هل التابلت ممكن يغنيك عن استخدام لاب توب ؟ .. لمجرد شاشته الكبيره ؟ طيب هو انت اصلا ممكن تفكر تشتري تابلت ليه ؟
النهارده هقولكم على إجابات الأسئلة دي في مراجعة تابلت هواوي M5 Lite الجديد وكمان هقولك بإختصار مميزات وعيوب التابلت ده وليه نزل دلوقتي بالتحديد.
التصميم والخامات :-
هواوي Mediapad M5 Lite اللي بنراجعه النهارده بيجي بجسم معدني وخامات نضيفة محترمه جدا .. والتقفيل الخارجي للتابلت ممتاز وهتحس ده فعلًا لما تمسك التابلت في ايدك وهتحس انك ماسك حاجه محترمه فعلًا، التابلت وزنه تقيل جدا حوالي 475 جرام وده طبيعي بالنسبة لتابلت بحجم الشاشة الكبير ده والبطارية الضخمة اللي هنا !
وعشان حجم التابلت اللي هو 10 بوصة وعشان وزنه التقيل جدًا واللي قريب من النص كيلو، اكيد مش هتعرف تمسكه بإيد واحده، والماسكه في الايد مش هتكون سهلة زي الموبايلات.
بالنسبة لتصميم التابلت فهو بسيط جدا، الضهر من المعدن بالكامل والكاميرا الخلفية موجوده فوق على اليمين مع جزء فوق من البلاستيك عشان يحسن من إستقبال التابلت للشبكه، وكلمة هواوي مكتوبه بالعرض في نص التابلت، وعلى الجنب اليمين هتلاقي الباور وأزرار التحكم في الصوت.
والتابلت للأسف الشديد مش بيجي معاه جراب او كوفر في العلبه، وتابلت بالحجم ده اكيد لازم يجي معاه جراب يخليك تسند عليه الجراب او حتى عشان يحميلك الضهر او الشاشة الـ10 بوصة الضخمه اللي في التابلت.
القلم وإستخداماته :-
تابلت Huawei Mediapad M5 Lite بيجي مع قلم خاص بهواوي وإسمه M-Pen، بص انا اول ما طلعت القلم من علبة التابلت مكنش شغال على التابلت، دورت شوية في السيتينج عشان احاول اعرف المشكلة .. طلع القلم بيشتغل بحجارة .. والحجارة بتاعته موجودة جواه بس لازم تشيلها من الكيس علشان يشتغل، والكيس لزوم التخزين والكلام ده عشان البطارية ميحصلهاش مشاكل بسبب التخزين.
المهم خلاص كدا القلم اشتغل بس مفيش مكان في جسم التابلت عشان تشيل القلم فيه، الطبيعي ان اي موبايل او تابلت بيشتغل بقلم بيكون فيه مكان تشيل فيه القلم .. او حتى يديلك جراب فيه مكان تشيل فيه القلم زي تابلت الثانوي، بس للأسف هواوي معملتش حساب للقلم اللي بيجي مع التابلت.
والقلم فيه حاجه زي مشبك كده عشان لو عايز تعلقه في جيب قميص او في اي حاجه، والقلم حجمه مش صغير ولا رفيع لأ هو بحجم الأقلام العاديه.
انا عايز الاول اوضحلك ان مفيش تابلتس تانيه في نفس الفئة السعرية دي بيجي معاها قلم، فا دي حاجه نعتبرها ميزة مهمه لصالح M5 Lite .. القلم ده بقى بتستخدمه عشان تتعامل مع شاشة التابلت بدال صباعك بس مع إستخدامي للتابلت حسيت اني لازم ادوس جامد شوية عن الطبيعي بتاع إستخدام التابلت بالصباع وده لإن إستجابه الشاشة للقلم بطيئه شويتين.
وبالنسبة لإستخدامات القلم في التابلت فهما حوالي 3 استخدامات، اولهم واهمهم هو التعامل مع تطبيق نيبو بتاع هواوي والتطبيق ده بيخليك تستخدم القلم في انك تكتب نوت مثلا .. او ترسم رسمة او تكتب فوق رسمة وطبعا معاك الوان كتير للقلم ومعاك كمان حجم الخط الي بتكتب بيه بالقلم وإعدادات تانيه كتيره .. او ممكن كمان تكتب كلام ويتحول اوتوماتيك لحروف انجليزي ممكن تاخدها كوبي وتحطها مثلا في رسالة .. وطبعًا كلها إستخدامات مهمه وكويسه وهتسهل عليك كتير، المشكله الوحيده إن تطبيق نيبو مبيدعمش اللغة العربية !
تاني استخدام للقلم هو الة حاسبة كدا التطبيق بتاعها موجود بردة ممكن تفتحها وتكتب بخط ايدك عمليه حسابية والتابلت هيتعرف على الارقام وينفذلك عملية الحساب ديه.
تالت واخر اوبشن هو انك ممكن تستخدم القلم في الكتابة بالكيبورد بدال ما تقعد تدوس على ازرار الحروف .. بمعنى انك هتكتب بخط ايدك بالقلم وهو هيتحول اوتوماتيك لكتابة وتبعتها، وفي الإستخدام ده التابلت بيدعم اللغة العربية عادي يعني ممكن تدخل تتشات مع حد على تطبيق ماسنجر وتكتبله عن طريق القلم.
والمشكلة اللي في القلم ان سرعة استجابه الشاشة للقلم مش الافضل، يعني بتكون متأخرة شوية وبتخليك تزهق بسرعه من الكتابة وترجع تستخدم صباعك تاني.
ومعجبنيش بردة اقتصار استخدام القلم على بعض البرامج .. يعني الواجهة نفسها مفيهاش اي اعدادات للقلم بخلاف الهاند رايتنج ف اعدادات اللغات .. يعني مثلا مينفعش اكتب عن الشاشة المطفية بالقلم ويحفظها في نوت مثلا زي موبايلات سامسونج جالاكسي نوت.
الشاشة :-
الشاشة هنا في التابلت بتيجي بحجم 10.1 بوصة وهي نوعها IPS LCD ودقتها FHD+ .. وحقيقي الشاشة عملاقة وضخمة مفيهاش كلام .. بس الشاشة الوانها معجبتنيش اوي وحاسسها مبكسلة شوية لما بشغل عليها العاب مثلا او بشغل فيديو على يوتيوب بجودة عاديه .. هل ده طبيعي مثلا علشان حجم الشاشة الكبير ده واستخدام دقة FHD ؟ هل كان لازم مثلا QHD ؟ .. بس اصلا المعالج الي هنا بعافية شوية.
شاشة التابلت من قدام بتيجي بحواف ضخمة جدًا من الجناب ومن فوق وتحت .. مش عارف ليه بصراحه لإن في تابلتس اقدم وبحواف اصغر من كده، بس فعلًا لو الحواف صغرت عن كده هتأثر بشكل ايجابي لإن الشاشة والتابلت كله حجمه كبير اوي وكمان الحواف هتخلي الحجم اكبر والوزن اتقل.
المعالج والاداء :-
الكلام عن المعالج فهواوي هنا مستخدمة معالجها القديم وهو كيرن 659 .. ثماني النواة تكنولوجيا 16 نانو .. معالج على قده حبتين تلاته .. وكمان الواجهة هنا مش متحدثة .. شغالة على اندرويد اوريو والله اعلم هتتحدث ولا .. وكل الكلام ده مخلي الاداء مش سلس اوي .. يدوبك التابلت ده مناسب للاستخدام المعتدل او المتوسط مش اكتر من كدا .. يعني يدوب برامج سوشيال تصفح يوتيوب كدا يعني، والمعالج ده هو اللي موجود في Honor 9 Lite و Y9 2018.
بالنسبة للاداء الرسومي في الالعاب فالمعالج الرسومي هنا ضعيف حبتين .. لعبة ببجي بتشتغل على اعدادات جرافيك متوسطة وبتسقيط فريمات، لازم تنزل لاقل اعدادات جرافيك عشان تشتغل كويس .. وكول اوف ديوتي بردة شغالة على اقل اعدادات جرافيك ويدوبك شغالة تمام، وبرده احب افكرك ان وظيفة التابلت مش تشغيل الالعاب اصلًا.
البطارية :-
وديه حاجة جامدة جدا بقى في التابلت، البطارية هنا بتيجي بحجم 7500 مللي أمبير .. إستخدمتها في تجربتي إستخدام تقيل جدا واستحملت معايا حوالي 9 ساعات شاشة مفتوحة على اعلى درجات سطوع للشاشة والعاب طول اليوم .. فيعني التابلت ده احب اقولك هيقعد معاك يومين مستريح بالاستخدام المعقول.
وكمان معاك منفذ تايب سي وشاحن سريع ف العلبه 18 واط بيشحن البطارية العملاقة ديه بالكامل في اقل من 3 ساعات.
الكاميرات :-
مفيش اهتمام هنا بالكاميرات زيه زي معظم التابلس، الكاميرا الخلفية بتيجي بدقة 8 ميجا بيكسل .. والامامية بردو بتيجي بنفس الـ8 ميجا بيكسل بتوع الخلفية، الكاميرا السيلفي هنا عجبتني اكتر ويمكن هما مهمتين بيها علشان مثلا الي هيتكلم فيديو كول في التابلت هنا السيلفي هتقضي الغرض معاه ومش مطلوب من التابلت اكتر من كدا فمش هعيب في الكاميرات الي هنا.
عناصر اخرى :-
من افضل النُقط في التابلت هنا هي البصمة، التابلت بيجي ببصمة سريعة جدًا وعمليه وممتازة كبصمة إصبع تحت الشاشة في تابلت يعني، ومفيش هنا FaceUnlock لفتح التاب عن طريق الوجه، والتابلت فيه لمبة اشعارات نورها واضح وقوي جدًا.
بالنسبة لنظام التشغيل التابلت بيجي بأندرويد اوريو 8.1 بواجهة EMUI 8.1 القديمه اللي كانت تقيله جدًا .. بس انا حابب اقولك ان التابلت ده نزل بره بقاله سنه ولسه نازل مصر دلوقتي فا ممكن ده يكون سبب انه بيجي بواجهة قديمه زي دي، بس حتى لو كده اعتقد المفروض ينزله ابديت للواجهة الجديده !
ومن افضل المميزات في التابلت هي نُقطة الصوت .. انت هنا معاك 4 سماعات ستيريو خارجيه هيقدمولك تجربة صوتيه قوية جدا جدا .. والسماعات محترمه جدًا لإنها بتيجي من شركة هارمون، وبالنسبة لسماعة المكالمات الاماميه فا مفيش سماعة مكالمات .. التابلت بيفتح السبيكر وبتتكلم من خلال والمايكات بتاعت التابلت موجوده في الجزء اللي فوق فيه.
اما عن الشبكة هنا في التابلت فهي متوسطة، مش هتديك افضل حاجه يعني مش قوية اوي مش ضعيفه اوي لكنها مقبوله.
الرأي النهائي :-
رأيي النهائي في تابلت هواوي Mediapad M5 Lite .. التابلت ده مميز في السماعات الاستريو .. القلم المرفق معاه .. البصمة الي صعب تلاقيها في تابلت .. البطارية الضخمة والشحن السريع وكمان مساحة تخزين ورام مقبولين في الفئة السعرية الي التابلت ده موجود فيها.
خلي بالك المنافسين للتابلت ده في الفئة السعرية ديه .. ناقصهم حاجات كتير موجودة في التابلت ده .. فـ فرصة التابلت ده قوية جدا في انه يقدر يعمل حاجة .. هواوي منزلاه علشان يساعدها في انها تتواجد في السوق المصري لحد اما تقدر تنزل موديلاتها الجديدة بسبب مشاكل هواوي مع امريكا.
واخيرا معجبنيش في التابلت هنا .. المعالج مش مناسب لسنة 2020 الي داخلين عليها .. والشاشة مبكسلة شوية لو هتركز معاها اوي واستخدامات القلم المحدودة بس كون وجوده لوحده ميزة زي ما وضحتلك.
في النهاية .. التابلت عمره ما هيغينك عن اللاب توب ولا الموبايل .. التابلت ده حاجة في النص كدا قليل مننا الي هيكمل في استخدامه .. للي بيدور على شاشات كبيرة علشان مثلا يذاكر من ملفات PDF عليه .. او للاشخاص الكبيرة في السن الي عاوزين شاشات عملاقة علشان مثلا يتفرجوا على فيديوهات ويعمل فيديو كول مع قرايبهم او اولادهم او احفادهم ويبقوا معاهم لحظة بلحظة.
سعر التابلت :-
سعر التابلت الرسمي 5777 جنية للنسخة 64 جيجا مع 4 جيجا رام ، وينفع تركب شريحة واحدة ومعاك مكان لكرت ميموري وعلبة التابلت بيجي فيها التابلت والقلم والشاحن الـ 18 واط و وصلة الشحن ومفيش سماعات أذن ولا جراب .
Comments