لو عايز تشتري باند رياضي تحت الـ1000 جنية في مصر هتحتار بين خيارات كتير .. احنا النهارده هنقارن بين 3 باندات من 3 شركات معروفين وهما Huawei Band 6 و Honor Band 6 و Mi Band 6 ودول يعتبروا افضل 3 باندات تحت الـ1000 جنية حاليًا .. علشان تقدر تختار منهم باند مناسب ليك يقدملك اللي انت محتاجه.
التصميم :-
باند هواوي وهونر شبه بعض ونفس الأبعاد والوزن اللي بيكون 18 جرام من غير ستراب .. وهما بيحاولوا يقربوا من تصاميم الساعات وفيهم زرار صغير للتحكم .. اما باند شاومي شكلها مُختلف عنهم وشبه الباندات القديمة شوية ووزنها 14 جرام .. الشاشة رفيعة وصغيره ومفيش زرار تحكم.
الهواوي والهونر الستراب بتاعهم مريح أكتر في اللبس وفيه درجات مظبوطه أكتر .. على عكس مي باند 6 اللي خامة الستراب بتاعها انشف شوية ومش مريحة زي هونر وهواوي.
والخامات بالكامل بتيجي من البلاستيك البولي كاربونيت والسترابات سيليكون .. المفروض ان خامة ستراب هواوي أفضل شوية من هونر لكن في الإستخدام مفيش فرق بينهم.
الاختلاف الواضح في التصميم بين هونر و هواوي هو ان هونر باند 6 محفور عليها كلمة Honor على جسم الباند .. اما هواوي باند 6 مفيش أي كتابة ظاهره عليه.
الـ3 باندات مقاومين للماء لعمق 50 متر .. متقلقش منهم خالص عن تجربة .. وطبعًا وجود الزرار في هواوي وهونر بيفيدك لإن اللمس بيكون صعب شوية في المايه.
الشاشة :-
على الورق المفروض شاشة مي باند 6 أكبر لإنها بقياس 1.56 بوصة .. اما شاشة هواوي باند 6 و هونر باند 6 بقياس 1.47 بوصة فقط .. لكن الشكل يوضحلك ان شاشة هواوي وهونر أكبر.
الشاشات في هواوي وهونر مُستطيلة وشكلها للعين أكبر على عكس مي باند 6 اللي شاشتها بيضاوية أكتر وبتشبه الباندات القديمة مش بتشبه الساعات.
الـ3 شاشات بتوع الـ3 باندات من نوع AMOLED .. ألوانهم كويسة جدًا وإضاءاتهم تحت الشمس قوية .. والـ3 باندات مفيش فيهم سطوع تلقائي .. لازم تظبط درجة السطوع بإيدك.
حساسية اللمس كويسة جدًا على الـ3 باندات .. مفيش اي مشكلة هتواجها معاهم.
الخواص وتجربة الإستخدام :-
في حاجات مشتركة كتير في الـ3 باندات يقدروا يعملوها .. زي قياس مستمر لضربات القلب .. معدل النوم بتاعك .. معدل الاجهاد .. وتقدر تتحكم في الموسيقى على موبايلك وتدور على موبايلك لو مش لاقيه وتتحكم في الكاميرا بتاعت موبايلك من الـ3 باندات عادي جدا.
ولكن هنلاقي ميزة حصرية مهمة في باند هواوي وهي قياس مستمر لنسبة الاكسجين في الدم .. ولو نسبة الأكسجين قلت الساعة هتنبهك علشان تطمن على نفسك .. ودي حاجة مهمة في فترة كورونا أكيد .. انك تبقى عارف علطول نسبة الاكسجين في دمك حتى من غير ما تفكر تقيسها لانك أكيد هتنسى.
الـ3 باندات مفيهمش ميكروفون وسكبير .. ولكن هتقدر تتعامل ازاي مع المكالمة ؟ هواوي باند 6 تقدر تكنسل او تقدر ترد بسرعه برسالة جاهزه علشان لو سايق او بتتمرن في الجيم او في اجتماع وهكذا .. هونر باند 6 تقدر تكنسل بس .. مي باند 6 تقدر تكنسل او برده تقدر ترد برسالة.
بالنسبة للـWatch Faces فا هنلاقي هواوي وهونر تقدر تحمل على الباند Faces كتير تتنقل ما بينهم براحتك .. على عكس المي باند اللي اخرها 6 بس وبتقولك امسح حاجة علشان تقدر تكمل تحميل .. والـ3 باندات تقدر تحط عليهم صورة من عندك كخلفية.
هواوي وهونر فيهم Screen On تقدر تخلي شاشة الباند شغالة لمدة 5 أو 10 أو 20 دقيقة .. انما مي باند 6 مفيهاش الميزة دي للأسف .. والـ3 باندات بيقرأوا اشعارات بالعربي عادي.
لما نيجي نشوف مين أسهل في القراية هنلاقي هواوي وهونر علشان الشاشة أعرض والكلام بيظهر اكبر شوية .. بس مي باند 6 تتفوق في انها بتعرض الـEmojis.
سوفت وير هواوي وهونر شكله احسن شوية ومرن اكتر من مي باند 6 .. لان عندك ستارة علوية والسحب من تحت بيجيب الإشعارات .. انما مي باند 6 بدائية شوية في شكل السوف وير .. الـ 3 باندات مفيهمش NFC ولا GPS .. الحاجات اللي لو عايزها هتضطر تطلع في فئة سعرية أعلى شوية.
طيب هي اسمها سوار رياضي .. اخبار التمارين ايه ؟
- هواوي باند 6 فيها 96 نظام رياضي
- مي باند 6 فيها 30 نظام رياضي
- هونر باند 6 فيها 10 انظمة رياضية
هواوي أسرع وأدق باند فيهم في حساب ضربات القلب باستمرار وانت بتتمرن .. مي باند 6 و هونر باند 6 احيانًا بيتأخروا على ما يحسوا ان ضربات قلبك زادت وده الطبيعي وانت بتتمرن .. وكلهم فيهم Auto Detect للـWorkouts .. ولكنه بيستجيب اسرع وبيحسب ادق شوية في هواوي باند 6.
البطارية :-
الـ3 باندات بطارياتهم محترمة جدًا .. مش هتواجه معاها اي مشاكل، استخدام فعلي هيوصل لـ10 ايام مستريح جدًا ويمكن أكتر كمان.
معاهم شواحن مغناطيسية صغيرة .. الـ Mi Band 6 بيشحن في ساعتين .. اما الـ Honor Band 6 والـ Huawei Band 6 بيشحنوا في حوالي ساعة.
اسعار الباندات :-
- هواوي باند 6 سعرها 999 جنية
- هونر باند 6 سعرها 835 جنية
- مي باند 6 سعرها 800 جنية
الرأي النهائي :-
ايه اللي انت بتحتاجه من الباند ؟ شاشة كبيرة علشان تقرا الإشعارات ؟ شكل مقبول ؟ إمكانية التحكم في المكالمة ؟ بطارية تقعد وقت طويل ؟ بتتمرن ومحتاج دعم رياضي وقياس ضربات القلب ونسبة الأكسجين ؟
لما نيجي نطبق الكلام ده على الباندات بقى .. هتلاقي هواوي باند 6 وهونر باند 6 متفوقين على باند 6 في التصميم والشاشة بفرق كبير وده مخليني مايل أكتر ليهم.
هواوي باند 6 أعلى شوية من هونر باند 6 لإنها بتتفوق في نظام قياس نسبة الأكسجين في الدم وبتعرف ترد على المكالمات برسائل وفيها أنظمة رياضية أكتر ودقيقة أكتر وانت بتتمرن.
لو بتهتم اوي بصحتك ومحتاج تتبع كل حاجه يبقى شوف هواوي باند 6 فيها كل اللي انت عايزه وزيادة .. اما لو مش فارق معاك وعايز توفر مبلغ بسيط هات هونر باند 6 هتكون كويسة.
Comments