بجودة 20 ميجا بيكسل فتحة عدسة f/2.0 .
  • بصمة مدمجة تحت الشاشة ومن المتوقع انها تبقا سريعة ومحترمة .
  • انسى التصميم البلاستيك القديم للبوكوفون , التصميم هنا زجاجي محترم وشيك جدا وكمان الفريم من المعدن .. ومحدش هيقدر يقول ان التصميم ده مش شيك !
  • ألوان الموبايل , أسود أو أزرق أو أحمر .
  • وزن 191 جرام مع تخانة 8.8 مم .
  • بطارية 4000 مللي أمبير في النسخة العادية شحن 18 واط .
  • معالج النسخة العادية احسن واجدد معالج في الفئة المتوسطة سناب دراجون 730 ومعالج رسومي Adreno 618 .
  • الكاميرات الخلفية في النسخة العادية 3 كاميرات الاساسية 48 ميجا بيكسل فتحة عدسة f/1.8 مستشعر سوني IMX582 والتانية 13 ميجا بيكسل تصوير واسع والعدسة الاخيرة للعزل.
  • يدعم مدخل سماعات 3.5 مم بس مفيش مكان لكارت ذاكرة اضافي (خلي بالك لان النسخة الـ 64 ممكن تبقا ضيقة عليك 😅) .
  • المساحة والرام 64+6 أو 128+6 .
  • الاسعار في الصين هتبدأ من 290 دولار لاقل نسخة 64+6 و 305 دولار للنسخة 128+6 .
  • اسم Redmi K20 احتمال يفضل في الصين فقط وبالتالي علشان الموبايل يوصل مصر ممكن يوصل باسم تاني زي Mi 9T والاسعار المتوقعة في مصر أغلى شوية من الصين نتوقع تكون 5800 جنية و 6800 جنية للنسختين 64 و 128 و لو فعلا الموبايل ده نزل في مصر يبقا صعب نشوف Mi 9 SE  وشاومي مصر هتكتفي بنزول النسخة العادية من K20 خلال من شهر لـ شهرين واتمنى تكون الاسعار اقل من الي احنا توقعناها كمان .
  • ونوعدكم احنا في موبيزل اول ما نتأكد من نزول K20 العادي في مصر ونعرف اسمه بالظبط هيبقا ايه هنعمل فورا مقالة المواصفات فيها المميزات والعيوب والمواصفات المظبوطة الي نازلة مصر زي ما انتوا متعودين مننا .

مواصفات Xiaomi Redmi K20 Pro :-

ألوان K20 هي نفس ألوان K20 برو
  • هو نفس مواصفات K20 العادي فيما عدا المواصفات التالية .
  • البطارية نفس الحجم 4000 مللي امبير بس مع شحن اسرع 27 واط حيث يتم شحن 58% من البطارية في نصف ساعة فقط .
  • الكاميرا الخلفية ثلاثية ولكنها مختلفة الرئيسية 48 ميجا بيكسل فتحة عدسة f/1.8 مع مستشعر سوني مختلف وهو Sony IMX586 والكاميرا الثانية 12 ميجا بيكسل للتصوير بزاوية والاسعار والاخيرة مختلفة 8 ميجا بيكسل للزوم .
  • المعالج مختلف وهو هنا اعلى معالج في العالم حاليا سناب دراجون 855 ومعالج رسومي Adreno 640 .
  • مساحات التخزين من اول 64+6 و 128+6 و 128+8 و 256+8 و الاسعار في الصين على الترتيب 365 دولار و 375 دولار و 405 دولار والاخيرة والاعلى 435 دولار .
  • زي ما قولنا في النسخة العادية هنقول هنا الاسعار ديه في الصين والاسعار في مصر بتيجي اغلى شوية واصلا من المحتمل ان النسخة البرو من K20 متنزلش مصر لانها هتبقا بسعر قريب جدا من Xiaomi Mi 9 والي هو يعتبر الهاتف الرئيسي من شاومي في الفئة السعرية بتاعت من 8 لـ 9 الاف جنية ومتوافر منة كميات للبيع في مصر وعموما حتى لو K20 برو نزل مصر هيبقا محتمل يكون اسمه Mi 9T Pro وسعره هيبدأ من 7200 جنية لأقل نسخة .

قد يعجبك أيضا...

Comments

جاري التحميل...