مراجعة موبايل Oppo Reno 2F – اوبو تشغل المنافسة في الفئة المتوسطة !

شركة OPPO نزلت الجيل الجديد من سلسلة الـ Reno ونزلت بهاتفين وهما الـ Oppo Reno 2 و الأخ الأصغر Oppo Reno 2F , هنتكلم في المقالة ديه عن الموبايل الأرخص فيهم وهوا Oppo Reno 2F والي يعتبر أخو موبايل Oppo F11 Pro بس مع بعض التطورات !

الرينو 2F بشاشة أموليد من غير نوتش 6.5 بوصة و معالج Mediatek Helio P70 و كاميرا خلفية رباعية و سيلفي 16 ميجا بيكسل و بطارية 4000 مللي أمبير.

فى مراجعة النهاردة هنشوف فعلا الرينو 2F قدر يعالج عيوب الـ Oppo F11 Pro ولا مقدرش ؟ وايه العيوب والمميزات الحقيقية للـ Reno 2F و موقفه بالنسبة للمنافسين دلوقتي !


مواصفات Oppo Reno 2F :-

  • أبعاد الهاتف 162.4×75.8×8.7 ملم.
  • وزن الهاتف 195 جرام مع تصميم ظهر من الزجاج وفريم من البلاستيك.
  • تأتي شاشة الهاتف أمولد بقياس 6.5 بوصة مع دقة Full HD+ بجودة 1080*2340 بيكسل مع 394 كثافة بيكسلات و حماية من جوريلا جلاس الجيل الخامس والشاشة كاملة بدون نوتش.
  • معالج الهاتف هو Mediatek Helio P70 مع معالج رسوميات Mali-G72 MP3.
  • يمكنك اضافة كارت ذاكرة خارجي يصل الى 256 جيجا بايت فى منفذ منفصل.
  • الهاتف متوفر بنسخة 128 جيجا بايت مع ذاكرة عشوائية 8 جيجا رام
  • يأتي الهاتف بنظام تشغيل اندرويد 9.0 Pie مع واجهة مستخدم Color OS 6.0.
  • كاميرا الهاتف الخلفية تأتي رباعية بجودة 48+8+2+2 ميجا بيكسل و فلاش احادى LED و تصوير فيديو 1080 بيكسل مع مثبت اليكتروني gyro EIS.
  • كاميرا السيلفي تأتي بجودة 16 ميجا بيكسل مع فتحة عدسة F/2.0 و تصوير فيديو بجودة 1080 بيكسل مع 30 لقطة فى الثانية وهي موجودة بموتور بوب اب خاص للسيلفي.
  • بطارية الهاتف تأتي بسعة 4000 مللي أمبير تدعم تقنية الشحن السريع.
  • يدعم الهاتف مستشعر بصمة الاصبع المدمج بشاشة الهاتف مع دعم Face unlock.
  • متوفر بالهاتف ميكروفون اضافي لإزالة الضوضاء.
  • يدعم الهاتف تشغيبل الراديو FM.
  • متوفر بالهاتف خاصية OTG و الجيروسكوب.
  • متوفر بالهاتف دعم شبكات الجيل الثاني والثالث والرابع GSM/HSPA/LTE عن طريق شريحتين اتصال من نوع Nano.
  • الهاتف متاح في الأسواق بألوان الأبيض و الأخضر.

التصميم :-

هاتف Oppo Reno 2F واحد من أفضل الهواتف في الفئة المتوسطة اللي ممكن تمسكها في ايديك وبدون مبالغة من أول ما طلعت الموبايل ده من العلبه ومسكته في ايدي كنت قلقان جدا لينزل غالي لأن فعلا الخامات نظيفة جدا.

الموبايل ظهره زجاج فخم جدا واخد نفس نمط تصميم الـ Oppo Reno 10X فلاج شيب OPPO القديم.

هو أي نعم الإطار انا حاسس أنه من البلاستيك مش معدن بس ده أحسن ما يكون معدن ويتقشر.

أهم حاجة هي رصة الأربع كاميرات الشيك جدا فى ظهر الهاتف، تقريبا ده واحد من أشيك التصميمات اللي ممكن تشوفها في موضوع رصة الكاميرات ده بدون أي بهرجة مبالغ فيها و مفيش مستشعر بصمة خلفي و كمان الكاميرات كلها مدفونة جوا ظهر الموبايل مفيش أي بروز نهائي في الكاميرات لما بتمشي ايديك عليها مش هتحس اصلا أنك عديت ع الكاميرا و فى أسفل الظهر شعار الشركة OPPO.

وكمان علشان لما تحط الموبايل ع المكتب أو أي حاجة ميخبطش ف الظهر الزجاجي في كورة خضرا من السيراميك بارزة علشان هي اللي تاخد أي خبطة و انت بتحطه على المكتب.

زر التشغيل power button علي الجانب الأيمن موجود عليه خط أخضر فسفوري علشان تميزه بسهولة.

تحتوي الواجهة الأمامية للهاتف علي شاشة بقياس 6.5 بوصة و الحاوف قليلة أوى.

و الموبايل معاه جراب شفاف كان نفسي يبقي جاي معاه جراب جلد زي اللي جاي مع اخوه الكبير ال Oppo Reno 2 بس مفيش مشكلة.

أعلي الهاتف هتلاقي نفس فكرة اسلايدر الاف 11 برو، Slider متين بردوا محستش معاه بأي مشاكل بس الزيادة عليه هو قنبلة ألوان و دا عبارة عن اوبشن روش و حلو ممكن تختار لون من 12 لون , الاسلايدر ينور بيه وهو طالع وهو نازل أو ممكن تخليه عشوائي كل مرة يفتح ويقفل يغير لونه و كمان ممكن تختار صوت الـ slider يعمله وهو طالع وهو نازل.

اعتقد الاسلايدر ده هيجنن أي حد أول ما يشتري الموبايل ده وهيفضل يلعب ف الألوان ديه.

وطبعا الاسلايدر أول ما يحس أن الموبايل بيقع بيقفل بسرعه زي اخوه الـ F11 Pro و ان شاء الله حظك مبيقاش وحش يعني والموبايل يقع ف اللحظة اللي بتتصور فيها سيلفي.

علي الجانب الأيسر للهاتف نجد أزرار رفع و خفض الصوت و منفذ لدخول شريحتين الاتصال أو شريحة واحدة و كارت ذاكرة خارجي.

أسفل الهاتف نجد ميكروفون المكالمات و السماعة الخارجية و منفذ كابل الشحن USB Type C و منفذ 3.5 ملم لسماعات الرأس Headphones مع الميكروفون العازل للضجيج.

الهاتف متوفر في الأسواق بألوان الأبيض و الأخضر.


الشاشة :-

الشاشة هنا كاملة بحجم 6.5 بوصة بدون نوتش و الحواف قليلة بس الحافة السفلية كانت محتاجة تصغر شوية عن كده بس مش مشكلة مع دقة Full HD+ بجودة 1080*2340 بيكسل مع 394 بيكسل لكل بوصة مع أبعاد 19.5:9.

الشاشة هنا من نوع اموليد و اللي بتعرضلك ألوان مشبعة و بتقدملك تجربة أحسن بفرق ملحوظ عن الشاشة الـ IPS LCD الموجودة في Oppo F11 Pro.

وعموما شاشة Reno 2f تفاصيلها ممتازة و الـ Sharpness كويس جدا.

سطوع الشاشة تحت الشمس حلو جدا ومفيش فيه أي مشاكل برغم اني حاسس أن في سطوع أعلى من كده من الشاشات الأموليد ولكنه ما زال مقبول جدا.

وبالنسبة لطبقة الحماية فالشاشة عليها حماية من جوريلا الجيل الخامس وكمان متركب عليها اسكرينة.

والشاشة فيها اوبشن Screen off clock بيعرضلك الساعة ونسبة البطارية و أيقونة missed calls أو رسالة، إنما واتساب أو ماسنجر كل ده مش بيظهر عليها وهي مطفية و خلي بالك الموبايل مفيش فيه لمبة اشعارات.


الأداء :-

وهنا اوبو وفرت شوية و استخدمت نفس المعالج الموجود في الاوبو F11 و F11 Pro و اللي ممكن البعض يشوفه عيب وممكن حد تاني يشوفه ميزة.

العيب هو انك تدفع 6 الاف جنيه في موبايل فيه معالج Mediatek Helio P70 اللي اكيد بنفس السعر ده هتلاقي موبايلات بمعالج أحسن.

والميزة أن المعالج دا متجرب في موبايلات قبل كدا و Oppo متأكدة 100% من أدائه الممتاز و أن مستحيل يكون فيه أي عيوب في الأداء.

نتكلم بقي على أرض الواقع الموبايل أدائه كويس الي حد ما في الاستخدام اليومي من البرامج العادية و برامج السوشيال مفيش أي تهنيجات خالص و الأداء مستقر بشكل كبير.

بالنسبة للأداء الرسومي بمعالج Mali-G72 MP3 لعبة PUBG بتشتغل على High HD بشكل ممتاز بدون أي تهنيج.

و لعبة Call of duty بتشتغل على اعدادات جرافيك high بدون أي مشاكل والسخونية مقبولة جدا في جسم الموبايل.

و لعبة fortnite مش بتشتغل بشكل رسمي على المعالج ده.

يعني من الأخر الـ Reno 2F هيقدملك أداء جيد جدا لو انت شخص استخدامك عادي وبتلعب لعبتين تلاتة إنما لو انت شخص محترف ألعاب و عاوز أفضل أداء بالسعر اللي هتدفعه و ده أهم أولوية عندك فانصحك تشوف بدائل تانية لان الـ Reno 2F بيركز ع نقط تانية غير الأداء.

يتوافر الهاتف بنسخة بذاكرة داخلية 128 جيجا بايت مع 8 جيجا بايت رام و يمكنك زيادة المساحة الداخلية للهاتف عن طريق إضافة كارت ذاكرة خارجي يصل الى 256 جيجا بايت فى منفذ منفصل عن شريحتين الاتصال.


عوامل حماية الأمان و الخصوصية :-

البصمة مدمجة بالشاشة و أدائها ممتاز وسريع جدا ومفيش فيه أي مشاكل واجهتها معاها والموبايل اصلا عليه اسكرينة و أدائها كويس جدا.

الـ Face Unlock سرعته كويس جدا و عندك اتنين اوبشن ياما تخليه يشتغل مع زر التشغيل و كل مرة تدوس ع زر الـ power السلايدر يفتح علشان يتعرف ع وشك أو تخليها بأنك تعمل سلايدر علي الشاشة وبعدها يبدأ يشتغل و الslider يفتح و ده اوبشن انا شايفه أحسن بدل ما الاسلايدر يفضل طالع نازل ع الفاضي.


نظام التشغيل و واجهة المستخدم :-

يأتي الهاتف بنظام تشغيل اندرويد PIE 9.0 مع سوفت وير Color OS 6 مفيهوش جديد ممكن اقوله و للأسف اوبشن الـ dark mood اللي موجود في موبايلات ريلمي مش موجود و اتمنى يوصل بتحديث في موبايلات OPPO الجديدة لانه اوبشن جميل جدا.

و تتمتع الواجهة بالعديد من المميزات و الخصائص حيث يمكنك التحكم فى اخفاء ازرار التحكم الثلاث و استخدامهم فى نفس الوقت حيث تقوم بلمس الشاشة من أسفل لاعلى فى جهة اليمين للرجوع للخلف و فى المنتصف كا زر HOME و من جهة اليسار لفتح ال Recent apps أو استخدام ال assistive ball و هو دائرة فى أى مكان بالشاشة حيث تقوم بلمسها لمرة للرجوع للخلف و مرتين لفتح ال recent apps و ضغطة مطولة ل home.

يدعم الهاتف خاصية Clone apps حيث يمكنك أن تقوم بتحميل نسختين من أى تطبيق مثل What’s app و Facebook و Messenger.

يدعم الهاتف ميزة Private safe و اللى تقدر تحتفظ فيها بملفاتك الخاصة و اخفائها.

تدعم الواجهة خاصية تسجيل المكالمات بشكل تلقائي و لكن يجب تفعيلها من الاعدادات اولا.

يمكنك الهاتف من أخذ screenshot بثلاثة أصابع على الشاشة كما يمكنك قسم الشاشة الى نصفين Split screen و استخدام تطبيقين فى نفس الوقت عن طريق سحب الشاشة من أسفل الى أعلى بثلاثة أصابع.

أصبحت التطبيقات مجمعة فى درج التطبيقات بدلا من أن تكون مبعثرة على الشاشة.


الدعم و الاتصال :-

يدعم الهاتف شبكات اتصال الجيل الثاني والثالث والرابع GSM/HSPA/LTE عن طريق شريحتين اتصال من نوع نانو وبالنسبة لشبكة الموبايل زي ما بنقول دايما أداء المعالج دا ممتاز في الشبكات يمكن احسن كمان من الموبايلات الي فيها سناب دراجون.

يدعم الهاتف Wi-Fi 802.11 a/b/g/n/ac dual band مع دعم خاصية Wi-Fi direct و امكانية انشاء Hotspot.

يدعم الهاتف بلوتوث الاصدار 4.2 A2DP,LE.

يدعم الهاتف GPS مع خواص ,A-GPS GLONASS BDS ,GALILEO

متوفر بالهاتف دعم مستشعرات القرب و السرعة و البوصلة و الضوء و تعمل بكفاءة.

يدعم الهاتف تشغيل الراديو FM.

يدعم الهاتف مستشعر الجيروسكوب حيث استخدام نظارات الواقع الافتراضي VR و مشاهدة فيديوهات 360 درجة.

متوفر بالهاتف خاصية OTG حيث يمكنك توصيل أى USB driver للهاتف و يمكنك نقل أى بيانات من و الى.

بالنسبة لمستشعر التقارب اللي بيقفل الشاشة وانت بتعمل مكالمة والموبايل على ودنك .. موجود سوفت وير في الموبايل ده فالموبايل ذكي جدا في أنه يقدر يحدد حركة الموبايل و انت فاتح المكالمة وبالتالي بيقفل شاشة الموبايل و مستشعر الضوء بردوا موجود سوفت وير ومفيهوش مشاكل واستجابته سريعة.


الصوت :-

صوت الـ Reno 2F جاي من سماعة واحدة و صوتها عالي ومجسم مفيش صوت أحسن من كدا بصراحة.

وصوت سماعة المكالمات عالي وممتاز وصوت سماعة الأذن بردوا عالي وممتاز.


البطارية :-

بطارية الهاتف هنا 4000 مللي أمبير صمدت تقريبا متوسط 6 ساعات شاشة مفتوحة في يوم كامل من الاستخدام.

و يتم شحنها عن طريق منفذ USB Type C والشاحن السريع ال 20 واط في حوالي ساعة و ثلث.

و زي ما بنقول دايما بطاريات ريلمي و اوبو بتديلك وقت متوسط شاشة مفتوحة بس هما بيقدموا أفضل زمن شحن لأن الشاحن السريع بتاعهم مميز جدا في الشحن لحد 100%.


الكاميرات :-

الموبايل جاي ب 4 كاميرات خلفية العدسة الرئيسية 48 ميجا بيكسل مع فتحة عدسة 1.7 والتانية 8 ميجا بيكسل للتصوير الواسع ultra wide مع فتحة عدسة 2.2 والتالتة 2 ميجا بيكسل black and white ملهاش افادة حقيقية في نظري والاخيرة 2 ميجا بيكسل للعزل.

بالنسبة لتصوير الفيديوهات تقدر تصور بجودة 1080 بيكسل مع 30 اطار فى الثانية و بجودة 720 بيكسل و للأسف مش بيقدر يصور بجودة 4K و دا عيب فى هاتف بالسعر دا.

الموبايل ده لا يدعم تشغيل جوجل كاميرا جربت نسخ كتير و مش شغالة كويس وبالتالي الاعتماد على برنامج التصوير بتاع اوبو ع الموبايل ده.

نتكلم بقي عن الأداء الفعلي….

الكاميرا بتطلع صور حقيقية بشكل كبير والـ HDR ممتاز و البورتريه ممتاز بردوا في تحديد الأطراف و بعد الzoom بردوا ما زالت التفاصيل مقبولة جدا.

الصور الطبيعية زي ورد و زرع و شجر بتبقي صور حقيقية بشكل كبير مفيش فيها لعب كتير برغم اني مشغل Dazzle color اللي بيعزز الألوان.

في التصوير بالليل مع الاضاءة القليلة أوي لازم تستخدم الـ Night mode.

ولما جينا نقارن الـ Reno 2F مع Realme XT في الكاميرا الخلفية .. لقينا في الرينو 2 اف لون البشرة كان واقعي اكتر و الصورة مفيش فيها لعب كتير في الألوان على عكس الـ XT اللي خلى الصورة أحلى بسبب معالجة الصورة و في صور تانية تفوق الـ XT في تشبع الألوان عن ال 2F و في الـ night mode بالموبايلين و واضح تشبع اللون الزيادة في الـ XT اللي خلي صورة ال 2F تبان أنها بهتانة و بالتالي فالـ RENO 2F مش أحسن كاميرا بسعره خالص ولكن بتقدم أداء مقبول يقدر ينافس.

اقرأ على موبيزل .. مراجعة Realme XT – ملك بدون تاج !

ندخل على السيلفي في رينو 2F بجودة 16 ميجا بيكسل مع فتحة عدسة F/2.0 و تصوير فيديو بجودة 1080 بيكسل وموجود في الموتور او البوب اب الي بيطلع من جسم الموبايل.

السيلفي عنصر قوي في الـ Reno 2F و اللي أدائه عجبني جدا الصور طالعة مظبوطة و البورتريه مظبوط و صورنا بيه سيلفي كتير جدا والصور كلها طالعة حلوة ومظبوطة.

وحتى الصور في الإضاءة الداخلية الألوان واقعية بشكل كبير بدون التعديل في ألوان الصورة.

و بالليل لسه الموبايل قادر يطلع صور حلوة جدا في مختلف اضاءات التصوير وحتى البورتريه بردة طالع كويس.

و لما قارنا الـ XT مع الـ 2F , لأقينا تفوق الـ 2F في انه بيقدر يجيب لون بشرة مظبوط اكتر لو الاضاءة كويسة , انما في الاضاءات الضعيفة الـ XT قدر يطلع تفاصيل والوان احسن من الـ Reno 2F .

عموما ممكن تشوف كل الصور الي بنتكلم عليها ديه في فيديو المراجعة في أخر المقالة .


محتويات صندوق الهاتف :-

هاتف OPPO Reno 2F و تم تركيب اسكرينة للحماية عليه مسبقا من الشركة
كُتيب التعليمات والتشغيل والضمان
الشاحن بقوة VOOC
كابل الشحن Type C
دبوس معدني لفتح درج الشريحة
جراب سيلكون شفاف لحماية الهاتف
سماعات الأُذن Earphones


سعر الهاتف :-

السعر الرسمي 5990 جنية للنسخة الوحيدة الموجودة 128 جيجا مع 8 جيجا رام.


تقييم الهاتف :-

الـ Reno2 f أخو F11 Pro , نفس المعالج والبطارية وفي رأيي نفس أداء الكاميرات كمان بخلاف بس وجود عدسة wide في الـ Reno 2F.

الجديد .. الـ 2F تصيميه شيك من الزجاج و شاشته أموليد ألوانها أحلى و فيه بصمة في الشاشة سريعة و أدائها حلو و كمان 8 جيجا رام مش 6 زي الـ F11 Pro و منفذ الشحن بتاعه Type C غير الاف 11 برو.

وبالتالي الـ Reno 2F تطوير منطقي عن الـ F11 PRO خصوصا انه نزل أرخص من F11 برو اول ما نزل .. وبالتالي انت بنفس سعر اف 11 برو حاليا هتاخد بعض المواصفات الأعلى في رينو 2F.

أما بالنسبة لموقف الـ Reno 2F من المنافسين .. لو حطيت الـ رينو 2F جمب الشاومي MI 9T هيخسر في كل حاجة تقريبا فيما عدا السيلفي و سرعة الشحن بس.

بس طبعا زبون اوبو مختلف ومش بتبقي عينه على ماركات تانية زي شاومي أو حتى ريلمي اللي تبع اوبو.

وعموما الموبايل مفيهوش عيوب جوهرية يمكن بس أنا غير راضي عن وجود معالج Mediatek P70 في الموبايل ده بالسعر ده بس هو أمر واقع لأن الـ F11 Pro ناجح وبيبع لحد دلوقتي وفيه نفس المعالج وسعره بردوا مش رخيص.

والـ Reno 2F في وجه نظري عالج نواقص الاوبو F11 برو و بالتالي متوقع له نجاح كبير أوي خصوصا أن اوبو مهتمة بالدعايا و الانتشار لسلسلة الرينو كويس جدا و خصوصا أن الفئة السعرية دي فاضية تماما من أهم منافس لاوبو في مصر وهي سامسونج اللي معندهاش غير Samsung A70 والي يعتبر بقا قديم نسبيا.


مميزات اوبو رينو 2F :-

  • يمكنك استخدام كارت ذاكرة خارجي مع شريحيتن الاتصال فى نفس الوقت.
  • تصميم زجاجى فخم و شيك جدا.
  • توفر البطارية تجربة مميزة بشحن سريع مع خاصية VOOC.
  • شاشة Amoled كاملة بألوان مشبعة و تجربة مشاهدة ممتعة.
  • مستشعر بصمة مدمج بالشاشة يقدم لك بصمة سريعة.
  • سيلفي Pop up جميل و متين مع ألوان جميلة متغيرة.
  • منفذ شحن Type C.
  • شبكة الهاتف ممتازة.

 

عيوب Oppo Reno 2F :-

  • غياب لمبة الاشعارات.
  • كان من الأفضل لو استخدمت الشركة معالج أفضل من P70.
  • كاميرا الهاتف الخلفية لا تدعم التصوير بجودة 4K.
  • مستشعر التقارب الخاص بقفل المكالمات موجود سوفت وير وليس هارد وير مما يقد يتسبب في ان الشاشة احيانا ممكن متقفلش وانت بتعمل مكالمة والموبايل على ودنك.

فيديو المراجعة على اليوتيوب :-

قد يعجبك أيضا...

Comments

جاري التحميل...