من فترة عملنا مقارنة بين الريلمي 3 برو و الريلمي 5 برو و وضحنا الفرق بينهم .. ممكن تشوف المقالة من هنا.
لكن النهاردة معانا مراجعة كاملة لموبايل Realme 5 Pro , الموبايل بيجي بشاشة مع 6.3 بوصة و بطارية 4000 مللي أمبير و كاميرا رباعية و سيلفي مميز مع معالج سناب دراجون 712 و معالج رسومي مميز مع مجموعة متميزة من المستشعرات.
هناقش فى مراجعة النهاردة مميزات و عيوب موبايل ريلمي الجديد و أدائه بالتفصيل.
مواصفات Realme 5 Pro :-
- أبعاد الهاتف 157×74.2×8.9 ملم.
- وزن الهاتف 184 جرام مع خامات تصنيع بلاستيك.
- تأتي شاشة الهاتف IPS LCD بقياس 6.3 بوصة و دقة FHD+ بجودة 1080*2340 بيكسل مع كثافة بيكسلات 409 بيكسل لكل بوصة مع نوتش في اعلى الشاشة.
- معالج الهاتف سناب دراجون 712 ثماني النواة تكنولوجيا 10 نانو مع معالج رسوميات Adreno 616.
- يأتي الهاتف بنظام تشغيل اندرويد Pie 9.0 مع واجهة مستخدم Color OS 6.
- الهاتف متوفر باصدار ذاكرة داخلية 128 جيجا بايت مع 4 أو 8 جيجا بايت رام ذاكرة عشوائية.
- كاميرا الهاتف الخلفية تأتي رباعية بجودة 48 ميجا بيكسل مع فتحة عدسة f/1.8 و الثانية بجودة 8 ميجا بيكسل ultra wide مع فتحة عدسة f/2.2 فلاش LED و الثالثة 2 ميجا بيكسل للعزل و الرابعة 2 ميجا بيكسل macro تصوير فيديو بجودة و بجودة 4K و بجودة 1080 بيكسل مع 30 لقطة في الثانية.
- كاميرا السيلفي تأتي بجودة 16 مع فتحة عدسة F/1.8 و تصوير فيديو بجودة 1080 بيكسل مع 30 لقطة في الثانية.
- بطارية الهاتف تأتي بسعة 4000 مللي أمبير مع دعم شحن سريع VOOC.
- يدعم الهاتف تشغيل الراديو FM.
- متوفر بالهاتف دعم شبكات الجيل الثاني والثالث والرابع عن طريق شريحتين اتصال من نوع nano.
- الهاتف متاح في الأسواق بألوان الأزرق و الأخضر.
مميزات موبايل ريلمي 5 برو :-
- يمكنك استنخدام كارت ذاكرة خارجي مع شريحتين الاتصال.
- كابل الشحن USB Type C.
- سرعة شحن عالية بفضل خاصية VOOC.
- كاميرا الهاتف السيلفى و الخلفية تقدم اداء مميز.
- معالج الهاتف يقدم أداء رائع فى المهام اليومية و الألعاب الثقيلة.
عيوب Realme 5 Pro :-
- غياب لمبة الاشعارات.
- بطارية الهاتف كان من الأفضل لو كانت اكبر قليلا.
- خامات تصنيع من البلاسيتك.
التصميم :-
للأسف تصميم الموبايل من البولي كربونيت أو البلاستيك بالرغم من أن في منافسين بيقدموا تصميم زجاجي أرقى بس ريلمي محتفظة بفكرة الموبايلات البولي كربونيت واللي هي شايفة أنه في الفئة السعرية ديه هيكون مناسب أكتر وهيستحمل أكتر وقعات والكلام ده من غير ما يتكسر.
بس طبعا أرخم حاجة في البلاستيك أنه بيتخربش بسهولة جدا علشان كده لازم تركب سكين لحماية ظهر الهاتف و تستخدم جراب كمان وتحافظ عليه كأنه جديد.
التصميم شيك مميز بنقشة اسمها Diamond cut لامعة وهو من أشيك موبايلات ريلمي الحالية.
تحتوي الواجهة الأمامية للهاتف علي شاشة بدقة 6.3 بوصة أعلاها نجد الكاميرا الأمامية بجودة 16 ميجا بيكسل مع سماعة المكالمات و مستشعر القرب.
علي الجانب الأيمن للهاتف نجد زر التشغيل لفتح وغلق الهاتف و أزرار التحكم في الصوت.
علي الجانب الأيسر للهاتف نجد منفذ دخول شريحتين الاتصال و كارت ذاكرة خارجي.
أسفل الهاتف نجد ميكروفون المكالمات و السماعة الخارجية و منفذ كابل الشحن الـ Type C.
ظهر الهاتف يحتوي علي الـ 4 كاميرات في الظهر و اللي مكملة شياكة الهاتف في بروز بسيط للكاميرات الخلفية بيختفي لما تركب الجراب الشفاف الي موجود في صندوق الهاتف.
الموبايل حجمه في الإيد كويس جدا و وزنه مش تقيل و يعتبر مناسب جدا للاستخدام بإيد واحدة.
الشاشة :-
شاشة هاتف تأتي من نوع IPS LCD بقياس 6.3 بوصة تعرض 16 مليون لون بدقة FHD+ بجودة 1080*2340 بيكسل مع كثافة بيكسلات 409 بيكسل لكل بوصة بأبعاد 19.5:9 مع دعم حماية من نوع جوريلا جلاس الجيل الثالث و فيه اسكرينة متركبة علي الشاشة من الشركة.
الشاشة عادية جدا مفيهاش أي تجديد و بالنسبة لسطوع الشاشة كويس ومقبول جدا تحت الشمس والشاشة ألوانها مقبولة جدا.
ريلمي مدخلتش نفسها في قصة شاشة كاملة بموتور ولا شاشة أموليد علشان متعليش تكلفة الموبايل علشان تهتم أكتر بالمعالج والكاميرات في الموبايل ده.
الأداء :-
معالج الهاتف هو Snapdragon 712 ثماني النواة تكنولوجيا 10 نانو .. ريلمي كملت على نهجها القديم وحطت معالج سناب دراجون 712 في الموبايل ده وبكده هي لسه محافظة على أنها بتقدم أفضل معالج سناب دراجون في الفئة السعرية تحت الـ 4000 جنيه.
عموما الأداء مستقر جدا ومفيش فيه أي مشاكل احيانا ممكن تحس بتهنجيات بسيطة في كيبورد الـ ريلمي 3 برو الكلام ده مبقاش موجود هنا في الـ 5 برو.
بالنسبة بقا للأداء الرسومي من معالج Adreno 616 الموبايل بيشغل PUBG على High HD و اللعبة بتشتغل بسلاسة جدا ومفيش فيها أي تهنجيات أو تقطيعات وكمان السخونية مقبولة جدا في جسم الموبايل.
جربت call of duty واشتغلت على أعلى اعدادات جرافيك وشغالة زي الفل بدون أي تهنجيات.
أما بالنسبة لـ فورت نايت الموبايل ده واحد من أرخص الموبايلات الي بيدعم تشغيل فورت نايت بشكل رسمي بسبب أن المعالج بتاعه بيدعم تشغيلها حملت اللعبة حجمها تقريبا 5 جيجا كبيرة شوية ومحتاجة نت محترم و قوي واشتغلت بشكل كويس جدا بس طبعا على اعدادات جرافيك متوسطة مش أكتر من كدا.
يتوافر الهاتف بإصدار بذاكرة داخلية 128 جيجا بايت مع 4 جيجا بايت رام و الثاني نفس المساحة ولكن مع 8 جيجا بايت رام.
يمكنك زيادة المساحة الداخلية للهاتف عن طريق إضافة كارت ذاكرة خارجي يصل إلى 256 جيجا بايت في منفذ منفصل عن شريحتين الاتصال.
عوامل حماية الأمان و الخصوصية و الصوت :-
الهاتف بيدعم مستشعر البصمة الموجود في ظهر الموبايل سريعة ومفيهاش اي مشاكل.
وال Face unlock أدائه صاروخي كعادة كل موبايلات ريلمي و اوبو.
صوت الهاتف متوسط و لكنه مجسم شوية ومقبول و بالنسبة لصوت سماعات المكالمات عالي ومقبول وبالنسبة لصوت سماعات الأذن فهو كويس بردة بس مش مجسم أوى مع دعم ميكروفون اضافي لازالة الضوضاء.
البطارية :-
بطارية الهاتف 4000 مللي أمبير كان من الأفضل لو كانت 4500 مللي أمبير صمدت لمدة 6 ساعات شاشة مفتوحة مع الاستخدام المتوسط هو مش أحسن زمن في الفئة السعرية ديه بس هو مقبول بسبب زمن الشحن لأن الهاتف بيشحن عن طريق منفذ USB Type C وشاحن VOOC سريع جدا تقريبا الموبايل بيوصل لـ 90% في ساعة بالظبط واخر 10% بيشحنوا في ربع ساعة يعني بالموبايل بيشحن بالكامل في ساعة وربع وده أقل زمن شحن حاليا في الفئة السعرية ديه.
ونحب نفكرك أن الموبايل ده بيفضل يشحن بكامل سرعته حتى وانت بتلعب ألعاب عليه من غير ما يسخن أوي وديه حاجة مش موجودة في الموبايلات المنافسة.
الكاميرات :-
الكاميرا الخلفية رباعية الاساسية 48 ميجا بيكسل فتحة عدسة 1.8 مع مستشعر سوني IMX 586 والكاميرا التانية 8 ميجا بيكسل فتحة عدسة 2.2 للتصوير الواسع Ultrawide والعدسة الثالثة 2 ميجا بيكسل للبورترية والعدسة الرابعة 2 ميجا بيكسل للتصوير الMacro فتحة عدسة 2.4 .
وريلمي 5 برو بيجي بكاميرا سيلفي بجودة 16 ميجا بيكسل فتحة عدسة 2.0 بمستشعر سوني IMX 471.
وكمان قدرنا نسطب برنامج جوجل كاميرا على الموبايل.
التجربة الفعلية .. الكاميرات الخلفية بتطلع صور ممتازة سواء عادية او بورترية في كل اوضاع التصوير سواء عادي او بورترية وكمان التفاصيل كويسة جدا مع لعب بسيط في الوان البشرة والي تقدر باستخدام برنامج جوجل كاميرات تطلع صور بتفاصيل حقيقية اكتر ولون بشرة مظبوط اكتر .. وباستخدام النايت مود بتاع الموبايل الي اسمه NightScape هتطلع صور بليل متميزة جدا مع لعب بسيط في الالوان والي تقدر بردة تستخدم الـ Night في برنامج جوجل كاميرا وتطلع صور ممتازة حقيقية بدون اللعبة في الالوان مع اضاءة صور اقوى حتى في الاضاءات الضعيفة جدا.
مش هنقدر ننسى العدسة الواسعة الي بتطلع صور محترمة بزاوية تصوير واسعة 119 درجة بس بتشتغل كويس في الاضاءات الكويسة فقط .. وكمان في عدسة ماكرو بتقدر تصور بيها اي حاجة عن قرب اوي حوالي 4 سم بس من عدسة الموبايل وبالتالي تقدر تاخد صور لتفاصيل دقيقة جدا زي وردة من جواها التفاصيل عاملة ازاي.
بالنسبة للسيلفي .. فهو متميز جدا .. سيبك من الرقم الـ 16 ميجا بيكسل .. اداء السيلفي حلو جدا في كل اوضاع التصوير صبح بليل صور عادية او بورترية .. بس بردة باستخدام جوجل كاميرا هتاخد صور سيلفي احسن شوية بليل.
تقدر تشوف تفاصيل الصور المتصورة بالموبايل في فيديو المراجعة في أخر المقالة.
بالنسبة لتصوير الفيديوهات الموبايل بيصور 4K ولكن بدون مثبت الكتروني .. التثبيت الالكتروني بيشتغل على 1080p والتصوير بيبقا ثابت ومحترم جدا.
الدعم و الاتصال :-
يدعم الهاتف شبكات اتصال الجيل الثاني والثالث والرابع عن طريق شريحتين اتصال من نوع نانو و تعامل الهاتف مع الشبكة ممتاز جدا.
يدعم الهاتفWi-Fi 802.11 a/b/g/n/ ac dual band مع دعم خاصية Wi-Fi direct و امكانية انشاء Hotspot.
يدعم الهاتف بلوتوث الاصدار الخامس A2DP,LE.
يدعم الهاتف GPS مع خواص ,A-GPS GLONASS BDS ,GALILEO و التحديد الجغرافي دقيق جدا.
متوفر بالهاتف دعم مستشعرات الضوء و السرعة و البوصلة و القرب و بقي أداءه أفضل كتير.
يدعم الهاتف تشغيل الراديو FM.
يدعم الهاتف مستشعر الجيروسكوب حيث استخدام نظارات الواقع الافتراضي و مشاهدة فيديوهات 360 درجة.
يدعم الهاتف خاصية ال OTG و اللي ترد بيها توصل فلاشة للموبايل و تنقل البيانات من و إلي الهاتف.
نظام التشغيل و واجهة المستخدم :-
يتم اصدار هاتف بنظام تشغيل اندرويد pie 9.0 و واجهة مستخدم Color OS 6.
المفروض أن دي نفس واجهة المستخدم بتاعة Oppo بس ريلمي بتقول أنها عدلت شوية حاجات فيه زي شكل الايقونات بتاعة قائمة الاشعارات وكمان أصبح عدد أيقونات الاشعارات الي بتظهر جمب النوتش يبقا أكتر تعتبر شوية تعديلات مش بطالة بس كان نفسي يضيفوا لمبة اشعارات بس للاسف لسه مفيش لمبة اشعارات.
وكمان تقدر تحدد بصمة معينة تخليك تفتح تطبيق مخفي علاطول.. ميزة حلوة جدا بردة.
تتمتع الواجهة بالعديد من المميزات و الخصائص حيث يمكنك التحكم فى اخفاء ازرار التحكم الثلاث و استخدامهم فى نفس الوقت حيث تقوم بلمس الشاشة من أسفل لاعلى فى جهة اليمين للرجوع للخلف و فى المنتصف كا زر HOME و من جهة اليسار لفتح ال Recent apps أو استخدام ال assistive ball و هو دائرة فى أى مكان بالشاشة حيث تقوم بلمسها لمرة للرجوع للخلف و مرتين لفتح ال recent apps و ضغطة مطولة ل home.
يدعم الهاتف خاصية Clone apps حيث يمكنك أن تقوم بتحميل نسختين من أى تطبيق مثل What’s app و Facebook و Messenger .
تدعم الواجهة خاصية تسجيل المكالمات بشكل تلقائي و لكن يجب تفعيلها من الاعدادات اولا.
أصبحت التطبيقات مجمعة فى درج التطبيقات بدلا من أن تكون مبعثرة على الشاشة.
محتويات صندوق الهاتف :-
هاتف Realme 5 pro و عليه اسكرينة للحماية
الشاحن بقوة VOOC
كابل الشحن USB Type C
سماعات الرأس
جراب لحماية ظهر الهاتف
لا يوجد سماعات أذن في العلبة.
تقييم الهاتف :-
ريلمي 5 برو بيقدم تركيبة محترمة أوي في الفئة السعرية بتاعت 4 الاف جنية.
بيقدم معالج سناب دراجون بأداء مستقر ومحترم وشعبية أكبر مع بطارية مقبولة بس مع شحن سريع جدا وكاميرات محترمة جدا والتجربة بتاعتها بتبقي أحسن بليل مع جوجل كاميرا و شبكة محترمة جدا مع مساحة كبيرة .. لأن اصغر نسخة بتيجي هنا 128 جيجا.
التنازلات المعتادة من ريلمي شاشة بنوتش مش شاشة كاملة ومفيش لمبة اشعارات والخامات من البلاستيك.
وأكيد هنعمل مقارنة بين الريلمي 5 برو و المنافس العنيد شاومي نوت 8 برو قريب جدا .. تابعنا على موبيزل.
سعر موبايل Realme 5 Pro :-
للنسخة 128 جيجا مع 4 جيجا رام بسعر رسمي 3790 جنية.
للنسخة 128 جيجا مع 8 جيجا رام بسعر رسمي 4690 جنية.
Comments