مراجعة Honor 8x Max – موبايل بأكبر شاشة 7.12 بوصة مع بطارية 5000 مللي أمبير !

شركة Honor أصدرت منذ فترة كبيرة بالخارج هاتف كبير في الحجم وهو Honor 8x Max ومن سنة مقررتش انها تنزل الموبايل ده في مصر , ولكن بعد فترة وحدوث أزمة هواوي مع جوجل و أمريكا , قررت شركة أونر في مصر انها تستعين بموبايل 8x Max وتنزله الاسواق المصرية في محاولة منها لمواكبة السوق , وطبعا كامل خدمات جوجل شغالة على الموبايل بسبب ان الهاتف واخد الترخيص بالفعل قبل حدوث الأزمة , فهل موبايل أونر 8x ماكس هيقدر يضيف حاجة لصالح شركة أونر في مصر , ولا مجرد تحصيل حاصل ؟


التصميم :-

موبايل Honor 8x Max ممكن يتقال عليه فابلت والفابلت ده حجم متوسط بين الموبايل والتابلت .. الفابلت بيجمع بين الحجم الكبير للتابلت وفي نفس الوقت تقدر تستخدمه كموبايل وتمشي بيه وتحطه في جيبك .

عموما موبايل 8x Max يناسب الاشخاص الي عاوزين موبايل شاشة كبيرة .. هو اصلا نازل يخاطب الفئة ديه .. خصوصا لان مفيش اي موبايلات جديدة بحجم شاشة كبير زيه .

لو انت اول مرة تجرب فابلت الي هو يعني 8x Max فهتحس للحظات كدا انه كبير زيادة عن اللزوم .. وبعدها يا اما هتحب الحجم ده ياما مش هتقدر تتعود عليه .

الموبايل تصميمه من البلاستيك مع فريم من المعدن .. لانه اصلا الموبايل وزنه تقيل بالفعل فلو كان الظهر من الزحاح كان هيبقا اتقل من كدا هيروح فين يعني ؟ الموبايل وزنه 210 جرام وتخانته 8.1 ملي .

بروز الكاميرا الخلفية قليل اوي وكمان الجراب الي جاي مع الموبايل ف العلبة بيغطي البروز الخفيف ده خالص .


الشاشة :-

شاشة هونر 8 اكس ماكس .. اهم حاجة فيه .. شاشة بقياس 7.12 بوصة من نوع IPS وبدقة FHD+ .. الشاشة كبيرة جدا .

علشان اقدر اوريلك حجم الشاشة شغلتلك جمبه شاشة الـ Honor 8x العادي .. شايف فرق الحجم اد ايه ؟

الشاشة تناسب فعلا الي حابب فابلت يتفرج عليه ع افلام او حد نظره ضعيف شوية وعاوز موبايل شاشته كبيرة .. وكمان الشاشة هنا بالابعاد الجديدة 18:9 .. والحواف حوالين الشاشة اه مش اصغر حاجة بس مقبولة جدا ع حجم الشاشة الكبير ده .

الشاشة الوانها كويسة وسطوعها تحت الشمس مقبول جدا ع انها IPS والشاشة فيها نوتش دروب وتر ينفع تلغيه من الاعدادات لو حابب .

كعادة اونر مفيش اعلان رسمي عن طبقة الحماية بس الموبايل جاي ف العلبة متركب عليه سكرينة .


الأداء :-

موبايل Honor 8x Max جاي بمعالج سناب دراجون 660 .. مش 636 زي النسخة الصينية .. عموما معالج سناب دراجون 660 قديم نسبيا ومقدرتش اشكر في ادائه في موبايل نوكيا 7.2 الي عملنا ليه مراجعة قريب .

عموما اداء الاسناب دراجون 660 قريب جدا من الكيرن 710 الي اصلا Honor بتحطه في موبايلاتها المتوسطة .. اداء الموبايل مفيش فيه اي مشاكل في الاستخدام العادي من برامج السوشيال والمكالمات والكلام ده كله .

بالنسبة للاداء الرسومي .. فللاسف اداء الاسناب دراجون 660 في الموبايل ده اقل من الطبيعي واقل بشكل ملحوظ عن الكيرن 710 .

الموبايل بيقدر يشغل ببجي على هاي اتش دي بس في تسقيط فريمات كتير بشكل ملحوظ ولازم تنزل لاعدادات جرافيك متوسطة علشان تقدر تلعب باريحية .

وكمان كول اوف ديوتي شغالة على اعدادات جرافيك متوسطة بردة .. ومفيش اوبشن جرافيك اعلى من كدا .

انا فاهم ولازم كمان انت تبقا فاهم ان الي بيدور ع فابلت فهو من الاساس بيدور ع شاشة كبيرة واداء مقبول وبيبقا شخص اساسا مش مهتم بالالعاب والكلام ده .


عوامل الأمان و عناصر أخرى :-

الموبايل فيه بصمة خلفية اداءها كويس وسريع ومفيش فيه اي مشاكل .

وكمان فيه فيس ان لوك اداءه مش بطال .. مش صاروخي .. بس كويس .

الموبايل للاسف جاي عليه اندرويد اوريو 8.1 .. ولسه موصولوش اندرويد باي 9.0 .. بس اعتقد هيوصله .. اتمنى يعني .. عموما ميزة عمل نسختين من برامج التواصل الاجتماعي موجودة .

الموبايل فيه لمبة اشعارات بتنور باكتر من لون ونورها واضح وتقدر تعتمد عليها . وايقونات الاشعارات بتظهر فوق جمب النوتش .

بالنسبة للمتشعرات .. فالموبايل فيه كل المستشعرات .. ضوء تقارب بوصلة واداءهم كويس جدا مفيهوش مشاكل .


الصوت و الشبكة :-

تجربة الشاشة الكبيرة ديه بقا تكمل بالصوت المحترم .. الموبايل فيه سماعة تحت ع اليمين صوتها عالي وكمان سماعة المكالمات بتشتغل مع السماعة التانية علشان تديلك تجربة صوت ستريو محترمة جدا .. الموبايل فعلا صوته عالي ومجسم وثري دي كدا والدولبي اتموس فيه اكتر من اوبشن وشغال فعلا وبيفرق في البيز وقوة الصوت الي بتخرج من الاسبيكر .

بالنسبة لصوت سماعة المكالمات فهو عالي ومفيهوش مشاكل وصوت سماعات الاذن بردة عالي و كويس .

اخيرا نقطة الشبكة .. فشبكة الموبايل مش احسن حاجة مش عارف ليه .. هي متوسطة في وجه نظري مش قوية ومش ضعيفة .


البطارية :-

علشان تكمل تجربة الشاشة الكبيرة والصوت المحترم معاك بطارية 5000 مللي أمبير .. بتستحمل معاك متوسط 9 ساعات شاشة مفتوحة في يوم كامل من الاستخدام .

الموبايل جاي معاه شاحن سريع 18 واط بس للاسف منفذ الشحن micro USB v.2.0 .. عموما البطارية الضخمة ديه بتتشحن في ساعتين بالظبط بالشاحن الي جاي مع الموبايل .. وديه من اكتر الحاجات الي عجبتني ف الموبايل ده .

وكمان البطارية بتدعم الشحن العكسي يعني ممكن تشحن موبايل تاني عن طريق وصلة شحن عكسية .


الكاميرات :-

الموبايل ده اسوأ حاجة فيه الكاميرات .. الكاميرا الخلفية مزدوجة 16 ميجا بيكسل فتحة عدسة 2.0 والتانية 2 ميجا بيكسل للعزل .. والسيلفي 8 ميجا بيكسل فتحة عدسة 2.0 .

لازم تبقا فاهم ان الموبايل ده مفيش اي تركيز ع الكاميرات فيه .. الاعتماد هنا ان الكاميرا الخلفية مقبولة شوية .. يعني الي هو معاك كاميرا تسعفك كدا تصور بيها حاجة سريعة .. انما مش كاميرا تطلع بيها صور احترافية ولا تفاصيل كتير ولا في عدسة وايد انجل ولا ماكرو .

الكاميرا يدوب بتطلع تفاصيل مقبولة طول ما الاضاءة كويسة واول ما الاضاءة تقل يبتدي يظهر نويز كتير في الصور خصوصا ان مفيش نايت مود موجود في السوفت وير بتاع الموبايل ده .

بالنسبة للسيلفي فهو اقل موبايل من ناحية السيلفي جربته حاليا .. الصور الوانها مش مظبوطة خالص وبتغلط في كل حاجة واي حاجة .. مفيش تفاصيل كتير حتى لو الاضاءة مقبولة .. ولما الاضاءة بتقل اوي مش هتلاقي تفاصيل كتير .

وبالنسبة لتصوير الفيديوهات فالموبايل بيصور 1080p ومفيش اي تثبيت الكتروني .

ممكن تشوف الصور والفيديوهات المتصورة بالموبايل في فيديو المراجعة في أخر المقالة .


سعر الموبايل :-

موبايل Honor 8x Max موجود دلوقتي في المحلات بسعر 4200 جنية للنسخة 128 جيجا مع 4 جيجا رام وينفع تركب كارت ميموري وشريحتين اتصال مع بعض .

الموبايل بيجي في العلبة متركب عليه سكرينة وجاي معاه جراب شفاف وشاحن 18 واط وكابل شحن و سماعات أذن في العلبة .


الرأي النهائي :-

موبايل Honor 8x Max نازل مصر متأخر .. شركة هونر في مصر قالت تنزله علشان تقدر تسد شوية في السوق بموبايل كويس ليها لحد اما ازمتها مع جوجل تتحل .. وعموما الـ 8 اكس ماكس كامل خدمات جوجل شغالة عليه .

فابلت هونر 8 اكس ماكس .. بيقدملك شاشة كبيرة بالابعاد الجديدة ادائها حلو جدا لو انت بتحب الشاشات العملاقة وكمان معاك صوت ستريو محترم جدا وبطارية ضخمة وشحن سريع .. يعني الموبايل مناسب جدا للفرجة ع افلام وفيديوهات ومناسب جدا للاشخاص الكبيرة الي محتاجين شاشة كبيرة .

انما لو انت شخص عاوز افضل قيمة مقابل سعر فالـ 8 اكس ماكس مش بيقدم افضل معالج في الفئة السعرية ديه ولكنه يعني ما زال الاداء مقبول وكمان بيديلك 4 جيجا رام مع ان في منافسين كتير بيقدموا 6 جيجا رام في الفئة السعرية ديه .. واخيرا للاسف اكتر حاجة معجبتنيش في الموبايل ده هي الكاميرات الي ادائها فعلا مش مناسب خالص في الفئة السعرية ديه .

مميزات

  • شاشة كبيرة 7.12 بوصة بدقة ممتازة واداء جيد جدا .
  • صوت ستريو محترم جدا وعالي ومجسم .
  • بطارية ضخمة وشحن سريع .
  • يدعم تركيب كارت ميموري وشريحتين اتصال معا .

عيوب

  • الهاتف قديم نسبيا .
  • اداء الكاميرات غير مناسب تماما لسعر الموبايل .
  • لا يقدم افضل اداء في فئته السعرية .
  • منفذ الشحن قديم ميكرو يو اس بي .
  • لا يأتي بأحدث أصدار أندرويد .

فيديو مراجعة الموبايل على اليوتيوب :-

قد يعجبك أيضا...

Comments

جاري التحميل...