طبعا احنا اخر ناس في الكوكب نراجع موبايل سامسونج Galaxy A51 .. وعشان كده في المراجعة دي هقدملك حاجه زياده وهي مقارنة الـA51 مع موبايلين كمان في نفس الفئة السعرية .. والموبايلين هما الريلمي XT والـ Galaxy A50 القديم، وفي المقارنة دي هقدر اوضحلك التطور اللي حصل من الـA50 للـA51 وكمان هنعرف لسه سامسونج مش بتقدم قيمة مقابل سعر ولا لأ عن طريق مقارنة الموبايل بالـRealme XT اللي من اقوى موبايلات الفئة المتوسطة.
التصميم :-
موبايل جالاكسي A51 بيجي بنفس وزن وحجم الـA50 وبنفس الابعاد، وكمان بنفس احساس المسكة في الايد واللي هو ممتاز، ولو بصينا على الـGalaxy A50 اصلًا هنلاقيه كان ممتاز جدًا في نقطة الوزن والابعاد والمسكة في الايد فا بالتالي الـA51 الجديد ممتاز جدًا، وحرفيًا هو الأفضل في نقطة التصميم والمسكة في الايد والوزن الخفيف في الفئة السعرية دي.
ده بالنسبة للوزن والابعاد والمسكه في الايد، اما عن الشكل والتصميم الخارجي فا الخامات واحد وهي البلاستيك البولي كاربونيت واللي سامسونج استخدمته في Galaxy A70 و A50 السنه اللي فاتت ودلوقتي بتستخدمه في A51 تاني .. وعن الشكل نفسه هنلاقي التصميم واخد نقشة عبارة عن 3 مثلثات في ضهر الموبايل بشكل قريب من اللي شوفناه في Galaxy A30s.
اما عن رصة كاميرات الموبايل في الضهر فهي بتيجي بشكل جديد واللي هو تريند حاليًا وهنشوفه الفتره الجايه كتيره .. ومميزات طريقة عرض الكاميرات دي في الضهر ان بروزها عن الضهر بيكون قليل جدًا وبيكون للفريم كله مش للكاميرات بس فا مش هيكون في قلق من النقطه دي.
وزي ما وضحتلك فوق ان الموبايل بيجي بتصميم من خامة البلاستيك البولي كاربونيت .. وزي ما الخامه دي مميزة في الوزن الخفيف وانها مش معرضه للكسر لكنها معرضه للخربشه والبهدله بشكل كبير جدا .. والجراب كمان مش بيحل المشكله دي لأ بيزودها لإنه بيخلي التراب اللي بين الجراب والموبايل يخربش ضهر الموبايل.
وعشان تحمي الموبايل انصحك تركب سكين من شركة Pro Skinz ودي شركة موجوده في الشيخ زايد ومدينة نصر .. الشركة بتستخدم افضل الخامات العالميه اللي بتحمي موبايلك من الخدوش والتبصيم ومبتسيبش اثر لما تشيله من على الموبايل لأ هي بتحافظ على موبايلك نضيف ومحمي وبتديله شكل خارجي افضل واشيك .. وكمان ممكن تركب الجراب الشفاف اللي بيجي مع الموبايل فوق السكين بحيث تزود الحمايه على الموبايل.
لو بصينا على واحد من اقوى موبايلات الفئة المتوسطه في فئته وهو Realme XT جنب الـGalaxy A51 هنلاقي ان الاكس تي يكسب في حاجه والـA51 يكسب في حاجه، الاكس تي هيكسب في الخامات الخارجية الأكثر فخامه وقيمة لإنها من الزُجاج اللي بيديك تجربة افضل في مسكه الموبايل وشعور فخم شوية، لكن سامسونج هيكسب في الوزن الاقل والتخانه الاقل وبروز الكاميرات اللي مش موجود.
الشاشة :-
الشاشة في الـSamsung A51 هي نُقطة القوة الحقيقيه اللي في الموبايل .. وده لإن الشاشة هي اول شاشة بثقب في الفئة المتوسطة وكمان الشاشة اموليد ومن سامسونج يعني العظمه كلها، شاشة الموبايل بتيجي من نوع سوبر اموليد وبحجم 6.5 بوصة بدقة FHD+ مع ابعاد 20:9 والشاشة كامله لإن السيلفي هنا موجوده في خرم صغير جدًا في نص الشاشة من فوق بشكل قريب من Note 10 لكن بحجم اصغر.
إستغلال الشاشة لواجهة الموبايل جبارة حرفيًا في الفئة المتوسطة، انت عندك اصغر حواف فوق وتحت وعلى الجناب وعندك اصغر ثُقب موجوده في الشاشة حتى الأن .. شكل الشاشة الضخمة اللي مش محسساك بحجمها الكبير ومديالك تجربة شاشة كامله ممتازة من غير اي حواف .. كل ده بيحسسك قد ايه سامسونج ابدعت في تصنيع شاشة الموبايل !
مع الثُقب اللي في الشاشة الصغير المحترم ده مع الحواف الصغير على جميع جوانب الموبايل والشاشة الضخمة دي مع موبايل مش محسسك بحجم الشاشة الضخمة دي، سامسونج تاخد لقب اقوى شاشة في الفئة المتوسطة وهي حاطه رجل على رجل !
لما نيجي نقارن الموبايل بالـA50 هنلاقي ان شاشة الـA51 الجديد بتقدملك درجات سطوع هاديه وقليله اقل من الـA50 ونفس النتيجة بردو لو قارننا الموبايل بالـXT هنلاقي ان الموبايل بيقدم درجات سطوع اهدى واقل من الاكس تي، وعمومًا الكلام ده مش هتلاحظه غير لما تمسك الموبايلات مع بعض لكن غير كده انت معاك شاشة عظيمه بحواف قليلة جدًا وصغيره ونسبة إستحواذ ممتازة للشاشة من واجهة الموبايل الاماميه.
بس اكيد تجربة الشاشة الكامله افضل وفي الفئة بتاعت الـA51 عندك موبايلات قوية بتقدم شاشات كامله زي الـOppo Reno 2F والشاومي Mi 9T .. ودي الموبايلات اللي بتقدم شاشات اموليد كامله بدون نوتش بس طبعًا هتديك وزن اتقل بسبب موتور السيلفي اللي هيخليك تقلق شوية.
وبالنسبة لطبقة الحماية الموجوده على الموبايل فا هو بيجي عليه Corning Gorilla Glass 3 والموبايل بيخرج من العلبة متركب عليه سكرينه .. ومن الاعدادات ممكن تلغي شكل الثُقب بتاع الكاميرا السيلفي وهتحط حافة سودا بالعرضه فوق.
الأداء :-
سامسونج قدمت اقوى حاجه عندها هنا في الموبايل ده وهي الشاشة وجت عند المعالج وقالت كفايه بقى .. الموبايل بيجي بمعالج اكسينوس 9611 وهو معالج ثماني النواة وبيشتغل بتقنية 10 نانو ميتر وده نفس البروسيسور اللي موجود في موبايل M30s اللي بيجي بسعر اقل بفرق كبير، وكمان مفيش تطور كبير عن اداء الـGalaxy A50 القديم واللي كان بيجي بـ اكسينوس 9610.
وبإختصار الموبايل بيقدم اداء كويس مش وحش لكنها مش نقطة قوة في الموبايل .. وعشان تساعد البروسيسور انه يبينلك قوته ويوريك قد ايه هو كويس ادخل اقفل او قلل الانيميشن بتاعت واجهة سامسونج، هي حلوه مش وحشه بس بتتقل الواجهة اوي وبتقلل من السرعة الموبايل وعادي ممكن تقللها بس بحيث تاخد نفس التجربة الجميله بتاعتها مع سرعة في الواجهة.
وبالنسبة لأداء الموبايل فا هو مش سلس اوي بس مقبول كإستخدام لبرامج السوشيال والمكالمات والإستخدام العادي بس .. بس ارجع واقولك انه احنا في 2020 دلوقتي وده مش افضل معالج موجود في الفئة المتوسطة .. انت لو يهمك الاداء بشكل كبير او محتاج موبايل اداءه كويسه ابعد عن الموبايل ده لإنه مش جاي عشان يديك افضل اداء .. اما لو انت شخص إستخدامك عادي وبتحب واجهة سامسونج وشاشات سامسونج الممتعه فا الموبايل ده مناسب جدا ليك.
سامسونج جالاكسي A51 هو اول موبايل من شركة سامسونج بيجي بواجهة سامسونج الجديده One UI 2.0 والمبنيه على اندرويد 10 الجديد، والواجهة دي فيها نفس الاوبشنز القديمه اللي موجوده في الواجهة القديمه مع مميزات جديده زي انك تربط الموبايل بتاعك بالويندوز وتعمل ايكو سيستم صغير كده.
وكمان في اوبشن جديد بتتحكم منه في ايه اللي يحصل لما تدوس مرتين على زُرار الباور ممكن تخليه يفتح بيكسبي او تفتح تطبيق معين او الكاميرا مثلًا ودي حاجه كويسه وهتفيد ناس كتير .. وكمان عندك ايدج بانل اللي بتيجي في سلسلة الـS والـNote من سامسونج واللي هتسهل عليك كتير بحيث انك ممكن تحط فيها برامج توصلها بسهولة.
والتحديث الجديد حسنلك كمان في النايت مود او الوضع الليلي بتاع الموبايل وخلى اداءه احسن .. القوائم لونها بقى رايح للرمادي الغامق كده مش الرمادي اللي مدي على الأصفر كده زي ما شوفنا في الواجهة القديمه.
الـA51 بيجي بـ6 جيجا رام بدل الـ4 رام اللي في الـA50 القديم، وبيهم هتاخد اداء افضل في فتح برامج اكتر في الخلفية من غير ما السوفت وير يقفلهم، وكمان هتعرف تستخدم اكتر من برنامج في وقت واحد بشكل اريح واسهل كتير من الاول.
بالنسبة للاداء الرسومي في الموبايل واللي بيهم ناس كتير اوي .. في لعبة ببجي في اوبشن الـUltra HDR وشغال عادي كويس بس لو لعبت لفتره طويله هتلاقي تقطيع بسيط وتسقيط فريمات كل فتره ولازم تنزل لإعدادات جرافيك اقل، وبالنسبة لـ Call Of Duty هي شغاله على اعدادات جرافيك High وشغاله كويس ومفيش اي تسقيط فريمات او تهنيج .. وبالنسبة لفورت نايت فا هي مش شغاله على الموبايل ده بشكل رسمي.
الخلاصه بالنسبة للأداء فالموبايل مجاش بتطورات كتيره عن الـA51 والاتنين قريبين من بعض جدًا مع 6 جيجا رام في A51 الجديد بدل 4 فقط في A50 .. واداء الموبايل بالنسبة للمنافسين هيكون اقل من معظم المنافسين زي الاكس تي وغيره.
عوامل الامان والشبكة وعناصر اخرى :-
بالنسبة لبصمة الإصبع واللي كانت جدل كبير اوي في A50 القديم .. بصمة الـA51 الجديد بقى بقت اسرع بفرق بسيط اوي عن الـA50 .. التطوير الحقيقي اللي حصل في نقطة البصمة انها مبقتش تغلط خالص .. قليل اوي لما هتيجي تفتح الموبايل ببصمتك ويغلط او ميفتحش بس بردو هو مش اسرع بصمة في الشاشة خصوصًا مع الانيميشنز الكثيره اللي في واجهة سامسونج واللي في البصمة بتخلي اداء البصمة مش سريع .. ولو قارننا البصمة ببصمة الإكس تي او اي منافس تاني في الفئة دي بيقدم بصمة تحت الشاشة هنلاقي ان الموبايل يخسر قدامهم، الموبايلات المُنافسه بتقدم بصمة اسرع بفرق كبير واكثر عمليه من بصمة الـA51.
وبالنسبة للـFaceunlock هو كويس بس مش اسرع حاجه .. وتقدر تزود سرعته عن طريق انك تضيف وشك مرتين في الموبايل هيحسن شوية من دقته وسرعته في الفتح.
وبالنسبة لـ لمبة الاشعارات فهنا مفيش لمبة اشعارات لكن معتقدش انك محتاجها، سامسونج بتوفرلك ميزة Always On Display اللي بتعرضلك ايقونات الاشعارات اللي بتجيلك على الشاشة وهي مقفوله .. وبالنسبة لمستشعرات الموبايل فهي شغاله بدون مشاكل والموبايل بيدعم ميزة الـNFC اللي هنحتاجها كتير في سنه 2020.
صوت الموبايل الخارجي حلو وعالي ومجسم اكتر من Galaxy A50 القديم اللي كان عالي ومش مجسم، الـA51 بقى فيه طبقات وبيز وبالنسبة لصوته مُقارنتًا بالـXT هنلاقي ان صوته اقل حاجه بسيطه اوي من صوت الاكس تي، وصوت سماعة المكالمات عالي جدًا وممتاز وهتحتاج توطيه كمان .. وصوت سماعة الاذن كويس جدًا وبيدعم Dolby Atoms الموجوده في الموبايل.
بالنسبة لموضوع الشبكه واللي كان فيه كلام كتير اوي في A50 القديم .. فالوضع اتحسن كتير اوي عن A50 .. يعني قارنت شبكة الـA51 الجديد بالـ A50 ولاقيت سرعة استجابة الداتا في الاماكن اللي شبكتها ضعيفه احسن بكتير في الـA51 عن الـA50 .. ولما قارنته بالاكس تي لاقيت ان الـA51 قرب شوية من الريلمي اكس تي بس لسه موصلش ليه .. وعموما اداء الشبكة النهائي لـ A51 اديله متوسط مش ممتاز .
البطارية :-
سامسونج استسهلت وجابت بطارية الـA50 وحطيتها في الجيل الجديد A51، نفس البطارية اللي بتيجي بحجم 4000 مللي امبير مع دعم الشحن بقوة 15 وات ومنفذ الشحن USB Type C .. مفيش تطوير حقيقي في البطارية عن الـA50 القديم والاداء كمان قريب جدًا.
بالنسبة لأداء البطارية الفعلي فهو اداني نفس اداء الـA50 القديم .. استحمل معايا يوم كامل من الاستخدام المتوسط، بس لو هتدوس عليه شوية في الإستخدام هتحتاج تشحنه قبل نهاية اليوم .. وبالنسبة لزمن الشحن هتشحن في حوالي ساعتين إلا تلت بالشاحن اللي موجود في علبة الموبايل .. انا معنديش مشكلة مع البطارية ولا مع سرعة الشحن، الإتنين متوسطين مش افضل حاجه ولا اسوأ حاجه.
الكاميرات :-
الموبايل بيجي بـ 4 كاميرات خلفية بدال 3 كاميرات بس في A50، اول كاميرا في الـ4 كاميرات بتيجي بدقة 48 ميجا بيكسل وفتحة العدسة بتاعتها F/2.0 وتاني كاميرا بتيجي بدقة 12 ميجا بيكسل وفتحة عدسة F/2.2 وهي عدسة للتصوير الواسع، والكاميرا التالته بتيجي بدقة 5 ميجا بيكسل للعزل واخر كاميرا الرابعه بتيجي بدقة 5 ميجا بيكسل وهي ماكرو للتصوير عن قُرب.
والكاميرا السيلفي بتيجي بدقة 32 ميجا بيكسل بفتحة عدسة ضيقة شوية F/2.2 وكأرقام فالموجوده في A50 دقتها 25 ميجا بيكسل بفتحة عدسة اوسع.
تطبيق الكاميرا اللي بيجي مع موبايل A51 اتضافله الـNight Mode للتصوير بالليل وكمان بقى بيدعم التصوير الماكرو اللي بقت زياده عن الـA50 السابق.
بالنسبة للتطورات اللي حصلت من الـA50 للـA51 في الكاميرا الخلفية فأغلبها كانت في معالجة الصور اكتر من التحسينات في الهارد وير .. معالجة الصور بتاعته بقت حلوه جدًا .. الالوان مظبوطه والـDinamic Range مظبوط جدًا، وبالنسبة للعدسة الواسعه الموجوده في الموبايل فهي واسعه جدا وبتطلع صور ممتازة بتفاصيل كويسه .. والعدسة الماكرو اداءها مش كويس اوي مش المتوقع.
وبالنسبة للكاميرا الاماميه هنلاقي نفس التطوير بردو، الالوان بقت افضل بفرق كبير عن الـA51 والتفاصيل افضل كمان والـDinamic Range اتحسن بشكل كبير سواء بورتريه او تصوير عادي.
بالنسبة لمقارنة الكاميرات الخلفيه بين الموبايلين الـA50 والـA51 فهنلاقي ان معالجة الصور في الـA51 افضل بفرق كبير جدًا عن الـA50 وكمان في تصوير البورتريه هنلاقي ان الـA51 افضل في التفاصيل والالوان .. والتصوير داخل مكان مغلق هنلاقي ان التفاصيل في الموبايلين قريبة جدًا من بعض بتفوق بسيط اوي للـA51 والوان البشره افضل في الـA51 بفرق كبير، وبالنسبة لإستخدام النايت مود في التصوير هنلاقي ان في تفوق كبير لصالح الـA50 في النقطة دي ودي حاجه متوقعه لإنه بيجي بفتحة عدسة اوسع وبيعرف يتعامل افضل مع الإضاءه.
اما عن مقارنة الكاميرا السيلفي في الموبايلين هنلاقي ان الـA51 افضل بفرق مش كبير اوي عن الـA50 لإن الـA50 نفسه كان ممتاز، الـA51 هيتعامل مع الإضاءه احسن وهيدي صور بورتريه احسن.
لو حطينا الاكس تي مع الـA51 هنلاقي ان الاكس تي بيدي الوان مش واقعيه اوي وبيلعب في الوان الصورة وبيطلعلك صورة مِحمره شوية عن الـA51، لكن الـA51 هيديك صورة افضل والوان بشره افضل .. اما عن التصوير البورتريه في الموبايلين هنلاقي ان الاكس تي بيطلع صور بورتريه افضل بفرق كبير وملحوظ كألوان بشره وتفاصيل وعزل .. وبالنسبة للتصوير داخل مكان مغلق الاكس تي بيلعب في الالوان بشكل كبير لكنه بيقدم تفاصيل اكتر وبيطلعلك في النهاية صورة تحب تشوفها، وبالنسبة للنايت مود فالإكس تي هيقدملك صور افضل بفرق كبير جدًا عن الـA51.
وبالنسبة لمقارنة الكاميرا السيلفي في الاكس تي والـA51 فالموبايلين قريبين جدًا من بعض، بفرق كل سوفت وير بيتعامل ازاي مع الصورة، سوفت وير ريلمي بيحاول يخلي لون البشره دافي اكتر اما الـA51 بيحاول يفتح الصورة واحيانًا بيلسع لون الجلد، وبالنسبة للبورتريه فالتفاصيل في ريلمي اكس تي هتكون افضل اما العزل والتعامل مع الإضاءه والـDinamic Range هيكسب فيها الـA51.
ممكن تشوف كل صور المقارنة في فيديو المراجعة في أخر المقالة.
سعر الموبايل :-
الموبايل بيجي بنسخة واحده بس بمساحة تخزين 128 جيجا مع 6 جيجا رام، وسعر النسخة دي في السوق المصري 5350 جنيه مصري والموبايل بيدعم تركيب كارت ميموري خارجي وشريحتين إتصال.
والموبايل بيجي متركب عليه سكرينه، والعلبة بيكون فيه وصلة الشحن USB Type C والجراب الشفاف ورأس الشاحن 15 وات وسماعات خارجية أذن.
الرأي النهائي :-
موبايل Samsung Galaxy A51 احسن من A50 في التصميم والشكل خصوصًا شكل الشاشة الجديد بتصميم الثٌقب والحواف الصغيره، وكمان بيجي بـ6 جيجا رام وشبكة افضل بفرق كبير مع بصمة اكثر إعتماديه واسرع بفرق بسيط، ومعالجة الكاميرا للألوان افضل وشبكة أفضل.
ولكن بالنسبة للموبايلات المنافسة بنفس السعر فموبايل Samsung A51 بيقدم أفضل شاشة أموليد واستحواذ شاشة مع وزن خفيف ومسكة في الايد ممتازة ولكن الموبايل مش بيقدم أفضل معالج ولا أفضل كاميرات ولا أفضل بطارية ولا أفضل سرعة شحن !
ومن الأخر أعتقد ان سعر الـ Samsung A51 هيقل حوالي 400 جنية مثلا خلال اسبوعين وبكدا هيقدر ينافس وبقوة !
مميزات Galaxy A51 :-
- الهاتف يدعم تركيب شريحتين إتصال مع كارت ميموري في نفس الوقت
- شاشة الهاتف سوبر اموليد قوية ضخمة جدًا وإستغلال الواجهة الاماميه للهاتف ممتازة
- اندرويد 10 الجديد باحدث إصدار من واجهة سامسونج
- تصميم الهاتف الخلفي جديد وخفيف وبدون بروز كبير للكاميرات
- كاميرات الهاتف تُقدم اداء جيد في هذه الاضاءات الجيدة كما تدعم الكاميرا السيلفي تصوير فيديوهات 4K
عيوب Galaxy A51 :-
- تصميم الموبايل من البلاستيك البولي كاربونيت المُعرض للخدوش والتبصيم
- اداء الهاتف ليس الافضل في فئته السعرية
- لم يتم تطوير البطارية عن الجيل السابق من الهاتف
- سرعة البصمة ليست الأفضل ولا الأسرع في هذه الفئة السعرية
- لم يقدم تغيير جذري عن Galaxy A50
Comments