مراجعة موبايل Infinix S5 – أرخص موبايل بشاشة كاملة ولكن مع العديد من العيوب !

موبايل جديد من انفينكس وهو Infinix S5 .. الموبايل ده محطوط فيه حشو أرقام مواصفات كتير .. زي المساحة الـ 128 والـ 6 جيجا رام و الكاميرا الخلفية الرباعية والشاشة الكاملة الي فيها خرم .. حاجات فعلا تشد ناس كتير .. بس هل فعلا الارقام ديه حقيقية ؟ وايه هي عيوب الموبايل الحقيقية ؟

كل الحاجات ديه هتعرفها لما تقرأ المقالة ديه لاننا هنعمل مراجعة شاملة لموبايل انفنكس اس 5 الجديد على موقعكم المفضل موبيزل .

التصميم :-

انفنكس في أخر موبايلين ليها الي هما Infinix Hot 8 و Infinix S4 , ماشية على سيناريو مش بطال وهو التصميم البولي كربونيت الي دايما بتميزة بنقشة جديدة وشيك .

وهنا في موبايل Infinix S5 انفنكس عاملة نقشة تصميم حلوة .. في زي خطوط مايلة في الظهر كدا ماشية بطول الموبايل كله وكمان في تغير في درجة لون ظهر الموبايل من فوق لتحت .

وكمان انفنكس عامله حاجة زي طبقة شفافة خفيفة كدا فوق الظهر علشان تحسسك يعني انه من الزجاج .. بس هو طبعا مش من الزجاج .. بس ميزة الطبقة الشفافة ديه انها بتحافظ على الظهر من الخرابيش .. بس ده ميمنعكش انه تركب الجراب الشفاف الي جاي مع الموبايل علشان كمان تغطي البروز الخفيف الي ف الكاميرا الخلفية .

الموبايل وزنه خفيف 178 جرام وتخانة 8 ملي ومكسته ف الايد كويسة جدا .. وهتعرف تستخدمة بكل سهولة .

الشاشة :-

ديه المفروض انها من مميزات الموبايل .. لان شاشة Infinix S5 كاملة 6.6 بوصة بدقة HD+ .. مفيش نوتش ونقول اهلا وسهلا بارخص شاشة بثقب ( خرم للسيلفي ) حاليا .. التجربة الي اكيد في مستخدمين كتير كانوا عاوزين يجربوها ومستنين انها تنزل في موبايل رخيص .. وانفنكس عرفت تاخد اللقطة وتشد المستخدمين دول بموبايل Infinix S5 .

بس بصراحة معجبنيش ف الشاشة حاجات كتير .. اولهم سطوع الشاشة الي واضح جدا انها اقل من اي شاشة اي بي اس جربتها .. وتحت الشمس القوية شوية بتاعت الساعة 12 ممكن متعرفش تشوف الشاشة كويس خصوصا لو متركب عليها سكرينة .

زوايا الرؤية بتاعت الشاشة مش حلوة خالص .. يعني لو بصيت ع الشاشة من الجمب كدا هتحس انها مظلمة ومش شايف حاجة .

البيزلز او الحواف كويسة جدا فيما عدا الحافة السفلية الي كبيرة حبتين تلاته .

الشاشة معلهاش طبقة حماية رسمية .. الموبايل بيجي ف العلبة معاه سكرينة بلاستيك ضعيفة كدا .. منصحكش تركبها او ركبها مؤقتا لحد اما تجيب سكرينة مناسبة للخرم الي ف الشاشة .

واخيرا الشاشة بدقة اتش دي بلس بس .. يعني علشان انفنكس تديك شكل الثقب في الشاشة سحبت منك مميزات كتير اوي .. سطوع و وحواف و دقة شاشة .. والي ممكن كل الحاجات ديه متفرقش اصلا مع مستخدم عادي مش حد فاهم يعني ايه مواصفات .

لو عاوز تخفي شكل الثقب في الشاشة فينع تخفيه من اعدادات الموبايل ويظهر حوالية شريط اسود والشاشة هتبقا أكنها بالابعاد القديمة .

الشاشة عليها ضمان 100 يوم من تاريخ شراءك للموبايل .. لو حصل اي حاجة والشاشة اتكسرت خلال الـ 100 يوم دول هتقدر تغير الشاشة مجانا من وكيل انفينكس بمصر .

الاداء :-

كالعادة انفنكس واخدة نفس المعالج الي موجود بالفعل ف موبايلات ليها ب 1800 جنية ومنزلاه ف موبايل بـ 3000 جنية وهو الميدياتيك P22 .. المعالج ده اقتصادي بحت وهو ثماني النواة تكنولوجيا 12 نانو .. يدوبك بيشغلك برامج التواصل الاجتماعي بشكل مقبول .. والـ 6 جيجا رام مش هيحسسوك باي عذاب في التنقل بين التطبيقات المفتوحة والي عددهم كبير بصراحة .

بالنسبة للاداء الرسومي لموبايل Infinix S5 .. فهو بيشغل ببجي على اعدادات جرافيك متوسطة بس هتسقط فريمات كتير وهتضطر تنزلها لاقل اعدادات جرافيك .

ولعبة Call of Duty بتشتغل على اقل اعدادات جرافيك بردة بدون مشاكل .

ومن الأخر لازم تبقا فاهم ان الفئة السعرية الي انفنكس اس 5 اول ما نزل اتحط فيها .. فيه منافسين كتير جدا بيقدموا معالج افضل من ميدياتيك P22 بكتير .. وان معالج P22 ده كويس ف فئة سعر 2000 جنية مش 3000 جنية !

عوامل الأمان وعناصر أخرى :-

بيعجبني ف انفنكس انها بتحط مستشعر بصمة خلفية حجمه كبير علشان تتجنب الخطأ خالص .. والمستشعر هنا كمان سريع وبيفتح الموبايل بسرعة مقبولة .

والفيس ان لوك بردة سريع مش بطال .

بالنسبة للسوفت وير .. نفس السوفت وير المستخدم ف Infinix Hot 8 و Infinix S4 .. سوفت وير سلس الي حد ما ومفيهوش تعقيدات كبيرة .. أهم مميزاته انه بتقدر تتحكم في درجة صوت الاشعار الي جالك بشكل منفصل عن صوت نغمة الرنين .

السوفت وير يعيبه عدم وجود امكانية عمل نسختين من برامج التواصل الاجتماعي .. والميزة ديه بقت موجودة في كل الموبايلات تقريبا في الفئة السعرية ديه .

بالنسبة للمسشتعرات .. فمفيش حساس ضوء .. لازم تظبط سطوع الشاشة بايديك .. وانت كدا كدا اصلا هتبقا معلي السطوع علاطول علشان هو اصلا مش عالي .

باقي المستشعرات زي الجيروسكوب و التقارب موجودين وشغالين بكفاءة .

الموبايل مفيهوش لمبة اشعارات بس ممكن تستخدم خاصية الضغط ع الشاشة مرتين علشان تفتح وتشوف الاشعارات الي جاتلك .

الصوت و الشبكة :-

صوت موبايل Infinix S5 جاي من سماعة واحدة تحت ع الشمال .. المكان الي بيتكتم مع الالعاب .. بس اصلا الموبايل مش موجه لمحبي الالعاب .. صوت الاسبيكر عالي ومسموع بس الجودة بتاعته مش اد كدا .

صوت سماعات المكالمات عالي وممتاز وصوت سماعات الاذن كويس بردو مفيهوش مشاكل .

بالنسبة لشبكة الموبايل .. فهو متوسطة .. مش احسن حاجة ف الفئة السعرية ديه .. وساعات كان الانترنت بيفصل مني على 4G ولازم اشغله على 3G بشكل يدوي .. والمشكلة ديه اتكررت كتير .. بس هو مكنش بيفصل خالص يعني .

البطارية :-

موبايل Infinix S5 جاي ببطارية انفنكس المعهودة 4000 مللي أمبير الي مع الي استحملت معايا 7 ساعات شاشة مفتوحة في يوم كامل من الاستخدام .. وهو وقت كويس جدا .

بس بتشحن ف وقت طويل لان منفذ الشحن ميكرو القديم وشاحن كمان بطئ 10 واط .. بتشحن لحد 90% في ساعتين واخر 10% هياخدوا حوالي ساعة الا ربع .

الكاميرات :-

والي المفروض ان ديه نقطة الدعايا الرئيسية للموبايل .. موبايل Infinix S5 جاي بأربع كاميرات في الظهر .. العدسة الرئيسية 16 ميجا بيكسل فتحة عدسة 1.8 والعدسة التانية 5 ميجا بيكسل بتقوم بدورين التصوير بزاوية واسعة والتصوير الماكرو ف نفس الوقت .. والعدسة التالتة 2 ميجا بيكسل للعزل .. والعدسة الاخيرة للمساعدة في الذكاء الاطصناعي والتصوير في اضاءة ضعيفة .. والي هي اصلا يعتبر مش شغالة .

والسيلفي 32 ميجا بيكسل موجود ف ثقب الشاشة فتحة عدسة 2.0 .

الكاميرا الخلفية بتطلع صور بهتانة الي حد ما .. والتفاصيل قليلة الي حد .. يعني كمية التفاصيل ديه مينفعش تبقا موجودة ف موبايل بالفئة السعرية ديه وكمان البورترية مش احسن حاجة بردة وبيغلط ف القص و الاتش دي ار مش حلو .. الصور بتلسع من الشمس بشكل عجيب .

العدسة الوايد انجل كويسة .. يعني ادائها مناسب للفئة السعرية ديه وبتطلع صور كويسة وممكن تعتمد عليها وصور الماكرو مقبولة ولكنها مش الأفضل .

التصوير السيلفي عموما مقبول جدا طول ما الاضاءة مساعداك .. بس الوان الصور بتطلع افتح من الطبيعي .. بس تقدر تتقبلها عادي .

وتصوير الفيديوهات سيء جدا في الموبايل ده .. لأنه بيصور على 1080p بدون اي تثبيت الكتروني .

ممكن تشوف الصور والفيديوهات المتصورة بالموبايل ده في فيديو المراجعة في أخر المقالة .

سعر الموبايل ومحتويات العلبة :-

سعر موبايل Infinix S5 الرسمي 3000 جنية للنسخة الكبيرة الموجودة حاليا 128 جيجا مع 6 جيجا رام وينفع تركب كارت ميموري وشريحتين اتصال مع بعض .

علبة الموبايل تحتوي على جراب شفاف و لاصقة حماية للشاشة وسماعات أذن وشاحن 10 واط وكابل شحن .

التقييم النهائي :-

من الأخر موبايل Infinix S5 موبايل مناسب لاصحاب الاستخدام الخفيف ( ملهمش ف الالعاب وكدا ) .. مناسب لاي حد عاوز موبايل خفيف شكله حلو وحابب فكرة الشاشة الكاملة الي فيها ثقب مع ارخص 128 جيجا و 6 جيجا رام حاليا وسيلفي مقبول جدا .

انما للأسف Infinix S5 .. مش بيقدم افضل معالج ولا افضل سطوع شاشة ولا افضل كاميرا خلفية ولا افضل سرعة شحن .. والي في منافسين كتير بنفس سعره بيقدروا يتغلبوا عليه بسهولة .. زي مثلا Xiaomi Note 8 و Realme 5 العادي .

مميزات Infinix S5

• ارخص 128 جيجا مع 6 رام في مصر حاليا .
• ارخص شاشة كاملة بثقب في الشاشة .
• اداء البطارية جيد .
• اداء الكاميرا السيلفي مرضي الي حد ما .
• تصميم شيك وخفيف ولكن من البلاستيك .

عيوب Infinix S5

• معالج الهاتف ضعيف في هذه الفئة السعرية .
• سطوع الشاشة ضعيف تحت الشمس ولا يوجد مستشعر لظبط السطوع للشاشة .
• الكاميرا الخلفية تقدم اداء سيء وغير مرضي اطلاقا .
• منفذ شحن قديم micro usb مع عدم دعم الشحن السريع للبطارية .
• لا يدعم عمل نسختين من برامج التواصل الأجتماعي .

فيديو مراجعة الموبايل على اليوتيوب :-