مراجعة Realme 6 Pro – موبايل ممتاز ولكن مش الأفضل في الفئة المتوسطة !

بعد مراجعة Realme 6 العادي .. قولنا انه تطوير للـRealme 5 Pro .. ودلوقتي احنا بقالنا فترة بنستخدم وبنجرب موبايل Realme 6 Pro الجديد .. والنهارده هنراجعه وهنشوف فعلًا هل هو تطوير للـRealme XT زي ما شركة ريلمي بتقول ولا هنلاقي نقط ضعف كتيره فيه !

التصميم :-

بالنسبة لخامات الموبايل فالظهر بيجي من الزجاج والفريم من البلاستيك .. وده المعتاد من ريلمي من ناحية الخامات في الفئة السعرية دي .. زي ما شوفنا في Realme XT بالظبط.

شكل رصة الكاميرات في الظهر متغيرش برده في الـRealme 6 Pro عن الـXT .. كان نفسي يبقى في تطوير محسوس عند كده .. كل اللي حصل انهم شالوا الـFrame او الإطار النيكل اللي حوالين الكاميرات الخلفية.

اما بالنسبة لشكل التصميم بقى .. فالموبايل هنا عليه شكل البرق كده .. بيظهر ويتحرك ويختفي مع تغير الإضاءة عليه .. اللون الأزرق اتفاجئت انه اغمق من اللي كنت متوقعه .. واللون رايح للأسود من الأطراف بشكل كبير.

ومن الأخر .. التصميم شبابي ومطرقع اوي .. ممكن يعجبك وممكن لا .. هي ازواق عمومًا.

اما بالنسبة للمسكة في الإيد .. الموبايل وزنه 202 جرام .. تقيل نسبيًا عن الـRealme 6 العادي وحجمه اكبر كمان .. هو اكبر من الـRealme 6 .. واصغر من الـRedmi Note 9S .. حاجه في النص كده !

كالعادة، الموبايل فيه نفس البروز اللي بنشوفه في موبايلات ريلمي في الكاميرا الخلفية .. والجراب اللي بيجي مع الموبايل في العلبة بيغطي البروز ده بالكامل.

الشاشة :-

شاشة الموبايل كبيره بتيجي بحجم 6.6 بوصة من نوع IPS LCD بدقة FHD+ مع تردد او معدل تحديث 90 هيرتز .. والشاشة فيها ثُقبين للسيلفي على الشمال.

احنا في موبيزل لسه معانا الـRealme XT .. فرق الألوان بين الشاشتين رهيب والتفوق واضح لـ ريلمي XT .. فلو انت موضوع الوان الشاشة ودرجات سطوعها بيفرق معاك اوي .. الـXT لسه إختيار مُمتاز .. وهو الوحيد اللي موجود من ريلمي بشكل رسمي في مصر بشاشة أموليد .. اي موبايلات أموليد تانية من ريلمي منزلتش مصر بشكل رسمي.

نرجع بقى للـRealme 6 Pro .. خلاص أمر واقع، الشاشة IPS LCD .. واللي يشفع لها شوية معدل التحديث العالي اللي هيحسسك بسلاسة بسيطه ونعومة وانت بتعمل Scroll على الموبايل.

وبرده انا وضحت وجهة نظري الشخصية في ان فرق الـ90 هيرتز من الـ60 هيرتز .. مش هو السبب اللي يخليك تجري تشتري موبايل علشانه .. اه هو في فرق طبعًا وفي نعومة وانت بتعمل Scroll مثلًا على فيس بوك او في البوم الصور بتاعك .. بس هو انت بتمسك الموبايل يعني عشان تتنقل وتسكرول بس !

وجهة نظري زي ما قولتها قبل كده .. شاشة اموليد بتردد 60 هيرتز أفضل بكتير وبفرق واضح من شاشة IPS LCD بتردد 90 هيرتز او حتى 120 هيرتز.

نرجع تاني للـRealme 6 Pro .. الشاشة هنا ألوانها كويسة وسطوعها متوسط تحت الشمس .. وبشكل عام، الـQuality او جودة الشاشة بتاعت الريلمي 6 برو احسن شوية من الريلمي 6 العادي .. وكمان إستجابة الـTouch أفضل في الـRealme 6 Pro من العادي.

وشكل الثُقب المُزدوج اللي فوق على الشمال ده برده مش حابه اوي .. بس اقدر اقبلهم لإن الكاميرا التانيه بتاعت السيلفي ليها دور حقيقي .. هتعرفه في فقرة الكاميرات.

وأخيرًا .. الشاشة عليها طبقة حماية من نوع Corning Gorilla Glass الجيل الخامس .. والموبايل بيجي في العلبة متركب عليه سكرينه.

الأداء :-

ريلمي 6 برو بيجي بمعالج كوالكوم سناب دراجون 720G .. المعالج ده بعد الإستخدام الفعلي مع واجهة ريلمي والـ8 جيجا رام اللي بيجي بيهم الموبايل .. اداءه كويس.

بس انا عندي 4 مشاكل مع الأداء ملهومش علاقة بالموبايل نفسه .. تعالوا نشوف !

• ان Realme 6 اللي ارخص من الموبايل ده بيجي بمعالج ميدياتك Helio G90T .. واللي قولتلك في فيديو قبل كده انه اقوى حاجه بسيطه من Snap Dragon 720G الموجود في Realme 6 Pro .. خصوصًا في الأداء الرسومي.
• ان الـSnap Dragon 720G ده موجود دلوقتي في موبايل منافس ارخص حوالي 2000 جنيه من الموبايل ده وهو الـRedmi Note 9S .. وان يَكُن المُعالج هنا في الـRealme 6 Pro اداءه احسن حاجه بسيطة اوي من الـNote 9S بسبب الواجهة السلسلة أكتر والرام الأكتر .. مش أكتر من كده !
• ان الفئة السعرية اللي ريلمي حطت فيها Realme 6 Pro فيها وحوش حاليًا بيقدموا اداء افضل بفرق ضخم زي الـHonor 20 والـNova 5T بمعالج رائد الـKirin 980 !
• ان المعالج ده موفرليش تطور او Upgrade محسوس وكبير عن الـSnap Dragon 712 اللي كان موجود في الـRealme XT قبل كده.

بس متخليش الحاجات ديه تحسسك ان الأداء وحش .. لأ خالص .. زي ما قولتلك الأداء مُستقر وكويس ومفيش تهنيجات او اي حاجة مُفاجئة او تقطيع Animations او اي حاجة .. ملخص الموضوع ده ان الأداء كويس بس ده مش اقوى معالج في الفئة السعرية ديه.

وبالنسبة للأداء الرسومي .. لعبة PUBG بتشتغل على High HD .. ودي اعلى اعدادات رسمية بيوصلها المعالج .. واللعبة بتشتغل كويس جدًا بدون اي مشاكل .. ولعبة Call Of Duty شغالة على Very High .. واللعبة بردة شغالة كويس جدا.

وأخيرا لعبة فورت نايت .. شغالة على اعدادات جرافيك Medium .. واللعبة شغاله بشكل مقبول بردة .. وبالنسبة للسخونية .. فهي أقل حاجة بسيطة من الـRealme 6 .. بس مش الفرق الرهيب يعني.

عوامل الأمان وعناصر اخرى :-

بصمة الإصبع موجوده على زُرار الباور .. سريعة وعملية ومن لمسة بتفتح ومش بتغلط .. والـFace Unlock هنا صاروخي كعادة موبايلات ريلمي.

الموبايل جاي من العلبة بـAndroid 10 عادي جدًا زيه زي اخوه الـRealme 6 .. وفيه نفس التعليق السلبي الموجود في الـRealme 6 وهو ان الموبايل ده مفيهوش لمبة اشعارات.

بس مستشعرات الموبايل كلها شغاله عادي بكفاءه وبدون اي مشاكل .. وصوت الموبايل جاي من سماعة واحده صوتها عالي ومُجسم والتجسيم اعلى بفرق واضح من الـRealme 6 العادي.

صوت سماعات المُكالمات عالي وكويس .. وصوت سماعات الأذن مُجسم وكويس وأحسن من ريلمي 6 العادي بفرق واضح برده.

بالنسبة لشبكة الموبايل فهي مُمتازه جدًا ومفيش فيها اي مشاكل.

البطارية :-

نفس بطارية الـRealme 6 العادي موجوده هنا .. بطارية حجمها 4300 مللي امبير، والمعالج اللي موجود هنا المفروض انه موفر أكتر في إستهلاك البطارية.

ومع ذلك البطارية قعدت برده حوالي 8 ساعات شاشة مفتوحه .. مفيش فرق محسوس عن الـRealme 6 !

والشاحن الـVOOC الـ30 واط اللي جاي مع الموبايل في العلبه بيشحن البطارية كامله في حوالي ساعة تقريبا.

الكاميرات :-

الموبايل ده بيجي بـ6 كاميرات .. 4 في الظهر .. الأساسية بدقة 64 ميجا بيكسل بفتحة عدسة F/1.8 بمستشعر سامسونج GW1 .. والتانية 12 ميجا بيكسل بفتحة عدسة F/2.5 للزوم 2X .. والتالتة 8 ميجا بيكسل للتصوير الواسع فتحة عدسة F/2.3 والأخيرة 2 ميجا بيكسل Macro.

والعدستين بتوع السيلفي .. الاساسية الـ16 ميجا بيكسل بفتحة عدسة F/2.1 بمستشعر سوني IMX471 والتانية للتصوير الواسع 8 ميجا بيكسل بفتحة عدسة F/2.2.

للأسف الموبايل ده رجع يلعب تاني في الوان الصورة .. ويخليها محمرة زيادة عن الطبيعي زي الـRealme XT لو فاكرين .. بس الصراحة التفاصيل ممتازة.

ولما جربت استخدم Google Camera لاقيت تفاصيل الصور ممتازه وحدتها ممتازه ومعالجة الألوان فيها حقيقية .. بس عادي ممكن عينك متحبهاش وتفضل الصورة اللي الألوان فيها فاقعة أكتر.

وبالنسبة للعدسة الـTelephoto الـ2x زوم واللي بتوصل لحد 20x زوم Digital .. ادائها متواضع .. ومعرفش هيبقى ليها إستخدام عندك ولا لأ، وهي بتصور بيها صور بس .. مينفعش تصور بيها بورتريه مثلًا ولو كانت بتعمل كده كانت هتبقى احسن وليها إستخدامات اكتر.

والعدسة الـUltra Wide Angle اللي هنا تقليديه جدًا .. مختلفتش حاجه عن عدسات ريلمي اللي جربتها قبل كده.

بالنسبة للتصوير في إضاءه داخليه ضعيفه شوية .. ابلكيشن الكاميرا بتاع ريلمي ضيع شوية تفاصيل .. انما جوجل كاميرا لحق الموبايل وطلع تفاصيل قوية جدًا في الصور .. وبالنسبة للـNight Mode فهو عجبني بصراحه.

مقارنات

• ولما قارنت الريلمي 6 العادي مع الـRealme 6 Pro لاقيت في الإضاءه الداخليه ان الريلمي 6 العادي مش بيلعب في الوان الصورة .. اما الـ6 برو بيلعب جامد اوي في الألوان .. بس التفاصيل أفضل في الـ6 برو وبالنسبة لإستخدام الـNight Mode هنلاقي ان الـ6 برو صورته فيها تفاصيل اكتر وSharp اكتر ومنورة أكتر مع شوية لعب بسيط في الألوان .. بس التفاصيل قوية جدًا وبشكل عام أفضل من ريلمي 6 العادي.
• وبالنسبة للـRealme 6 Pro لما نقارنه مع الـXT بقى .. الموبايلين نفس طريقة المعالجة واللعب في الألوان ونفس التفاصيل .. اما في الـNight Mode بقى الـXT بيسيح الصورة وبيزود اضاءتها بشكل اوفر اما الريلمي 6 برو بيظبطها .. بس بشكل عام مفيش فرق جزري بينهم.

بالنسبة لتصوير الفيديوهات بموبايل ريلمي 6 برو فهو ممتاز لانه بيقدر يصور لحد 4K وفيه ثبات الكتروني وكمان في مايك اضافي علشان عزل الضوضاء.

بالنسبة للتصوير السيلفي فا الصور هنا بتطلع فيها سِنة إحمرار برده في لون البشرة .. بس عمومًا برده انا شخصيًا بحب الـLook ده .. بيبقى شكلة حلو في السيلفي .. والعدسة الـUltra Wide اللي هنا جامده جدًا .. فكرتني بتجربة الـVivo V17 Pro اللي كان فيه العدسة الـWide دي.

ولما بقى استخدمت الـ جوجل كاميرا .. لاقيت صور مختلفه خالص في طريقة المعالجة والـHDR مظبوط جدًا ومفيش احمرار جامد في لون البشره.

وبالنسبة للتصوير في الإضاءه الداخليه فهي الى حدٍ ما كويسه بس صور جوجل كاميرا بتطلع تفاصيل اكتر .. والـUltra Wide في الإضاءه الداخليه مش بتبقى حلوه اوي .. لازم إضاءه عاليه.

مقارنات

• لما قارنت الـRealme 6 Pro مع الـRealme 6 لاقيت ان الـ6 العادي مفيهوش احمرار الصور ده .. بس بشكل عام الصوره احسن في ريلمي 6 برو .. وبرده تجربة الـNight Mode بالكاميرا الأماميه هنلاقي ان الـRealme 6 ادائه سيء .. وفي تفوق واضح لسيلفي الـ ريلمي 6 برو بليل.
• ولما قارنت الـRealme 6 Pro مع الـXT لاقيت ان صورة الـXT الوانها مظبوطه اكتر .. الـ6 برو في احمرار كبير ظاهر فعلًا .. وبالنسبة لتجربة الـNight Mode في الموبايلين هتلاقي ان الـXT بيفتح الصوره بشكل اوفر جدًا .. بس برده الوانه احسن وتفاصيله احسن من الـ6 برو.

ممكن تشوف الصور و الفيديوهات المتصورة بالموبايل في فيديو المراجعة في أخر المقالة.

سعر الموبايل :-

الموبايل بيجي بنسخة واحده بس بمساحة تخزين 128 جيجا مع 8 جيجا رام بسعر 5390 جنيه مصري .. وينفع تركب كارت ميموري بحجم 256 جيجا مع شريحتين إتصال مع بعض في نفس الوقت.

الرأي النهائي :-

الموبايل بالنسبة للمنافسين :-

• بيقدم تجربة سيلفي حلوه مع عدسة Ultra Wide في السيلفي
• بيقدم عدسة للزوم 2X لو هتستخدمها
• بيقدم شاشة بمعدل تحديث 90 هيرتز
• بيقدم شحن سريع بقوة 30 واط
• تصوير الفيديوهات حلو سواء بالكاميرا الخلفية او الأمامية

بس للأسف سعر الموبايل ده حطه في منافسة مع موبايلات تانيه بتقدم معالجات اقوى وشاشات اموليد بتجربة احسن .. الموبايل ميُعتبرش قيمة كويسه مقابل السعر.

الموبايل بالنسبة للجيل القديم منه .. الـXT يعتبر تطوير في :-

• وجود شحن اسرع
• كاميرا خلفيه للزوم
• كاميرا اماميه Ultra Wide
• معالج افضل بفرق بسيط

بس بالنسبة لقوة الكاميرات الرئيسية فمفيش فرق كبير .. وعندك تنازل كبير في الشاشة اللي مبقتش AMOLED .. وبالتالي اللي معاه Realme XT منصحوش بالتطوير للـRealme 6 Pro.

الموبايل ده بالنسبة للـRealme 6 العادي :-

• تجربة كاميرات افضل خصوصًا السيلفي
• تصميم زُجاجي أشيك

بس اداء الـRealme 6 العادي في الألعاب افضل من الـRealme 6 Pro .. وبالتالي لو الحاجات الزياده اللي في Realme 6 Pro متهمكش .. وفر المبلغ ده وخليك في ريلمي 6 العادي.

فيديو المراجعة على يوتيوب :-