واحد من اكتر الهواتف اللي الناس كانت بتسال عنها هو موبايل شاومي الجديد Xiaomi Note 8 و هل فعلا النوت 8 العادي تطوير عن النوت 7 ولا ايه الحكاية؟
مواصفات موبايل Xiaomi Note 8 :-
- أبعاد الهاتف 158.3×75.3×8.4 ملم.
- وزن الهاتف 190 جرام.
- الهاتف مصنوع من الزجاج.
- يدعم الهاتف شبكات اتصال الجيل الثاني والثالث والرابع GSM/HSPA/LTE عن طريق شريحتين اتصال من نوع نانو.
شاشة الهاتف تأتي بقياس 6.3 بوصة من نوعIPS LCD بدقة FHD + مع 409 كثافة بيكسلات و حماية من جوريلا جلاس الجيل الخامس. - معالج الهاتف هو Snapdragon 665 ثماني النواة بمعمارية 11 نانومتر مع معالج رسوميات Adreno 610.
- الهاتف متوفر بذاكرة داخلية 32 جيجا و 3 رام ونسخة أخرى 64 جيجا و 4 رام والأخيرة 128 جيجا مع 4 جيجا رام .
- كاميرا الهاتف الخلفية تأتي رباعية بجودة 48+8+2+2 ميجا بيكسل مع فلاش أحادى LED.
- كاميرا الهاتف السيلفي تأتي بجودة 13 ميجا بيكسل مع فتحة عدسة f/2.0.
- بطارية الهاتف تأتي بسعة 4000 مللي أمبير.
- متوفر بالهاتف دعم Wi-Fi ac.
- يدعم الهاتف مستشعرات الجيروسكوب و البوصلة و التقارب و IR.
- يدعم الهاتف ميكروفون اضافي لإزالة الضوضاء.
- متوفر بالهاتف مستشعر بصمة الاصبع و خاصية قفل الوجه Face Unlock.
- يتم اصدار الهاتف بنظام تشغيل اندرويد Pie 9.0 مع واجهة مستخدم MIUI 10.
- الهاتف متوفر بألوان الأسود و الأزرق و الأبيض.
مميزات شاومي نوت 8 :-
- يمكنك استخدام كارت الذاكرة الخارجي مع شريحتين الاتصال فى نفس الوقت.
- منفذ شحن USB Type C.
- خامات تصنيع زجاجية ممتازة.
- يدعم مستشعر IR للتحكم فى الأجهزة المنزلية.
- بطارية الهاتف تقدم أداء جيد جدا.
- معالج سناب دراجون 665 يقدم أداء مميز فى المهام اليومية و الألعاب الثقيلة.
- يدعم لمبة اشعارات.
- كاميرا خلفية ممتازة قد تكون الأفضل في هذه الفئة السعرية.
- دقة الشاشة مميزة FHD+.
عيوب Xiaomi Note 8 :-
- بشكل عام لا يوجد تطوير كبير عن نوت 7.
- الكاميرا الخلفية بارزة عن جسم الموبايل و يتم حل هذه المشكلة عند طريق الجراب المُرفق بالعلبة.
- يجب شراء شاحن سريع لتشعر بتجربة الشحن السريع بالهاتف.
- سوفت وير الهاتف يحتاج لتحديث لظهور الاشعارات بجانب النوتش.
التصميم :-
شاومي بقت بتعمل تغييرات جذرية في المواصفات والقيمة الي بتاخدها مقابل السعر اللي بتدفعه لأن لما النوت 7 نزل كان أقل نسخة 3000 جنيه وكان تصميمه من الزجاج المتين المرة ديه النوت 8 نازل بتسعير أقل ودخل في فئة سعرية أقل وهي 2500 جنية وبردوا محافظ على التصميم الزجاجي الشيك اللي بيعمل انعكاس عليه مع تغيير الاضاءة.
الاطار زي ما هو عريض مفيش انحناء في الموبايل وكمان الفريم بلاستيك و دا أحسن ما يكون معدن ويتقشر عموما المسكة في الايد كويسة جدا واحساس الفريم بيخلي الموبايل متماسك في ايديك.
بالنسبة لبروز الكاميرات المشكلة الكبيرة الي كانت في النوت 7 ، النوت 8 البروز بتاع الكاميرات أقل شوية و لكنه ما زال كبير بس الفكرة بقا ان الجراب الشفاف اللي جاي معاه بيغطي البروز لأنه بيجي من حوالين الكاميرات وبيطلع شوية علشان يحمي الكاميرات كويس أنهم حلوا المشكلة ديه.
الموبايل وزنه خفيف في الايد ومسكته سهله لأن شاشته مش كبيرة وسهل الاستخدام بايد واحدة و بأبعاد 158.3×75.3×8.4.
تحتوي الواجهة الأمامية للهاتف علي شاشة بقياس 6.3 بوصة أعلاها نوتش فيه الكاميرا السيلفي 13 ميجا بيكسل مع سماعة المكالمات و مستشعر القرب و الضوء و فى الحافة السفلية كلمة Redmi.
يحتوي الجانب الأيمن للهاتف علي زر التشغيل Power button لفتح و غلق الهاتف و أزرار رفع و خفض الصوت.
يحتوي الجانب الأيسر على منفذ دخول شريحتى الاتصال مع منفذ منفصل لكارت ذاكرة خارجي.
أسفل الهاتف نجد منفذ USB Type C و السماعة الخارجية و ميكروفون المكالمات.
يحتوي ظهر الهاتف علي الكاميرا الخلفية الرباعية بشكل عمودى الأولى بجودة 48 ميجا بيكسل و أسفلها بجودة 8 ميجا بيكسل و أسفلها بجودة 2 ميجا بيكسل وأسفلهم الكاميرا الأخيرة بجودة 2 ميجا بيكسل مع فلاش LED و أسفلهم مستشعر بصمة الاصبع و فى الأسفل شعار Redmi.
الشاشة :-
مفيش أي تغيير حرفيا عن النوت 7 نفس الشاشة الـ 6.3 بوصة من نوع IPS LCD بدقة Full HD plus و جودة 1080*2340 بيكسل مع كثافة بيكسلات 409 بيكسل لكل بوصة مع أبعاد 19.5:9 مع دعم اللمس المتعدد , اللي هتاخد بالك منه أنهم حشروا كلمة Redmi في الحافة السفلية للموبايل واللي بالتبعيه هتحسسك أن الحافة ديه كبيرة إلا أنها مقبولة جدا في الفئة السعرية للهاتف.
الشاشة مفيش فيها جديد نقوله مظهرش فيها أي مشاكل ولا خطوط بيضا ولا حمرا والشاشة عليها حماية من جوريلا الجيل الخامس بس اكيد لازم تركب اسكرينة عليها و شاومي بتدعم انك تقدر تلغي النوتش لو مش حابب شكله.
الأداء :-
شاومي هنا استخدمت معالج سناب دراجون 665 مش هتلاحظ أي اختلاف جذري في أداء النوت 8 عن النوت 7 مع معالج رسومي Adreno 610.
واصلا أداء النوت 7 مكنش وحش ولا فيه أي تأثير من ناحية الأداء علشان كده شاومي قررت بلاش فزلكة و استخدمت النسخة الجديدة من سناب 660 اللي هو سناب 665 بتكنولوجيا 11 نانو.
أداء الموبايل كويس جدا في البرامج و تطبيقات السوشيال ميديا والمكالمات و لكن ساعات كنت بحس ببطء لمدة نص ثانية لما بقفل لعبة تقيلة أو اتنقل بين الألعاب المفتوحة و اعتقد هيوصل تحديث يخليه أسرع شوية قريب أوي، هو فعلا وصل تحديث بس ملحقتش اعمله و بعدين اختفي.
بالنسبة للأداء الرسومي كالعادة السناب دراجون 665 بيشغل PUBG حاليا على اعدادات جرافيك متوسطة واشتغلت بكل كفاءة والسخونية قليلة جدا في جسم الموبايل.
وكمان شغلت Call of duty على أعلى اعدادات جرافيك واشتغلت زي الفل وبدون أي تهنيج.
و أخيرا Fortnite مش بتشتغل بشكل رسمي لأن المعالج لا يدعمها.
يعني من الاخر الأداء مختلفش كثير عن النسخة القديمة النوت 7 واللي أصلا كان حلو.
الهاتف متوفر بثلاث اصدارات الأولى 32 جيجا بايت مع 3 جيجا رام و الثانية 64 جيجا بايت مع 4 جيجا رام و الأخيرة 128 جيجا بايت و 4 جيجا رام و تقدر تركب كارت ذاكرة خارجي فى منفذ منفصل عن شريحيتى الاتصال.
عوامل الامان و حماية الخصوصية :-
بصمة خلفية سريعة جدا زي كل موبايلات شاومي بس هي حجمها صغير شوية هتاخد وقت على ما تتعود عليها.
و خاصية قفل الوجه Face unlock موجود وشغال وسريع وزي الفل.
نظام التشغيل و واجهة المستخدم :-
يتم اصدار هاتف شاومى نوت 8 بنظام تشغيل اندرويد PIE 9.0 مع واجهة مستخدم MIUI 10.
الموبايل فيه لمبة اشعارات باللون الأبيض بتنور لما يجيلك اشعار.
أيقونات الاشعارات اللي المفروض تظهر فوق جمب النوتش مش بتظهر دايما لما بتفعلها من الاعدادات بتظهر ثانية وتختفي ومتظهرش تاني و دي نفس مشاكل النوت 7 أول ما جربته كان المفروض أن شاومي تنزل الموبايل مفيش فيه المشكلتين دول أصلا.
تتميز الواجهة بالعديد من الخصائص مثل خاصية البقاء على اتصال دائم بالشبكة الافتراضية always-on VPN و ميزة دوز لتوفير الطاقة والتحسن في تخزين البيانات والتحسين من ذاكرة الرام.
تم اضافة ال Night mode للهاتف الي بيقلب القوائم للون الأسود و يعمل بشكل رائع.
تتميز الواجهة بامكانية Split screen وهى قسم الشاشة الى نصفين و استخدام تطبيقين فى نفس الوقت مع ايضا امكانية تسجيل الشاشة , و ايضا ميزة Dual apps و التى تمكنك من تحميل نسختين من أى تطبيق و ليس برامج التواصل الاجتماعى فقط كما يدعم الهاتف خاصية Second space و التى تمكنك من الاحتفاظ بملفاتك الشخصية و الخاصة من أى شخص غريب يمسك هاتفك أو أى طفل يلعب فى هاتفك حيث تقوم بتحديد مجموعة محددة من التطبيقات ليقوم ذلك الشخص باستخدامها.
تتميز ايقونات الهاتف بحركات Animation عند غلق التطبيقات مما يعطى شكل جميل.
يدعم الهاتف خاصية App lock و التى تمكنك من تشفير بعض الملفات او التطبيقات عن طريق كلمة سر.
تدعم الواجهة خاصية النقر على الشاشة مرتين لتُضئ و امكانية أخذ Screenshot مطولة مع امكانية تسجيل المكالمات.
يمكنك الاستغناء عن أزرار التحكم الثلاث و استخدام الايماءات Geastures بدلا منها, كما تدعم الواجهة اماكنية تسجيل الشاشة Screen recording.
الدعم و الاتصال :-
يدعم الهاتف شبكات اتصال الجيل الثاني والثالث والرابع GSM/HSPA/LTE عن طريق شريحتين اتصال من نوع nano و يعملان بتقنية dual stand by بالنسبة للتعامل الهاتف مع الشبكة تعتبر متوسطة مش أحسن ولا أقوى حاجة، في الاماكن اللي تغطيتها سيئة في الشبكة ممكن تلقط مكالمات وتتعبك شوية على ما تلقط mobile data بس هي بشكل عام أحسن من النوت 7.
متوفر بالهاتف WiFi 802.11 a/b/g/n/ac و خاصية Wi-Fi direct و dual band و امكانية انشاء hot spot.
يدعم الهاتف بلوتوث 4.2 مع دعم خواص A2DP,LE,aptX HD.
مستشعر الجيروسكوب حيث استخدام نظارات الواقع الافتراضي VR و مشاهدة فيديوهات 360 درجة.
متوفر بالهاتف مستشعر القرب و السرعة و البوصلة و التقارب.
يدعم الهاتف GPS بخواص A-GPS, GLONASS, BDS, GALILEO.
للأسف الهاتف يدعم تشغيل الراديو FM.
الهاتف يدعم مستشعر IR و اللي متعودين عليه من شاومي و اللي مش بنلاقيه في أي موبايل تاني منافس.
الصوت :-
صوت السماعة الخارجية عالي ومجسم حتى أنه أعلى من الشاومي نوت 8 برو و صوت سماعات المكالمات عالي وممتاز أما صوت سماعات الأذن فهو مقبول.
و الهاتف بيدعم ميكروفون اضافي لازالة الضوضاء.
البطارية :-
الهاتف بيجي ببطارية 4000 مللي أمبير قوية زي النوت 7 تقريبا و استحملت حوالي 7 ساعات شاشة مفتوحة على استخدام متوسط و يعتبر وقت معقول جدا في الفئة السعرية ديه.
الموبايل بمنفذ شحن Type C والمفروض أن الموبايل بيدعم الشحن السريع بس بيجي معاه شاحن بطئ 10 واط في العلبة بيشحن البطارية بالكامل لحد 100% في ساعتين وربع.
وبردة مفيش جديد يذكر من ناحية البطارية مقارنة بالنوت 7 و اللي مكنش وحش بردوا.
الكاميرات :-
الكاميرا الخلفية هتلاقي رصة الـ 4 كاميرات خلاص ديه الراعي الرسمي لظهر أي موبايل جديد دلوقتي الكاميرا الأساسية بجودة 48 ميجا بيكسل مع فتحة عدسة 1.8 و التانية 8 ميجا بيكسل مع فتحة عدسة 2.4 للتصوير الواسع wide angel و الثالثة بجودة 2 ميجا بيكسل للعزل و الأخيرة 2 ميجا بيكسل macro.
المميز في النوت 8 العادي هو دعمه لتشغيل برنامج جوجل كاميرا بكامل خصائصه لأنه بمعالج سناب دراجون و جوجل كاميرا بيقدر يطلع صور احترافية و واقعية أكتر.
و علي فكرة معظم اللي كان معاه النوت 7 ونزل جوجل كاميرا مقدرش يرجع يصور بتطبيق الكاميرا العادي خلاص و بقي كل اعتماده على جوجل كاميرا و هنا بردوا نفس الفكرة بالظبط.
اداء الكاميرا الخلفية مختلفش كتير عن النوت 7 , الاداء كدا كدا كان ممتاز وبيقدم أفضل كاميرا خلفية في الفئة السعرية تحت 3000 جنية , وكمان الموبايل باستخدام جوجل كاميرا , مطلع صور ممتازة في الاضاءة العالية وكمان الاضاءة المنخفضة .. وممكن تشوف بنفسك الصور الي طالعة من كاميرا الموبايل في فيديو المراجعة في أخر المقالة.
شاومى نوت 8 بيجي بسيلفي 13 ميجا بيكسل مع فتحة عدسة 2.0 و تصوير فيديو بجودة 1080 بيكسل مع 30 لقطة فى الثانية.
السيلفي مش أحسن حاجة في الموبايل ده زيه زي النوت 7 كدا في الاضاءات الكويسة هتاخد صور مقبولة جدا و باستخدام جوجل كاميرا هتاخد صور بتفاصيل و ألوان أحسن بس مع اتش دي ار أقل شوية.
في الاضاءات الضعيفة أوي بقي ريح دماغك و متفتحش تطبيق الكاميرا بتاع شاومي أصلا وخليك في جوجل كاميرا علشان هتاخد منه صور أحسن مليون مرة.
محتويات صندوق الهاتف :-
هاتف Xiaomi Note 8
الشاحن بقوة 10 وات
كابل الشحن USB Type C
دبوس معدني لفتح درج الشريحة
كُتيب تعليمات التشغيل و الضمان
جراب شفاف لحماية ظهر الهاتف
ملحوظة: صندوق الهاتف لا يحتوي على سماعات الأُذن Headphones.
تقييم الهاتف :-
لو هتقارن النوت 8 بالنوت 7 , النوت 8 جاي بلمسة جديدة من شاومي اللي هي حوار الأربع كاميرات و اللي فعليا هتستخدم فيهم العدسة الواسعة و ممكن الـ macro إنما أداء الكاميرا الخلفية الرئيسية والسيلفي مفيش فرق كبير عن النوت 7 والنوت 8 بيدعم يصور 4K وده مكنش موجود في النوت 7 وكمان أهم حاجة موضوع أنه بقي بيدعم شريحتين اتصال وكارت ذاكرة في نفس الوقت أما بالنسبة للأداء فمفيش فرق ملحوظ.
واخيرا النوت 8 نزل بتسعير أقل من النوت 7 و دي النقطة اللي شاومي عملتها علشان تسيطر علي المبيعات أكتر و أكتر لأنهم عارفين أن الموبايل مفرقش كتير عن النوت 7 بس حته أن السعر الرسمي يبقا أقل 500 جنية من النوت 7 وقت ما نزل دي حته لوحدها تنقل النوت 8 في فئة سعرية تانية وتخلي كعبها عالي على المنافسين.
اما لو انت بقا اصلا مش هامك النوت 7 وبتفكر تجيب النوت 8 , فاحب اقولك أن الموبايل ده بيقدملك معالج كويس في الفئة السعرية دي بس للأسف لسه السوفت وير مش أحسن حاجة و منتظرين سوفت وير شاومي الجديد MIUI 11 اللي هيحل مشاكل كتير و كمان النوت 8 بيديلك أفضل خامات خارجية زجاج و كمان منفذ USB Type C و شاشة Full HD+ وصوت عالي وكاميرات خلفية محترمة جدا في الفئة السعرية بتاعته.
واتمنى من شاومي تركز أكتر في نقطة السوفت وير وتحاول تخلي الموبايل و هو نازل مصر يكون متجرب 100% ومفيهوش أي مشاكل في السوفت وير و تعلي شوية من الكوالتي كنترول على موبايلاتها علشان تقلل عدد الشكاوى الي بتيجي من المستخدمين بعد نزول أي موبايل جديد ليهم.
سعر الهاتف :-
الموبايل فيه منه 3 نسخ ….
أول نسخة 32 جيجا بايت مع 3 جيجا رام بسعر 2500 جنيه مصري
ثاني نسخة 64 جيجا بايت مع 4 جيجا رام بسعر 3000 جنيه مصري
ثالث و أعلى نسخة 128 جيجا بايت و 4 جيجا رام بسعر 3330 جنيه مصري
Comments