مراجعة Xiaomi Redmi Note 9s – بعد التجربة .. هل يستحق سعره ولا مقلب ؟

اي موبايل جديد من شاومي ينزل مصر .. لازم يعمل ضجة كبيرة .. طبيعي تلاقي ناس كتير بتمدح جدًا جدًا في الموبايل وناس تانية بتنتقضه جدًا .. فاللي هو انت مش بتبقى فاهم، هو في اية ؟

عمومًا خلينا نشوف اداء موبايل شاومي الجديد في الفئة المتوسطة Xiaomi Redmi Note 9s بعد فترة من الاستخدام .. هل فعلًا الموبايل يقدر يسد وينافس في الفئة السعرية المُمَيزة اللي شاومي حطت الموبايل ده فيها .. ولا الموبايل فيه عيوب تمنعك انك تشتريه ؟!

التصميم :-

زي ما شاومي معودانا على التصميم الزُجاجي في سلسلة ريدمي نوت مؤخرًا .. فالـNote 9s لسه مكمل في المشوار ده .. تصميم زجاجي شيك عليه حماية Corning Gorilla Glass الجيل الخامس .. مع فريم من البلاستيك.

اللون اللي جربناه هو اللون الأزرق، لون ممتاز .. مش هقدر اقولك اكتر من كده .. اللون ده بيتغير على حسب درجة الضوء اللي جايه عليه .. وكل درجات لونة عجباني بصراحة .. وبرده شوفه في الطبيعة وأحكم عليه بشكل أفضل.

واللي مكمل شياكة التصميم ده .. شكل رصة الكاميرات الجديدة الموجودة في مربع في نص الظهر .. التجديد حلو ومطلوب .. وعاجبني ان شاومي غيرت شكل الموبايل ده خالص عن الأجيال القديمة.

الموبايل وزنه كبير 209 جرام وتخانته 8.8 ملم وابعاده كبيرة علشان شاشته كبيره .. فالموبايل حجمًا كبير وصعب الإستخدام بإيد واحدة.

الكاميرا الخلفية بارزة كتير عن جسم الموبايل .. وشاومي حاطه جراب شفاف في العلبة ليه شفة كدا من عند الكاميرات علشان تغطي البروز بتاعها.

الشاشه :-

شاشة كبيرة حجمها 6.67 بوصة من نوع IPS LCD بدقة FHD+ .. شاشة عملاقة فعلًا .. والسيلفي هنا محطوط في ثقب كبير شوية في اعلى منتصف الشاشة.

مش مرتاح لشكل الثقب ده، مش عارف ليه .. حاسه كبير شوية .. كان محتاج يصغر شوية او يروح على الشمال أو اليمين علشان عيني ما تفضلش بصاله كل شوية .. عمومًا لو مش عاجبك شكله ممكن تلغيه وتضيف شريطه سودا من اعدادات واجهة الموبايل.

إتأكدت بنفسي من مصنع الشاشة .. هي مختلفة عن المصنع اللي كان بيعمل شاشات الـNote 7 والـNote 8 العادي .. ويارب متظهرش في الشاشة ديه مشاكل التطبيع بعد فترة كبيرة من الاستخدام .. اما بالنسبة لفترة استخدامي للموبايل فمظهرش معايا اي مشاكل ولا تطبيع ولا اي حاجه.

وبالنسبة لنقطة تسريب الإضاءة اللي البعض بيقولوا عليها .. فوصل تحديث للموبايل ظبط موضوع الشاشة جدًا .. يعني دلوقتي لما ابص على اطراف الموبايل واكون مشغل خلفية سودا أو خضرا على الموبايل .. مش بحس بمشكلة كبيرة .. وعمومًا الشاشات الـIPS LCD طبيعي تلاقي منها تسريب اضاءة خفيف كده .. وفي Shadow او ضل خفيف اوي حوالين الثقب، مش هيضايقك متقلقش .. انا بس اتكلمت في النقط ديه لاني لاقيت كلام كتير عنها.

اما بالنسبة لرأيي في الشاشة .. فهي مش أفضل شاشة .. ولا هي شاشة اموليد ولا بتدعم 90 هيرتز .. الألوان فاتحة زيادة عن الطبيعي .. بس يعني هي مقبولة وتقضي الغرض بالسعر بتاعها .. وممكن تلعب في درجة الوان الشاشة براحتك لحد اما تلاقي الدرجة اللي تريح عينيك .. والسطوع بتاع الشاشة مقبول جدا تحت الشمس مفيهوش مشاكل.

وأخيرًا .. الشاشة عليها طبقة حماية Corning Gorilla Glass 5 .. ولأول مرة من شاومي الاقي الموبايل متركب عليه سكرينه لما اطلعه من العلبة.

الأداء :-

وحاليا الـRedmi Note 9s هو أرخص موبايل بمعالج كوالكوم سناب دراجون 720G .. معالج ممتاز جدًا بيجي معمارية 8 نانو.

اداء المعالج ده كويس جدا جدا .. يعني انا شايف المعالج ميفرقش حاجة اوي عن اداء معالج سناب دراجون 730G الموجود في Mi 9T وOppo Reno 2.

بس الاداء مش بيتوقف فقط على المعالج !! .. الواجهة هي اللي بدورها تحسسك بقوة المعالج أو لا .. لسه مش مستقرة أوي .. ساعات بيحصل فيها Lag او تهنيجات خفيفة اوي .. ساعات بحس بتقطيعات كده .. مفتقد إستقرار وسرعة واجهة شاومي اللي كلنا عارفينها .. عمومًا منتظرين الواجهة الجديدة MIUI 12 ونشوف ادائها هيقول ايه على الموبايل ده.

اما بالنسبة لأبلكيشن الكاميرا .. كان بيعلق معايا ساعات وبحتاج اقفله وافتحه او ارستر الموبايل كله .. واعتقد كل المشاكل ديه هتتحل بتحديث سوفت وير.

ده ميمنعش ان اداء الموبايل في المجمل كويس جدا .. انا بس بنقلكم التجربة الكاملة اللي حصلت معايا.

الأداء الرسومي كويس جدا .. ببجي اشتغلت على High HD .. المعالج اللي هنا ده اقصى حاجه بيوصلها في الاعدادات .. واللعبة شغالة زي الفل.

ولعبة كول اوف ديوتي اشتغلت على اعدادات جرافيك Very High واللعبة برده بتشتغل زي الفل .. واخيرًا فورت نايت شغالة بشكل رسمي على اعدادات جرافيك Medium وهتقدر تلعب اللعبة بدون اي مشاكل.

بالنسبة للسخونية بقى .. فالموبايل ده السخونية بتاعته قليلة بفضل تكنولوجيا التصنيع بتاعت المعالج .. معمارية 8 نانو ميتر .. بيسخن أقل حاجة بسيطة من الـHelio G90T الموجود في الـNote 8 Pro والـRealme 6 .. ويمكن تكون ديه نقطة قوة في وجه نظر البعض من ناحية اداء السناب دراجون 720G .. بس منقدرش ننسى ان الـHelio G90T بيقدر يشغل العاب على اعدادات جرافيك اعلى من الـ720G.

ولو انت بتقارن بين الـRedmi Note 9s والـRedmi Note 8 Pro .. فإنت محتاج تكمل المراجعة للأخر.

عوامل الأمان وعناصر اخرى :-

شاومي نقلت البصمة اللي في الضهر وحطتها على زرار الباور .. البصمة سريعة مفيهاش مشاكل .. بس ساعات لو الموبايل في جيبي وجيت اطلعه والمس الباور مش بيفتح .. ساعات بحتاج ادوس على الزرار الأول .. مش من مجرد لمسة .. اما الـFace Unlock فهو سريع ومفيهوش اي مشاكل.

الموبايل جاي Android 10 مع واجهة MIUI 11 .. اللي بتدعم الـDark Mode .. وبتدعم عمل نسختين من كل الـ برامج اللي على الموبايل.

للأسف لسة الموبايل جاي ببرنامج اتصال جوجل .. اللي هيمنعك من انك تسجل المكالمات .. الميزة ديه طلعت مهمة اوي عندكو مش عارف ليه .. انا عمري ما فكرت اسجل لحد .. بس بالنسبة للـWating فهو شغال عادي وبيظهرلك ان الشخص اللي بتطلبه Waiting.

الموبايل فيه ميزة لطيفة بردة وهي الـHaptic Feedback .. لما تكتب على الكيبورد او تدوس على ازرار التحكم بالشاشة تحت .. تلاقي هزة بسيطة كدا في الشاشة .. انصحك تجربها.

والموبايل ده مميز نفسه بـ3 حاجات عن المنافسين .. وجود لمبة اشعارات .. هي نورها مش قوي اوي بس موجودة .. ومستشعر الـIR Blaster بتاع التحكم في الاجهزة الكهربائية زي ما متعودين من شاومي .. و وجود مايكروفون اضافي بتاع عزل الضوضاء .. كل ده موجود في الموبايل .. وكل المستشعرات شغالة في الموبايل بدون مشاكل.

بالنسبة للصوت فهو جاي من سماعة واحدة تحت على اليمين .. الصوت مجسم والـBass فيه حلو جدا .. ودرجة العلو بتاعته مقبوله جدا.

صوت سماعة المكالمات .. عالي اوي وحلو جدا جدا .. وصوت سماعات الأذن بردة ممتاز جدا والصوت اللي بيطلع منه حلو جدا.

اما بالنسبة لقوة الشبكة .. جربت الموبايل في اماكن كتير الشبكات فيها ضعيفه .. لقط معايا مكالمات وMobile Data بدون اي مشاكل كبيره .. بس في مرتين بالعدد الموبايل سقط فيهم شبكه ورجع تاني بسرعة في ثانيتين تلاتة علطول.

فأنا هدي الموبايل ده تقييم فوق المتوسط من ناحية الشبكات .. وهعتمد اكتر على تجاربكم بعد شراء الموبايل علشان اخلي التقييم ممتاز.

بالنسبة لقوة واستقرار شبكات الـWiFi مقابلنيش معاه مشاكل قوي .. والمدى بتاعه محترم .. ولو اني لازم وانا بعمل Download او بحمل ملف كبير اكون فاتح شاشة الموبايل لانها اما بتتقفل ممكن الموبايل ينفض وميكملش التحميل.

البطارية :-

بطارية الموبايل ضخمة بتيجي بحجم 5020 مللي أمبير .. نقطة تنافسية مهمة جدا للـRedmi Note 9s .. البطارية ديه انا فضتها وشحنتها اكتر من مرة .. متوسط عمر البطارية من 7 لـ10 ساعات شاشة مفتوحة على حسب الاستخدام.

وده وقت ممتاز جدا جدا جدا في موبايل بالامكانيات ديه .. وده طبعا بفضل المعالج الـ8 نانو اللي بيوفر جامد في الإستهلاك مع البطارية اللي حجمها ضخم.

منفذ الشحن USB Type C .. بس للأسف الموبايل بيدعم شحن سريع بقوة 18 وات .. الشاحن مكتوب عليه انه بيقدر يشحن كحد اقصى 22.5 وات .. بس هيشتغل بدون مشاكل معاك على الـNote 9s على 18 وات وهيشحن البطارية في حوالي ساعتين إلا ربع.

الكاميرات :-

الموبايل بيجي بـ4 كاميرات في الظهر .. الأساسية 48 ميجا بيكسل بفتحة عدسة F/1.8 بمستشعر سامسونج GM2 .. والتانية 8 ميجا بيكسل للتصوير الواسع بفتحة عدسة F/2.2 والتالتة 5 ميجا بيكسل Macro .. والرابعة 2 ميجا بيكسل للعزل.

والسيلفي الموجود في ثُقب في نص الشاشة بيجي بدقة 16 ميجا بيكسل مع فتحة عدسة ديقة جدًا F/2.5 !

بغض النظر عن الأرقام .. احنا جربنا الكاميرات كويس جدًا وصورنا اكتر من 200 صوره .. وكمان حملنا تطبيق جوجل كاميرا اللي شغال بكل كفاءه على الموبايل.

اما بالنسبة للتجربة الفعليه للكاميرات، بالنسبة للتصوير في الشمس بالكاميرا الأساسيه فهنلاقي صوره ممتازه من حيث الوان البشره والتفاصيل وكمان في الـPortrait بيطلع العزل ممتاز .. ولما تستخدم جوجل كاميرا بقى هتلاقي نتيجة افضل في الوان البشره بفرق واضح .. والموبايل ده فيه Cinematic Mode وده بيظهرلك لما تفتح البورتريه وده بيطلع صوره واسعه مع عزل الخلفيه للشخص اللي ظاهر فيها .. ميزة لطيفة جدًا انصحك تجربها.

والتصوير في الضل هتلاقي ان الوان البشره مش الأفضل وكمان العزل مش مظبوط .. بس بإستخدام Google Camera هتاخد نتيجة ممتازه جدًا في التفاصيل والوان البشره .. والتصوير في مكان مُغلق بقى هنلاقي ان الصوره كويسه كتفاصيل بس الوان البشره مش افضل حاجه برده.

وبالنسبة للعدسة الـUltra Wide فا هي عادية مفيهاش جديد يتقال .. يمكن الوانها مش الأفضل، وبالنسبة للتصوير في الإضاءه الضعيفه فا هتلاقي ان الـNight Sight بتاع جوجل كاميرا بيتفوق على الـNight Mode بتاع ابلكيشن الموبايل نفسه.

ولما حطيت الـNote 9s جنب الـNote 8 عشان اشوف الـUpgrade اللي حصل في الكاميرا .. لأ في فرق فعلًا في الكاميرات في اغلب اوضاع التصوير .. التفاصيل احسن والألوان احسن والصوره بشكل عام افضل.

اما بالنسبة للتصوير السيلفي فا هنلاقي برده وضع الـCinematic Mode وده بيطلع صوره الى حدٍ ما كويسه بالسيلفي بس كعزل مش الأفضل .. والتصوير السيلفي عمومًا الوان البشره مبتبقاش الأحسن والوان الصوره عمومًا مش الأفضل برده .. اما بقى لما بستخدم الـGoogle Camera بلاقي فعلًا صوره محترمه جدًا من حيث الألوان وخصوصًا لون البشره.

اما بقى بالنسبة لتصوير الفيديوهات .. فالموبايل بيقدر يصور بجودة بتوصل لـ4K مع دعم لتصوير الـSlow Motion .. والموبايل بيدعم الثبات الإلكتروني بس اخره على جودة الـ1080p، مفيش ثبات على الـ4K وده طبيعي في الفئة السعرية دي .. والموبايل فيه مايكروفون اضافي لعزل الدوشه من الخلفيه.

في تصوير الفيديوهات ممكن تصور بالـUltra Wide معاك لحد 1080p بس مينفعش تنقل من العدسة الأساسية ليها .. لازم تقفل الفيديو وتبدأ فيديو جديد .. وكمان في وضع الـCinematic Mode اللي لسه مكمل لحد دلوقتي وده بيضيف شريط اسود تحت وفوق كده بيحسسك انك بتصور بكاميرا سينيما.

ممكن تشوف الصور و الفيديوهات المتصورة بالموبايل في فيديو المراجعة في أخر المقالة .

سعر الموبايل :-

الموبايل بيجي للأسواق المصرية بنسختين :-

• الأولى بمساحة تخزين 64 جيجا مع 4 جيجا رام بسعر 3333 جنيه مصري
• الثانيه بمساحة تخزين 128 جيجا مع 6 جيجا رام بسعر 3777 جنيه مصري

وينفع تركب كارت ميموري بحجم 512 جيجا وشريحتين اتصال مع بعض في نفس الوقت .. واخيرا شاومي بتقدم مكان ثلاثي للشرائح في فئة ريدمي.

الرأي النهائي :-

مميزات الموبايل :-

• افضل تصميم وخامات في الفئة السعرية دي
• معالج ممتاز على المدى البعيد مع سخونية مقبولة جدًا
• بطارية ضخمة هي الأفضل في الفئة السعرية دي
• كاميرات محترمة على قدر عالي من المُنافسة خاصًة بإستخدام جوجل كاميرا
• لمبة الإشعارات
• مستشعر الـIR Blaster

عيوب الموبايل :-

• سوفت وير مش مستقر ومحتاج يتظبط
• تهنيجات او Lag خفيف في سوفت وير الكاميرا
• كنت محتاج شاحن اسرع من ده واللي هنشوفه في Note 9 Pro
• حجم الموبايل كبير

وضع نُسخ الموبايل في السوق المصري حاليًا :-

• النسخة الـ64 جيجا مع 4 جيجا رام من الموبايل ده ممتازه وملهاش مُنافس حاليًا .. وهي بكل تأكيد أفضل من الجيل القديم اللي هو Redmi Note 8
• النسخة الـ128 جيجا مع 6 جيجا رام فهي بسعر قريب من الـNote 8 Pro .. اللي من وجهة نظري لسه بيقدم قيمة قوية جدًا وليه نقط تفوق على الـNote 9s .. لأن النوت 8 برو بكاميرا خلفية أقوى 64 ميجا بيكسل مع معالج بيقدر يشغل العاب باعدادات جرافيك أعلى
• وكمان النسخه الكبيره بسعر قريب جدًا من الـRealme 6 .. وعلشان نحسم الأمر بينهم، إستنى مقالة مقارنة قريب جدا فيها أدق التفاصيل بين الـNote 9s والـRealme 6

فيديو المراجعة :-