شاومي لما بتحط حاجة في دماغها بتعملها .. والمرة دي شاومي عملت حاجة مختلفة تمامًا .. عملت أخف موبايل في فئة متوسطة .. موبايل Mi 11 Lite بوزن 157 جرام .. أخف حتى من Oppo Reno 5 .. وفي نفس الوقت مع تصميم زجاجي شيك واخد ستايل الموبايلات الرائدة بدون اي بهرجة او فزلكة ملهاش داعي.
ولكن المواصفات بتاعت مي 11 لايت 4G مواصفات تقليدية شوية .. شوفناها قبل كدا في موبايلات من شاومي نفسها وشوفنا اعلى منها كمان .. ولكن هل المرة دي ارقام المواصفات حقيقية ؟ وليه أسيب Redmi Note 10 Pro و Poco X3 Pro وأشتري Mi 11 Lite ؟ كل الأسئلة دي هنجاوب عليها في مراجعة Mi 11 Lite في المقالة دي.
التصميم :-
لما تمسك Mi 11 Lite في ايدك هتحس ان كل الموبايلات الباقية تقيلة وتخينه .. وان مي 11 لايت فعلا ريشة في ايدك .. وعلشان تفهم كلامي ممكن تنزل تمسك الموبايل في أي محل موبايلات.
في بعض الناس بتحب الموبايل يبقى خفيف في ايدها لإنها بتستخدمه لفتره كبيرة .. وفي بعض الناس بتحب الموبايل يبقى تقيل وله وزن في ايديها .. هي أذواق شخصية في الأخر.
تصميم الظهر من الزجاج .. زجاج خفيف مش تقيل زي الموبايلات الرائدة .. علشان الوزن يبقى خفيف أوي .. والتخانة قليلة اوي 6.8 ملم .. ولكن الفريم بلاستيك .. كان نفسي الفريم يبقى معدن بس أكيد كان هيتقل الموبايل على الأقل 10 جرام لو اتعمل معدن .. وشاومي كان كل همها تعمل موبايل خفيف.
التصميم نفسه شيك لأقصى درجة .. موبايل راقي فعلا Premium .. لانه واخد شكل Mi 11 الهاتف الرائد بتاع شاومي .. ملوش دعوة ببهرجة الكاميرات بتاعت Redmi Note 10 Pro ولا Poco X3 Pro.
وفي نفس الوقت البروز بتاع كاميرات مي 11 لايت معقول جدًا .. والبروز بيتغطي بالجراب المرفق في علبة الموبايل.
الشاشة :-
نبص على شاشة مي 11 لايت هنلاقي شاومي مسترخصتش تمامًا .. شاشة 6.5 بوصة AMOLED بدقة FHD+ بتردد بيوصل لـ90 هيرتز .. المُميز هنا ان الشاشة بتعرض مليار لون .. وعرض مليار لون دي ميزة مش هتلاقيها غير في الموبايلات الرائدة .. وطبعا الشاشة هنا داعمة للـHDR10.
والمُميز برده والمختلف في الموبايل ده ان السيلفي على الشمال مش في النص .. حجم ثقب السيلفي متوسط مش صغير زي ريدمي نوت 10 برو ومش كبير زي بوكو X3 برو .. حاجة كده في النص.
عمومًا الشاشة هنا حلوة .. هتعجبك .. سطوعها كويس جدًا .. ألوانها حلوة جدًا جدًا .. مفيش اي تنازل في جزئية الشاشة.
والشاسة عليها طبقة حماية جوريلا الجيل الخامس وهتلاقي سكرينة متركبة على الشاشة لما تطلعه من العلبة.
ولكن هنا معدل تحديث الشاشة 90 هيرتز مش 120 هيرتز زي ريدمي نوت 10 برو .. وهشرحلك النقطة دي بالتفصيل في الفقرة اللي جايه بتاعت الأداء.
الأداء :-
مي 11 لايت بيجي بمعالج سناب دراجون 732 تكنولوجيا 8 نانو .. معالج متوسط هو هو اللي موجود في نوت 10 برو وأدائه قريب جدًا من سناب دراجون 720G الموجود في Reno5 و Galaxy A52 والـRealme 8 Pro لما ينزل.
ولكن سناب دراجون 732 المعالج المُستخدم في مي 11 لايت أصلًا مقدرش يشغل الـ120 هيرتز بتوع نوت 10 برو كويس .. وقلت الكلام ده نصًا في مراجعة Redmi Note 10 Pro .. المعالج ده أخره 90 هيرتز .. فا شاومي علشان تقدر فعلا تحط أرقام تتحول لتجربة فعلية .. خلت الشاشة في مي 11 لايت 90 هيرتز .. وعززت من موقف الشاشة في درجات الألوان الأكثر .. لإن فعلا الـ90 هيرتز مناسبين اكتر للمعالج ده.
الأداء معقول .. ولكنه مش أسرع أداء في الفئة دي .. لإن Poco X3 Pro هيقدملك أداء أحسن والـ120 هيرتز بتوعه هتحس بيهم فعلًا .. لكن مش هتاخد الشاشة الـAMOLED اللي هنا ولا التصميم المميز اللي هنا.
وفي نفس الوقت احنا بنجرب حاليًا Poco F3 اللي جاي بمعالج ممتاز وشاشة AMOLED بمعدل 120 هيرتز وتصميم شيك .. وده فعلًا الـJoker بتاع شاومي ولكن بسعر أغلى .. لو تقدر تزود وتجيبه هيكون أفضل.
ببجي شغاله على High HD .. كول اوف ديوتي Very High .. ولكن بسبب التصميم الزجاجي والتخانة القليلة اوي .. فهتحس بسخونية الموبايل بدري أوي .. الموبايل بيسخن بسرعه زي Poco X3 Pro بالظبط مع مراعاة ان المعالج اللي في مي 11 لايت المفروض ميسخنش أوي كده .. ولكن ده بسبب التصميم زي ما فهمتك.
ولكن المعالج في مي 11 لايت حتى بعد ما يسخن مش بيحصله اختناق كبير ولا بيفقد جزء كبير من قوته .. هو بس التصميم اللي محسسك بالسخونية مش اكتر لكنها طبيعية.
عوامل الأمان وعناصر اخرى :-
بصمة على زرار الباور عملية .. البصمة سريعة بس كالعادة أيقونات الواجهة بتاخد وقت في التجميع زي ريدمي نوت 10 برو بالظبط .. الـFace Unlock كويس جدًا مفيهوش أي مشاكل.
كالعادة أول ما تفتح الموبايل من العلبة هتلاقي Update أعمله علشان تاخد أفضل تجربة مُمكنة .. الموبايل بيدعم الـNFC وبيجي مع ميكروفون اضافي لعزل الضوضاء وبيدعم الـAlways On Display.
صوت الموبايل Stereo .. وحقيقي ده اعلى صوت Stereo من شاومي .. اعلى من نوت 10 برو والـBass بتاعه ممتاز .. مش عارف ازاي الصوت ده طالع من الجسم الصغير ده !
مفيش للأسف مدخل سماعات 3.5 ملم مهو واخد ستايل الموبايلات الرائدة بقى .. معاك وصلة تحويل في علبة الموبايل من Type C لـ3.5 ملم علشان لو عاوز تركب سماعتك القديمة.
بالنسبة لمستشعر التقارب بتاع المكالمات .. فهو للأسف مش دقيق برده وبيعلق احيانًا .. معرفش ليه مش بنحط مستشعر هاردوير سريع يا شاومي ؟
أما بالنسبة لقوة الشبكات .. الـWiFi ممتاز أقوى من نوت 10 برو .. لكن شبكات الإتصال تاخد تقييم فوق المتوسط .. احسن من ريدمي نوت 10 برو شوية.
البطارية :-
شاومي علشان تخلي الموبايل رفيع وخفيف اوي كده اضطرت تخلي البطارية 4250 مللي أمبير مش 5000 مللي امبير زي ما متعودين .. ولكن المميز هنا ان اداء البطارية مناسب للرقم بتاعها.
أداء البطارية معقول جدًا هيقدملك حوالي 6 ~ 7 ساعات شاشة مفتوحة وأكيد مشغل 90 هيرتز .. الشاحن المُرفق 33 وات وبيشحن البطارية في ساعة .. المفروض يشحن في وقت أقل من كده!
الكاميرات :-
3 كاميرات في الظهر الأساسية 64 ميجا بيكسل فتحة عدسة F/1.8 بمستشعر سامسونج GW3 ..التانية 8 ميجا بيكسل فتحة عدسة F/2.2 للتصوير الواسع .. التالتة 5 ميجا بيكسل ماكرو فتحة عدسة F/2.4 .. والسيلفي 16 ميجا بيكسل فتحة عدسة F/2.5 بمستشعر سوني IMX471 .. والكاميرات بتدعم جوجل كاميرا.
من الأخر لما جربت الكاميرا بتاعت مي 11 لايت حسيت ان التجربة منطقية ومرضية جدًا على انها 64 ميجا بيكسل .. يعني من الاخر انت بتاخد كاميرا 64 ميجا بيكسل مفهاش مشاكل .. مفيش وضع تصوير هتلاقي الكاميرا بتعاني فيه.
الألوان مظبوطة جدًا .. السوفت وير مش بيلعب في الألوان .. هو بس بيعززها حاجة بسيطة .. لون السما مظبوط جدًا .. والتصوير في إضاءات أقل شوية برده معقول جدًا على رقم الكاميرا اللي هنا .. وجربت جوجل كاميرا لاقيت السوفت وير بتاع شاومي اذكي في التعامل في الكاميرا الخلفية.
ولكن علشان الصورة تبقى أوضح قارنت Poco X3 Pro مع Note 10 Pro مع Mi 11 Lite .. ولاقيت ان اداء مي 11 لايت قريب جدا من اداء ريدمي نوت 10 برو اللي المفروض الكاميرا بتاعته 108 ميجا بيكسل .. ولكن زي ما قولتلك مي 11 لايت جاي يحقق الارقام بتاعته مش جاي يستعرض ارقام وخلاص .. يمكن نوت 10 برو بيتفوق في التفاصيل بس.
السيلفي .. متغيرش كتير في مي 11 لايت عن موبايلات شاومي اللي قبل كده .. تفاصيل كويسة مع Over Sharpening في الإضاءات العالية .. ولون بشرة فاتح شوية هتحتاج تعدل فيه باي برنامج تعديل الصور.
ولما الإضاءة بتقل هتلاقي الصور بقت ناعمة شوية والتفاصيل قلت وممكن ساعتها تستخدم جوجل كاميرا علشان تقدر تاخد صور فيها تفاصيل اكتر وبعدها تعمل Color Edit علشان تاخد صورة فعلا حلوة.
ولما قارنت السيلفي مع نوت 10 برو وبوكو X3 برو لاقيت ان أداء السيلفي في مي 11 لايت قريب جدًا جدًا لاداء ريدمي نوت 10 برو .. اللي اقل منهم شوية هو بوكو X3 برو.
بالنسبة بقى لتصوير الفيديوهات فا الموبايل بيصور على 4K وفيه ثبات إلكتروني شغال مع الـ4K .. شوفنا الميزة دي في Poco X3 NFC لكن للأسف مش موجودة في Redmi Note 10 Pro .. وبرده في ميكروفون اضافي لعزل الضوضاء علشان تحسن من جودة الصوت اللي بتتسجل وانت بتصور فيديوهات.
سعر Mi 11 Lite :-
الموبايل متوفر في مصر بنسختين، ودي أسعارهم :-
- نسخة 128 جيجا مع 6 جيجا رام بسعر 5000 جنية مصري
- نسخة 128 جيجا مع 8 جيجا رام بسعر 5300 جنية مصري
والموبايل بيدعم تركيب شريحتين إتصال 4G او شريحة واحدة مع كارت ميموري بحجم 512 جيجا.
الرأي النهائي :-
مميزات Mi 11 Lite :-
- تصميم الموبايل مميز جدًا
- وزن وتخانة بيقدموا تجربة ممتعة
- شاشة ممتازة من ناحية الألوان والسطوع
- صوت Stereo ممتاز
- كاميرات أداءها متوازن جدًا
عيوب Mi 11 Lite :-
- مفيش مدخل 3.5 مللي للسماعات
- بطارية صغيرة شوية ولكن اداءها مقبول
- مستشعر تقارب (للمكالمات) اداءه مش الأفضل
- معالج مش أقوى خصوصا مع وجود Poco X3 Pro بمعالج أقوى بكتير
- السخونية محسوسة جدًا بسبب تصميم الموبايل الرفيع
عمومًا الموبايل مش معمول لـ مُستخدمين شاومي القدام .. لأ هو معمول لفئة مُختلفة مجربتش شاومي قبل كده .. إستخدامهم خفيف وعايزين موبايل راقي في الشكل والخامات والشاشة لإنهم مش Gamers ووزنه خفيف ورفيع وشيك في المقام الأول .. وبالتالي ساعتها مي 11 لايت هيكون مثالي جدًا ليهم.
لو بتدور على الأداء وهو رقم 1 في أولوياتك يبقى Poco X3 Pro أفضل .. او تزود شوية وتجيب Poco F3 .. لو محتار بين ريدمي نوت 10 برو و مي 11 لايت فا انزل وامسك الموبايلين في إيدك في أي محل واللي ترتاح لإستخدامه هاته .. لإن الفروقات مش كبيرة خالص بعيدًا عن الخامات والتقفيل الأفضل في Mi عن Redmi.
Comments