مراجعة Realme C11 – أرخص موبايل من ريلمي في مصر !

ريلمي شركة بتخاطب الشباب .. وبتحاول تلبي ليهم إحتياجتهم في الموبايلات .. واعلنت في مصر عن موبايل Realme C11 علشان يكون واحد من أرخص موبايلات ريلمي في مصر .. وفي نفس الوقت الموبايل فيه شوية مُميزات حلوة أهمها الشكل علشان متحسش إنك ماسك موبايل رخيص خالص.

وفي المراجعة النهارده هنجاوب على أسئلة كتيرة .. زي ايه الفرق بين Realme C11 والـRealme C3i .. وهل ريلمي C11 حاليًا يُعتبر أفضل موبايل بسعر 2000 جنية مصري ؟

التصميم :-

ودي أول حاجة مُمكن تشدك ناحية الموبايل ده .. على قد ما التصميم بسيط إلا إنه مُلفت وجديد .. ومحدش خالص هيتوقع إن ده موبايل اقتصادي من التصميم بتاعه.

وكعادة الفئة الإقتصادية .. التصميم بالكامل من البلاستيك .. مع نقشة على الظهر علشان تحمي شوية الموبايل إنه ميتخربش .. لأن للأسف ريلمي مش حاطه جراب في علبة الموبايل.

الكاميرا الخلفية موجودة في مربع ومش بارزة جامد عن الظهر .. وبكدا ده أول موبايل إقتصادي من ريلمي يجي بشكل نافذة كاميرات مختلفة ومميزة.

بالنسبة للمسكة في الإيد .. الموبايل مش صغير خالص .. وزنه 196 جرام وتخانه حوالي 9.1 .. وهتحتاج شوية على ما تاخد على ابعاد الموبايل .. وخلاص معظم الموبايلات بقت كبيرة ووزنها تقيل حتى الموبايلات الإقتصادية.

وريلمي بتقول إن الموبايل متقفل كويس جدًا لدرجة إنه مقاوم لطرطشة الماء .. من غير شهادة رسمية طبعًا .. بس هي واثقة في تقفيلها.

الشاشة :-

شاشة بتيجي بحجم 6.5 بوصة من نوع IPS LCD وبدقة HD+ .. والسيلفي محطوط في نوتش الشاشة.

وهختصر عليك وقتك .. ديه نفسه شاشة موبايل Realme C3 .. ومعتقدش حد إشتكى منها .. وكويس إن ريلمي إستخدمت نفس شاشة الـC3 الأغلى وحطيتها في الـC11.

مُجملا ألوان شاشة C11 كويسة .. زوايا الرؤيا كويسة .. السطوع كويس ومعقول تحت الشمس مفيش فيه مشاكل.

ولما نقول موبايل بالفين جنية بدقة HD+ فا ده عادي ومتوقع .. هو موبايل واحد بس اللي كسر القاعدة ونزل بشاشة FHD+ في الفئة ديه وأكيد كلكم عارفينه وهو الـRedmi 9.

واخيرًا .. الشاشة مفيش إعلان رسمي عن طبقة الحماية .. والموبايل بيجي في العلبة متركب على الشاشة سكرينة.

الأداء :-

وهنا هنقف مع بعض شوية .. ويا ريت تركز في كلامي .. الـRealme C11 جاي بمعالج ميدياتك Helio P35 بمعمارية 12 نانو .. معالج جديد ولكن هو مبني على الـP22 .. يعني أداءه مايل أكتر للإقتصاديه وده واضح من نتيجة أختبار Antutu.

ولكن مُجمل أداء الـC11 مش وحش ومش بطال .. أحسن شوية من الـRedmi 9A اللي لسه مجربه .. وأقل شوية عن الـRealme C3 والـRedmi 9.

فأنا معنديش مشاكل مع الموبايل ده من ناحية الأداء اليومي العادي في فتح البرامج والتطبيقات .. والتنقل ما بينهم .. وللعلم النسخة اللي كنت بجربها كانت بـ3 جيجا رام.

ولكن ركز معايا بقى .. الـHelio G35 بيجي بمعالج رسومي الـPowerVR زي الـG25 وزي الـP22 .. وبكدا يبقى أقل بحبه حلوين من المعالج الرسومي الـMali G52 الموجود في الـG70 والـG80.

وده مُنعكس على الأداء في الألعاب .. ببجي أخرها تشتغل على Balanced Medium ولما تيجي تلعب هتلاقي بعض التقطيعات البسيطة في أول الجيم .. وشوية وهتختفي بس هترجع تاني لما تطول في اللعب على الموبايل.

اما لعبة كول اوف ديوتي فهي بتشتغل على اعدادات جرافيك Low واللعبة هنا بتشتغل كويس من غير تقطيعات ولا سخونية في جسم الموبايل.

لو انت اتلغبطت .. هلخصلك الدنيا في كلمتين .. لو إنت إستخدامك عادي مش راجل Gamer .. اداء الـC11 مش هيقصر معاك .. إنما لو انت عايز تلعب العاب تقيلة على الموبايل .. روح للموبايلات الي فيها الـG70 والـG80 علشان المعالج الرسومي الأعلى زي الريلمي C3 و C3i والـRedmi 9.

عوامل الأمان وعناصر اخرى :-

للأسف مفيش بصمة في الظهر .. كان الأفضل تكون موجودة .. والـFace Unlock سرعته مقبوله ولكن مش سريع أوي.

الموبايل جاي بواجهة ريلمي المبنية على اندرويد 10 واللي فيها Dark Mode وكمان عمل نسختين من برامج التواصل الإجتماعي.

وللأسف مفيش لمبة اشعارات ولا في مايكروفون إضافي علشان عزل الضوضاء .. المستشعرات كلها شغالة، ضوء، تقارب .. وكمان الموبايل بيدعم الجيروسكوب وبيدعم الـOTG.

للأسف صوت الموبايل مش عالي .. وأديله تقييم أقل من المتوسط .. نفس صوت الـC3 اللي مكنش عاجبني.

صوت سماعة المكالمات عالي وكويس بس للأسف مفيش تسجيل مكالمات خلاص في موبايلات ريلمي الجديدة .. وصوت سماعات الأذن مقبول.

واخيرًا بالنسبة لقوة الشبكات .. الـWiFi كويس مفهوش مشاكل .. وشبكات الإتصال متوسطة زي الـC3 بالظبط.

البطارية :-

بطارية ضخمة .. بتيجي بحجم 5000 مللي أمبير .. ريلمي دايمًا بتحب تحط بطاريات ضخمة .. والبطارية بتوصل لأكتر من 10 ساعات إستخدام فعلي للشاشة .. والموبايل هيكمل يوم ونص او يومين معاك من غير شحن .. حلو جدًا.

وكعادة ريلمي منفذ شحن قديم Micro USB 2.0 وشاحن 10 واط والبطارية هتتشحن في حوالي 3 ساعات إلا ربع.

الكاميرات :-

الكاميرا الخلفية مزدوجة الرئيسية 13 ميجا بيكسل فتحة عدسة F/2.2 والتانية 2 ميجا بيكسل للعزل .. والسيلفي 5 ميجا بيكسل فتحة عدسة F/2.4.

سوفت وير الكاميرا بتاع ريلمي هنا متضاف فيه Night Mode مع إنه مكانش موجود في الـC3 .. فا دي حاجة كويسة .. والـChroma Boost اللي بيعزز الألوان موجود برده في سوفت وير الكاميرا هنا.

واحنا في موبيزل جربنا الـC11 مع الـC3 علطول .. وبالمناسبة الكاميرا الرئيسية للـRealme C3 هي هي الموجودة في الـC3i علشان لو حد هيسأل.

مُجملًا شايف اداء الـC11 مقلش كتير عن الـC3 .. بل بالعكس .. انا شايف ألوان الصور طالعة أحسن في الإضاءة العالية وده ناتج عن فتحة العدسة الأضيق اللي بتخلي الصور أحلى في الشمس والإضاءات العالية.

إنما مع الإضاءات الداخلية فا تشبع الألوان وشكل الصور العام وحتى لما الدنيا بتظلم .. صور الـC3 أفضل شوية بالرغم إن في Night Mode في الـC11 ومفيش في الـC3.

والسيلفي برده نفس اللي قولته في الكاميرا الخلفيه هقوله هنا بالظبط .. بالرغم من إن المفروض إن C11 وC3 اللي هو هو برده C3 في السيلفي نفس الكاميرا.

إلا إن في بعض الإختلافات في طريقة المعالجة والتقاط صور السيلفي .. ومُجملا علشان لو توهت مني .. كاميرا الـC11 مقبولة جدًا على سعر 2000 جنية.

بالنسبة لتصوير الفيديوهات بموبايل Realme C11 .. الموبايل بيصور فيديوهات بجودة 1080p بدون تثبيت الكتروني .. وده الطبيعي في الفئة السعرية ديه.

سعر الموبايل :-

الموبايل بيجي في السوق المصري بنسختين .. أسعارهم كالتالي :-

• النسخة الـ32 جيجا مع 2 جيجا رام بسعر 1990 جنية مصري
• النسخة الـ32 جيجا مع 3 جيجا رام بسعر 2290 جنية مصري
  والنسخة دي عليها خصم 100 جنية على موقع سوق دوت كوم وسعرها 2190 جنية بس !

وطبعًا بينفع تركب شريحتين إتصال مع كارت ميموري بحجم 256 جيجا في نفس الوقت.

الرأي النهائي :-

مميزات Realme C11 :-

• بطارية ضخمة
• تصميم شيك وتقفيل محترم
• شاشة كبيرة مقبولة

عيوب Realme C11 :-

• أداء رسومي ضعيف
• الصوت مش الأفضل
• لا يوجد مستشعر بصمة
• سعر الموبايل غالي

وبالنسبة للموبايلات المُنافسة فا عندنا Realme C3 بسعر 2500 جنية .. Realme C3i بسعر 2200 جنية .. Redmi 9 بسعر 2250 جنية والنسخة الكبيرة بسعر 2500 جنية.

ومن وجهة نظري .. لو مش معاك غير 2000 جنية مُمكن تخليك في Realme C11 .. وحط في دماغك ان الـ2 جيجا رام اللي فيه قليل جدًا على واجهة ريلمي والموضوع مش هيكون لذيذ .. لكن لو تقدر تطلع بالمبلغ للـ2200 جنية فا أنصحك بالـRealme C3i او الـRedmi 9 هيكونوا افضل بفرق واضح.

اما لو هتقدر تزود المبلغ لـ2500 جنية فأنصحك بالـRealme C3 او الـRedmi 9 اعلى نسخة هيكون أفضل بفرق كبير.

فيديو المراجعة :-