مراجعة موبايل Huawei Nova 5T – موبايل رائد من هواوي بسعر متوسط !

لو حابب تشتري موبايل رائد بسعر معقول .. يبقا لازم تفكر في Huawei Nova 5T الجديد .. بس قبل ما تشتريه هوضحلك في المقالة ديه كل مميزاته و عيوبه .

التصميم :-

موبايل Huawei Nova 5T تصميمه شيك ومختلف وجديد على فئة النوفا .. الظهر عليه حروف كلمة نوفا متكررة في كل حته .. وكمان اللون بيتدرج من ازرق لموف .. وكلمة نوفا مكتوبة كبيرة تحت مكان لوجو هواوي تلمحلك اد ايه الاهتمام بفئة النوفا عندهم .

ظهر الموبايل من الزجاج والفريم من المعدن .. الموبايل برميم في الايد وحجمه صغير و وزنه خفيف 174 جرام وهيخليك تستخدمه بكل سهولة بايد واحدة مفيش اي مشاكل ف مسكة الموبايل .

بروز الكاميرا الخلفية كبير حبتين .. والبروز ده بيتغطي بالجراب الشفاف الي جاي مع الموبايل ف العلبة .

الشاشة :-

شاشة موبايل Nova 5T اسوأ حاجة فيه .. شاشة من نوع IPS بحجم 6.26 بوصة بدقة FHD+ .. شاشة كاملة بدون نوتش وتم استخدام بانش هول او ثقب بالشاشة يتحط فيه الكاميرا السيلفي .

الحواف حوالين الشاشة كويسة جدا ومقبولة والشاشة نفسها حجمها قليل وملموم كدا في الايد وصباعك هيوصل لاركان الشاشة بكل سهولة وانت ماسك الموبايل بايد واحدة .

بالنسبالي .. استخدام شاشة IPS في الفئة السعرية ديه يعتبر عيب لأن معظم الموبايلات المنافسة بتستخدم شاشات أموليد الي سطوعها تحت الشمس أعلى وتشبع الألوان فيها أفضل .

الشاشة مفيش فيها مشاكل ع انها من IPS .. وطبعا مفيش اعلان رسمي عن وجود طبقة الحماية ع الشاشة والموبايل جاي ع العلبة متركب عليه سكرينة .

لو مش عاجبك شكل الثقب او البانش هول الي ف الشاشة وعينك مش عارفه تتعود عليه ممكن من اعدادات الموبايل تضيف شريطة سودا تخفي بيها الثقب ده .

الاداء :-

وديه من أفضل الحاجات ف موبايل Huawei Nova 5T لانه جاي بمعالج كيرن 980 الرائد من هواوي بتقنية تصنيع 7 نانو ميتر .. حرفيا ده كدا ارخص موبايل من هواوي بالمعالج ده .. والمعالج ده هيديلك اداء ممتاز في الاستخدام اليومي وفتح البرامج والتطبيقات .. وكمان معاك 8 جيجا رام هيديلك سماحية فتح برامج كتير في الخلفية .

الموبايل كامل خدمات جوجل شغاله عليه لانه بالفعل واخد الترخيص وبيوصله تحديثات امنية بدون اي مشاكل .

وبالنسبة للاداء الرسومي فالموبايل ده هيشغلك اي حاجة ف خيالك ع اعلى اعدادات جرافيك .. ببجي مثلا بتشتغل على الترا اتش دي ار وشغالة بكفاءة وبدون اي تهنيج او تسقيط فريمات .

كول اوف ديوتي شغالة على فري هاي وشغالة بردة زي الفل وبدون اي مشاكل .

حتى فورت نايت والي هي واحدة من اتقل الالعاب شغالة ع الموبايل ده ع اعلى اعدادات جرافيك الي هي Epic بدون اي مشاكل .

حرفيا المعالج الي ف الموبايل ده جبااار متقلقش منه في تشغيل اي حاجة من ناحية الألعاب .

عوامل الأمان :-

البصمة مدمجة بزرار الباور .. مش لازم تدوس .. لمسة بس كدا الموبايل هيفتح .. والبصمة سريعة جدا والمكان ده انا شايفة عملي اوي .

والموبايل كمان فيه فيس ان لوك بيتعرف ع وشك بسرعة جدا وبيفتح بردة .

عناصر أخرى :-

الموبايل موجود فيه لمبة اشعارات نورها ضعيف وبتنور باكتر من لون .

الموبايل فيه عمل نسختين من برامج التواصل الاجتماعي .

المستشعرات كلها موجودة وحقيقية في الموبايل ده .. اولهم مستشعر التقارب الي موجود ف الحافة العلوية للموبايل والي بيقفل الشاشة ع ودنك وانت بتعمل مكالمة .. وكمان مستشعر الضوء موجود حقيقي والموبايل بيدعم الجيروسكوب بدون اي مشاكل .

صوت الموبايل جاي من سماعة واحدة تحت ع اليمين صوتها عالي ومجسم .. وصوت سماعات المكالمات عالي ممتاز .

من أهم العيوب ف الموبايل ده مفيهوش مدخل 3.5 ملي ولازم تستخدم وصلة تحويل من Type C لـ 3.5 او تستخدم سماعة تايب سي اصلا .. مش عارف لسه علبة الموبايل هيبقا فيها انهي سماعة .

واخيرا بالنسبة لشبكة الموبايل فهي قوية جدا وممتازة بصراحة مفيهاش اي مشاكل ف الاستخدام .

البطارية :-

بطارية موبايل نوفا 5T متوسطة لأنها 3750 مللي أمبير .. بتستحمل معاك متوسط 5 لـ 6 ساعات شاشة مفتوحة .. مش احسن وقت في الفئة السعرية ديه بس هو ما زال وقت مقبول .

بالنسبة لسرعة الشحن .. الموبايل جاي معاه شاحن 22.5 واط في العلبة بيشحن الموبايل عن طريق منفذ Type C لحد 90% في ساعة واخر 10% بياخدوا تلت ساعة ويبقا كدا زمن الشحن الكلي ساعة وتلت وهو وقت كويس جدا .

الكاميرات :-

الكاميرا الخلفية رباعية الاساسية 48 ميجا بيكسل فتحة عدسة 1.8 بمستشعر سوني المحترم IMX 586 .. والتانية 16 ميجا بيكسل للتصوير الواسع فتحة عدسة 2.2 والتالتة 2 ميجا بيكسل للعزل والرابعة 2 ميجا بيكسل للماكرو .

والسيلفي 32 ميجا بيكسل فتحة عدسة 2.0 موجود في الثقب الي في الشاشة .

الكاميرا الخلفية

الموبايل بيقدر يطلع صور ممتازة وتفاصيل كتير بدون اي غلطات او لعب كبير في الألوان في الاضاءات الكويسة .. البورترية بيعمل فلتر بسيط كدا ع الصورة بس ما زال مقبول والقص فيه مظبوط جدا .

التعامل مع الشمس و الـ HDR بتوع الكاميرا كويسين جدا .

بالنسبة للعدسة الوايد انجل فهي اداء كويس بس التفاصيل والالوان بتقل شوية .

والعدسة الماكرو الموجودة فيه ادائها كويس بس مش احسن عدسة ماكرو جربتها بصراحة في الفئة السعرية ديه .

الاضاءة الداخلية الاداء ممتاز والبورترية لسه مظبوط والألوان مظبوطة والتفاصيل وكل حاجة كويسة جدا .

الاضاءات القليلة بقا نجرب النايت مود الي بيقعد حوالي من 5 لـ 7 ثواني يصور ويعمل معالجة للصورة علشان يطلعلك صورة فعلا احسن .

النايت مود بتاع هواوي عموما كويس جدا وانا بفضلة جدا في طريقة معالجة الألوان .

الكاميرا السيلفي

بالنسبة للسيلفي فهو مش احسن حاجة ف الموبايل ده .. بس عموما الموبايل بيطلع صور حلوة جدا الصبح والبورترية كمان مظبوط جدا .. ولون البشرة مظبوط بدون اللعبة في الالوان وكمان التفاصيل كتير ومش قليلة .

بس التعامل مع الشمس مش احسن حاجة والصور ساعات هتلسع منك لو بتتصور في شمس قوية حبتين تلاته .

والصور ف اضاءة داخلية مش وحشة بردة بس مش احسن حاجة هتحس فيها ب بهتان كدا .

بليل بقا في مختلف الاضاءات هتلاقي الصورة بتطلعلك بدون اي بروسسينج او معالجة للصورة والصور الي بتطلع تفاصيل قليلة نسبيا بس يعني ممكن تستخدم فلاش الشاشة علشان ينورلك ويطلعلك صور مقبولة شوية في ظروف التصوير الصعبة .

بالنسبة لتصوير الفيديوهات فالموبايل بيصور لحد 4K بجودة 30 اطار في الثانية وهتلاقي ثبات الكتروني في الجودة ديه وديه حاجة كويسة جدا .

هتلاقي الصور المتصورة بالموبايل وكمان الفيديوهات في فيديو المراجعة في أخر المقالة .

سعر الموبايل :-

السعر الرسمي 6499 جنية للنسخة 128 جيجا مع 8 جيجا رام و تم توفر الهاتف للحجز المسبق مع هدية سماعة قيمة من هواوي والتسليم يوم 25 ديسمبر .

وينفع تركب شريحتين اتصال ومينفعش اصلا تركب كارت ميموري .

التقييم النهائي :-

موبايل Nova 5T فعلا موبايل رائد .. بيقدملك افضل اداء بسبب استخدام معالج هواوي الرائد كيرن 980 وكمان كاميرا خلفية واقعية ممتازة والنايت مود بتاعها ممتاز وخامات تصنيع محترمة وحجم صغير في الايد وصوت عالي وشبكة كويسة ولمبة اشعارات كمان .

بس الموبايل ده فيه 3 عيوب من وجه نظري لازم تتقبلهم لو ناوي تشتريه .. اولهم الشاشة من نوع IPS والي بالسعر ده معظم المنافسين حاليا بيقدموا شاشة أموليد .. وعدم وجود مدخل الـ 3.5 ملم وان الموبايل مش بتقدر تركب فيه كارت ميموري .. الحاجات ديه لو مش عيوب بالنسبالك فالموبايل ده هيبقا مناسب جدا ليك .

وأخيرا لازم تبقا عارف ان Huawei Nova 5T يعتبر نسخة طبقة الأصل من Honor 20 العادي الي موجود بالفعل في السوق المصري .. فرق السعر ما بينهم بسبب ان النوفا 5T بحجم 8 جيجا رام مش 6 زي الاونر 20 و تصميم الظهر بتاع النوفا افضل واجدد شوية من الاونر 20 واخيرا اسم او قيمة البراند بتاعت هواوي اعلى من أونر في السوق المصري برغم ان الاتنين تبع بعض .

مميزات

• معالج رائد من هواوي يقدم أداء ممتاز حتى في الألعاب التقيلة .
• كاميرا خلفية ممتازة حتى في التصوير الليلي .
• تصميم وخامات محترمة من هواوي .
• يدعم لمبة اشعارات .
• شبكة الهاتف ممتازة .
• يدعم شاحن فائق السرعة 22.5 واط .

عيوب

• كنا نفضل استخدام شاشة أموليد مثل الهواتف المنافسة .
• لا يدعم تركيب كارت ميموري .
• لا يدعم مدخل سماعات 3.5 ملم .
• لا جديد يذكر في الهاتف بخلاف التصميم وحجم الرام عن هاتف Honor 20 الموجود بالسوق بسعر أقل .

اقرأ على موبيزل .. مراجعة موبايل Realme XT .

فيديو المراجعة على اليوتيوب :-