بمناسبة ان شاومي باعت 25 موبايل ريدمي نوت 8 حول العالم، الشركة نزلت لنا الموبايل تاني بنفس خاماته الزجاجية المُمتازة في الفئة الإقتصادية واللي بتتفوق على كل المنافسين لكن مع معالج أقوى وسوفت وير شاومي الجديد وشاحن سريع في العلبة .. هنقدملكم مراجعة Redmi Note 8 2021 الجديد من شاومي!
التصميم :-
الظهر الزجاجي اختفى تقريبًا في الموبايلات الاقتصادية .. ريدمي نوت 8 2021 راجع بقوة علشان ياخد لقب أرقى خامات وأفخم تصميم في الفئة الإقتصادية بالظهر الزجاجي الشيك وطبقة حماية Gorilla Glass الجيل الخامس.
التصميم شيك وراقي جدًا، بيعمل إنعكاسات لطيفة لما الضوء بيجي عليه .. ولو بتسأل على الخامة المُستخدمة في الفريم فا هو أكيد من البلاستيك .. الموبايل في الفئة الإقتصادية مش فلاج شيب.
التصميم كشكل فا هو قديم لإنه من 2019، لكن قيم والخامة الزجاجية تخليك تتقبل شكل التصميم اللي مازال كويس .. لكن من عيوب التصميم ده هو بروز الكاميرات الكبير جدًا .. لكن محدش أشتكى من دخول تراب فا متقلقش.
الموبايل وزنه 190 جرام وتخانته 8.4 مللي وأبعاده ملمومه في الإيد ومسكته مقبولة جدًا .. تصميم ريدمي نوت 8 كان قبل ما شاومي تكبر حجم موبايلاتها في سلسلة Redmi Note 9 فا متقلقش.
الشاشة :-
شاشة الموبايل هنا 6.3 بوصة من نوع IPS LCD بدقة FHD+ بنوتش للسيلفي .. نفس الشاشة القديمة الموجودة في نوت 8 موجودة في نسخة 2021 بدون أي إختلاف.
شاشة معقولة جدًا في الفئة الاقتصادية .. على فكرة سطوعها مقبول وأحسن شوية من سطوع Poco M3 و Redmi 9T .. Hلوانها كويسة جدا .. دقتها محترمة جدًا.
ينقصها تكون بتردد أعلى .. وده صعب .. لأنك في الفئة الاقتصادية بتبقى بين اختيارين .. يا شاشة بجودة كويسة FHD+ بس 60 هيرتز يا شاشة بجودة HD+ بس بتردد 90 هيرتز زي Infinix Hot 10S.
وأخيرًا شاشة ريدمي نوت 8 2021 هتلاقيها في العلبة من غير سكرينة بس شاومي بتقول الشاشة عليها حماية Gorilla Glass 5 .. والأفضل تركبله سكرينه برده بس شفافة عاديه بلاش Privacy علشان السطوع ميقلش.
الأداء :-
الجوهر بتاع الموبايل اتغير .. شاومي استخدمت معالج ميدياتيك Helio G85 اللي بيشتغل بتكنولوجيا 12 نانو .. المفروض ان المعالج ده انشط شوية من المعالج القديم SD665.
الموبايل جاي بسوفت وير شاومي الجديد MIUI 12.5 .. والسوفت وير ده مش خفيف نسبيًا .. تحسه سوفت وير عاوز معالج فئة متوسطة مش إقتصادية.
نوع ذاكرة التخزين في ريدمي نوت 8 2021 متغيرش .. زي ما هو eMMC5.1 .. ولو كان بقى UFS 2.1 زي Poco M3 كان اداءه هيكون أفضل من كده بفرق.
ملخص الكلام، الأداء معقول وأحسن من بوكو M3 وRedmi 9T بشكل ملحوظ .. ولكن الأداء بتاعه ميتفوقش على Infinix Hot 10S اللي راجعناه .. بس الفرق بينهم بسيط .. المنافسية بقت بين شاومي وانفينكس، وريلمي خرجت!
الأداء الرسومي معقول .. ببجي بتشتغل على High HD .. وبتشتغل كويس .. كول اوف ديوتي على Medium Graphic مفيش اعلى من كده.
ولكن زي ما انت أكيد عارف معالجات ميدياتيك G بتسخن شوية .. وخلي بالك نوت 8 ظهره كمان ازاز .. فالسخونية بتظهر اوي في جسم الجهاز بعد فترة بسيطة من اللعب عليه .. بس الجراب هيقلل الإحساس بتاعت الحرارة شوية.
عوامل الأمان وعناصر اخرى :-
البصمة هنا في الظهر .. أدائها حلو جدا .. مفيش تجميع ايقونات واجهة ولا اي حاجة .. الاداء عجبني .. والـFace Unlock سرعته مقبولة برده.
الموبايل هنا مفيهوش NFC .. بس فيه لمبة اشعارات بقالنا كتير جدًا مش بنشوفها .. وفيه IR Blaster وفيه ميكروفون اضافي لعزل الضوضاء وفيه Radio FM.
مفيش للأسف Second Space .. وكمان مفيش Dual Apps .. مش عارف ليه الحقيقة! بأي منطق، المعالج اللي هنا مش ضعيف لدرجة اننا نشيل الميزة دي.
الصوت مش Stereo زي Poco M3 .. الصوت Mono ولكن السماعة قوية جدا .. لو تعرف حد معاه نوت 8 شوف صوته عامل ازاي .. صوت عالي جدا ومجسم جدا .. ولكن ما زال اقل حاجة بسيطة من الـStereo.
مستشعر التقارب هنا هاردوير وشغال زي الفل .. وكمان الجيروسكوب حقيقي هاردوير وديه ميزة مش هتلاقيها في موبايل تاني بالسعر ده.
نيجي للمشكلة بقى، الشبكة، شبكة الإتصال في ريدمي نوت 8 2021 مبتختلفش كتير عن نوت 8 القديم .. شبكة مش مستقرة تمامًا، الموبايل في أماكن الشبكة ضعيفة فيها بيكون غير مُتاح ولازم تدوس كل شوية على زرار الباور علشان الشبكة ترجع .. ريدمي نوت 8 2021 أضعف موبايل من ناحية الشبكة في 2021!
البطارية :-
بطارية واخده النهج القديم .. سعة 4000 مللي امبير بس .. ولكن أداءها مش بطال، يعني حوالي 7 ساعات شاشة مفتوحة، وقت مش قليل خالص .. مش الأحسن لإن دلوقتي في 6000 مللي امبير في الفئة دي زي Realme C25.
الشاحن المرفق 22.5 واط بيشحن الموبايل بسرعة شحن فعلي 18 واط في حوالي ساعتين الا ربع .. سرعة شحن معقوله على سعر الموبايل.
الكاميرات :-
الكاميرا الخلفية 48 ميجا بيكسل فتحة عدسة F/1.8 .. والتانية 8 ميجا بيكسل للتصوير الواسع فتحة عدسة F/2.2 .. والتالتة 2 ميجا بيكسل ماكرو والرابعة 2 ميجا بيكسل عزل .. والسيلفي 13 ميجا بيكسل فتحة عدسة F/2.0.
الموبايل ده بمعالج ميدياتيك والمفروض ملوش جوجل كاميرا .. انا فضلت ادور لحد اما لاقيت نسخة شغالة كويس .. حملها وسطبها وهيشتغل معاك كويس من غير ما تعدل اي حاجة.
للوهلة الأولى لما مسكت نوت 8 2021 حسيت ان الكاميرا مش ممتازة .. بس علشان كنت بجرب موبايل غالي قبله .. فا قررت اني اقارنه مع الموبايلات التانية اللي موجودة بسعره وهما Poco M3 و Hot 10S.
ولما قارنت لاقيت ان نوت 8 2021 اداءه معقول جدا ومتفوق في معظم الصور .. نقدر نقول ان الكاميرا الخلفية نوت 8 2021 اداءها فوق المتوسط.
لما جيت بقا استخدم جوجل كاميرا لاقيت تحسن بنسبة مثلا 20% في جودة الصور اللي بتخرج من نوت 8 2021 .. هو احيانًا التطبيق بيهنج بس مش مشكلة المهم انه بيصور في الأخر بتفاصيل اكتر.
السيلفي نفس الكلام، حلو .. أحسن بشكل ملحوظ من Poco M3 .. وبينافس بشده مع Hot 10S .. بس هو يكسب في المعالجة الداخلية وبرده مش هتلاقي لون بشرة عدل في سيلفي موبايل اقتصادي.
ولما نستخدم جوجل كاميرا لوحده في نوت 8 2021 هنلاقي جوجل كاميرا بيعمل Retouching لـ لون البشرة .. انا كنت مشغله علشان يحسن من لون البشرة بس بيمسح التفاصيل شوية .. والنتايج معقولة جدًا على سعر الموبايل.
بالنسبة بقى لتصوير الفيديوهات فا الموبايل بيدعم تصوير بجودة 1080p .. مفيش 4K زي النسخة اللي فاتت بسبب المعالج للأسف، والمميز هنا ان في مثبت إلكتروني، وفي ميكروفون اضافي كمان لعزل الضوضاء.
سعر Redmi Note 8 2021 :-
- نسخة واحدة 64 جيجا مع 4 جيجا رام بسعر 2600 جنية
بينفع تركب كارت ميموري بحجم 256 جيجا وشريحتين إتصال مع بعض في نفس الوقت.
الرأي النهائي :-
مميزات Redmi Note 8 2021 :-
- خامات زجاجية محترمة
- شاشة دقتها ممتازة واضاءتها مقبولة
- كاميرات معقولة بتتحسن مع جوجل كاميرا
- اداء كويس خاصًة في الألعاب
- دعم الشحن السريع
- بصمة سريعة جدا
- بطارية بتقدم وقت إستخدام كبير
- مستشعرات مظبوطة موجودة حقيقية
عيوب Redmi Note 8 2021 :-
- شبكات ضعيفة
- مفيش Dual Apps في السوفت وير
- بطارية صغيرة كحجم
- سوفت وير تقيل
Comments