أول ما عرفنا خبر عن اطلاق Redmi K30 اول ما نزل قولنا لازم نجيبه من الصين وفعلا الموبايل وصلنا من فترة وجربناه فترة طويلة وفى مراجعة النهاردة هنتكلم عنه بالتفصيل وهنشوف هل يستحق تستني الموبايل ده ولا لا ؟ وايه موقف الموبايل ده بالنسبة لـNote 8 Pro وMi 9T هل ضاف حاجة ولا مفيش جديد.
المواصفات :-
- ابعاد الهاتف 165.3×76.6×8.8 مم
- وزن الهاتف 208 جرام والظهر من الزجاج
- تأتي شاشة الهاتف من نوع IPS LCD بقياس 6.67 بوصة ودقة FHD+ بجودة 1080×2400 بيكسل مع كثافة بيكسلات 395 بيكسل لكل بوصة مع ثقبين بالشاشة للكاميرا السيلفي المزدوجة والشاشة بتحديث 120 هرتز
- معالج الهاتف هو سناب دراجون 730G مع معالج رسوميات Adreno 618
- يأتي الهاتف بنظام تشغيل اندرويد 10 مع واجهة مستخدم MIUI 11
- الهاتف متوفر بإصدارين بذاكرة داخلية 128 جيجا بايت مع 6 جيجا رام أو 8 جيجا رام ذاكرة عشوائية
- الكاميرا الخلفية رباعية، الرئيسية 64 ميجا بيكسل مع فتحة عدسة F/1.9 و الثانية 8 ميجا بيكسل Ultra Wide مع فتحة عدسة F/2.2 والثالثة 2 ميجا بيكسل مع فتحة عدسة F/2.4 للتصوير الـMacro والرابعة 2 ميجا بيكسل بفتحة عدسة F/2.4 للمساعدة في العزل
- كاميرا السيلفي تأتي مزدوجة بجودة 20 ميجا بيكسل مع فتحة عدسة F/2.2 والثانية للعزل بفتحة عدسة F/2.4 ودعم لتصوير فيديو بجودة 1080 بيكسل مع 30 لقطة في الثانية
- بطارية الهاتف تأتي بسعة 4500 مللي أمبير وشحن 27 واط مع منفذ USB Type C
- يدعم الهاتف تشغيل الراديو FM
- متوفر بالهاتف دعم شبكات الجيل الثاني والثالث والرابع عن طريق شريحتين اتصال من نوع Nano
- الهاتف متاح في الأسواق العالمية بألوان الأزرق والأحمر والأبيض
التصميم :-
أول ما تمسك الموبايل في ايديك هتحس إن الموبايل ده كبير وثقيل عن الطبيعي في الفئة السعرية دي .. الموبايل وزنه 208 جرام وسُمكه 8.8 ملم فهو مش صغير اطلاقا وأبعاده كبيرة شوية ومحتاج تتعود عليه شوية، الشركات كل شوية عماله تكبر فالموبايلات وكل فين وفين لما بنجرب موبايل حجمه سهل ومريح في الايد اليومين دول مع ان ناس اكتر بتفضل الموبايلات الصغيره.
تصميم الموبايل من بعيد يخطفك .. لأنه غير كل موبايلات شاومي التانية، تصميم الظهر من الزجاج واللون الاحمر اللي معانا واللي بنراجعه النهارده غريب شوية .. من تحت فوشيا وطالع فوق للاحمر .. حاجة كده مخصوصة البنات.
شاومي حطالك الكاميرا الخلفية في دائرة كأنها مراية شكلها قريب من تصميم الكاميرا بتاع الـMate 30 Pro بس طبعا بروز الكاميرات كبير كالعادة و لازم تركب الجراب الشفاف اللي جاي مع الموبايل في العلبة بتاعته .. واصلا الجراب نفسه عاملين فيه شفة كدا من عند الكاميرات علشان يغطي بروز الكاميرات العجيب ده.
اطار الموبايل من الألمونيوم والتقفيل نفسه كويس جدا بس الفريم سميك شوية والانحناء اللي في الظهر صغير شوية علشان زرار الباور هنا مدمج فيه البصمة، وأخيرا الموبايل عليه طبقة حماية جوريلا جلاس الجيل الخامس على ظهره .. بس ده ميمنعش انك تركب الجراب الشفاف اللي جاي معاه.
تحتوي الواجهة الأمامية للهاتف علي شاشة بدقة 6.67 بوصة أعلاها سماعة المكالمات ومستشعر التقارب مع ثقبين في الشاشة للكاميرا السيلفي وهي شاشة كاملة من غير حواف او نوتش، علي الجانب الأيمن للهاتف نجد زر التشغيل لفتح وغلق الهاتف مدمج به مستشعر بصمة الاصبع و أزرار التحكم في الصوت.
علي الجانب الأيسر للهاتف نجد منفذ دخول شريحتين الاتصال و كارت ذاكرة خارجي، أسفل الهاتف نجد ميكروفون المكالمات والسماعة الخارجية علي اليسار مما يتسبب بكتم الصوت أثناء استخدام الهاتف بشكل أفقي .. ومنفذ الشحن من نوع USB Type C.
ظهر الهاتف يحتوي علي الكاميرا الرباعية في أعلي منتصف الظهر، والهاتف متوفر بألوان الأزرق والأحمر والأبيض.
الشاشة :-
الشاشة هنا غريبة شوية، تركيبة جديدة هنشوفها في أكتر من موبايل من شركات كتيره، شاشة 6.67 بوصة من نوع IPS LCD بدقة Full HD Plus بجودة 1080×2400 بيكسل مع كثافة بيكسلات 395 بيكسل لكل بوصة و أبعاد العرض 20:9.
الشاشة هنا كاملة وفيها ثقبين كدا علي اليمين فوق علشان يتحط فيهم السيلفي .. وحقيقي أنا مش عاجبني خالص تصميم الشاشة .. يعني تحط شاشة IPS وكمان فيها ثقبين مش ثقب واحد .. وايه اصلا لازمة الثقب التاني بتاع الكاميرا المساعدة في عزل السيلفي .. ولا ليه لازمة اصلا منظرة وخلاص بصراحة.
كان يعجبني أكتر لو حطوا شاشة أموليد بموتور زي الـMI 9T بس نقول ايه كله عشان التجديد.
ولما نتكلم عن التجديد بقي الشاشة هنا 120 هرتز، وده رقم كبير على الفئة المتوسطة في سرعة تحديث الشاشة .. ميزة مهمة وجديدة في الفئة السعرية دي انك تشوف معدل تحديث شاشة بالرقم ده واللي هيقدملك تجربة استخدام مفيش فيها أي تقطيعات أو تهنيج من الشاشة في عرض المحتوى قدامك مهما كان سرعته ايه، وطبعا عندك اوبشن تخلي الشاشة 60 هرتز علشان توفر في البطارية .. بس السؤال اللي يطرح نفسه هل انت حاسس بتقصير في اداء الشاشة الـ 60 هرتز بتاعتك دلوقتي ؟ وحاسس ان الـ120 هرتز انت محتاجهم ؟
الشاشة سطوعها تحت الشمس متوسط مش أعلى حاجة ولكنه مقبول والشاشة ألوانها كويسة كشاشة IPS LCD ومفيش فيها مشاكل، والحواف حوالين الشاشة بردوا كويسة ولو الحافة السفلية تقل عن كدا حاجة بسيطة.
ممكن تلغي شكل الثقبين من اعدادات الموبايل باضافة شريط اسود .. والشاشة عليها حماية جوريلا الجيل الخامس والموبايل بيجي مش متركب عليه سكرينة.
من الأخر علشان مطولش عليك انا غير متقبل لفكرة الشاشة الـIPS LCD اللي فيها خرمين ديه لمجرد اني اخد 120 هرتز .. لو هتخيرني .. هختار شاشة اموليد 60 هرتز بنفس السعر زي المي 9 تي مثلًا .. او حتى شاشة 60 هرتز IPS LCD وفوقيها اضافة قوية في الكاميرات او سعر أقل زي Redmi Note 8 Pro.
الأداء :-
و هنا شاومى قررت مفيش فزلكة وحطت المعالج المفضل بتاعها في الفئة المتوسطة وهو SnapDragon 730G نفس المعالج اللي كان في الـMi 9T مع مراعاة فرق الـG .. المعالج كويس جدا هيديلك أداء ممتاز في الفئة السعرية دي، عموما مفيش جديد في الأداء عن الـMi 9T و لا حتى الريدمي Note 8 Pro اللي سعره أرخص وبيدي نفس الأداء بمعالج ميدياتيك Helio G90T.
الأداء الرسومي في K30 كويس .. لعبة ببجي شغالة على High HD وشغالة بكفاءة بدون أي مشاكل، وCall Of Duty شغالة على Very High وشغالة برده كويس جدا، وFortnite شغالة بشكل رسمي وبتشتغل على اعدادات جرافيك متوسطة.
يعني من الاخر الأداء متغيرش عن المي 9 تي والنوت 8 برو الموجودين من شاومي اصلا بنفس الاسعار ويمكن أقل، الهاتف متوفر بالصين بإصدارين بذاكرة داخلية 128 جيجا بايت مع 6 أو 8 جيجا بايت رام.
يمكنك زيادة المساحة الداخلية للهاتف عن طريق إضافة كارت ذاكرة خارجي يصل إلى 256 جيجا بايت لكن مع الاستغناء عن عن شريحة الاتصال الثانية.
عوامل حماية الامان والخصوصية :-
علشان شاومي استخدمت شاشة IPS LCD .. شاومي مقدرتش تحط البصمة في الشاشة وعلشان التجديد ومتحطهاش في الظهر زي النوت 8 برو حطتها في زرار الباور زي الـHonor 20 .. والبصمة أدائها ممتاز وسريع ومن لمسة بس الموبايل بيفتح .. يجماعة المكان ده عملي جدا عن البصمة اللي في الظهر والبصمة اللي في الشاشة.
وكمان الـFace Unlock سريع وعملي ومفيهوش اي مشاكل .. وهنا مفيش موتور هيطلع عشان يتعرف عليك لأ الموضوع بيكون سهل وسريع.
الصوت :-
صوت الموبايل جاي من سماعة واحدة تحت علي الشمال وانا معرفش الشركات ليه بقت بتحطه ف المكان القديم اللي مكنش بيعجبنا .. والصوت نفسه كويس بس مش أعلى حاجة من شاومي يعني الـNote 8 العادي صوته أعلى بفرق واضح.
صوت سماعات المكالمات عالي وممتاز وصوت سماعات الأذن عالي أوي هتحتاج توطيه بصراحة ومخرج الصوت في مدخل الـ3.5 مللي هنا ممتاز.
كما يدعم ميكروفون اضافي لإزالة الضوضاء مما يُحسن من جودة الصوت في التسجيل وتصوير الفيديو.
الدعم والاتصال :-
بالنسبة لشبكة الموبايل جربتها كتير وهي مقبولة مش وحشة وبرده مقدرش احكم على شبكة الموبايل بالسوفت الصيني لو الموبايل نزل مصر بشكل رسمي هنجرب النسخة اللي هتنزل مصر، مفيش لمبة اشعارات ولا فيه Always On Display .. وده تنازل غريب مش متعود عليه من شاومي.
بالنسبة للمستشعرات فمستشعر الضوء موجود حقيقي وشغال ومستشعر التقارب سوفت وير زي موبايلات سامسونج بس شغال كويس وصعب يعلق معاك، وطبعا مستشعر الـIR اللي متعودين عليه من شاومي موجود.
- يدعم الهاتف Wi-Fi 802.11 a/b/g/n/ ac dual band مع دعم خاصية Wi-Fi direct وامكانية فتح Hotspot.
- يدعم الهاتف بلوتوث الاصدار الخامس A2DP,LE
- يدعم الهاتف GPS مع خواص ,A-GPS GLONASS BDS ,GALILEO
- متوفر بالهاتف دعم مستشعرات الضوء والسرعة والبوصلة والقرب وكلهم بيشتغلوا كويس جدا
- يدعم الهاتف تشغيل الراديو FM
- يدعم الهاتف مستشعر الجيروسكوب حيث استخدام نظارات الواقع الافتراضي ومشاهدة فيديوهات 360 درجة
- يدعم الهاتف خاصية ال OTG واللي بيها ممكن توصل فلاشة للموبايل وتنقل الداتا
نظام التشغيل وواجهة المستخدم :-
يتم اصدار هاتف بنظام تشغيل اندرويد 10 مع واجهة مستخدم MIUI 10، وتتميز الواجهة بالعديد من الخصائص مثل خاصية البقاء على اتصال دائم بالشبكة الافتراضية Always On VPN وميزة دوز لتوفير الطاقة والتحسن في تخزين البيانات والتحسين من ذاكرة الرام.
تتميز الواجهة بامكانية Split Screen وهى قسم الشاشة الى نصفين واستخدام تطبيقين فى نفس الوقت مع ايضا امكانية تصوير الشاشة فيديو، و ايضا ميزة Dual Apps والتى تمكنك من تحميل نسختين من أى تطبيق وليس برامج التواصل الاجتماعى فقط كما يدعم الهاتف خاصية Second Space والتى تمكنك من الاحتفاظ بملفاتك الشخصية والخاصة من أى شخص غريب يمسك هاتفك أو أى طفل يلعب فى هاتفك حيث تقوم بتحديد مجموعة محددة من التطبيقات ليقوم ذلك الشخص باستخدامها.
تتميز ايقونات الهاتف بحركات Animation عند غلق التطبيقات مما يعطى شكل جميل وسلاسه في الاستخدام، ويدعم الهاتف خاصية App Lock والتى تمكنك من تشفير بعض الملفات او التطبيقات عن طريق كلمة سر، وتدعم الواجهة خاصية النقر على الشاشة مرتين لتُضئ و امكانية أخذ Screenshot مطولة مع امكانية تسجيل المكالمات.
يمكنك الاستغناء عن أزرار التحكم الثلاث واستخدام الايماءات Geastures بدلا منها، كما تدعم الواجهة اماكنية تسجيل الشاشة Screen Recording.
البطارية :-
بطارية ضخمة بسعة 4500 مللي أمبير صمدت حوالي 6 ساعات شاشة مفتوحة استخدام مكثف مع الشاشة الـ120 هرتز .. أداء كويس جدا ومقبول خصوصًا ان الشاحن المُرفق في العلبة قوي جدا.
شاحن 27 واط شحن البطارية بالكامل لحد 100% في ساعة واحدة فقط .. يعني من الاخر البطارية مش هتعطلك في الموبايل ده وهتستحمل معاك وتتشحن بسرعة ويمكن دي الميزة الوحيدة عن النوت 8 برو و المي 9 تي وهي سرعة الشحن.
الكاميرات :-
الكاميرا الخلفية رباعية، الرئيسية 64 ميجا بيكسل مع فتحة عدسة F/1.9 بمستشعر من سوني IMX 686 وده التطوير بتاع IMX586 المحترم اللي بيطلع صور حلوة والكاميرا الثانية Ultra Wide بدقة 8 ميجا بيكسل مع فتحة عدسة F/2.2 والكاميرا الثالثة 2 ميجا بيكسل مع فتحة عدسة F/2.4 للتصوير الـMacro والرابعة 2 ميجا بيكسل بفتحة عدسة F/2.4 للمساعدة في العزل.
و السيلفي العجيب الموجود في الثقبين بتوع الشاشة العدسة الرئيسية 20 ميجا بيكسل مع فتحة عدسة F/2.2 والعدسة التانية اللي ملهاش لازمة في وجهة نظري ثقب على الفاضي 2 ميجا بيكسل بفتحة عدسة F/2.4 للمساعدة في العزل.
سوفت وير الكاميرا مفيش فيه أي جديد متضاف هو نفسه المتعودين عليه من شاومي وضع الـ64 و الـNight Mode بس المميز هنا الموبايل بيصور بسرعه مفيش فيه أي تهنيج زي ما كان بيحصل في الـMI 9T بس بعد ما بتصور الصورة بيحصلها Processing أو معالجة لمدة ثانية او اتنين قبل ما يفتحها.
في التصوير في الشمس عادي أو بورتريه، الذكاء الاصطناعي بيفتح الصور زيادة عن اللزوم زي النوت 8 العادي، بس لما تجرب وضع الـ64 بقي مفيش أي لعب في الصورة بس الـHDR مش بيبقي كويس لما عملت زوم علشان اشوف فرق التفاصيل يعني وضع الـ64 ميجا بيكسل أحسن حاجة بسيطة أوي.
لما جربت وضع الـ64 ميجا بيكسل تاني مع الوضع العادي علشان اشوف فرق التفاصيل مع الزوم برده هنا الفرق مش الكبير أوي .. سيبك بقا من وضع الـ64 ميجا بيكسل ده وتعالوا نشوف تعامل الموبايل مع الألوان والورد وبصراحة شاومي في معالجة الصور مع الورد جامدة جدا بتبين حقيقة الألوان بدون أي تجميل.
بالنسبة للعدسة الماكرو الـ2 ميجا يعني أدائها مش بطال بس مش أفضل حاجة.
التصوير في اضاءة داخلية، اللعب في الألوان مش كتير ومفيش هنا تغيير في لون البشرة الصورة علي حقيقتها ودا بيعجب بعض الناس وبعض الناس لا، تجربة بقا للـNight Mode الصورة كويسة بس في بعض الـNoise بسيطة، بس بشكل عام النايت مود كويس .. وبشكل عام برده من وجه نظري الموبايل مضفش أي جديد في التصوير صبح و ليل عن وحش الكاميرا النوت 8 برو بمستشعر سامسونج الـGW1.
اما بقى بالنسبة للسيلفي فهنلاقي لون البشرة في السيلفي بيبقي سوفت أوي زيادة عن اللزوم وتحت الشمس الوضع هيبقي مقبول جدا، انما في الظل هيبدأ يبان ضعف الكاميرا في التصوير السيلفي.
في الاضاءة الداخلية تبدأ التفاصيل تقل بس يعني لو معاك اضاءة قوية هتاخد تفاصيل كويسة .. بس لو الاضاءة ضعيفة السيلفي مش هيبقي كويس، وطبعا بالليل الوضع بيبقي سيئ جدا بسبب فتحة العدسة الضيقة في السيلفي و بكده لسه شاومي مكملها في طريقها ف السيلفي اللي مش كويس أوي في الفئة المتوسطة زي Note 8 Pro و Mi 9T.
بالنسبة لتصوير الفيديوهات هو قريب جدا من Mi 9T بيصور 4K مع 30 اطار فى الثانية وبيصور بجودة 1080 بيكسل مع 30 أو 60 اطار فى الثانية وSlow Motion لحد 960 اطار فى الثانية .. وتقدر تصور فيديوهات زي الـVlogs وتعملها مونتاج زي المجودة فى Mi Note 10 و فيه تثبيت إلكتروني وجودة عزل الصوت كويسة جدا.
ممكن تشوف الصور والفيديوهات المتصورة بالموبايل في فيديو المراجعة في أخر المقالة.
محتويات صندوق الهاتف :-
- هاتف Xiaomi K30
- رأس الشاحن بقوة 27 وات
- كابل الشحن USB Type C
- دبوس معدني لفتح درج الشريحة
- كُتيب تعليمات التشغيل والضمان
- جراب شفاف لحماية ظهر الهاتف
الرأي النهائي :-
رأيي النهائي في Redmi K30 .. الموبايل ده ضاف على النوت 8 برو شاحن أسرع وشاشة 120 هرتز ومعالج سناب دراجون مكافئ لأداء الميدياتيك G90T اللي في النوت 8 برو مفيش أي اختلافات جوهرية تانية.
والـK30 بالنسبة للـMI 9T اللي هو اسمه K20 الشاشة بقت IPS بثقبين بـ120 هرتز مقابل شاشة كاملة أموليد 60 هرتز بموتور في الـMi 9T .. وأنا أُفضل هنا شاشة المي 9 تي وبرده شاحن أسرع وبطارية أكبر شوية.
مفيش أي اختلافات جوهرية تانية .. شخصيًا شايف ان ملوش لازمه تستنى الموبايل خالص .. خليك في النوت 8 برو أو المي 9 تي إلا لو انت يعني فارق معاك أوي موضوع الـ120 هرتز .. ومعتقدش الموبايل ده اصلا هينزل مصر لأن ملوش مكان في الفئة السعرية إلا لو شاومي في مصر ليها رأي تاني.
وعموما احنا في موبيزل لسه مضفناش Redmi K30 في قسم شاومي .. لأننا بنضيف الموبايلات الي أكيد 100% نازلة مصر .. ولو جالنا خبر عن نزول الموبايل ده بأسمه الحالي او أي أسم تاني هنضيفه فورا في قسم موبايلات شاومي وكمان هنجرب النسخة الي نازلة مصر مرة تانية.
سعر الهاتف :-
سعر الموبايل في الصين 250 دولار للنسخة 128 جيجا بايت و6 جيجا رام، وحوالي 270 دولار للنسخة الـ128 جيجا بايت مع 8 جيجا رام يعني بالمصري حوالي 4000 جنيه وعلى ما تجيبه من الصين لهنا هيدخله في حوالي 4500 جنيه، وينفع تركب شريحتين اتصال أو شريحة وكارت ذاكرة خارجي.
الهاتف يعتبر نسخة طبق الأقل من هاتف Xiaomi Poco X2 .
Comments