كاميرا 108 ميجا بيكسل .. شاشة أموليد 120 هيرتز .. تصميم زجاجي .. سعر أقل من 5000 جنية .. ده اللي بيقدمهولك Redmi Note 10 Pro .. باكيدج مواصفات قوية جدًا، النهارده هقدملك مراجعة Redmi Note 10 Pro مراجعة مُفصلة .. هنقل لك العيوب اللي واجهتني، وكمان هعرفك وضعه ايه وسط المُنافسين.
التصميم :-
الـNote 10 Pro جهاز كبير في الإيد .. مش صغير وملموم زي Redmi Note 10 العادي .. معمول لمحبي الموبايلات الكبيرة .. ولكن متقلقش الموبايل مش تخين، التخانة بتاعته 8.1 ملم يعني الموبايل يعتبر رفيع.
العقبة الوحيدة في التصميم هي بروز الكاميرات .. طبعًا مستشعر الكاميرا الـ108 ميجا بيكسل اللي هنا كبير فا علشان كده شاومي خلت البروز على درجتين .. الدرجة اللي ماسكة في جسم الجهاز متينه .. ولكن في درجة تانية للبروز زجاج وطالعة لوحدها، مقدرش أحكم عليها دلوقتي لان الموبايل لسه جديد ولكن اتمنى ميحصلش فيها مشاكل.
طبعًا أنت مستحيل تمشي بالموبايل ده من غير جراب لإن البروز هيخليه مش مستقر خالص .. ولكن الجراب الشفاف المصنفر من جوه اللي جاي مع الموبايل في العلبة هيغطي البروز بالكامل لانه فيه جزء كده أعلى من الكاميرا الخلفية .. والجراب برده بيغطي مدخل الشحن .. حاجة كويسة جدا.
على مستوى الخامات وشكل التصميم .. الموبايل جاي بتصميم زجاجي عليه طبقة حماية Corning Gorilla Glass 5 مع فريم بلاستيكي .. أكيد كنت أتمنى اشوف فريم معدن ولكن اصلًا المنافسين بيقدموا موبايلات بالكامل من البلاستيك فا منقدرش نعترض على النقطة دي.
شكل تصميم الكاميرا الخلفية جديد ومميز وهيحسسك انك ماشي بموبايل غالي ودي لقطة كل سنة شاومي بتعرف تعملها .. الموبايل بينزل بـ3 ألوان، الرمادي والأزرق والبرونز.
الشاشة :-
شاشة كبيرة 6.7 بوصة من نوع AMOLED بدقة FHD+ بثقب صغير أوي للسيلفي .. وكمان الشاشة بتردد 120 هيرتز .. شاشة مبهرة على الحقيقة بصراحة .. ألوان مشبعة وممتازة وممكن تخليها مشبعة أكتر من إعدادات الواجهة وانا بصراحة مخليها مشبعة من ساعة ما مسكت الموبايل.
سطوع تحت الشمس ممتاز لاقصى درجة .. أنا كنت بجرب الموبايل ده مع Reno5 4G وعايز اقولك اني حسيت في معظم الوقت ان سطوع نوت 10 برو أعلى وشايف الشاشة احسن تحت الشمس.
لو انت من الأشخاص اللي بتتفرج على فيديوهات كتير والموبايل بالنسبالهم شاشة .. فا شاومي تحسها عامله الموبايل ده ليك .. لانها اهتمت جدا جدا بالشاشة.
ثقب السيلفي صغير جدا والحافة السفلية معقولة جدا وده هيخلي التجربة احسن واحسن .. كل اما تبص على شاشة الموبايل هتتبسط اكتر واكتر.
الشاشة عليها حماية Corning Gorilla Glass الجيل الخامس ومتركب عليها سكرينة كويسة، أنصحك متشيلش السكرينه .. ومتركبش فوقيها سكرينة تانيه علشان متبوظش التجربة.
الأداء :-
الـNote 10 Pro جاي بمعالج كوالكوم سناب دراجون 732 .. بيشتغل بتكنولوجيا 8 نانو .. معالج فئة متوسطة .. وده نفس المعالج المستخدم في Poco X3 NFC .. وفعلًا تجربة الإستخدام هنا مشابهه بشكل كبير للـX3 NFC.
ساعات هتحس ان الموبايل سريع جدًا معاك وان الـ120 هيرتز انت حاسس بيهم .. تيجي تخرج من ابلكيشن وتروح ابلكيشن تاني تحس بـDrop Frame بسيط وتحس ان الموبايل شغال بـأقل من 60 هيرتز .. شوية ويظبط تاني.
بص الـ120 هيرتز كتير اصلًا في الفئة المتوسطة وكتير على معالج متوسط .. ولكن شاومي دائمًا بتهتم بـ باكيدج المواصفات .. بتهتم تديلك اعلى ارقام .. ولكن هل سوفت وير شاومي التقيل نسبيًا والمعالج المتوسط اللي هنا هيقدروا يدولك تجربة مستقرة مع الـ120 هيرتز ؟ الإجابة لا.
انا عارف ان مفيش شركات تانيه اصلًا بتقدم معالج اقوى من SD732G في الفئة دي .. اوبو وسامسونج وريلمي بيقدموا SD720G .. لكن شاومي عندها Poco X3 Pro اللي هينزل قريب في نفس الفئة وهيقدملك معالج رائد مناسب للـGamers وهيقدر يشغل الـ120 هيرتز بشكل كافي، لكن هتضحي بالشاشة والتصميم والكاميرا اللي هنا.
الأداء الرسومي .. ببجي على High HD .. كول اوف ديوتي على Very High .. فورت نايت بتشتغل على Medium والـFrame Rate فيها بيبقا من 5 لـ30 فريم في الثانية .. طبعًا بيحصل دروبات او تقسيط فريمات كتير وانت بتلعب لإن اللعبة تقيلة على المعالج ده.
والموبايل مش بيسخن .. متقلقش من النقطة دي .. السخونية المعقولة الطبيعية مع الألعاب التقيلة .
فـ بالمتخصر المفيد .. لو انت مش عاوز اعلى معالج مُمكن وحبيت الشاشة والكاميرات اللي هنا .. فالـ نوت 10 برو هيكون كويس جدًا ليك .. أما لو انت عاوز موبايل تتقل عليه براحتك وتضغط عليه في الإستخدام .. فالانتظار أفضل.
عوامل الأمان وعناصر اخرى :-
البصمة مدمجة بزرار الباور والبصمة سرعتها كويسة ومعقولة جدًا .. في تجميع سريع بيحصل في ايقونات الواجهة المعتاد من شاومي ولكن مش هيعملك ازمة .. الـFace Unlock سرعته ممتازة جدًا برده.
اول ما تفتح الموبايل هتلاقي تحديث MIUI 12.0.10 حجمه 691 ميجا .. اعمله علشان الموبايل يبقى مستقر معاك شوية وتاخد التجربة اللي أنا نقلتهالك في المراجعة هنا.
مفيش لمبة إشعارات بس في Always On Display لعرض الإشعارات اللي جاتلك على الشاشة المطفية .. وطبعًا بيدعم مجموعة المستشعرات اللي شاومي دائمًا بتضيفهم في موبايلاتها :-
- دعم الـNFC
- دعم الـIR Blaster
- دعم تشغيل الـRadio
- دعم ميكروفون اضافي لعزل الضوضاء
- دعم منفذ الـ3.5 مللي والمنفذ من فوق مش تحت
الموبايل بيدعم صوت Stereo عالي ومجسم وهيديلك تجربة ممتازة مع الشاشة الممتازة اللي هنا مع هزه بسيطة اوي اوي في الظهر نتيجة الـBass مش اكتر.
سنسور التقارب هنا سوفت وير مش حقيقي .. أدائه أضعف من نوت 10 العادي .. ممكن الشاشة تفتح وأنت بتعمل مكالمة وهتضطر كل شوية تدوس على زرار الباور .. وانت بتسمع فويس على الواتساب هيضايقك برده .. واتوقع هيوصله تحديث يحسن شوية من التجربة دي لانها مش لطيفة.
نيجي بقى لنقطة الشبكة .. الـWiFi كويس جدًا، اما بالنسبة لشبكة الإتصال فا أنا جربت الموبايل ده بشريحة فودافون وإتصالات و وقت تجربتي كان معايا Note 10 العادي اللي شبكته كانت ممتازة، وكان معايا Poco X3 NFC اللي شبكته مكانتش كويسة .. لاقيت Note 10 Pro بينهم في قوة الشبكة .. أقل شوية من نوت 10 العادي لكن أقوى من Poco X3.
شريحة فودافون على الريدمي نوت 10 برو عملت X معايا مرتين في الشبكة .. وده بطئ من السوفت وير في التحويل من 4G لـ3G وموبايلك هيبقى غير مُتاح في اللحظة دي .. أنصحك تخلي فودافون علطول على الـ3G وانت في مكان مفيهوش شبكة .. وعمومًا لو انت مقلق من الشبكة أستنى نشوف تجارب عدد أكبر من المستخدمين هنا في مصر.
البطارية :-
بطارية بحجم 5000 مللي امبير .. مع تشغيل الـ120 هيرتز ورفع إضاءة الشاشة هتعمل معاك من 5 لـ 6 ساعات شاشة مفتوحة .. وقت قليل شوية على بطارية 5000 مللي امبير.
لو قللت التردد لـ60 هيرتز هتقعد معاك من 7 لـ 8 ساعات شاشة مفتوحة .. ومش هقولك البطارية سيئة يعني .. لا هي مقبولة بس كان في احسن من كدا يا شاومي.
والشاحن المرفق مع الموبايل 33 واط بيشحن البطارية في حوالي ساعة و5 دقايق وقت كويس جدًا.
الكاميرات :-
كاميرا خلفية رباعية الأساسية 108 ميجا بيكسل فتحة عدسة F/1.9 .. والتانية 8 ميجا بيكسل للتصوير الواسع فتحة عدسة F/2.2 .. والتالتة 5 ميجا بيكسل ماكرو والرابعة 2 ميجا بيكسل عزل .. والسيلفي 16 ميجا بيكسل فتحة عدسة F/2.5.
حملت جوجل كاميرا نسخة شغالة كويس جدًا وكمان شغالة على نوت 10 العادي .. تقدر تحملها من هنا هي تاني نسخة علاطول.
طول ما الإضاءة عالية هتاخد بالكاميرا الخلفية صور مليانة تفاصيل .. تشبع مظبوط .. التعليق الوحيد هيكون على لون السماء مش الأفضل .. ولكنه مقبول ومع Touch بسيط تزود Saturation الصورة هتلاقيها بقت ممتازة.
ولما جربت أقارن بين العدسة الـ108 ميجا بيكسل ووضع التصوير العادي .. لاقيت ان فعلًا في الـ108 الصور بتبقى مليانة تفاصيل، بس زي ما قولتلك لازم الإضاءه تكون عالية.
الكاميرا الـUltra Wide معقولة .. ولكن مش أفضل حاجه .. تظل عدسات الـUltra Wide بتاعت سامسونج اوسع وافضل .. والتصوير في إضاءة داخلية مُرتفعة ممتاز برده من ناحية الألوان والتفاصيل .. تقدر فعلا تعتمد عليها.
لما الإضاءة تقل هيبقى عندك اختيارين .. Night Mode شاومي او Night Sight جوجل كاميرا .. الأداء بتاعهم متقارب في الكاميرا الخلفية .. وكنت متوقع أداء أقوى من كده بصراحة في الأوضاع الليلية دي في الإضاءات الضعيفة .. لكن واضح ان المستشعر الكبير بيعاني شوية في الإضاءات الضعيفة.
علشان نقدر نحكم على الكاميرا بشكل صح قارنتها بالـPoco X3 NFC والـReno5 4G .. أكتر ألوان مظبوطة هتلاقيها في ريدمي نوت 10 برو في الإضاءات العالية .. الـReno5 بيفرقع الألوان .. الـX3 NFC مش مستقر .. لكن في بعض الصور لاحظت ان اداء البوكو قريب من أداء نوت 10 برو ودي حقيقة.
في الإضاءه الداخلية هتلاقي Reno5 الصور بتسلع منه شوية من الإضاءه المباشرة .. الـ نوت 10 برو والـ بوكو X3 أفضل، الـX3 NFC بيغير الألوان على مزاجه لكن الـNote 10 Pro بينقل الألوان زي ما هي.
في الـNight Mode بقى تفاصيل الـReno5 قريبة من نوت 10 برو .. والـ Poco X3 NFC أقلهم في النقطة دي، ولكن البوكو دائمًا بيحاول يفرقع الألوان شوية ويرفع الـExposure في الـNight Mode عن الـ نوت 10 برو والـ رينو 5.
السيلفي بقى .. زاوية التصوير بقت اوسع في ريدمي نوت 10 برو ولكن اوسع في الصور بس .. انما في تصوير الفيديو لسه ضيقه .. الصور بتطلع ممتازة حرفيًا في الإضاءات العالية .. في الإضاءات الداخلية ألوان الصورة بتتغير على حسب اضاءات الغرفة .. ولسه التفاصيل مظبوطة.
بورترية في إضاءة داخلية فرق السماء من الارض بين جوجل كاميرا وابلكيشن شاومي .. جوجل كاميرا احسن بكتير .. لما الإضاءة تقل اوي هتعاني شوية او شويتين في تصوير السيلفي وهتحتاج جوجل كاميرا .. ولكن جوجل كاميرا مش هتديلك أحسن الوان فا هتحتاج تعمل Coloring كويس.
لما نقارن صور السيلفي مع الموبايلات التانية .. هنلاقي احسنهم تقريبا ريدمي نوت 10 برو من ناحية الـDinamic Range وظبطة الألوان والتفاصيل .. ولكن زي ما قولتلك هتعاني شوية في التصوير الليلي وهتلاقي رينو 5 يتفوق في جزئية التصوير السيلفي الليلي.
وانا شايف برده ريدمي نوت 10 برو احسن من Poco X3 NFC في السيلفي من ناحية زاوية تصوير أوسع واحسن 20% في الإضاءات العالية .. ولكن بيعاني برده من التصوير الليلي، مفيش تحسن ويظل رينو 5 أفضل في التصوير السيلفي بالليل.
بالنسبة لتصوير الفيديوهات بالموبايل فا هو بيصور لحد 4K بس طبعًا مفيش ثبات إلكتروني على الـ4K .. الثبات الإلكتروني موجود على جودة الـ1080p .. والموبايل فيه ميكروفون اضافي، وبالنسبة لتصوير الفيديوهات بالسيلفي فا بيدعم تصوير بجودة 1080p .. وزاوية التصوير ضيقة جدًا في السيلفي.
شوف تجربة التصوير بالموبايل صور وفيديوهات في فيديو المراجعة !
سعر Redmi Note 10 Pro :-
- النسخة الـ64 جيجا مع 4 جيجا رام بسعر 4222 جنية
- النسخة الـ128 جيجا مع 6 جيجا رام بسعر 4666 جنية
- النسخة الـ128 جيجا مع 8 جيجا رام بسعر 4999 جنية
والموبايل بيدعم تركيب شريحتين إتصال من الجيل الرابع مع كارت ميموري بحجم 512 في نفس الوقت.
الرأي النهائي :-
مميزات Redmi Note 10 Pro :-
- تصميم زجاجي رفيع
- شاشة AMOLED ممتازة جدًا
- مجموعة مستشعرات ممتازة
- صوت Stereo ممتاز
- شاحن سريع 33 وات
- كاميرات خلفية وأمامية ممتازة جدًا
عيوب Redmi Note 10 Pro :-
- بروز الكاميرا الخلفية
- سوفت وير محتاج تحديث علشان يبقى مستقر أكتر
- مستشعر التقارب محتاج تحديث
- شبكة مش الأقوى في الفئة السعرية دي
- كاميرا سيلفي مش الأفضل
- مفيش ثبات إلكتروني في جودة الـ4K
لو عايز أقوى أداء بقى في الفئة دي وأولوياتك الألعاب وان الموبايل يقدملك أداء قوي لفترة طويلة فا استنى Poco X3 Pro اللي هينزل قريب في السوق المصري بمعالج رائد ممتاز في نفس الفئة السعرية.
مقارنة Note 10 Pro مع Galaxy A52 و Reno5 4G قريبًا !
Comments