لما موبايل جديد بينزل في فئة سعرية معينة .. ويكون كويس ويقدر يدخل المنافسة .. لازم نقارنه بافضل موبايل موجود في فئته السعرية .. وعلشان كدا في المقاله دي هنقدملك مقارنة كاملة بين Honor 9X Pro وRedmi Note 8 Pro علشان لو محتار ما بينهم .. تعرف تشتري مين فيهم.
التصميم :-
الموبايلين ما شاء الله تصميماتهم فخمة جدا في فئتهم السعرية .. الاتنين ظهرهم من الزجاج وخاماتهم فخمة .. ولو اني ميال اكتر لتصميم الـHonor 9X Pro علشان انعكاس حرف الـX والحركات ديه بدال الظهر السادة اللي بلون ثابت الموجود في الـNote 8 Pro .. عموما هي ازواق.
الموبايلين وزنهم مش خفيف .. الـNote 8 Pro وزنه 200 جرام والـHonor 9X Pro وزنه 206 جرام .. والاتنين تخانتهم كبيرة شوية 8.8 ملم .. فيعني هما مش موبايلات صغيرة زي الموبايلات الملمومه في الإيد، بس اللي هتحسه لما تمسك الاتنين سوا ان الـ9X Pro اطول واعرض حاجة بسيطة.
الاختلاف الجزري بقى في التصميم هو بروز الكاميرات .. الـHonor 9X Pro البروز بتاع الكاميرات فيه صغير .. انما الـRedmi Note 8 Pro البروز كبير شوية فيه.
الموبايلين معاهم جرابات .. بس جراب الشاومي مش عملي ومش بيغطي كل البروز بتاع الكاميرا .. انصحك تجيب جراب تاني.
الشاشة :-
شاشة الهونر 9 اكس برو حجمها 6.6 بوصة LTPS IPS LCD .. شاشة كاملة بدون نوتش .. انما شاشة الريدمي نوت 8 برو حجمها 6.5 بوصة IPS LCD بردة بس فيها نوتش للسيلفي مش كامله .. والشاشتين بدقة FHD+.
طبعا تفوق واضح لشكل شاشة الـ9X Pro في انها كاملة وهتديلك تجربة افضل .. بس طبعا على حساب وجود سلايدر في جسم الموبايل .. ممكن تقلق منه او لأ .. بس هو عمومًا متجرب كتير ومفيش شكاوي منه تمامًا.
انما لما نبص على Quality او جودة الفيديوهات بقى .. هنلاقي شاشة النوت 8 برو بتتعامل احسن في درجات الالوان .. انما شاشة الـ9 اكس برو بحس انها فاتحة زيادة عن الطبيعي وبهتانة شوية .. بس بشكل عام .. شاشة الـ9X Pro ناصعة البياض اكتر شوية من شاشة الـNote 8 Pro اللي هتحسها مصفرة شوية لو حطتها جنب الهونر.
الشاومي مش بيجي عليه سكرينة بس عليه حماية Corning Gorilla Glass الجيل الخامس .. انما الهونر مفيش اعلان رسمي عن طبقة الحماية .. بس الموبايل جاي متركب عليه سكرينة.
الأداء :-
قولنا قبل كدا ان الـNote 8 Pro جاي بمعالج ميدياتيك Helio G90T .. وده افضل معالج بسعره .. الكلام ده قبل ما نشوف وحش الاداء الجديد الـKirin 810 الموجود في الهونر 9 اكس برو.
بس مبدئيًا لازم اوضحلك حاجة .. نقطة السخونية الازيد عن الطبيعي الموجودة في الـNote 8 Pro .. الي احنا تقريبًا الوحيدين الي نوهنا عنها .. قولنا انه بيسخن زيادة عن الطبيعي بس مش خطر يعني .. المفروض ان النوت فيه تبريد مائي .. والهونر كمان فيه تبريد مائي.
بس الصراحة لما لعبنا جيم ببجي هنا وهنا .. لاقينا فعلا الهونر سخونيته اقل بفرق ملحوظ عن الشاومي .. وده راجع للتبريد الافضل ولان المعالج معماريته افضل 7 نانو بدل 12 نانو الموجود في الشاومي .. فنقطة السخونية محسومة انها اقل في الهونر.
انما بالنسبة للاداء العادي .. تنقل فتح تطبيقات .. مش هتحس بأي مشكلة في الموبايلين والاتنين جايين بي 6 جيجا رام.
الاداء الرسومي بقى .. للاسف معالج Kirin 810 مش واخد حقه في تشغيل الالعاب لان هونر 9 اكس برو بيشغل ببجي على High HD بس .. إنما الشاومي بيشغلها على Ultra HDR.
كول اوف ديوتي شغالة على Very High في الموبايلين وشغالة كويسة جدا .. واخيرًا فورت نايت مش مدعومة بشكل رسمي على الـHonor 9X Pro .. انما بتشتغل على اعدادات جرافيك High في النوت 8 برو .. وديه نقطة تفوق واضحة وصريحة للنوت 8 برو.
وبكدا احب اقولك .. الهونر يكسب في ان المعالج افضل وسخونيته اقل ومُعَمِر اكتر على المدى البعيد .. انما الشاومي يكسب في انه بيشغل فورت نايت بشكل رسمي وبيشغل ببجي على اعدادات جرافيك اعلى.
عوامل الامان وعناصر اخرى :-
بصمة الـNote 8 Pro في الظهر والـHonor 9X Pro مدمجة بزر الباور .. الاتنين سراع جدا .. بس انا شخصيا حبيت بصمة الهونر اكتر .. الـFace Unlock مش موجود في الهونر .. انما موجود في الشاومي وادائه كويس جدا.
بخصوص الواجهة بتاعت الـ9 اكس برو .. فانت لو متابعنا وشوفت مراجعة Honor 9X Pro .. هتعرف ان الموبايل جاي بدون خدمات جوجل بشكل رسمي .. بس تقدر تحمل خدمات جوجل ديه بكل سهولة من خلال تطبيق بسيط بتحمله على الموبايل ممكن تحمله من هنا.
وبالتالي انا هدي نقطة افضلية للشاومي لانك مبتعملش اي مجازفة في حته جوجل ديه .. لإن برده في ناس متضايقة من موضوع انك تحمل جوجل بايديك على الـ9 اكس برو !
النوت 8 برو بيتفوق بوجود الـDark Mode ولمبة اشعارات ومستشعر IR .. الحاجات ديه مش موجودة في Honor 9X Pro .. بالنسبة للصوت بقى .. للاسف الموبايلين صوتهم متوسط .. مفيش واحد اعلى من التاني .. وهما مش اعلى صوت في الفئة السعرية ديه.
صوت سماعات المكالمات عالي وممتاز في الموبايلين .. بس بالنسبة لصوت سماعات الاذن فهو اعلى في الـNote 8 Pro.
وبالنسبة للشبكة .. فالشبكة ممتازه على الموبايلين .. مجاش شكاوي من النوت 8 برو واحنا اصلا جربناه وكان كويس جدا .. والاونر 9 اكس برو ممتاز برده في الشبكة.
البطارية :-
الـNote 8 Pro بطاريته بسعة 4500 مللي امبير والـHonor 9X Pro بسعة 4000 مللي أمبير .. طبعا هتقولي الشاومي احسن .. هقولك لأ خالص .. معالج الـ9X Pro موفر جدا 7 نانو انما الـNote 8 Pro حريقة 12 نانو .. ده غير تنظيم سوفت هواوي وهونر افضل وتعاملهم مع البطارية احسن .. فا من الاخر بطارية الهونر هتقدم اداء احسن.
الموبايلين بيجو بمنفذ الشحن الـUSB Type C .. بس للأسف الـHonor 9X Pro معاه شاحن بطيء 10 واط .. انما الشاومي شاحن سريع 18 واط وديه نقطة تفوق للشاومي.
الكاميرات :-
مبدئيًا .. الـNote 8 Pro فيه كاميرا رابعة زيادة Macro وديه نقطة مش موجودة في الهونر .. ده لو انت بتحب تصور ماكرو يعني.
الـHonor 9X Pro فيه 3 كاميرات الرئيسية 48 ميجا بيكسل فتحة عدسة F/1.8 .. انما الـRedmi Note 8 Rro فيه 4 كاميرات .. الرئيسية 64 ميجا بيكسل فتحة عدسة F/1.8.
والسيلفي في Honor 9X Pro بدقة 16 ميجا بيكسل في سلايدر بفتحة عدسة F/2.2 .. انما في الـNote 8 Pro بدقة 20 ميجا بيكسل فتحة عدسة F/2.0.
لازم تبقى فاهم ومتقبل ان سوفت وير شاومي في الكاميرات مش قد كدا .. فيه عيوب ونواقص كتير .. بتعوضهم بـ جوجل كاميرا اللي بقى فيه نسخ كتير شغالة دلوقتي عليه وبتطلع نتايج احسن بكتير من ابكليشن الكاميرا العادي.
بس طبعا جوجل كاميرا مش بتشتغل على معالجات كيرن .. فالمقارنة هتكون بدون جوجل كاميرا وهستخدم تطبيق الكاميرا العادي في كل موبايل فيهم.
لما بصور في مكان فيه شمس بلاقي ان الـNote 8 Pro بيفرقع الصورة كده زياده عن اللزوم والـHDR مش بيشتغل رغم ان انا مشغله .. اما الـ9X Pro بيجيب الصوره هاديه وتفاصيل والوان كويسه .. والتصوير في الضل كمان الشاومي بيفتح لون البشره شوية بس بيطلع الصورة في الاخر كويسه .. والاتنين في الضل ممتازين معنديش اي تعليق عليهم.
بالنسبة للتصوير البورتريه في الشمس، برده مازال الشاومي بيفتح الصور وبتفرقع منه شوية بس تحديد الاطراف افضل بكتير في الـNote 8 Pro بصراحه.
لما جربت اصور بإستخدام العدسة الـ64 ميجا بيكسل في الشاومي والـ48 ميجا بيكسل في الهونر .. لاقيت ان التفاصيل فعلًا اكتر في الشاومي عن هونر وفرقت بشكل واضح لما عملت زوم.
بالنسبة للعدسة الـWide Angle هي ممتازة في الاتنين بس اوسع بفرق بسيط في النوت 8 برو .. الصورة في الاخر بتطلع حلوه بس الذكاء الإصتناعي اللي موجود في الـ9X Pro بيطلع صورة احسن من النوت 8 برو.
بالنسبة للتصوير في مكان مغلق وإضاءه داخليه هنلاقي ان الشاومي بيفتح لون البشره عن الهونر .. بس بيعرف في الاخر يجيبلك صورة احسن من الهونر.
والتصوير بالـNight Mode لاقيت ان الهونر بيطلع صوره احسن برده .. وهي معروفه ان سوفت وير هواوي بيتعامل حلو وبيطلع صور ممتازة بالنايت مود .. النوت 8 برو بيحاول يفتح الحاجه اللي بتصورها جامد فا بيطلعلك لون مش واقعي اوي في الاخر وNoise حوالين الصورة اما الهونر بيجيبلك الحاجه اللي انت عايز تشوفها من غير ما يفتحها .. يا دوب تبقى شايفها بتفاصيلها وبس.
بالنسبة للكاميرا السيلفي بقى .. لازم تبقى فاهم ان الموبايلين دول مش هيقدمولك افضل كاميرات سيلفي في الفئة السعرية دي .. الـRealme 5 Pro او الـRealme XT بيطلعوا صور سيلفي احسن بفرق واضح عن الموبايلين دول.
بس الصور هنا مقبوله .. يمكن الذكاء الإصتناعي اللي في الهونر مخلي الصور افضل شوية من الشاومي اللي تحس فيه ان الـHDR مجاش .. بس عمومًا انا شايف ان يعني يمكن الـ9X Pro يطلع صور احسن بفرق بسيط خصوصًا في الاضاءه الضعيفه ومش عارف ازاي .. رغم ان فتحة العدسة اديق من النوت 8 برو بس .. بس هنا بقى نعرف ان السوفت وير ليه عامل كبير في القصه دي.
بالنسبة لتصوير الفيديوهات .. في نقطة تفوق واضحه للـNote 8 Pro في ان هو بيقدر يصور 4k بجودة 2160p انما الـ9X Pro مش بيصور 4k .. والموبايلين مفيهومش مثبت إلكتروني لتثبيت تصوير الفيديوهات.
ممكن تشوف الصور و الفيديوهات المتصورة في فيديو المقارنة في أخر المقالة.
الأسعار :-
الـXiaomi Redmi Note 8 Pro سعره حوالي 4100 جنيه للنسخة الـ128 جيجا مع 6 جيجا رام .. اما Honor 9X Pro سعره 4500 جنيه للنسخة الـ256 جيجا مع 6 جيجا رام ولسه لحد دلوقتي معاه هدايا بقيمة اكتر من 500 جنيه.
الرأي النهائي :-
الـHonor 9X Pro بيتفوق في معالج افضل بمعمارية تصنيع احدث وسخونية اقل .. بيتفوق في المساحة الممتازة اللي مش هتلاقي زيها حاليا بالسعر ده وهي 256 جيجا .. الكاميرات بتاعته كويسة في التصوير بسوفت وير الموبايل العادي والبروز بتاع الكاميرا قليل جدا وطبعا وجود شاشة كاملة بدون نوتش حاجة في ناس كتير بتدور عليها في الفئة المتوسطة.
انما الـNote 8 Pro بيتفوق في انه بيدعم تشغيل فورت نايت لو انت بتحبها .. عليه خدمات جوجل متحمله مُسبقًا .. فيه شوية حاجات مش موجود ف الـ9X Pro زي لمبة الاشعارات ومستشعر الـIR والشحن السريع والـDark Mode والـFace Unlock .. والكاميرا الخلفية بتصور فيديوهات 4K .. ولما بتستخدم جوجل كاميرا هتقدر تطلع صور حلوة جدًا خصوصا في الـNight Mode .. ومفيهوش موتور سلايدر لو بتقلق منه.
Comments