مقارنة Redmi Note 9s مع Realme 6 – تشتري مين فيهم ؟ و ليه ؟

انا عارف انك محتار بين أهم موبايلين نزلوا السوق المصري دلوقتي وهما Realme 6 وRedmi Note 9S .. وعشان الكلام كتر اوي عليهم .. النهارده هعملك مقارنة شاملة ما بينهم من غير لف ودوران .. علشان تقدر تختار موبايلك المناسب بينهم من غير ما حد يضحك عليك.

التصميم :-

الـNote 9S .. تصميم الظهر من الزجاج بفريم بلاستيك مع حماية Corning Gorilla Glass الجيل الخامس .. مع شكل جديد لرصة الكاميرات وتصميم الظهر عمومًا .. وبالتالي هديله نقطة تفوق على الـRealme 6 اللي جاي بتصميم بلاستيكي .. ورصة الكاميرات فيه تقليدية مفيهاش تجديد .. في بس حركة في الظهر كدا مع تحرك الضوء عليه.

اما بالنسبة للمسكة في الإيد .. فهنا هدي نقطة التفوق للريلمي 6 لإن حجمه أقل ووزنه أخف .. ومسكته في الإيد احسن بفرق ملحوظ عن الـRedmi Note 9S.

بالنسبة لنقطة بروز الكاميرات بقى .. فهنا الموبايلين فيهم بروز كبير .. بس بروز الـNote 9S أكبر .. ومع ذلك الجرابات اللي في العلبة بتقدر تغطي البروز في الموبايلين بدون اي مشاكل.

الشاشة :-

شاشة الـNote 9S بتيجي حجمها 6.67 بوصة من نوع IPS LCD بدقة FHD+ بثقب في منتصف اعلى الشاشة وبتردد او معدل تحديث تقليدي 60 هيرتز.

اما شاشة الـRealme 6 بتيجي بحجم 6.5 بوصة من نوع IPS LCD بدقة FHD+ بثقب على الشمال وبتردد اعلى 90 هيرتز.

لو هنحسبها من ناحية تردد الشاشة فهيكون طبعًا Realme 6 انعم حاجة بسيطة في الـScroll السريع اوي .. مش هتحس بتقطيع في الشاشة .. بس زي ما قولتلك في مراجعة Realme 6 .. الفرق مش Wow .. امال فين الفرق الحقيقي يا عم ؟

الفرق في Quality او جودة الشاشة نفسها .. شاشة الـRealme 6 الوانها احسن وتشبعها أفضل .. وقلت في مراجعة Note 9S ان الشاشة بهتانة شوية .. يمكن مش هتقدر تعرف بهتانه ولا لأ .. غير لما تحطها جنب شاشة موبايل تاني .. اما بالنسبة للسطوع تحت الشمس .. فالموبايلين بنفس درجة السطوع مش هتحس بفرق كبير ما بينهم.

وبالنسبة للحماية على الشاشة .. الـNote 9S بيجي بطبقة Corning Gorilla Glass الجيل الخامس .. والـRealme 6 بيجي بالجيل التالت .. والموبايلين بيجوا في العلبة متركب عليهم سكرينة.

وأه قبل ما انسى .. تقدر تلغي شكل الثُقب من الـNote 9S من اعدادات الواجهة .. انما الـRealme 6 مفيهوش الـOption ده كالعادة.

الأداء :-

بص يا سيدي .. الـRealme 6 بيجي بمعالج ميدياتك Helio G90T بمعمارية 12 نانو .. انما الـRedmi Note 9S بيجي بمعالج كوالكوم سناب دراجون 720G بيشتغل بمعمارية 8 نانو.

الكلام كتير أوي على المعالجات دي .. وانا هختصر عليك وقتك وهقولك المفيد .. الـG90T كنا مقلقين منه اما كان في الـNote 8 Pro .. بس دلوقتي وبعد اكتر من 6 شهور من نزول الموبايل .. مفيش شكاوي منه وشغال كويس مع الناس .. هو بس بيسخن زياده لما تقرص عليه في الالعاب .. بس مش بيقصر على اي حاجة نهائيًا.

ويجماعة اي موبايل بيسخن في الألعاب التقيلة .. بس السخونية درجات .. والمهم ان اقصى درجات سخونية الـG90T بعد التحديثات .. مبقتش تخليه يسخن أوفر.

اما بالنسبة للسناب دراجون 720G .. فده معالج جديد وبعد التجربة هو شبه الـ730G القديم .. معالج هادي كدا في نفسه ومستقر الي حد كبير .. بس كوالكوم مش فاتحاله المجال في الأداء الرسومي اوي ومعماريته أحدث .. وبالتالي انت هتاخد من المعالج ده اداء رسومي أقل حاجة بسيطة من الـG90T بس مع سخونية أقل بعد فترة من لعب الألعاب.

الكلام ده ملخص تجربتي لموبايلين فيهم الـG90T وهما الـRealme 6 والـNote 8 Pro .. وموبايلين فيهم السناب دراجون 720G وهما الـNote 9S والـRealme 6 Pro.

وبالنسبة للأداء الفعلي للموبايلين .. الـRealme 6 ناعم اكتر وسلس اكتر لإن الواجهة مستقرة وناعمة اكتر والـAnimation بتاعها خفيف اوي عن واجهة شاومي اللي لسه الـAnimations عندها مش مظبوطة اوي وساعات كنت بحس بتقطيعات خفيفة اوي كدا.

وكمان لما قست سرعة ذاكرة التخزين الموجودة في كل موبايل لاقيت الـRealme 6 متفوق بشكل واضح عن الـNote 9S وده انعكس على الاداء بردة.

اما بالنسبة للأداء الرسومي .. لو هنتكلم على اعدادات تشغيل الألعاب الرسميه بدون برامج ترفع منها .. لعبة PUBG بتشتغل على Realme 6 على Ultra HDR .. اما على الـNote 9S فا هي بتشتغل على High HD.

بالنسبة للعبة Call Of Duty فهي بتشتغل على الموبايلين على Very High للجرافيك وللفريمات .. وبالنسبة للـFortnite فهي بتشتغل على اعدادات جرافيك High على الـRealme 6 اما الـNote 9S بيشغلها على اعدادات جرافيك Medium.

بالنسبة لأداء الألعاب فهي بتشتغل كويس جدًا وبكفاءه على أعلى اعدادت متوفره في كل موبايل .. يمكن فورت نايت بتشتغل احسن حاجه بسيطه على الـRealme 6.

وبإختصار الـRealme 6 اداءه احسن في المجمل .. كواجهة وتشغيل العاب .. اما الـNote 9S فهيكون افضل على المدى البعيد بفضل معماريته الأقل واللي مخليه سخونيته اقل.

عوامل الأمان وعناصر اخرى :-

الموبايلين فيهم بصمة في الجمب على زرار الباور .. بس بصمة Realme 6 اسرع بفرق بسيط اوي .. والـFace Unlock برده اسرع في الـRealme 6 حاجه بسيطه .. ريلمي هنا متفوقه في سرعة عوامل الأمان.

الموبايلين بيجو شغال عليهم Android 10 من العلبه .. والموبايلين بيدعموا الـDark Mode عشان تقلب القوائم للإسود .. بس برده الـDark Mode على الـRealme 6 بيكون احسن لإن الإسود فيه واضح وصريح علشان درجات الوان الشاشة مظبوطه أكتر زي ما قولت فوق.

الـRedmi Note 9S تقدر تعمل نسختين من كل البرامج اليي على الموبايل .. انما الـRealme 6 برامج السوشيال بس كالعادة.

والـNote 9S بيتفوق في 3 حاجات مش موجودين في الـRealme 6 .. مستشعر الـIR Blaster اللي بيتحكم في الأجهزة الكهربائية .. لمبة إشعارات بتنور باللون الأبيض ونورها خفيف .. مايكروفون اضافي لعزل الضوضاء .. كل ده مش موجود في Realme 6 .. والموبايلين فيهم كل المستشعرات وكلها شغاله زي الفل.

بالنسبة للصوت بقى .. صوت Realme 6 اعلى حاجه بسيطه اوي .. بس صوت الـNote 9S مجسم اكتر .. وانا هختار وهفضل اسمع صوت الـNote 9S .. وصوت سماعات المكالمات وسماعات الأذن أفضل في الـNote 9S بحاجه بسيطه عن الـRealme 6.

اما بقى بالنسبة للشبكات فا هنلاقي ان الـWiFi في الـRealme 6 قدر يلقط عدد شبكات اكتر بفرق بسيط .. وبالنسبة لشبكات الإتصال .. الـRealme 6 افضل بفرق بسيط اوي عن الـNote 9S بعد تجارب كتير اوي، بس بصراحه الإتنين مش هيقصروا معاك.

البطارية :-

بطارية الـNote 9S بتيجي بسعة 5000 مللي امبير اما بطارية Realme 6 فهي بتيجي بسعة 4300 مللي أمبير.

الأداء الفعلي مع نفس الإستخدام .. الـRealme 6 وهو على الـ90 هيرتز ( منتا شاري الموبايل علشان تتبسط وتستمتع بمميزاته ) .. هيوصلك لمتوسط 8 ساعات شاشة مفتوحه .. والـNote 9S على نفسك الإستهلاك هيوصلك لـ10 ساعات.

لو انت عاوز تستخدم الـRealme 6 على الـ60 هيرتز وتاخد إستهلاك بطارية احسن بفرق نص ساعة .. براحتك برده .. بس هنا في نقطة تفوق لصالح بطارية الـRedmi Note 9S.

بالنسبة لسرعة الشحن بقى .. هنلاقي فرق كبير .. الـRealme 6 معاه شاحن 30 واط بيشحن في ساعة .. هي ساعة واحدة بس .. انما الـNote 9S معاه شاحن 22.5 واط والموبايل بيسحب من الشاحن ده 18 واط بس .. وبيشحن في حوالي ساعتين إلا ربع

الكاميرات :-

وبدون الدخول اوي في تفاصيل الأرقام .. لانها هنا طلعت بتخدع جامد .. الموبايلين فيهم 4 كاميرات في الظهر .. الاساسية في الـNote 9S بدقة 48 ميجا بيكسل بمستشعر سامسونج GM2 .. والاساسية في Realme 6 بدقة 64 ميجا بيكسل مستشعر سامسونج GW1 .. و باقي العدسات Ultra Wide وMacro وعزل.

والسيلفي في الـRealme 6 بيجي بدقة 16 ميجا بيكسل بفتحة عدسة F/2.0 .. اما الـNote 9S بيجي بدقة 16 ميجا بيكسل بفتحة عدسة F/2.5 .. فتحة عدسة ديقة جدًا.

ومبدئيًا كده .. الـNote 9S بيشغل Google Camera بكامل خصائصه عادي جدًا .. والـRealme 6 دورت كتير لاقيت نسخة بس مفيهاش Night Sight.

بالنسبة للتصوير في الشمس .. الـNote 9S بيجيب الصورة الحقيقية زي ما هي والتفاصيل بتكون افضل واكتر .. اما الـRealme 6 لعب في الألوان حاجة بسيطة علشان يقلل من إصفرار الصورة .. وبالنسبة للتصوير الـPortrait الاتنين بيطلعوا ممتازين ومعنديش مشاكل معاهم.

اما بالنسبة للتصوير في الظل .. الـRealme 6 بيلعب في الألوان بتاعت الصوره .. الصورة بتكون احلى بس مش حقيقية .. ونتيجة اللعب في الألوان بيخلي الصورة تفقد التفاصيل وبتطلع التفاصيل احسن بفرق واضح في الـNote 9S.

بالنسبة للتصوير بالجوجل كاميرا .. النسخة اللي بجربها في الـRealme 6 من الـGCam بتفرقع الألوان اوي اوي وبتخلي الصورة منورة جدًا .. بس بشكل عام الصوره بتكون حلوه .. انما نسخة GCam بتاعت الـNote 9S بتنقل الألوان الحقيقيه.

اما بالنسبة لتصوير منظر طبيعي .. فالـRealme 6 وكعادة موبايلات ريلمي .. بيتفوق بفرق واضح عن الـNote 9S بفضل واضع الـChroma Boost .. بس برده الشاومي بيحتفظ بالألوان الواقعيه والتفاصيل الأكتر .. بإختصار الـNote 9S بينقل الصورة الحقيقيه اما الـRealme 6 بيلعب جامد في الألوان.

اما بالنسبة للـUltra Wide فا هنلاقي ان الصورة اللي طالعه من Realme 6 افضل بفرق واضح من حيث الألوان والتفاصيل ومعالجة الصورة بشكل عام.

وبالنسبة للتصوير في مكان مُغلق بالموبايلين فا الريلمي بيطلع صور كويسه مقبوله كتفاصيل والوان .. بس الشاومي بيطلع الصورة الحقيقية وبإستخدام الـGCam فعلًا بنلاقي تفوق واضح من الـNote 9S في إنه بيطلع الصور الحقيقيه.

بالنسبة للتصوير بالليل بإستخدام الـNight Mode في الموبايلين .. تفوق واضح لـRealme 6 في التفاصيل والألوان .. الـNote 9S مش أفضل في التصوير بالليل.

وبالنسبة لإستخدام الـNight Sight في الـNote 9S فا الصورة وصلت لقوة تفاصيل صورة الـRealme 6 .. مع العلم ان جوجل كاميرا الـRealme 6 مش بيدعم الـNight Sight.

وبالنسبة لتصوير الفيديوهات الموبايلين بيصوروا بجودة 4K من غير ثبات الكتروني وعلشان تلاقي ثبات لازم تقلل الجودة لـ 1080p.

اما بالنسبة للسيلفي فا الموبايلين مش بيظبطوا الوان البشرة اوي .. بس كنت ميال اكتر لألوان الـRealme 6 .. ولما تستخدم الـGoogle Camera بتلاقي ان الإتنين مُمتازين جدًا.

والـGoogle Camera بالـNote 9S بيطلع تفاصيل رهيبة وكتيرة جدًا .. بعيدًا عن لون البشرة اللي محتاج فلتر كده عشان يتظبط بس كتفاصيل فا الـNote 9S ممتاز.

بصراحة موضوع الكاميرا ملخبط جدًا .. وخصوصًا الكاميرا السيلفي وهي تعتبر ممتازه في الموبايلين .. واحد فيه Night Sight في ابكليشن الموبايل بتاعه وواحد فيه Night Sight في ابلكيشن جوجل كاميرا، والصور اللي طالعه من الاتنين رايحه جايه مفيش حاجه تحسم الموضوع فعلًا.

أنضحك ضروري .. لازم تشوف الصور والفيديوهات المتصورة بالموبايلات في فيديو المقارنة في أخر المقالة علشان تقدر تحكم بنفسك مين الكاميرا الأفضل !

الأسعار :-

سعر Realme 6 :-

• نسخة الـ128 جيجا مع 4 جيجا رام بسعر 4000 جنيه وفي المحلات بحوالي 3750 جنيه
• نسخة الـ128 جيجا مع 6 جيجا رام بسعر 4500 جنيه وفي المحلات بحوالي 4250 جنيه

سعر Note 9S :-

• نسخة الـ64 جيجا مع 4 جيجا رام بسعر 3333 جنيه
• نسخة الـ128 جيجا مع 6 جيجا رام بسعر 3777 جنيه
  – وصعب تلاقي الموبايل في المحلات بسعر اقل من الأسعار الرسمية دلوقتي خالص

الموبايلين بينفع تركب فيهم شريحتين إتصال من الجيل الرابع مع كارت ميموري بحجم 512 جيجا في الـNote 9S و256 جيجا في الRealme 6.

الرأي النهائي :-

نقاط تفوق Realme 6 على Note 9S :-

• مسكة أفضل في الإيد
• شاشة احسن بألوان احسن وتردد اعلى
• معالج أفضل في تشغيل الألعاب
• سوفت وير مستقر وسلس أكتر
• ذاكره داخليه أسرع
• شحن أسرع بفرق كبير

نقاط تفوق Note 9S على Realme 6 :-

• خامات زُجاجيه أفضل مع تصميم أشيك
• معالج أفضل من ناحية إستهلاك البطارية والسخونية
• بطارية أكبر مع وقت شاشة مفتوحه أكبر
• لمبة الإشعارات
• مستشعر الـIR Blaster للأجهزة الكهربائية
• مايكروفون اضافي لعزل الضوضاء
• دعم تشغيل جوجل كاميرا بكامل خصائصة
• تسعير أقوى وأقل من الـRealme 6

ومش هحكم في نقطة جودة الكاميرات بفرق .. هسيبلك انت الحكم .. ونصيحة أخيره و وجهة نظري الشخصية .. لو هتشتري موبايل سعره ميعديش الـ3500 جنيه خليك في الـNote 9S النسخة الـ64 جيجا مع 4 جيجا رام .. اما لو هتقدر تدفع 3800 فا خليك في الـRealme 6 النسخة الـ128 جيجا مع 4 جيجا رام.

فيديو المقارنة على يوتيوب :-