مراجعة موبايل Nokia 7.2 – هل عادت نوكيا لمجدها السابق ؟!

نوكيا بتميز موبايلاتها بالخامات المحترمة والضمان المحترم و يعني ده كان بيديها سبب في أن موبايلاتها تبقي غالية عن المنافسين و المرة دى هنتكلم عن هاتف Nokia 7.2 و اللى بيجي بكاميرا ثلاثية و سيلفي 20 ميجا بيكسل مع شاشة 6.3 بوصة و معالج سناب دراجون 660 و بطارية 3500 مللي أمبير.

في المقالة ديه هنراجع كل حاجة في موبايل نوكيا الجديد الي لسه واصل وهو Nokia 7.2 و هنشوف مميزاته و عيوبه مع تفاصيل عن أدائه الفعلى.

مواصفات Nokia 7.2 :-

• أبعاد الهاتف 159.9*75.2*8.3 ملم.
• وزن الهاتف 180 جرام مع تصميم من البوليمر وهو خليط من البولي كربونيت والزجاج والمعدن ولكن احساسه في الايد مثل البولي كربونيت ولكن متانة قوية جدا جدا وصعب جدا ان يتم خربشته.
• يدعم الهاتف شبكات اتصال الجيل الثاني والثالث والرابع GSM / HSPA / LTE عن طريق شريحة اتصال واحدة أو شريحتين اتصال من نوع nano.
• شاشة الهاتف بقياس 6.3 بوصة مع دقة Full HD+ و جودة 1080*2280 بيكسل مع كثافة بيكسلات 400 بيكسل لكل بوصة و تدعم طبقة حماية من نوع Corning gorilla glass 3 و ايضا خاصية Always on display.
• يتم اصدار الهاتف بنظام تشغيل اندرويد 9.0 PIE.
• معالج الهاتف من نوع Qualcomm MSM Snapdragon 660 مع معالج رسوميات و جرافيك Adreno 512.
• يمكنك الهاتف من تركيب كارت ذاكرة خارجي يصل حتي 512 جيجا بايت.
• الهاتف يتم إصداره بإصدار واحد بذاكرة داخلية 128 جيجا بايت مع 6 جيجا بايت رام.
• الكاميرا الخلفية تأتي ثلاثية بجودة 48 +8+5 ميجا بيكسل مع فتحة عدسة F /1.8 و F/2.2 و خاصية الضبط التلقائي للصور و فلاش LED.
• الكاميرا الأمامية تأتي بجودة 20 ميجا بيكسل مع فتحة عدسة F/2.0.
• يدعم الهاتف ميكروفون اضافي لإزالة الضوضاء.
• يدعم الهاتف مستشعر الجيروسكوب حيث يمكنك استخدام نظارات الواقع الافتراضي VR و مشاهدة فيديوهات 360 درجة.
• الهاتف يدعم مستشعر بصمة الاصبع.
• يدعم الهاتف Wi-Fi ac و بلوتوث 5.0.
• يدعم الهاتف خاصية OTG والتى تمكنك من توصيل فلاشة للهاتف و نقل البيانات من و الى الهاتف.
• بطارية الهاتف تأتي بسعة 3500 مللي أمبير مع USB Type C.
• يتوافر الهاتف بألوان الفضي و الأخضر و الأسود.

مميزات نوكيا 7.2 :-

• يمكنك استخدام كارت ذاكرة خارجي مع شريحتين الاتصال فى نفس الوقت.
• متوفر بالهاتف لمبة الاشعارات الموجودة فى زر التشغيل Power button.
• تصميم جميل و عصري.
• منفذ شحن USB Type C.
• كاميرا السيلفي تقدم أداء مميز.

عيوب Nokia 7.2 :-

• بروز الكاميرا الخلفية المبالغ فيه وعدم وجود جراب مع الهاتف.
• سعر الهاتف عالى على امكانياته.
• الحواف حول الشاشة كبيرة بعض الشئ.
• أداء المعالج ليس الأفضل فى فئته السعرية.
• البطارية لا تكفي يوم كامل ولا يأتي مع الهاتف شاحن سريع.
• لا داعي للزر الخاص بمساعد جوجل الصوتي.

التصميم :-

تصميم الموبايل من البوليمر وهو خليط من البولي كربونيت والبلاستيك والزجاج .. الموبايل متين جدا وصعب يتخربش .. بس احساسة في الايد مش برميم.

التصميم يشدك جدا من بعيد مميز ومختلف و ظهر الهاتف فيه دائرة فيها الـ 3 كاميرات الي بارزة جدا عن ظهر الموبايل هتخليك كل أما بتحط الموبايل على ظهره هتسمع صوت رزعة الكاميرات بس طبعا الزجاج بتاع الكاميرا عليه طبقة حماية محترمة وللأسف مفيش جراب في علبة الهاتف.

على الجانب الأيمن للهاتف تجد زر التشغيل لفتح و غلق الهاتف.

و على الجانب الأيسر للهاتف تجد زر أخر يشبه زر التشغيل و هو مخصص لـ Google assistant وفي اوبشن يخليك تقفل الزرار ده خالص وللأسف علشان الواجهة خام من جوجل فمينفعش تخلي الزرار ده يعمل حاجة تانية.

تحتوي الواجهة الأمامية للهاتف على الشاشة بحجم 6.3 بوصة أعلاها نجد الكاميرا الأمامية بجودة 20 ميجا بيكسل مع سماعة المكالمات و مستشعر القرب مع ميكروفون اضافي لازالة الضوضاء , يوجد بالهاتف لمبة اشعارات مدمجة بزر الباور.

أعلى الهاتف نجد منفذ 3.5 ملم لدخول سماعات الرأس Headphones.

أسفل الهاتف نجد منفذ كابل الشحن USB Type C و الذي يتميز بسرعة أعلى فى نقل البيانات مع ميكروفون المكالمات و السماعات الخارجية.

الشاشة :-

شاشة Nokia 7.2 حجمها 6.3 بوصة بدقة Full HD+ والشاشة نوعها IPS LCD محترمة مع جودة 1440 * 2560 بيكسل مع كثافة بيكسلات 554 بيكسل لكل بوصة و تدعم طبقة حماية من نوع Corning gorilla glass 5 كما تدعم اللمس المتعدد و ايضا خاصية Always on display وبتدعم الـ Pure dispaly من نوكيا وبتدعم الـ HDR 10 الحاجات ديه كلها بتخلي تجربة المشاهدة على فيديويهات حلوة جدا.

الشاشة ألوانها طبيعية جدا أحسن من الـ IPS LCD العادية الي ألوانها بتبقا بهتانة شوية وأحسن من الأموليد الي ألوانها بتبقي فاقعة أوي.

الألوان الحقيقية فعلا موجودة في النوكيا وتباين الألوان حلو جدا وفي اكتر من درجة لون مع بعض ظاهرين.

والشاشة كمان سطوعها وألوانها تحت الشمس كويسة جدا هي مش لدرجة الأموليد بس مستواها كويس جدا.

المشكلة هنا هى الحواف حول الشاشة كبيرة أوي تحسسك انك ماسك موبايل اقتصادي كانت محتاجه تحسين عن كده.

واخيرا الشاشة عليها حماية من جوريلا الجيل التالت ومفيش عليها اسكرينة.

الأداء :-

Snapdragon 660 ثماني النواة تكنولوجيا 14 نانو و هو ثماني النواة يعمل بقوة تردد 4 * 2.2 جيجا هرتز Kyro 260 و 4 * 1.8 جيجا هرتز kyro 260 المعالج ده لازم تبقا فاهم أنه موجود في موبايلات بنص ثمن الموبايل ده.

6 جيجا رام وكمان عليه اندرويد One الخام من جوجل الأداء المفروض أنه يبقي سلس .. لكن فى الاستخدام هتلاقي انك بتحس بالانيميشن بتاع الواجهة جدا وحاسس بتقل في ابلكيشن الماسنجر بتاع الفيس بوك يعني من الاخر الأداء مقبول ولكنه ليس الأفضل في هذه الفئة السعرية والصراحة كنت متوقع أداء افضل و نتمنى مع التحديثات الأداء يبقا أفضل من كده شوية بس ده مش معناه إن الموبايل بيهنج لا هو مهنجش ولا مرة في فترة استخدامي له الفكرة بس معايا في التنقل بين التطبيقات و احساسى انه غير سلس.

بالنسبة للأداء الرسومي مع معالج الرسوميات Adreno 512 ولعبة PUBG اشتغلت على High HD بدون أي مشاكل أو تهنيج و أدائها كويس جدا مع الشاشة الممتازة دي.

Call of duty اشتغلت على اعدادات جرافيك متوسطة مع frame rate عالي واشتغلت بكفاءة و زي الفل.

وسخونية الموبايل مقبولة جدا وكويسة جدا جدا.

عوامل حماية الأمان و الخصوصية :-

البصمة الخلفية سريعة بس مش أوي يعني في أسرع من كده.

الـ Face unlock بطيء شوية عن المنافسين.

نظام التشغيل و واجهة المستخدم :-

الموبايل بيجي بواجهة اندرويد خام مش متعدلة و بكده خسرت انك تقدر تعمل نسختين من برامج التواصل الاجتماعي.

قد يعتبر البعض عدم اضافة نوكيا لأى شئ على الواجهة الخام شئ غير محبب لهم و البعض الاخر يفضل ذلك مما يجعل وصول أى تحديث سهل و سلس بفضل عدم وجود واجهة مخصصة.

يدعم الهاتف خاصية Ultimate storage with google photos و التى تمكنك من رفع عدد غير محدود من الصور و الفيديوهات على سيرفرات جوجل و هذا كان شئ مميز فقط لهواتف الـ Pixel.

الهاتف متوافر به Nokia Support و التى تمكنك من دعم مباشر مع الشركة عند وجود أى مشكلة أو عن طريق الشات و المنتديات.

كما يدعم الهاتف امكانية قسم الشاشة الى نصفين و استخدام تطبيقين فى نفس الوقت , كما يمكنك التحكم فى اضاءة الهاتف فى الليل لراحة أكثر للعين من توهج اضاءة الهاتف.

في اوبشن السحب على البصمة من فوق لتحت بينزل قايمة الاشعارات و لكن انصحك الغي الاوبشن ده خالص علشان هيضايقك وانت بتلعب على الموبايل ده وللأسف يعني المفروض الاوبشن ده يبقا مش شغال وانت بتلعب عليه.

من الحاجات الجميلة في الموبايل ده الاشعارات, عندك خلطة كاملة .. أولها ايقونات الاشعارات بتظهر فوق جمب النوتش وكمان عندك لمبة اشعارات موجودة فى زر التشغيل ونورها واضح وشيك وحركة جديدة و حلوة وكمان فوق كل ده الشاشة وهي مقفولة وجالك اشعار بتظهر عليها بسبب خاصية الـ Pure display بتاعة نوكيا.

الصوت :-

صوت السماعة الخارجية متوسط مش أعلى حاجة ولا هو أقل حاجة هو يعتبر فى المتوسط.

أما بالنسبة لسماعة المكالمات صوتها عالي ومقبول و بالنسبة لصوت سماعات الأُذن صوتها عالي ومقبول.

الدعم و الاتصال :-

الهاتف يدعم شبكات اتصال الجيل الثانى والثالث والرابع GSM / HSPA / LTE عن طريق شريحة اتصال واحدة أو شريحتين اتصال من حجم nano بالنسبة لتعامل الهاتف مع الشبكة يمكن دي أحسن حاجة في الموبايل ده الشبكة قوية جدا ومستقرة جدا يعني ممكن أدائها يبقي أحسن من شبكات هواوي و أوبو و ريلمي.

الهاتف يدعم Wi-Fi 802.11a/b/g/n/ac مع dual band و خاصية Wi-Fi Direct و امكانية انشاء hotspot.

يدعم الهاتف بلوتوث 5.0 A2DP , LE.

الهاتف يدعم GPS مع دعم A-GPS ,GLONASS,GALLIEO,BDS.

يدعم الهاتف خاصية OTG والتى تمكنك من توصيل فلاشة للهاتف و نقل البيانات من و الى الهاتف.

الهاتف يدعم مستشعر الجيروسكوب حيث يمكنك استخدام نظارات الواقع الافتراضي VR و مشاهدة فيديوهات 360 درجة.

الهاتف يدعم مجموعة من المستشعرات مثل البوصلة و التقارب و السرعة و الضوء و كلها تعمل بكفاءة.

البطارية :-

و هى للأسف الشديد من أسوا الحاجات في الموبايل ده حرفيا.

بطارية 3500 مللي أمبير مع معالج بمعمارية قديمة شوية 14 نانو استحملت حوالي 4 ساعات وشوية شاشة مفتوحة على استخدام ساعتين Call of duty وساعة يوتيوب وساعة تصوير يعني مش كله جيمز بصراحة الخلطة ديه كانت محتاجة 4000 مللي بطارية ع الاقل.

الموبايل بيجي بمنفذ شحن USB Type C وللأسف من غير شاحن سريع الشاحن الي معاه 10 واط وبالتالي بيشحن بالكامل لـ 100% في ساعتين.

الكاميرات :-

و دي نقطة من نقط التركيز المحورية لنوكيا في الموبايل ده الأساسية 48 ميجا بيكسل مع فتحة عدسة F/1.8 والتانية 8 ميجا بيكسل للتصوير الواسع wide angel مع فتحة عدسة F/2.2 والأخيرة 5 ميجا بيكسل للعزل.

أداء الكاميرا الخلفية متقلب جدا لدرجة غريبة, يعني مرة اصور الاقي تفاصيل كتير وصور ممتازة ومرة الاقي مفيش تفاصيل والصورة مش مظبوطة والذكاء الاصطناعي اللي بيتعرف ع المشهد احيانا بيغلط.

احساسي ان Hardware الكاميرات محترم جدا بس السوفت وير بتاع الكاميرا لسه محتاج شوية تحديثات علشان يبقي أسرع في أنه يفهم المشهد اللي بتصوره وكمان يبقي أسرع في التصوير شوية.

انت متخيل إن البورتريه في الموبايل ده بيتاخر على ما يجهز الصورة ما بالك بال Night mode اللي بياخد وقت كتير بردوا علشان يصور.
من أجمل الحاجات فى الصور هي واقعية الألوان مش أكتر الكاميرا مش بتفرقع الألوان ولا بتلعب فيها جامد.

بس الـ Night mode مش بيضيف تحسينات كبيرة على الصورة برغم وقت التصوير الكتير اللي بياخده ع ما يصور.

الهاتف بيقدر يصور فيديوهات بجودة 4K 2160 مع 30 اطار فى الثانية و بجودة 1080 بيكسل و بجودة 720 بيكسل مع ثبات اليكتروني gyro EIS فى حالة التصوير بجودة 1080 بيكسل.

السيلفي هنا بجودة 20 ميجا بيكسل مع فتحة عدسة 2.0 مع تصوير فيديو بجودة 1080 بيكسل مع 30 لقطة فى الثانية.

الصور مقبولة جدا معنديش مشاكل معاها ومش حاسس فيه مشكلة كبيرة معظم الوقت كان بيطلع صور حلوة سواء فى الشمس أو الظل أو الاضاءة الداخلية كله كويس جدا وال HDR شغال كويس وبيعمل effects حلوة في الصور والبورتريه كويس جدا بردوا.

محتويات صندوق الهاتف :-

هاتف Nokia 7.2
كُتيب التعليمات و التشغيل والضمان
الشاحن
كابل الشحن USB Type C
سماعات الرأس Headphones

دبوس معدنى لفتح درج الشريحة .

سعر الهاتف :-

السعر الرسمي هو 5200 جنيه مصري للنسخة الوحيدة الموجودة 128 جيجا بايت مع 6 جيجا رام.

وممكن تلاقيه في المحلات ب 5000 جنية وأقل.

تقييم الهاتف :-

عجبني جدا في الموبايل ده أربع حاجات أولهم الشاشة اللي الكوالتي بتاعتها ممتازة فعلا ومش هتلاقي زيها .. الاشعارات بتظهر عن طريق 3 حاجات يعني مستحيل يجيلك اشعار متاخدش بالك منه .. والشبكة بتاعة الموبايل فوق الممتاز .. و أخيرا التصميم المختلف للموبايل ده اللي فعلا وانت ماسكه كل شوية واحد هيسألك ايه الموبايل الي ف ايديك ده.

العيوب من وجهة نظر موبيزل, السعر.. ليه يا نوكيا كل مرة تنزلي تسعير كبير ف الأول وبعد كده تبدأي تنزلي في السعر, الكاميرا الخلفية محتاجه تحديث سوفت وير, البطارية مش كبيرة ومن غير شاحن سريع, الكاميرا البارزة أوي دي مهما كان عليها زجاج حماية بس بردوا الواحد بيبقي قلقان وهو كل شوية يحط الموبايل على المكتب واخيرا المعالج أداءه مش بطال بس هو مش أحسن معالج في الفئة السعرية ديه.

وفي النهاية اعتقد اللي هيشتري الموبايل ده هيبقي بيدور على اسم نوكيا والثقة في التحديثات المستمرة للموبايل ده والثقة بردوا في الخامات الداخلية والخارجية للموبايل .. وفعلا موبايلات نوكيا معمرة وبتعيش بدون ظهور أي مشاكل ملهاش لازمة واخيرا الشكل أو التصميم المختلف للموبايل ده و رصة الكاميرات في الدايرة البارزة الي ممكن تعجب ناس كتير وتلفت نظرهم.

مراجعة الموبايل على اليوتيوب :-