مقارنة بين Xiaomi Mi 9 Lite و Mi 9T و Realme XT – المقارنة المستحيلة وكشف الحقائق !

شاومي نزلت موبايل جديد في الفئة المتوسطة وهو Xiaomi Mi 9 Lite والي بيجي بسناب دراجون 710 و كاميرا خلفية ثلاثية الاساسية 48 ميجا بيكسل وبطارية 4000 مللي أمبير وشاشة أموليد 6.39 بوصة فيها نوتش وفيها بصمة مدمجة بالشاشة .

Mi 9 Lite

في مقارنة النهاردة .. هنقارن بين Xiaomi Mi 9 Lite مع Xiaomi Mi 9T علشان تعرف ايه الفرق ما بينهم وفي نفس الوقت هنقارن المي 9 لايت مع Realme XT .. علشان تقدر تعرف حقيقة كل موبايل ومين الموبايل الأفضل فيهم ؟


التصميم :-

اول ما مسكنا Xiaomi Mi 9 Lite في ايدينا نزلنا بوست ع صفحة فيس بوك موبيزل .. بشكر في جمال التصميم .. وجه نظرنا التصميم جميل جدا وبيعمل انعاكسات مع الضوء الي جاي عليه حروف S بأكثر من لون .. والموبايل تصميمه من الزجاج والفريم من المعدن .

بردة تمسك Xiaomi Mi 9T تصميمه حلوة كدا باللون الاحمر والانعكاسات الي ع طرف الموبايل من الجنبين كدا حاجة شيك كدا وبردة التصميم من الزجاج والفريم من المعدن .

واخيرا Realme XT والي بيعمل انعكاس دائري كدا ع اطراف الموبايل مع الضوء عليه .. وهنا التصميم من الزجاج بس الفريم من البلاستيك .

كمتانة .. احسنهم من وجه نظرنا هو Mi 9T ثم Realme XT والمي 9 لايت مع بعض .. والكلام ده كمان محسوس ف الوزن ان Mi 9T اتقلهم حوالي 191 جرام  .. انما Realme XT و Mi 9 Lite زي بعض ف الوزن تقريبا متوسط 180 جرام و زي بعض تقريبا في المسكة في الأيد .

بالنسبة لبروز الكاميرات .. فاقل واحد فيه بروز للكاميرات هو Mi 9T بعديه Mi 9 Lite واكبر بروز فيهم الريلمي اكس تي .. وكدا كدا الجرابات الي جاي مع الموبايلات في كل علبة بتغطي اي بروز موجود .

اسلايدر Mi 9T

طبعا اغلاهم في السعر هو Mi 9T والي فيه اسلايدر سيلفي والي اتكلمنا عنه مليون مرة .. فبلاش نتكلم تاني عن الاسلايدر .. انما موبايل Mi 9 Lite و Realme XT مفيهوش سلايدر ولا الحاجات ديه كلها ( علشان لو خايف من فكرة الاسلايدر ) .


الشاشة :-

شاومي Mi 9 Lite بشاشة سوبر أموليد حجم 6.39 بوصة بدقة FHD+ والشاشة فيها نوتش للسيلفي .. والشاومي Mi 9T شاشة بحجم 6.39 بوصة من نوع أموليد بدقة FHD+ والشاشة كاملة بدون نوتش وهي بأقل حواف فيهم كلهم .. واخيرا ريلمي XT بشاشة 6.4 بوصة من نوع سوبر أموليد بدقة FHD+ والشاشة فيها نوتش للسيلفي .

من الأخر Mi 9T احسن شاشة فيهم من وجه نظرنا من بسبب طبعا انها شاشة كاملة بدون نوتش .. تاني حاجة الوان الشاشة نفسها والـ HDR وتباين الألوان حلو جدا .

يجي وراه في جودة الشاشة موبايل Mi 9 Lite بجودة مقبولة جدا واخرهم Realme XT أقل جودة الوان فيهم .

السطوع تحت الشمس كويس جدا ف التلت موبايلات ولو اننا حسينا ان المي 9 لايت اعلاهم ف السطوع تحت الشمس .

بالنسبة للحواف حوالين الشاشة فريلمي XT للأسف صاحب اكبر حافة سفلية فيهم .

الـ 3 موبايلات .. الشاشات بتاعتهم عليها حماية جوريلا الجيل الخامس .. الريلمي هو الوحيد الي بيجي ف العلبة عليه سكرينة .


الاداء :-

ع اليمين اكس تي والمنتصف Mi 9T وع اليسار Mi 9 Lite

بص يا سيدي اقوى واحد في المعالج هو Xiaomi Mi 9T بمعالج سناب دراجون 730 .. ده سيبك منه ع جمب لاننا وضحنا قوته جمب Realme XT في المقارنة الي عملناها قبل كدا .

اقرأ ايضا .. مقارنة Xiaomi Mi 9T مع Realme XT .

خلينا دلوقتي مع Xiaomi Mi 9 Lite بمعالج سناب دراجون 710 .. والريلمي XT الي بمعالج سناب دراجون 712 .

المعالجين دول ادائهم قريب جدا جدا من بعض وده واضح من خلال التعامل في فتح البرامج والتنقل بينهم في الموبايلين جمب بعض .

بس طبعا ريلمي يتفوق في انه 8 جيجا رام وهو تفوق ع Mi 9T وتفوق بردة ع Mi 9 Lite الي رامتهم 6 جيجا في عدد البرامج المفتوحة في الخلفية .. والي ممكن اصلا متفرقش مع ناس كتير ف الاستخدام .

بالنسبة للاداء الرسومي .. فمفيش فرق جوهري بين المي 9 لايت و الريلمي اكس تي من ناحية تشغيل الالعاب .. الاتنين بيشغلوا ببجي على  High HD وشغالين زي الفل ومفيش فيهم اي مشاكل .. و لعبة كول اوف ديوتي شغالة ع Very High ف الموبايلين بدون اي مشاكل .. و أخيرا فورت نايت شغالة ع اعدادات جرافيك متوسطة في الموبايلين بردة بدون اي مشاكل .


عوامل الأمان :-

الـ 3 موبايلات فيهم بصمة مدمجة بالشاشة .. المي 9 لايت سرعته كويسة .. المي 9 تي ابطأ واحد تقريبا .. الريلمي XT أسرع واحد في البصمة .. برغم انك لو مسكت اي واحد فيهم لوحده هتحس انه سريع ومفيش فيه مشاكل .

بالنسبة للفيس ان لوك فهو سرعته كويسة في Mi 9 Lite .. بطيء شوية في Mi 9T بسبب انك لازم تسحب عشان الاسلايدر يطلع ويتعرف ع وشك .. واخرهم واسرعهم Realme XT .. بصمة وش صاروخية .


الصوت :-

اعلى واحد في الصوت بدون نقاش هو Xiaomi Mi 9T .. وراه علاطولRealme XT بس للاسف الوحيد فيهم الي السماعة بتاعته تحت ع الشمال وكدا ممكن تكتم مع الالعاب وانت ماسك الموبايل بالعرض .

انما للاسف اتفاجئنا ان Xiaomi Mi 9 Lite صوته اوطى منهم بفرق ملحوظ .. ليه كدا طيب ؟

بالنسبة لسماعات الاذن فصوتها عالي وكويس ف الـ 3 موبايلات .

واخيرا صوت سماعات الاذن عالي وممتاز ف الـ 3 موبايلات .


الشبكة و الأشعارات و عوامل أخرى :-

لمبة اشعارات مدمجة بكلمة Xiaomi في هاتف Mi 9 Lite

بالنسبة لقوة الشبكة .. فالـ 3 موبايلات قوة الشبكة فيهم ممتازة ومفيش واحد احسن من التاني في النقطة ديه .. متقلقش يعني .

بالنسبة للمستشعرات بردة التلت موبايلات فيهم كل المستشعرات حقيقية وشغالة زي الفل بدون اي تهنيجات .

الوحيد الي فيه مستشعر IR هو موبايل شاومي Mi 9 Lite وديه ميزة قوية فيه .

واخيرا بالنسبة للاشعارات .. شاومي Mi 9T فيه لمبة اشعارات في اسلايدر السيلفي من فوق .. المي 9 لايت فيه لمبة اشعارات جديدة بقا موجودة في كلمة شاومي الي ف ظهر الموبايل الكلمة نفسها بتنور لما يجيلك اشعار  .. حركة حلوة بس لازم تكون حاطط الموبايل ع الشاشة عشان تشوف اللمبة وميكونش النور عالي اوي ف الغرفة .. الريلمي اكس تي مفيهوش لمبة اشعارات .

ومقدرش انسى خاصية Always on بتاعت شاومي الي بتعرضلك الساعة باشكال كتير وكمان ايقونات اشعارات البرامج الي جاتلك ع الشاشة المطفية الكلام ده في المي 9 تي والمي 9 لايت .

شاشة هاتف Mi 9 Lite مطفية يظهر عليها الاشعارات

انما ريلمي XT للاسف الشاشة المطفية بيظهر عليها الساعة وايقونة الميزد كول والمسجات بتاعت الخط .. مفيش اشعارات برامج .


البطارية :-

شاحن Mi 9 Lite بقوة 18 واط

الـ 3 موبايلات فيهم بطارية 4000 مللي أمبير .. الاستخدام الفعلي حوالي 6 ساعات شاشة مفتوحة .. كلهم نفس الاداء تقريبا .

الـ 3 موبايلات تايب سي .. موبايل شاومي مي 9 تي و Mi 9 Lite معاهم شاحن 18 واط والريلمي XT معاه شاحن 20 واط .. وكلهم بيشحنوا في حوالي ساعة ونص وده وقت ممتاز جدا .


الكاميرات :-

شاومي Mi 9T بيجي بـ 3 كاميرات في الظهر .. اساسية بمستشعر سوني IMX 582 بجودة 48 ميجا بيكسل فتحة عدسة 1.8 والتانية للزوم 8 ميجا بيكسل فتحة عدسة  2.4 والأخيرة 13 ميجا بيكسل للتصوير الواسع 2.2 .. وبكدا ده الموبايل الوحيد فيهم الي فيه عدسة حقيقية للزوم 2X بس للاسف مفيهوش عدسة تصوير ماكرو … والسيلفي 20 ميجا بيكسل فتحة عدسة 2.2 محطوط في اسلايدر السيلفي .

شاومي Mi 9 Lite بيجي بـ 3 كاميرات في الظهر .. اساسية بمستشعر سوني IMX 586 بجودة 48 ميجا بيكسل فتحة عدسة 1.8 والتانية 8 ميجا بيكسل للتصوير الواسع والأخيرة 2 ميجا بيكسل للعزل … والسيلفي 32 ميجا بيكسل فتحة عدسة 2.0 محطوط في نوتش الشاشة .

ريلمي XT بيجي بـ 4 كاميرات في الظهر .. اساسية بمستشعر سامسونج GW1 بجودة 64 ميجا بيكسل فتحة عدسة 1.8 والتانية 8 ميجا بيكسل للتصوير الواسع فتحة عدسة 2.3 والتالتة 2 ميجا بيكسل للعزل والرابعة 2 ميجا بيكسل للتصوير الماكرو … والسيلفي 16 ميجا بيسكل فتحة عدسة 2.0 محطوط في نوتش الشاشة .

الـ 3 موبايلات بيقدروا يصوروا فيديوهات 4K و Slow Motion .. افضلهم من ناحية تصوير الفيديوهات من وجه نظرنا هو Mi 9T .

بالنسبة للصور العادية فهاتف Mi 9 Lite بيقدم أفضل تجربة تصوير واقعية في مختلف اوضاع التصوير والاضاءات .. واداءه قريب جدا من Mi 9T .. أنما ريلمي XT بيستخدم سياسية اللعب في ألوان وتفاصيل الصورة علشان تبقا أجمل ولكن بواقعية اقل .

بالنسبة للسيلفي فالهاتف الأفضل هو Realme XT .. وده بسبب بانه بأفضل مستشعر سيلفي فيهم والي بيقدم تجربة محترمة في كل اوضاع التصوير .. يليه هاتف Mi 9 Lite واسوأ سيلفي فيهم للشاومي Mi 9T .

ممكن تشوف الصور المتصورة بالموبايل في فيديو المقارنة في أخر المقالة .


الأسعار :-

شاومي Mi 9 Lite سعره 5000 جنية للنسخة 128 جيجا مع 6 رام .

شاومي Mi 9T سعره 6000 جنية للنسخة 128 جيجا مع 6 جيجا رام .. ( الكميات قربت تخلص من السوق ) .

ريلمي اكس تي بسعر 5400 جنية للنسخة 128 جيجا مع 8 جيجا رام .

وخلي بالك Realme XT احسنهم في انه بتقدر تركب شريحتين اتصال مع كارت في نفس الوقت .. انما المي 9 لايت ينفع تركب شريحتين او شريحة وكارت .. والاخير Mi 9T شريحتين من غير كارت خالص .

الـ 3 موبايلات بيجوا في العلبة معاهم شواحن سريعة زي ما قولنا في فقرة البطارية ومعاهم جرابات .. بس للأسف مش بيجي معاهم سماعات أذن في أي علبة موبايل فيهم .


الرأي النهائي :-

اكيد شاومي Mi 9T اعلى من Mi 9 Lite في الشاشة الكاملة والمعالج الأقوى وده يفسر فرق السعر ما بينهم فاحنا ف المقالة ديه وضحنا الفرق الجوهري ما بينهم .. وان يكن ان سيلفي Mi 9T أقل بفرق ملحوظ عن Mi 9 Lite .

بالنسبة للـ Mi 9 Lite مع XT .. فوجه نظرنا ان شاومي مي 9 لايت يتفوق في الكاميرا الخلفية بتطلع صور واقعية اكتر .. الاشعارات فيه أفضل لمبة وايقونات ع الشاشة المطفية .. وكمان جودة الوان الشاشة وسطوعها احسن شوية .. واكيد انه ارخص من الريلمي بحوالي 400 جنية .

الريلمي اكس تي يتفوق في جودة الكاميرا السيلفي وفي الصوت الاعلى من المي 9 لايت وكمان الـ 8 جيجا رام والي بتقدر تفتح بيهم برامج اكتر ف الخلفية .. وكمان العدسة الرابعة في الكاميرا الخلفية الخاصة بتصوير الماكرو .

نوت 8 برو مع Mi 9 Lite

ولازم تبقا فاهم ان شاومي عندها موبايل تاني أسمه Xiaomi Redmi Note 8 Pro .. وجه نظرنا أنه أفضل من Mi 9 Lite في المعالج وفي الكاميرات .. بس الشاشة بتاعته جودتها IPS وديه جودة أقل من Mi 9 Lite الأموليد .. وكمان خامات القسم الفرعي من شاومي Mi أفضل من خامات قسم Redmi .. وده يفسر فرق السعر ما بينهم .


فيديو المراجعة على اليوتيوب :-

قد يعجبك أيضا...

Comments

جاري التحميل...