شركة هواوي وبالتبعية هونر .. عندهم طريقتين علشان ينزلوا موبايل جديد.
- الطريقة الاولى .. يحطوا تركيبة مواصفات جديدة بس الموبايل بينزل من غير خدمات جوجل زي ما شوفنا في الـHuawei Y7p والـHonor 9X Pro.
- الطريقة التانية .. يحطوا تركيبة مواصفات قديمة نزلت قبل كده مع تعديلات طفيفة علشان الموبايل ينزل بخدمات جوجل.
والطريقة التانية هي اللي هنشوفها دلوقتي في مراجعة موبايل Honor 9X Lite المبني على Honor 8X القديم واللي بيجي بظهر زجاج ومساحة كبيرة وكاميرا خلفية فاجئتني جدا وسعر ممكن يكون مقبول وبكامل خدمات جوجل.
التصميم :-
وزي ما قولتلك التصميم زجاجي .. وديه حاجة كويسة جدًا في الفئة السعرية تحت الـ3000 جنية .. التصميم كلاسيكي اوي خصوصًا في اللون الإسود .. بس الموبايل متين في الإيد كده ومتقفل كويس.
مسكة الموبايل في الإيد سهلة لإنه حجمه صغير .. تخانته بتيجي اقل من 8 مللم مع زن 175 جرام .. كل ده بيحسن من المسكه اكتر واكتر مع فخامة ملمس الزُجاج.
اللي ضايقني في التصميم ده بقى .. بروز الكاميرات العجيب الغريب ده .. وللأسف البروز بيفضل ظاهر حتى بعد ما تركب الجراب الشفاف اللي جاي مع الموبايل في العلبة.
الشاشة :-
نفس شاشة الـHonor 8X بالظبط .. حجمها 6.5 بوصة ونوعها IPS LCD بدقة FHD+ .. والشاشة ديه بقى فيها مميزات قوية اهمها الدقة العالية والسطوع المُمتاز تحت الشمس.
والألوان كمان، الوان الشاشة هنا محترمة وكويسة جدًا جدًا يمكن من أفضل الألوان اللي ممكن تجربها بالسعر ده .. كلنا عارفين Quality او جودة شاشة الـ8X القديمة كانت عامله ازاي.
بس المشكلة كلها في شكل الـNotch القديم اللي شوفناه في الـ8X زمان بس مش مواكب الترند دلوقتي بتاع الثقب او على الاقل الـNotch الـDrop Water .. فحقيقي ممكن الموضوع ده يضايق البعض.
بس الموضوع متعوض شوية لما تشوف الحافة السفلية للموبايل وتلاقيها قليلة اوي .. قارنتها بالـRedmi Note 8 ولاقيتها فعلا قليلة جدا جدا.
واخيرًا مفيش إعلان رسمي عن طبقة الحماية بس الموبايل بيجي في العلبة متركب عليه سكرينه.
الأداء :-
المعالج التقليدي الـKirin 710 اللي شوفناه كتير فوق الـ3000 جنية ودلوقتي بنشوفه تحت الـ3000 جنية زي ما شوفناه في الـY7p قبل كدا.
الموبايل جاي بخدمات جوجل بس للأسف الموبايل جاي بأندرويد باي 9.0 القديم وواجهة هواوي EMUI 9.1 اللي كانت تقيله نسبيًا وكمان نوع ذاكرة التخزين هنا قديم وبطيء نسبيًا.
وكل ده إنعكس على اداء الموبايل انه مش ناعم اوي .. هو مقبول .. وافضل من موبايلات تانية من براندات مشهورة بالسعر ده زي سامسونج .. بس اقل شوية من الـRealme 6i.
بالنسبة بقى للألعاب .. لعبة ببجي بتشتغل على High HD .. بس مع بعض التقطيعات البسيطة اللي هتخليك تحس انك محتاج تنزل اللعبة لجرافيك Medium .. كول اوف ديوتي بتشتغل على Low واللعبة بتشتغل اكيد كويس على الاعدادات دي.
ومن الأخر .. انا هرتب الـKirin 710 كتاني احسن معالج في الفئة السعرية تحت الـ3000 جنية وهو في نفس المرتبة مع سناب دراجون 665 .. والاتنين جايين ورا الميدتيايك Helio G80 الموجود في Realme 6i.
عوامل الأمان وعناصر اخرى :-
البصمة التقليدية المعروفه في الظهر سريعة ومفيهاش مشاكل .. والـFace Unlock سرعته مقبولة جدا .. والموبايل فيه لمبة إشعارات بتنور بأكتر من لون وديه حاجة مبقناش نشوفها كتير.
وكمان فيه كل المستشعرات اللي شغالة بكفاءة وبدون اي مشاكل.
صوت الموبايل للأسف واطي شوية .. هديله تقييم اقل من متوسط.
وصوت سماعات المكالمات كويس مفيهوش مشاكل .. وصوت الـAUX مقبول برده مفيهوش مشاكل.
بالنسبة لقوة الشبكة .. فهو متوسطة .. ممتازة في المكالمات .. بس في الموبايل داتا مش قوية أوي.
البطارية :-
نفس بطارية الـHonor 8X .. بتيجي بحجم 3750 مللي أمبير .. هتستحمل معاك لحد 6 ~ 7 ساعات شاشة مفتوحة .. مش احسن وقت ولا اكبر بطارية لإننا بقينا نشوف بطاريات 5000 مللي أمبير دلوقتي بالسعر ده.
بالنسبة للشحن فا للأسف الموبايل جاي بالمنفذ القديم Micro USB 2.0 وشاحن 10 واط وبيشحن البطارية في ساعتين وربع.
الكاميرات :-
الموبايل جاي بكاميرا خلفية مزدوجة الأساسية 48 ميجا بيكسل مع فتحة عدسة F/1.8 والتانية 2 ميجا بيكسل للعزل .. والسيلفي 8 ميجا بيكسل بفتحة عدسة F/2.0.
بالنسبة لتجربة الكاميرات الفعليه، اداء الكاميرا عادي جدًا في الإضاءه العاليه، يعني مفيهوش جديد كده .. حسيت انه تقليدي ومناسب للفئة السعرية دي .. بس مش الاداء الرهيب او مش الاداء الـWow اللي تشتري عشانه الموبايل ده .. وبرده في الإضاءه الداخليه حسيت ان الأداء مش قد كده.
اما بقى بالنسبة للـNight Mode اللي حرفيًا فاجئني .. الـNight Mode بتاع الموبايل ده غريب .. بيحول الصور 180 درجة حرفيًا وحرفيًا بتبقى احسن من الـHonor 8X القديم بمراحل .. النايت مود ممتاز هنا وفعلًا بيغير الصور تمامًا وبيخليها حاجه تانيه خالص.
ولما قارنت الموبايل مع الـRedmi Note 8 .. في الإضاءه العاليه حسيت ان الـNote 8 احسن والـSharpness بتاع الصوره افضل .. في الإضاءه الداخليه الأداء قرب من بعض اوي .. في الإضاءه الضعيفه اوي بقى اتفاجئت بتفوق الـ9X Lite بفضل استخدام الـNight Mode الممتاز في الأونر والي قدر يتفوق على الشاومي.
بالنسبة لتصوير الفيديوهات الموبايل بيصور على جودة 1080p بـ 30 أو 60 اطار في الثانية و في ثبات الكتروني ولكنه لا يعمل بكفاءة.
اما بالنسبة للكاميرا السيلفي .. الأداء هنا متواضع جدًا والصور بهتانه والتفاصيل مش كتير والصور سايحة شوية .. صور البورتريه ساعات كتير بتغلط .. التصوير في الإضاءه الداخليه مش احسن حاجه .. في Night Mode في السيلفي برده بس محصلش اي حاجه .. مغيرش في الصوره خالص.
وبرده لو عملنا مقارنة مع الـNote 8 اللي يعتبر متواضع في السيلفي .. حسيت ان الـNote 8 احسن من الـ9X Lite .. بالرغم من ان النوت 8 مش احسن سيلفي .. اداء السيلفي في الـ9X Lite وحش جدًا للأسف.
ممكن تشوف الصور والفيديوهات المتصورة بالموبايل في فيديو المراجعة في أخر المقالة.
سعر الموبايل :-
الموبايل بيجي في مصر بنسخة واحده بمساحة تخزين 128 جيجا مع 4 جيجا رام .. والموبايل بينفع تركيب فيه شريحتين إتصال 4G مع كارت ميموري بحجم 512 جيجا في نفس الوقت.
الرأي النهائي :-
ومن الأخر و زي ما قولتلك .. الـHonor 9X Lite إصدار جديد من الـHonor 8X القديم .. اللي كان من اكتر الموبايلات الناجحة عند هونر، والناس طحنته شغل وإستحمل جامد جدا ولسه شغال معاهم بقاله اكتر من سنة.
الشركة خدته غيرت فيه التصميم وعدلت شوية في الكاميرا الخلفيه خصوصًا في التصوير بالليل .. ونزل تاني بسعر أقل وبكامل خدمات جوجل عشان يقدر ينافس بدون مشاكل.
مميزات الموبايل :-
- تصميم بخامات زُجاجيه ممتازه
- مساحة تخزين ضخمة
- شاشة ممتازه والوانها حلوه ودقتها ممتازه
- كاميرا خلفيه اداءها قوي خصوصًا في التصوير بالليل
- موجود في الموبايل لمبة اشعارات باكتر من لون
- اداء المعالج مقبول جدًا على سعر الموبايل
عيوب الموبايل :-
- نظام تشغيل قديم
- تصميم الشاشة بالنوتش القديم
- بطارية مش كبيرة اوي
- منفذ الشحن القديم ومفيش شحن سريع
- مفيش عدسات Ultra Wide او Macro
- الصوت مش عالي
- بروز الكاميرا الخلفيه كبير شوية وبيفضل ظاهر بعد تركيب الجراب المرفق
- كاميرا سيلفي اداءها مُتواضع
Comments