مراجعة Redmi Note 10 – أفضل موبايل بسعر 3000 جنية ؟!

لما تم الكشف عن سعر Note 10 من شاومي في مصر .. كنت قلقان منه وكنت خايف ان يكون في عيب قاتل في الموبايل ده .. لإن لو مفيش عيب قاتل فا هو هينقل الفئة السعرية دي في حته تانية خالص .. هيقدملك أقوى تجربة بلا شك في الفئة دي .. النهارده في مراجعة Redmi Note 10 كل حاجه عن الموبايل ده بالتفصيل !


التصميم :-

كنت بتتضايق من موبايلات شاومي علشان تقيلة وسُمكها بيكون تخين ؟ دلوقتي نوت 10 بيجي بوزن 179 جرام وتخانة 8.3 مم فقط .. حاجه فوق المُمتازة من شاومي بصراحة إنهم قدروا يقللوا التخانة والوزن بالشكل ده وفي نفس الوقت يحافظوا على البطارية الضخمة، فا كده الموبايل بقى رفيع وأبعاده كويسة ومسكته مُريحة في الإيد.

خامات الموبايل بالكامل من البلاستيك .. من نظرة هو إعتمادي ومش سهل يتكسر .. ومن نظرة تانية الـNote 9S كان زجاج وكان Premium .. بس عامة باقي مواصفات الموبايل ممتازة مش هتخليك تحتاج انه يكون زجاج وكمان كل الموبايلات اللي في الفئة السعرية دي والأغلى كمان من البلاستيك .. فا تمام.

لكن للأسف الموبايل بتظهر فيه البصمات من الهواء حرفيًا .. خاصة في اللون الـGray اللي إستلمناه للتجربة، الموبايل حرفيًا مغناطيس للبصمات علشان لامع .. كنت أفضل لو كان مصنفر مش لامع علشان ميظهرش فيه الخرابيش.

بالنسبة لشكل الكاميرات .. في الأول ممكن تستغربة، كالعادة شاومي بتحب تقدم حاجات مختلفة .. لو تفتكر Redmi Note 9 كان شكل الكاميرات مختلف تمامًا، ودلوقتي Note 10 برده مختلف تمامًا، ولكنه حلو وبيديلك إحساس إنه موبايل غالي.

بروز الكاميرات مش كبير نهائيًا، والجزء البلاستيك او الفريم البارز ده انا شايفه كويس جدًا وتقفيلة معقول .. وأتوقع مش هيحصل أي مشاكل زي دخول التراب وما الى ذلك .. وفي جراب شفاف في العلبة بيغطي البروز.


الشاشة :-

كنت بتتضايق من الشاشات في موبايلات شاومي ؟ نوت 10 بيجي بشاشة Super AMOLED بحجم 6.43 بوصة بدقة FHD+ مع تردد 60 هيرتز وثُقب في نص الشاشة .. وإتأكدت من مصنع الشاشة دي وطلع من سامسونج تمام.

حاجه ممتازة انهم يستخدموا شاشة اموليد في الفئة دي بدال شاشات الـIPS LCD .. سطوع الشاشة ممتاز تحت أشعة الشمس .. تشبع الألوان مش الأفضل لإنها برده AMOLED إقتصادية شوية، بس انت ممكن بنفسك تخلي درجة ألوان الشاشة مُشبعة أكتر من الإعدادات وهتلاقي التجربة بقت أفضل.

حواف الشاشة معقولة جدًا على فئة الموبايل السعرية .. الحافة السفلية كانت ممكن تصغر عن كده بس مش هنعتبرها عيب علشان سعر الموبايل .. الشاشة عليها طبقة حماية من نوع Corning Gorilla Glass الجيل التالت .. والموبايل جاي متركب عليه سكرينة كويسة في العلبة.

كل الموبايلات اللي في الفئة دي شاشات IPS LCD .. مفيش غير Galaxy M21 و Huawei Y8p .. دلوقتي ريدمي نوت 10 في نفس الفئة وشاشة ممتازة متقلش أي حاجه عنهم .. وكمان هي الوحيدة اللي بتيجي كاملة بدون نوتش بتصميم الثُقب .. حقيقي انا مُعجب جدًا بالشاشة اللي هنا !

معلومة بسيطة: .. تكلفة صيانة الشاشة الـAMOLED أغلى شوية لو اتكسرت .. كده كده معاك ضمان 6 شهور إستبدال مجاني للشاشة لاول مرة لو حصلها حاجة .. وبعد كدا التكلفة هتبقى على حسابك.


الأداء :-

معالج جديد من كوالكم .. سناب دراجون 678 تكنولوجيا 11 نانو .. معالج كويس جدًا على فئة الموبايل السعرية.

أداء المعالج ده كويس .. أقل 15% مثلا من سناب دراجون 720G .. وعمومًا أداء الموبايل ده أفضل واحسن بمراحل من Redmi Note 9 القديم من شاومي اللي كنت بشتكي منه.

ولكن اللي ممكن يضايقك في التجربة شوية هو سوفت وير شاومي .. واحنا بنجرب كنا بنجرب على MIUI 12.0.2 .. لسه الواجهة فيها شوية Animations سخيفه .. شوية تقطيعات بتحصل كل فين وفين .. لو انت مجرب موبايل من شاومي فا أنت هتبقى فاهم انا بتكلم عن ايه .. منتظرين نزول MIUI 12.5 اللي المفروض انه هيحل كل المشاكل دي.

لسه برده الإعلانات بتظهر بعد ما تسطب أي برنامج ومنتظرين الواجهة الجديدة اللي المفروض مفيهاش اعلانات .. وعمومًا في نقطة الأداء، مين بسعر 3 الاف جنية هيديلك معالج قوي أصلًا ؟ فا الأداء عمره ما هيكون مشكلة هنا.

نوع ذاكرة التخزين هنا UFS 2.2 .. هي اه قدمتلي سرعات قراءة وكتابة أقل شوية من الطبيعي بتاعت الـ2.2 .. تحسها قريبة من الـ2.1 ولكن برده معقول جدًا على سعر الموبايل.

الأداء الرسومي معقول جدًا .. لعبة ببجي على High HD وهتقدر تلعبها كويس جدًا .. كول اوف ديوتي على Very High وهتقدر تلعب بدون أي مشاكل او تقطيعات على الموبايل.

فورت نايت إشتغلت على الموبايل ده على أقل اعدادات جرافيك وبتشتغل بفريم ريت من 10 لـ20 فريم في الثانية .. رقم قليل طبعا بس كتر خير الدنيا انها اشتغلت.

اللي لاحظته بعد فترة من لعب العاب تقيلة على الموبايل هو إن الظهر سخونيته بتبقى معقولة فا معنديش مشاكل معاه .. بس كمان الشاشة نفسها بتسخن شوية .. هي متعتبرش مشكلة يعني ولكن السخونية ملحوظة في الشاشة.


عوامل الأمان وعناصر اخرى :-

البصمة مدمجة في زرار الـPower .. ولا غاطسة لجوه ولا حجمها كبير .. ومع ذلك مش هتقصر معاك في استخدامها .. وكويس إنها مش تحت الشاشة .. بصمة زرار الباور عملية أكتر في الفئة السعرية دي.

سرعة البصمة معقولة .. ولكن برده الواجهة بتعمل Animation سخيف وفي شوية تقطيعات كده في فريمات الواجهة وانت بتفتح بالبصمة بتبان أكتر لما تفتح وتقفل كذا مره ورا بعض .. والـFace Unlock سرعته معقولة مش وحشة.

الموبايل مفيهوش NFC .. وفيه Always On Display لعرض الأشعارات اللي جاتلك على الشاشة المطفية .. والموبايل كالعاده فيه سنسور الـIR Blaster المُميز من شاومي.

صوت Stereo خلاص اتعودنا عليه من شاومي موجود هنا .. وصوت الموبايل عالي ومجسم ولكن السماعة العلوية جودتها اقل بشكل ملحوظ من السماعة السفليةأ وده هيظهر معاك لما تعلي الصوت على الأخر .. وفي هزه او Vibration في الظهر لما تعلي الصوت على الأخر .. الشيء المعتاد من شاومي.

صوت سماعة المكالمات عالي وكويس والموبايل بيدعم تسجيل المكالمات عن طريق واجهة إتصال جوجل وبيقول للطرف التاني إنك بتسجله .. ومستشعر المقاربة شغال كويس وباقي المستشعرات ضوء وجيرسكوب شغالين كويس.

بالنسبة للشبكات .. الـWiFi كويس جدًا .. وإستغربت ان كمان شبكة الإتصال قوية .. يمكن بقالي فترة مقلتش على شبكة انها قوية .. بس أنا روحت اماكن كتير مفيهاش شبكة والموبايل ده قدرت أعمل منه مكالمات عادي .. والأفضل ننتظر تجارب عدد مستخدمين كبير .. أنا كنت بجرب بشريحة فودافون وشريحة اتصالات والأداء كان كويس جدًا.


البطارية :-

بطارية بحجم 5000 مللي أمبير .. استحملت معايا 7 ~ 8 ساعات شاشة مفتوحة .. عدد الساعات ده كافي ليوم من الإستخدام المتوسط .. ولكن البطارية الـ5000 مللي أمبير المفروض تطلع أداء أقوى من كده .. ولكن ده بسبب السوفت وير اللي مش ذكي أوي في التعامل مع البطارية.

احلى حاجة الشاحن المرفق اللي بقدرة 33 واط .. شحن البطارية فعليا من 15% لـ100% في ساعة وربع .. عمرك شفت شاحن اسرع من كدا بـ3 الاف جنية ؟


الكاميرات :-

الكاميرا الخلفية رباعية .. الأساسية 48 ميجا بيكسل بفتحة عدسة F/1.8 بمستشعر سوني IMX582 .. التانية 8 ميجا بيكسل بفتحة عدسة F/2.2 للتصوير الواسع .. التالتة 2 ميجا بيكسل ماكرو والرابعة 2 ميجا بيكسل للعزل .. والسيلفي 13 ميجا بيكسل بفتحة عدسة F/2.5.

حاولت أسطب جوجل كاميرا ولكن مفيش ولا نسخة إشتغلت معايا حاليًا .. فا إعتمادي كان على تطبيق التصوير بتاع شاومي في مراجعة Redmi Note 10 النهارده.

سوفت وير الكاميرا هنا تحسه شبه سوفت وير الكاميرا اللي كان على Poco X3 لو تفتكر معايا .. الصور فيها Coloring كده شوية .. تحس ان شاومي بتمسي عليك وتقولك انا هلونك الصور لو مش هيضايقك .. النتيجة صور حلوة جدا.

عموما أداء الكاميرا الخلفية الصبح وفي الإضاءات العالية ممتاز جدا جدا .. الكاميرا الـUltra Wide Angle معقولة ولا هي احسن حاجة ولا اوحش حاجة .. في النص الطبيعي بتاع الفئة دي.

اللعب في الصور بيظهر أكتر في الاضاءة الداخلية .. معالجة كبيرة نسبيًا بتحصل على الصور .. ولكن ما زالت التفاصيل معقولة والـSharpness كويس جدا.

الـNight Mode بقى اللي أداءه مش لطيف .. وأنت بتصور بيه بيلقط عدد صور قليل، مش علشان بياخد وقت .. لكن بيطول بس في معالجة الصورة .. والنتايج بتاعته معجبتنيش اوي .. لما ينزل للموبايل ده جوجل كاميرا هتلاقي صورة الـNight Mode أحسن من كده.

السيلفي كالعادة مش حلو أوي .. الـSkin Tone ممسوحة .. وفي Over Sharpness ملحوظ .. ولكن نقدر نقول الأداء معقول في الاضاءات العالية ..ولكن في الاضاءات الضعيفة الأداء ضايع خالص ومفيش تفاصيل .. مفيش صورة .. واساسًا مفيش Night Mode في السيلفي هنا.

بالنسبة بقى لتصوير الفيديوهات بالـ Redmi Note 10 فالموبايل ده بيصور فيديوهات بجودة بتوصل للـ4K .. دي حاجه كويسة اننا بقينا نشوف 4K تاني في الفئة السعرية دي، لكن للأسف مش هتلاقي أي نوع من أنواع التثبيت في الـ4K وده طبيعي في الفئة دي والفئات الأغلى كمان، بتحتاج تنزل الجودة على 1080p علشان تاخد ثبات وحتى ثبات الفيديو الـ 1080p مش الأفضل.

والموبايل بيجي مع ميكروفون اضافي لعزل الضوضاء، وبالنسبة لتصوير الفيديوهات السيلفي فا هو بيصور على 1080p وده الطبيعي بالنسبة للكاميرا السيلفي.

شوف تجربة التصوير بالموبايل صور وفيديوهات في فيديو المراجعة !


سعر Redmi Note 10 :-

  • نسخة 64 جيجا مع 4 جيجا رام بسعر 3000 جنية مصري
  • نسخة 128 جيجا مع 4 جيجا رام بسعر 3300 جنية مصري
  • نسخة 128 جيجا مع 6 جيجا رام بسعر 3600 جنية مصري

والموبايل بيدعم تركيب شريحتين إتصال من الجيل الرابع مع كارت ميموري بحجم 512 جيجا في نفس الوقت.


الرأي النهائي :-

طول فترة إستخدامي للموبايل قبل ما اقدملكم مراجعة Redmi Note 10 النهارده كنت مستني أقابل عيب في الموبايل .. زي ما قولتلك في بداية المقال انا قلقت من الموبايل لما عرفت سعره بالمواصفات اللي بيقدمها دي .. لكن فعلًا الموبايل مظهرش فيه عيب يبرر السعر ده، حتى الشبكة كانت ممتازة على غير العادة من شاومي !

مميزات Redmi Note 10 :-

  • بطارية ضخمة مع شحن سريع 33 وات
  • موبايل رفيع وخفيف وتصميم شيك
  • شاشة Super AMOLED ممتازة بدقة عالية وسطوع عالي
  • أداء محترم من المعالج الـSD678
  • صوت Stereo
  • مستشعر الـIR Blaster

عيوب Redmi Note 10 :-

  • كاميرا سيلفي أداءها مش الأفضل
  • الـNight Mode في الكاميرا الخلفية محتاج تحديث
  • مفيش دعم لخاصية الـNFC
  • البصمات والخدوش بتظهر على ظهر الموبايل بسهولة
  • سوفت وير شاومي مش الأفضل
  • اداء البطارية مش الأفضل ولكنه ما زال مقبول في حدود 7 ساعات شاشة مفتوحة
  • سخونية بسيطة زائدة في الشاشة اثناء لعب الالعاب التقيلة ولكن السخونية مش مؤثرة بشكل كبير
  • ضعف تثبيت الفيديوهات على جودة 1080p

الموبايل صفقة رابحة خصوصا أقل نسخة 64+4 بـ 3000 جنية .. اما النسخة العالية منها فسعرها نفس سعر Poco X3 NFC الي تردد شاشته اعلى ( بس نوع الشاشة نفسه أقل ) مع معالج أقوى وكاميرات أفضل .. فـ خلي بالك وانت بتختار وحدد اولوياتك !

قد يعجبك أيضا...

Comments

جاري التحميل...