سلسلة ريدمي نوت 10 من شاومي هي سلسلة كبيرة جدًا .. بدأت بـRedmi Note 10 وبعدين Redmi Note 10 Pro .. ومؤخرًا إنضم ليهم Redmi Note 10 5G و Redmi Note 10S، النهارده هنقدملكم مراجعة Redmi Note 10S واللي نقدر نقول هو موبايل موجه للألعاب في فئته السعرية، وجاي يرخم على موبايلين بالتحديد!
التصميم :-
ريدمي نوت 10 اس موبايل خفيف وصغير .. نسخة من ريدمي نوت 10 العادي في التصميم والشكل علشان مطولش عليك في الجزئية دي.
خامات بالكامل بتيجي من البلاستيك .. وزن 178 جرام وتخانه 8.3 ملم .. موبايل فعلا لطيف جدًا في الاستخدام بايد واحدة بدون اي مشكلة.
الكاميرات مش بارزه جامد .. والجراب المرفق بيغطي البروز بالظبط ولا أكتر ولا أقل .. وخلينا نتفق على ان خلاص مبقاش في خامات زجاج في فئة الـ4 الاف جنية.
الشاشة :-
تبص على الشاشة هتلاقي نفس شاشة ريدمي نوت 10 العادي برده .. شاشة 6.43 بوصة AMOLED بجودة FHD+ بتردد 60 هرتز فقط .. ةشاومي مقدرتش تحط تردد اعلى في الفئة السعرية علشان تحافظلك على الشاشة AMOLED.
انا شايف ريدمي نوت 10 العادي 60 هيرتز وريدمي نوت 10 برو 120 هيرتز .. كنت على الأقل احب اشوف نوت 10 اس 90 هيرتز كانت هتبقى مقبولة اكتر .. بس ارجع واقولك فرق السعر مش كبير بين العادي والـS.
الشاشة سطوعها حلو وألوانها ممتازة .. قارنتها بـRealme 8 اللي أغلى من أعلى نسخة بحوالي 500 جنية .. ومع ذلك لاقيت شاشة نوت 10 اس متقلش أي حاجه عن ريلمي 8!
بس في ملحوظة .. شاشة نوت 10 اس بتعمل Over Sharpening تلقائي كده في الفيديوهات ومش هتعرف تقفله .. هي حاجة عادية ممكن متاخدش بالك منها.
وأخيرًا الشاشة فيها Anti Flicker وده اوبشن لطيف جدًا ومش موجود في ريدمي نوت 10 العادي.
الأداء :-
ندخل على الأداء .. وده الفرق الجوهري بين نوت 10 العادي ونوت 10 اس .. معالج Helio G95 بتكنولوجيا 12 نانو .. وبالصدفة قدمنالكم مؤخرًا مراجعة Realme 8 اللي بيجي بنفس المعالج.
المعالج ده أقوى بفرق ملحوظ عن سناب دراجون 678 اللي موجود في ريدمي نوت 10 .. في الأداء العادي وفي الألعاب.
الموبايل ده كان ناقصه يبقى بتردد اعلى من كده .. 90 هيرتز مثلًا على الاقل علشان تحس انه ناعم .. هو سريع بس مش ناعم كفاية.
ولكن اللي يحسب له انه الوحيد اللي جربته مؤخرا ولاقيت ببجي بتشتغل على HDR Ultra .. جودة مفتوحه عادي في اللعبة .. وكول اوف ديوتي على Very High جرافيك .. تجربة الألعاب كويسة جدا مع الشاشة الـAMOLED والصوت Stereo.
ولكن في نقطة .. الموبايل بيسخن بسرعه .. والسخونية ملحوظة في جسم الموبايل واحب اقولك ان الجهاز ده أكتر جهاز فيه ميدياتيك Helio G95 بيسخن .. بيسحن اكتر من ريلمي 8 واكتر من Infinix Note 10 Pro.
عوامل الأمان وعناصر اخرى :-
البصمة على زرار الباور .. سريعة كويسة بس في تجميع بسيط بيحصل في ايقونات الواجهة كالعادة .. والـFace Unlock معقول جدا جدا.
الموبايل ده نازل بسوفت وير شاومي الجديد MIUI 12.5 اللي المفروض ادارة الرام فيه أحسن ولكني محستش ده .. التطبيقات كانت بتقفل عادي وبسرعة مع العلم اني بجرب النسخة الـ128 جيجا مع 6 جيجا رام.
ستارة الإشعارات اتعدلت .. لما تسحبها للاخر تحت هتلاقي في Scroll داخلي عشان تسحب في ايقونات الستارة ويفضل شريط السطوع ظاهر.
كل أصوات الواجهة اتغيرت لأصوات الطبيعة .. في الأول هتحس انها غريبة ولكنا لما تتعود عليها هتحبها .. الموبايل مفيهوش NFC للأسف الشديد ومعرفش ليه الحقيقة.
أما Animations الجهاز حسيت انها احسن شوية .. بس الجهاز هنا جاي بـ60 هيرتز فمقدرش أحكم لان الـ60 هيرتز اساسًا قليلين وبيحسسوني اني ماشي بموبايل مش سريع.
فا الأفضل نحكم أكتر على MIUI 12 من ناحية الـAnimations والتقل على موبايل 120 هيرتز .. والموبايل فيه Second Space زي نوت 10 برو على عكس نوت 10 .. ودي حاجه كويسة جدًا.
الموبايل فيه Always On Display .. بتقعد شوية وتختفي، لو عايز تخليها تقعد وقت أكتر شوف فيديو أسرار شاومي اللي هسيبهولك في نهاية المقال، وضحنا فيه الطريقة دي.
مستشعر التقارب لما جربته لاقيته بيتأخر شوية في فتح الشاشة مش قفلها .. فا ممكن اتقبله لان الأزمة بتحصل لما الشاشة تفتح على ودنك .. مش لما تيجي تشيل الموبايل والشاشة متفتحش .. ولكن برده ده مش أدق مستشعر.
بالنسبة للشبكات بقى فا الـWiFi كويس جدًا .. شبكات الإتصال زيه زي نوت 10 برو .. ممكن حد يتصل عليك والموبايل موجود عادي ويقوله غير متاح .. تمسك الموبايل تنوره بس الشبكة تيجي .. اعتقد لو معاك موبايل من شاومي هتبقى عارف الحركة دي كويس.
البطارية :-
البطارية بحجم 5000 مللي أمبير .. ادائها كويس ادتني حوالي 7 ~ 8 ساعات شاشة مفتوحة .. وقت إستخدام معقول أوي مع المعالج اللي المفروض بيستهلك البطارية جامد ومش موفر.
الشاحن المرفق مع الموبايل 33 وات .. بيشحن البطارية في ساعه .. وقت شحن عظيم جدًا.
الكاميرات :-
كاميرا خلفية 64 ميجا بيكسل فتحة عدسة F/1.8 والتانية 8 ميجا بيكسل تصوير واسع والتالتة ماكرو والرابعة عزل .. والسيلفي 13 ميجا بيكسل مع فتحة عدسة F/2.5.
للوهلة الأولى هتفتكر ان الكاميرات أحسن بكتير من ريدمي نوت 10 العادي .. عشان يعني الـ10S بكاميرا 64 ميجا بيكسل انما نوت 10 العادي بدقة 48 ميجا بيكسل بس.
ولكن اللي اقدر أقولك عليه ان معالجة كوالكم والمستشعر الـ48 ميجا بيكسل بتوع النوت 10 العادي ممتازين عكس الـHelio G95 اللي معالجة الصور فيه مش لذيذة والمستشعر الـ64 ميجا بيكسل مش فارد عضلاته.
معظم الصور اللي عجبتني أكتر هي صور نوت 10 العادي في أسلوب المعالجة بس الفرق مش رهيب .. انما المكسب الوحيد اللي هتاخده من نوت 10S هو الـNight Mode اللي أفضل شوية في التفاصيل .. وبرده الفرق مش رهيب.
مين جاي بنفس المعالج ونفس الكاميرا الـ64 ميجا بيكسل ؟ ايوة هو ريلمي 8 برغم انه اغلى 500 جنية بس برده كان لازم أقارن بينهم .. وفعلًا معظم الصور اسلوب المعالجة والتفاصيل فيها أفضل شوية في ريلمي 8 عن نوت 10 اس .. ولكن الفرق مش جوهري برده .. الفرق الجوهري فعلًا في الـNight Mode الأفضل بفرق واضح في ريلمي 8.
كاميرا ريدمي نوت 10 اس هي كاميرا مقبولة جدًا تحت الـ4000 جنية .. اما النسخ اللي كسرت حاجز الـ4 الاف مش هتكون الأفضل خالص في سعرها.
السيلفي في ريدمي نوت 10 اس مفرقش كتير عن نوت 10 العادي إلا ان بعض كان في تفوق في نوت 10 العادي عن الـS في المعالجة .. وبرده لسه مفيش Night Mode في السيلفي.
لكن لما نقارن سيلفي نوت 10 اس مع ريلمي 8 فا هنلاقي ان سيلفي ريلمي 8 أحسن بمراحل من نوت 10 اس .. كان نفسي السيلفي يكون فيه تحسن واضح عن نوت 10 العادي.
بالنسبة بقى لتصوير الفيديوهات فالموبايل بيدعم تصوير فيديوهات بجودة 4K مع 30 فريم لكن مفيش مثبت إلكتروني .. الـ1080p مع 30 فريم فيه مثبت إلكتروني، وفي طبعًا ميكروفون اضافي لعزل الضوضاء.
تجربة التصوير بالموبايل ومقارنة بالمنافسين في فيديو المراجعة في بداية المقال !
سعر Redmi Note 10S :-
موبايل Xiaomi Redmi Note 10S بيتقدم في مصر بـ3 نسخ :-
- مساحة تخزين 64 جيجا مع 6 جيجا رام بسعر 3600 جنية
- مساحة تخزين 128 جيجا مع 6 جيجا رام بسعر 3900 جنية
- مساحة تخزين 128 جيجا مع 8 جيجا رام بسعر 4200 جنية
والموبايل بيدعم تركيب شريحتين إتصال 4G وبيدعم كارت ميموري 512 جيجا في نفس الوقت !
الرأي النهائي :-
مميزات Redmi Note 10S :-
- أداء ممتاز جدًا خاصًة في الألعاب
- شاشة AMOLED ممتازة
- بطارية كبيرة وشحن سريع
- مميزات في السوفت وير
Anti Flicker
Second Space - صوت Stereo
عيوب Redmi Note 10S :-
- السخونية المعتادة من المعالج ده
- سيلفي أداءه متواضع جدًا
- مفيش مستشعر NFC
- تصوير الفيديوهات مش الأفضل
- شاشة 60 هيرتز فقط، مش 90 هيرتز
الفرق بينه وبين نوت 10 حوالي 200 جنية في مقابل أداء أفضل ومميزات كتير تانيه .. والفرق بينه وبين ريلمي 8 كبير في السعر فا يعتبر قيمة ممتازة، وهو أفضل خيار متاح من شاومي تحت الـ4 الاف جنية .. لكن لو مش هامك الشاشة الـAMOLED ممكن تلاقي خيارات تانيه زي Poco X3 NFC و Poco X3 Pro.
Comments