مراجعة Honor Band 6 – أفضل باند ذكي بأقل سعر !

شاشتها AMOLED.. بتدعم اللغة العربية.. دعم قياس نسبة الأكسجين في الدم!

علشان الـ3 أسباب دول 👆 .. باند Honor Band 5 اللي فاتت من أكتر الباندات مبيعًا في مصر، النهارده بقى هنقدم مراجعة Honor Band 6 واللي فيها تطورات ملحوظة جدًا عن Band 5 من هونر ومنها الشاشة الأكبر والتصميم الأشيك والبطاية الأكبر والسوفت وير المُتطور .. والسعر مش أغلى بفرق ملحوظ.

محتويات الصندوق :-

• الباند
• وصلة الشحن الصغيرة

التصميم :-

تصميم Honor Band 6 بالكامل من البلاستيك علشان سعرها ميبقاش أغلى .. ووزنها خفيف جدًا .. وانت لابسها في ايدك هتحس انك مش لابس حاجة.

شكلها رياضي جدًا .. أكيد مش هتليق على ستايل لبس كلاسيك .. ولكن بالسعر ده انت مش بتاخد كل حاجة .. الـ ستراب سيليكون طري ومريح في اللبس .. وفيه درجات كتير ويناسب أي ايد سواء ايدك صغيرة أو كبيرة.

على شمال جسم الباند هنلاقي كلمة هونر محفور بشياكة من غير افورة .. وعلى اليمين زرار الباور وفتح المنيو وعليه تاتش شريط خفيف اوي باللون الاحمر بيخليها شيك كده.

الباند مقاوم للماية لحد عمق 50 متر .. عيش براحتك بيها ومتقلقش.

الملخص .. حجم الباند في إيدك وانت لابسها حلو جدا على انها باند ولكن طبعًا لو هتقارنها بالساعات فهي أصغر بكل تأكيد .. ولكن لما تبص عليها جمب باند 5 القديمة .. هتلاقيها احسن بكتير كحجم وكشكل علشان الشاشة.

الشاشة :-

شاشة بحجم 1.47 بوصة من نوع AMOLED بدقة 194×368 بيكسل مترجم لكثافة بيكسلات محترمة جدا 282 بيكسل لكل بوصة .. الشاشة من أقوى الحاجات في الباند دي.

الشاشة اضائتها كويسة جدًا تحت الشمس ومفيهاش اي مشاكل في الإستخدام وكمان ألوانها مشبعة علشان تديلك تجربة محترمة.

ولكن للأسف مفهاش سطوع تلقائي .. بتتحكم في 5 درجات سطوع وانا في فترة تجربتي كنت مخلي السطوع على 4 أو 5 معظم الوقت لإن معظم استخدامي كان OutDoor.

في لازقة خفيفة كده بتيجي على الباند في العلبة .. ممكن تفصلّها سكرينة على مقاس الشاشة علشان تحميها إحتياطي لان مفيش حاجة هتاخد الخبطة في وش الباند إلا الشاشة .. هونر بتقول ان الشاشة عليها طبقة 2.5D زجاج ولكن الاحتياط واجب.

استجابة اللمس هايلة على الشاشة ومفيهاش اي مشاكل واحسن من باند 5 .. والحواف بتاعت الشاشة معقولة مش وحشة .. لكن أرحم بكتير من باند 5.

لما نبص على شاشة باند 6 جمب باند 5 هنلاقي باند 6 احسن بكتير .. الشاشة أكبر بنسبة 50% والدقة كمان احسن والشاشة لما كبرت في باند 6 خليتها قابلة للإستخدام بشكل أسهل وأوضح ده غير طبعًا أنها أشيك.

نظام التشغيل والخواص :-

هونر عملت حركة عجبتني .. خدت السوفت وير بتاع الساعات الذكية الأغلى من هونر وهواوي وحطته في Band 6 علشان متحسسكش انك لابس باند رخيص.

لما تسحب من فوق هتلاقي قائمة الاختصارات .. لما تسحب من تحت هتلاقي الإشعارات اللي جاتلك .. السحب يمين وشمال هتلاقي معدل ضربات القلب و معدل الإجهاد بتاعك وعدد خطواتك والطقس والتحكم في الموسيقى اللي على موبايلك.

زرار الباور ليه وظيفتين .. ضغطة خفيفة يفتحلك الـMenu الكاملة للباند .. وضغطة مطولة هتقدر تقفل او ترستر الباند.

تقدر تتحكم في درجة الـVibration بتاعت الباند من الـSetting بكل سهولة باكتر من درجة ودي ميزة مكنتش موجودة في باند 5 .. وأنا عن نفسي خليت الـVibration على اقل درجة علشان الـVibration قوي جدا.

الباند فيها Watch Faces كتير وتقدر تحمل من Huawei Health أشكال كتير وكمان تقدر تختار صورة عندك من الـGallery تبقى خلفية الباند .. وهي بتدعم لحد 5 صور كحد اقصى لان الذاكرة الداخلية للباند 128 ميجا فقط.

الباند مفيهاش Always On Display .. الميزة ديه حصرية للساعات الذكية الأغلى .. ولكن كالعادة في Screen On تقدر تحدد وقت كبير شوية تفضل شاشة الباند شغالة.

تقدر توصل الباند باي موبايل مش شرط هونر أو هواوي .. عن طريق تحميل برنامج Huawei Health وهتعمل ربط بالباند بسهولة ومن خلال البرنامج تقدر تتحكم في حاجات كتير زي البرامج اللي تبعتلك Notifications على الباند .. وانك تخلي لما ترفع ايدك الباند تنور اللي هي الـRaise To Wake.

وطبعا أهم ما يميز الباند هنا إنها بتدعم اللغة العربية وهتقدر تقرأ الـNotifications بالعربي عادي جدا .. بس لسه مش بتدعم الـEmojis بتاعت الماسنجر .. تقدر تعرف مين بيتصل بيك وتقفل عليه لو حابب لكن مش هتقدر ترد لان مفيش ميكروفون لأن برده ميزة الميكروفون والسماعة حصرية على الساعات الذكية الأغلى.

الباند دي تقدر تقول عليها Fitness Tracker .. لو انت راجل رياضي هتفيدك جدًا .. فيها 10 انظمة رياضية مختلفة .. وانا عن نفسي روحت بيها الجيم اكتر من مرة وقدرت اعرف بيها معدل ضربات القلب بشكل مستمر ووقت التمرين وحرقت قد ايه كالوريز طول منا بتمرن.

الباند كمان تقدر تتعرف لوحدها لو انت بدأت رياضة وتبدأ تحسبلك حرقت كام كالوري من غير ما تعمل حاجة .. بس تفعل الـOption ده من اعدادات الباند .. وزي ما قولتلك طول ما انت لابس الباند هي بتحسب خطواتك وبتقيس علطول ضربات قلبك وفي رسم بياني بيوضحلك خريطة معدل ضربات قلبك طول اليوم.

ده غير ان الباند بتقدر تحددلك عدد وجودة ساعات نومك علشان لو بتواجه مشاكل في نومك.

الميزة المهمة جدا قياس نسبة الاكسجين بقت أسرع في باند 6 .. ضيق بس الباند خالص على ايدك قبل ما تقيس النسبة .. وديه حاجة مهمة جدًا في فترة الكورونا لو النسبة قلت عن 90% لأكتر من يوم يا ريت تستشير دكتور.

لو موبايلك مش لاقيه تقدر تدور عليه من الباند .. هدوس فايند فون موبايلك هيرن لحد اما تلاقيه .. وتقدر كمان تظبط منبه في الباند نفسه مش في الساعة.

البطارية :-

البطارية هنا 180 مللي أمبير والشركة بتقول هتقعد معاك 14 يوم استخدام .. وانا بواقع تجربتي هي حرفيًا بتستهلك حوالي 8% طول اليوم يعني هتكمل معاك اكتر من 10 ايام مستريح وده وقت ممتاز جدًا.

الشاحن اللي معاها لطيف جدا وعلى فكرة ده نفس شاحن الـHuawei Watch Fit والـHonor Watch ES  .. وبيشحن الباند 6 بالكامل في حوالي ساعة .. والشاحن هنا أصغر وعملي أكتر عن الشاحن القديم بتاع باند 5.

سعر Honor Band 6 :-

• السعر الرسمي لـ Honor Band 6 هو 835 جنية مصري

الرأي النهائي :-

مميزات Honor Band 6 :-

• شاشة كبيرة ممتازة
• دعم عرض الإشعارات
• دعم اللغة العربية بالكامل
• بطارية قوية جدًا

عيوب Honor Band 6 :-

• مفيش ضبط سطوع تلقائي
• مفيش GPS

الـBand 6 هي نسخة مُصغرة من Huawei Watch Fit و Honor Watch ES، حجم شاشة وحجم ستراب أصغر حاجه بسيطة .. الكلام ده انا ممكن أتقبلة جدًا لإن الـBand 6 تقريبًا بنص السعر.

الـ Honor Band 6 تطوي حقيقي عن Band 5 خصوصًا في الشاشة اللي هتخلي تجربة الإستخدام أكثر راحة والإشعارات اللي هتقدر تقرأها بشكل طبيعي وكمان في شكل ألطف شوية في اليد وتصميم شيك، لو معاك باند 5 وبتفكر تعمل Upgrade لـ باند 6 هتحس بالفرق فعلًا.