مراجعة Redmi Note 11 – الأفضل من شاومي في الفئة الإقتصادية !

شركة شاومي عودتنا انها دائمًا بتقدم كاميرات وأداء ممتازين جدًا في موبايلاتها .. وعلشان كده احنا في موبيزل بنركز في تجاربنا لـ موبايلات شاومي على النقط دي .. والنهارده هنقدملكم مراجعة Redmi Note 11 الجديد من شاومي، وهنعرف هل شاومي لسه زي ما هي في الأداء والكاميرات ولا اتغيرت.

التصميم :-

تصميم Redmi Note 11 الجديد مختلفش كتير عن الأجيال اللي فاتت .. من بعيد لو شوفته هتعرف ان الموبايل ده موبايل ريدمي من شركة شاومي، تقليدي شوية.

الفكرة هنا ان الظهر مش لامع .. تحسه مطفي شوية خصوصًا في اللون الأسود .. وكده الخدوش والبصمات مش هتبان فيه بسهولة .. بس مع ذلك البصمات ممكن تظهر فيه برده.

الكاميرات كلها جوه المستطيل حتى الفلاش .. والبروز بتاع الكاميرات معقول .. وفي جزء صغير كده حوالي ربع مللي من فريم الكاميرات الومنيوم .. هي صغيرة اوي بس بصراحة مدية لمسه لطيفة لشكل الكاميرات.

الموبايل وزنه كويس جدا .. حوالي 179 جرام والتخانة بتاعته 8.1 ملم .. والخامات أكيد كلها بتيجي من البلاستيك .. وفي جراب شفاف جاي مع الموبايل في العلبة.

المختلف هنا عن الأجيال اللي فاتت .. ان الفريم بقى أعرض شوية .. بيقدم إحساس ان الموبايل Boxy شوية في إيدك .. لكن مش هتحس ده غير لما تمسك الموبايل في إيدك .. وعمومًا هي حركة لطيفة ومديالك إحساس إن مسكة الموبايل في الأيد احسن وان الموبايل مش هتيزحلق من إيدك بسهولة.

الشاشة :-

من أقوى المميزات اللي ممكن تشتري الموبايل ده علشانها هي الشاشة .. شاشة AMOLED ممتازة 6.43 بوصة بدقة FHD+ بتردد 90 هيرتز مع ثُقب صغير للكاميرا السيلفي.

الشاشة ألوانها مُشبعة .. وسطوعها عالي .. وفي نفس الوقت دقة عالية وتردد سريع 90 هرتز .. Package ممتازة جدًا في الفئة السعرية دي .. فعلا أهم ميزة في الموبايل واللي ممكن تشتريه عشانها.

أنا بس عندي ملحوظة ان الشاشة بتعدل شوية في الألوان اللي بتعرضها .. مش دقيقة أوي .. ولكن ممكن تعدل وتتحكم براحتك في درجة تشبع الألوان من إعدادات الشاشة .. ودي ميزة موجودة دائمًا في كل موبايلات شاومي حتى الإقتصادية .. وعمومًا الملحوظة دي مش هتاخد بالك منها أوي إلا لو بتدقق وبتقارن.

لو انت بتستخدم الموبايل كتير تحت الشمس أو لو بتتفرج على محتوى كتير على الموبايل .. فأكيد لازم تفكر في ريدمي نوت 11 .. والشاشة محمية بـGorilla Glass الجيل الثالث ومتركب عليها سكرينة.

الأداء :-

موبايل Note 11 بيجي بمعالج كوالكوم سناب دراجون 680 ثماني النواة بتكنولوجيا 6 نانو ميتر.

في الإستخدام العادي زي التصفح وفتح برامج والتنقل بين البرامج بيكون أداءه كويس ونشيط .. وأحسن بشكل ملحوظة عن ميدياتك G80 و G88 اللي موجودين في نفس الفئة السعرية.

وده مش معناه ان اداء نوت 11 رهيب .. احنا بنتكلم في حدود الفئة السعرية دي، الإستخدام معقول ومش هيدايقك في الإستخدام اليومي، ولكنه مش الأداء المثالي السريع.

الأداء الرسومي ممكن يدايقك شوية، ببجي أخرها Balanced Medium، والـGraphic مش أحسن حاجه، والفريمات مش أحسن حاجه، واضح ان الأداء الرسومي للمعالج ده مش قوي.

بالنسبة للسخونية فا المعالج سخونيته محدودة جدًا وممتازة جدًا، بفضل الـ6 نانو بقى .. ومش بيحصل له اختناق لما تضغط عليه، وإستهلاكه للبطارية فعلًا ممتاز.

عوامل الأمان وعناصر اخرى :-

بصمة موجودة على زِر الباور أداءها حلو جدًا وسريع ومفيش أي تجميع للأيقونات .. والـFace Unlock سريع ومفيهوش أي مشاكل.

الموبايل شغال بواجهة MIUI 13 مع Android 11 .. وفي تحسن كبير في التهنيج والتقطيع في الواجهة، والموبايل للأسف مفيهوش مستشعر الـNFC.

لكن في ميكروفون اضافي لعزل الضوضاء، في مستشعر IR Blaster، في ميزة Always On Display لعرض الإشعارات اللي بتيجي على الشاشة وهي مقفولة.

صوت الموبايل Stereo وتجربة الصوت ممتازة جدًا، صوت عالي والـBass محترم.

مستشعر التقارب مش حقيقي للأسف، بيقفل الشاشة في الوقت المطلوب بدون مشاكل، لكن ممكن يهنج في فتح الشاشة، وممكن الشاشة تفتح وانت بتتكلم لو عملت حركة غلط مثلًا.

بالنسبة لشبكات الإتصال والـWiFi .. فا الأداء ممتاز، أكثر من ممتاز، حقيقي انبهرت بأداء الشبكات خصوصًا فودافون من ناحية المكالمات والـData.

البطارية :-

بطارية 5000 مللي امبير ممتازة، المعالج فعلًا موفر جدًا في الإستهلاك .. مع تشغيل الـ90 هيرتز ممكن تدخل في 8 ساعات شاشة مفتوحة، وأحيانًا أكثر.

معاك شاحن 33 وات في العلبة بيشحن البطارية بالكامل لـ100% في حوالي ساعة فقط، شاحن سريع وبطارية ممتازة.

الكاميرات :-

كاميرا خلفية رُباعية، الأساسية 50 ميجا بيكسل بفتحة عدسة F/1.8، الثانية 8 ميجا بيكسل F/2.2 للتصوير الواسع، الثالثة 2 ميجا بيكسل Macro والأخيرة 2 ميجا بيكسل للعزل .. السيلفي 13 ميجا بيكسل بفتحة عدسة F/2.4.

الكاميرا الخلفية أداءها مقبول، بتطلع كمية تفاصيل معقولة .. لكن لازم تثبت إيدك كويس وانت بتصور علشان الصورة متطلعش مهزوزة، معالجة الصور أحيانًا بتكون كويسة وأحيانًا لأ، هتحس انك محتاج تزود تشبع الألوان .. التصوير في إضاءه داخلية وإضاءه ليلية معقول وبيطلع كمية تفاصيل كويسة.

بالنسبة لأداء الكاميرا السيلفي فا هو مش لطيف، التفاصيل في إضاءه عالية معقول بس الألوان مش مظبوطة .. وفي الـInDoor لازم اضاءه شديدة عليك علشان تاخد تفاصيل، ده نفس سيلفي Redmi Note 10.

بالنسبة لتصوير الفيديوهات فالموبايل بيدعم تصوير بجودة 1080p مع 30 فريم في الثانية، مفيش 4K للأسف .. في ثبات إلكتروني كويس، في ميكروفون اضافي لعزل الضوضاء.

سعر Redmi Note 11 :-

• نسخة 64 جيجا مع 4 جيجا رام بسعر 3400 جنية
• نسخة 128 جيجا مع 4 جيجا رام بسعر 3700 جنية
• نسخة 128 جيجا مع 6 جيجا رام بسعر 4000 جنية

دعم تركيب شريحتين إتصال من الجيل الرابع مع كارت ميموري بحجم 1 تيرا.

الرأي النهائي :-

مميزات Redmi Note 11 :-

• أداء يومي ممتاز ومستقر
• شاشة هي الأفضل على الإطلاق في الفئة دي
• صوت Stereo قوي جدًا
• بطارية أداءها ممتاز وشاحن سريع
• بصمة سريعة ودقيقة جدًا
• ميكروفون عزل الضوضاء، مستشعر IR Blaster

عيوب Redmi Note 11 :-

• مستشعر التقارب مش دقيق
• أداء الكاميرا الأمامية متواضع جدًا
• مفيش تصوير فيديوهات 4K
• الأداء الرسومي في الألعاب ضعيف