اليومين دول سوق الموبايل هادي شوية ومفيش موبايلات جديدة .. علشان كده هنفصل من الموبايلات شوية بمراجعة أرخص لاب توب من هواوي وهو Huawei Matebook D 15 الجديد .. هواوي مركزة جامد على الـLaptops الجديدة بتاعتهم واللي انت أكيد شوفت أكتر من أعلان ليهم.
التصميم :-
لما بتفتح العلبة بتاعت اللاب توب هتلاقي أول حاجه اللاب متغلف بشكل محترم .. وهتلاقي الشاحن السريع بقوة 65 وات مع وصلة الشحن من Type C لـType C .. وأيوه اللاب توب ده بينفع تشحنه بالـType C .. وبكده انت مش محتاج أكتر من شاحن .. هو شاحن واحد هيشحنلك الموبايل واللاب توب.
أول حاجه هتاخد بالك منها لما تمسك اللاب هو وزنه .. خفيف جدًا، حوالي كيلو ونصف بس تقريبًا .. التخانة بتاعته معقولة جدًا 16.9 مللي.
خامات اللاب توب من الستانلس ستيل المُحترم .. مش خامة بلاستيك او خامة رديئة .. ودي حاجة عظيمة جدًا .. كعادة هواوي بتهتم جدًا بالخامات بتاعت مُنتجاتها.
شكل اللاب توب هو هو نفس شكل Macbook بتاع Apple .. طبعًا مش هو هو بالظبط لكن هتحس انه شبهة جدًا .. وعمومًا التصميم عصري وشيك ويناسب سنة 2021 جدًا.
مفصلة الشاشة متينة .. وزي ما قولتلك صعب تفتح اللاب توب بإيد واحدة من متانة المفصلة دي .. حاجه انا شخصيًا بهتم بيها، علشان دي أول وأسرع حاجه بتبوظ في اي لاب توب.
أزرار الكيبورد بقى متينة وضغطتها مُريحة جدًا .. ترتيب الـKeyboard معقول جدًا وحجمه مُناسب .. لكن طبعًا مفيش إضاءه تحت الزراير .. والـTouchpad لما إستخدمتها مكانش فيها أي مشاكل بس انا شخصيًا بتعامل بالـMouse الـUSB ومبعرفش اتعامل بالـTouchpad خالص.
مُجملًا التصميم بتاع اللاب توب Premium جدًا فخم جدًا كشكل وخامات ووزن خفيف ومعنديش أي مشاكل معاه .. بيتفوق كمان على لاب توبات كتير في الفئة السعرية دي في نقطة التصميم.
الشاشة :-
شاشة بحجم 15.6 بوصة IPS LCD بجودة FHD+ بدقة 1920×1080 بيكسل .. الشاشة هنا مميزة جدًا في نقطة الاستحواذ .. الفريم بتاع الشاشة هنا صغير جدًا .. وبرده دي نقطة تفوق بالنسبة لـ اللابات المنافسة .. تحس أنك شايل لاب توب غالي ولكنه في الحقيقة لاب فئة متوسطة عادي.
لو هتسأل عن مكان الكاميرا فالحقيقة الكاميرا بتطلع من زرار سحري مخفي جوا الكيبورد.
نرجع للشاشة، ألوانها هتحس انها بهتانة شوية .. مش أحسن ألوان خالص ولكنها تقضي الغرض .. زوايا الرؤية بتاعت الشاشة مقبولة لحد 45 درجة بعد كده صعب تشوف حاجة.
سطوع الشاشة هنا حوالي 250 شمعة بس .. وده رقم مش كبير تمامًا ومعناه أنك لو بتستخدم اللاب توب تحت اشعة الشمس المباشرة مش هتعرف تشوف كويس.
ملخص جزئية الشاشه .. إستحواذها جميل جدًا والفريم صغير والدقة FHD ممتازة .. ولكن الألوان والسطوع متوسطين جدا .. تحس أنك واخد شكل Premium ولكن مع Quality شاشات لاب توبات فئة متوسطة أو اقل من المتوسطة شوية.
الأداء :-
اللاب هنا جاي بمعالج AMD Ryzen 5 3500U Quad Core .. تكنولوجيا 12 نانو باستهلاك 15 واط .. التردد بتاعه من 2.1 جيجا هيرتز ~ 3.7 جيجا هيرتز .. مع 8 جيجا رام من نوع DDR4 .. مع Windows 10 أصلي مع درايفراته.
الرامات هنا 8 جيجا وده الطبيعي في الفئة السعرية دي .. ولا هو وحش ولا هو حلو .. وعمومًا ويندوز 10 اللي جاي على اللاب توب بيشتغل بشكل كويس بـ8 جيجا رام .. لو أقل هتعاني شوية، ربنا يكون في عون اللي معاهم لابات 4 جيجا رام وشغالين بـWindows 10.
بالنسبة للمنافسين نقدر نقول على المعالج اللي هنا انه متوسط .. مش أقوى معالج بالنسبة لفئته السعريه .. هو مثلا يوازي الـCore i5 الجيل الثامن مثلًا.
بالنسبة لأن اللاب هنا اسمه ميت بوك .. يعني أستخدام يومي خفيف مش Gaming فالمعالج اللي هنا مش هيقصر معاك خالص .. تصفح فيديوهات وايميلات .. اللاب هنا هيبقى مرضي جدًا ليك .. لو هتفتح فوتوشوب وتعدل صور هتلاقيه كويس جدا برده.
نقرص اكتر ونفتح الـPremier علشان مثلًا نمنتج فيديو .. هنلاقي لو الفيديو مليان Data كتير زي مراجعات الموبايلات اللي بنقدمها ليكم مثلًا هنلاقي البرنامج هيبدأ يقطع تقطيع خفيف .. ولما جربنا نعمل Render للـProject ده خلص الـRender في وقت فعلي حوالي 20 دقيقة .. مع العلم اننا بنـRender نفس الفيديو على لاب توب Core i7 جيل ثامن بس HQ مش U في حوالي 7 دقايق بس !
طيب هتقولي ايه الفرق بين الـProcessor اللي اخره U واللي اخره HQ .. الـU ترمز لـLow Power Consumption .. هدف اللاب انه يوفر بطارية ويبقى لإستخدام عادي زي اللاب توب اللي هنا .. اما اللابات الـGaming واللي بنعمل عليها مونتاج تقيل بنجيبها بمعالج اخره HQ علشان يقدم High Performance.
لو انت مش فاهم اوي فانا هفهمك بالطريقة بتاعتنا .. موقع المعالج اللي هنا زي موقف SD720G الموجود في Realme 7 Pro و Oppo Reno 4 .. مش بيقدموا أفضل معالج ولكن مازال المعالج مُرضي في الأستخدام.
بالنسبة للأداء الرسومي بقى فا معالج الـGraphics او المعالج الرسومي مُدمج مش كارت شاشة خارجي .. وهو Radeon RX Vega 8 وشغال بـ15 وات برده .. وهو يعتبر بيقدم أداء أعلى من المعالجات الرسومية المُدمجة بتاعت Intel لكن طبعًا أقل بفرق واضح وصريح عن أي لاب توب بيجي بكارت شاشة مُنفصل.
اداء المعالج الرسومي مش وحش .. جربت ألعب لعبة فورت نايت وقدرت ألعب اللعبة بشكل كويس جدًا سواء موصل الشاحن او مش موصلة .. وأكيد محملتش ألعاب أكتر من كده لإن ده مش لاب توب جيمينج.
أخر حاجه في جزئية الأداء هي السخونية .. اللاب هنا صوته هادي جدًا مش هتسمعه لو مش ضاغط عليه .. او ما تضغط عليه هتسمع صوت المراوح وهو صوت خفيف مش مزعج نهائيًا .. بالنسبة للسخونية فالجزء الشمال من جنب الـTouchpad هو اللي بيسخن سخونية خفيفة .. مش مزعجة ومش هتضايقك.
بالنسبة للهارد بقى فا اللاب بيجي بهارد واحد SSD من سامسونج وحجمه 256 جيجا .. سرعة القراءه والكتابة عليه مُمتازة لأقصى درجة .. ولكن طبعًا هارد واحد بالمساحة دي مش كافي ويادوبك Partition واحد 70 جيجا للـWindows والتاي لملفاتك .. لو ملفاتك كتير هتضطر تمشي بهارد خارجي .. وبصراحة ده عيب كبير في اللاب توب ده.
عوامل الأمان وعناصر اخرى :-
في بصمة مدمجة بزرار الباور .. لو اللاب قافل خالص وجيت تفتحه دوس نص ثانية كده على زرار الباور وهو هيسجل بصمتك واللاب هيفتح ومش هيطلب منك تسجل بصمتك تاني لما يدخل على الـWindows.
ومن ناحية الأمان برده فا هواوي دامجة الكاميرا في زرار مخفي في الـKeyboard وده علشان لو الكاميرا فوق في الشاشة اولًا الفريم بتاع الشاشة حجمه هيزيد وثانيًا ممكن حد يخترق اللاب بتاعك ويفتح الكاميرا ويتجسس عليك وانت مش عارف .. فا عاش للحركة دي ولكن !
لما تيجي تعمل Video Call اللي هيكلمك مش هيتبسط لأن الكاميرا تحت وانت باصصله فوق .. ولو بصيت على الكاميرا تحت مش هتشوف اللي بيكلمك .. حقيقي الموضوع مُحير .. هو أمن بس مش عملي أوي في المكالمات .. وجودة الكاميرا هنا 720p والجودة مش وحشة ومش حلوة !
اللاب بيجي بمنفذين USB A 2.0 على اليمين مع مدخل السماعات الـ3.5 ملم .. وعلى الشمال في منفذ USB A 3.0 سريع مع منفذ HDMI ومنفذ الشحن الـType C .. وتحت الـTouchpad في الفريم في 2 ميكروفون .. وكده مفيش مدخل كارت ميموري ولا في مدخل كابل الانترنت السلكي اللي مبقاش في حد يستخدمه.
اللاب فيه سماعتين مكانهم سخيف شوية، موجودين في ظهر اللاب وهيتكتم طبعًا لو محطوط على حاجة مسطحة زي مكتب .. الصوت بتاعهم متوسط ومعجبنيش اوي .. الـQuality يعني يدوبك ولكن في شوية دوشة كده لما تعلي الصوت على الأخر.
لما تركز جمب الـTouchpad هتلاقي Huawei Share Sticker .. عن طريق الـNFC والـHuawei Share تقدر توصل موبايلك الـHuawei او الـ هونر لو هو بواجهة EMUI 10 أو أحدث باللاب توب بلمسة واحدة.
بتفتح الـPC Manager وبتدخل على My Phone وبتحط موبايلك على جسم اللاب توب وفي ثواني هيتعرف على موبايلك وهيبقى ليك تحكم كامل في الموبايل .. شاشة الموبايل بالكامل بتفتح على اللاب توب .. وبكده انت مش محتاج تفتح موبايلك خالص ولا تمسكه .. تقدر تنقل ملفات من او للموبايل وترد على مكالمات وايميلات وواتس أب وكل حاجه !
ومش لازم تسيب الموبايل على اللاب .. ممكن تحركة عادي .. المدى بتاعه معمول بيوصل لحوالي 3 متر .. ميزة جامدة جدًا ولكن للأسف مقتصرة بس على موبايلات هواوي ومش متاحة لأي موبايل من شركات الموبايلات التانية.
البطارية :-
بطارية 42 واط بتستحمل حوالي من 3 ~ 5 ساعات بإستخدام متوسط على أعلى سطوع للشاشة .. لو استخدام خفيف وموطي السطوع ممكن توصل معاك لـ7 ساعات.
المميز في اللاب هنا زي ما قولتلك انه بيجي بمنفذ شحن USB Type C زيه زي الموبايل فا ممكن تشحنه بشاحن الموبايل لو نسيت شاحن اللاب .. والشاحن المرفق معاه بيشحن نص البطارية في ساعة بس تكون مش بتستخدم اللاب .. لو بتستخدمه أستخدام تقيل وبتشحن في نفس الوقت هتلاقي زمن الشحن نص ساعة.
سعر لاب توب Huawei Matebook D 15 :-
- سعر Matebook D 15 حوالي 11 الف جنية مصري
الرأي النهائي :-
ده رأيي النهائي في اللاب توب بالنسبة لسعره وبالنسبة للمنافسين بتوعه.
مميزات Matebook D 15 :-
- تصميم عصري مع خامات ممتازة ووزن خفيف وتخانة معقولة
- مستشعر بصمة على زرار الباور
والكاميرا مخفية علشان الأمان - فريم وحواف الشاشة رفيعة جدًا ودقة الشاشة مُمتازة
- ميزة الـHuawei Share المُتميزة
- صوت هادي وتبريد ممتازة
- منفذ شحن USB Type C
- هارد SSD سريع علشان يكمل التجربة المُتكاملة
عيوب Matebook D 15 :-
- معالج اداءه ثابت ومستقر لكن مش موجه للـGaming
- شاشة بـQuality وألوان وسطوع مش أفضل حاجه
- بطارية كانت ممكن تكون أحسن من كدة
- مفيش مدخل كارت ميموري .. هتحتاج Converter خارجي
معلومة أخيرة ليك .. لو أنت مش متابع سوق اللاب توب فا اللاب توب الأقتصادي سعره من 3 لـ7 الاف جنية .. الفئة المتوسطة في سوق اللاب توب من 8 لـ14 ألف جنية .. من 15 ألف وانت طالع دي كده الفئة العالية .. وطبعًا الأسعار دي بالنسبة لـ أسعار اللاب توب الجديدة وتقيمي للاب ده كان بُناءًا على الأسعار دي.
Comments