وأخيرًا مُراجعة الموبايل اللي كلكم مستنينه .. موبايل Redmi Note 9 العادي .. جربنا الموبايل فترة .. وكان معانا في فترة التجربة موبايل Redmi Note 8 القديم علشان نقدر نحكم حكم نهائي على الموبايل ده .. ونشوف شاومي بتقدم موبايل جديد بمواصفات أفضل من القديم ولا ؟ .. وهل الموبايل مليان عيوب ولا ؟
التصميم :-
موبايل Note 9 العادي جاي بتصميم ظهر بلاستيكي بالكامل .. وده أول تنازل في الموبايل .. لأن النوت 8 القديم كان جاي بظهر زُجاجي فخم جدًا .. شاومي من الأخر بتقول لو عايز تصميم زُجاجي زود شوية و اشتري للـRedmi Note 9S.
بس علشان شاومي تلحق نفسها .. خلت تصميم الظهر هنا مُختلف عن الأجيال القديمة و واخد نفس رصة الكاميرا الخلفية الرُباعية الشيك اللي موجودة في الجيل الجديد زي اللي شوفناها في Note 9S, 9 Pro .. واللي بالمناسبة في بعض المُستخدمين إشتكوا من دخول تُراب في عدسة الكاميرات.
مشكلة التراب جوا العدسات ديه محصلتش معايا في الـ3 موبايلات اللي من سلسلة Note 9 اللي بنجربهم .. فهل ده سوء استخدام منهم ولا الموبايل ده محتاج فعلًا جراب يغطي الكاميرات بالكامل علشان تحافظ عليه ؟
بس المُختلف هنا مكان البصمة الموجود تحت مربع الكاميرات .. وللأسف البصمة هنا مش غاطسة جوا جسم الموبايل ولا ليها مكان لوحدها في الجراب .. الجراب فيه فتحه كبيرة اوي للكاميرات ولمكان البصمة كله.
هتاخد وقت على ما تعرف تحط صباعك من اول مرة علشان تفتح الموبايل .. انا شخصيًا لحد دلوقتي معرفتش اتعود .. حقيقي الموضوع ده ضايقني جدا .. وبالمناسبة الجراب بيغطي بروز الكاميرا الخلفية.
بالنسبة للوزن فالموبايل ده وزنه 199 جرام وتخانه 9 مللي .. الموبايل كبير نسبيًا في الإيد بسبب استخدام شاشة كبيرة.
الشاشة :-
شاشة كبيرة بحجم 6.53 بوصة من نوع IPS LCD بدقة FHD+ وفيها ثُقب للسيلفي على الشمال .. وخليني أتفق معاك على إتفاق .. وجود شاشة FHD+ واخده شكل الثقب الجديد في الفئة السعرية اللي تحت 3000 جنية لازم نعتبرها ميزة.
المُهم .. موضوع الشاشة الـFHD+ بالنسبة لشاومي مش جديد لإن الـNote 8 كان بشاشة FHD+ برده .. بس الجديد هنا شكل الشاشة وتصميمها الأحدث بثقب وكمان حجمها أكبر.
نوع الشاشة هنا مُختلف عن شاشة Note 9S وNote 9 Pro .. جودة او Quality الشاشة هنا أقل منهم .. وده طبيعي علشان الفئة السعرية.
وبرده نوع الشاشة هنا مختلف عن شاشة الـNote 8 .. أتوقع ميظهرش فيها مشاكل بعد فترة من الإستخدام .. وده مجرد توقع من طريقة السوفت وير اللي بتحاول دايمًا إنك متوصلش لأعلى درجات سطوع للشاشة علشان ميحصلش تطبيع .. واما نشوف.
بالنسبة للثُقب بتاع السيلفي .. فأنا مش عارف الحكايات اللي طالعة على الـShadow والكلام ده .. باختصار اي ثُقب في شاشة من نوع IPS هتلاقي ليه Shadow او ظل خفيف .. ده فيه بعض الموبايلات الـNotch كمان بيبقا ليه ظل .. والموضوع ده مش مؤثر خالص.
درجة سطوع الشاشة مقبوله .. مش أعلى حاجة ومش أوطى حاجة .. وده برده طبيعي في الفئة السعرية بتاعت الموبايل .. والشاشة عليها حماية Corning Gorilla Glass الجيل الخامس وكمان جاي متركب عليها سكرينه من العلبه.
الأداء :-
الموبايل جاي بمعالج ميدياتيك Helio G85 بمعمارية 12 نانو .. الموبايل محقق رقم كويس على منصة اختبار الاداء Antutu .. بس النسخة اللي كنت بجربها 3 جيجا رام .. حسيت إن الموبايل اداءه بطيء شوية .. خصوصًا ان نوع الذاكرة الداخلية هنا eMMC مش UFS 2.1 .. وده اكيد له عامل في الأداء المحدود من الموبايل ده.
الموبايل وصله تحديثين لحد دلوقتي .. حسنوا كتير من تجربة الموبايل خصوصًا الألعاب .. اللي كانت بتهنج قبل اخر تحديث .. بس دلوقتي مظبوطة.
أنصحك لو هتشتري الموبايل ده تقفل Animations الواجهة ( اعمل بحث في اعدادات الموبايل عن Remove Animation ) .. علشان تقطيع الـAnimations هنا كبير شوية .. والواجهة اصلًا بتاعت شاومي بقت تقيلة نسبيًا .. والمعالج ونوع الذاكرة اللي هنا هيحسسوك أكتر انها اتقل واتقل.
بالنسبة للأداء الرسومي .. ببجي بتشتغل على High HD .. التجربة بتبقى مقبولة .. اة ممكن تحس ان الـFrames مش كتير ومش مُستقرة اوي بس هتقدر تلعب بشكل طبيعي.
وكول اوف ديوتي للأسف شغالة على اعدادات جرافيك Medium .. علشان المعالج مش مدعوم من اللعبة وعمومًا الأداء في اللعبة كويس .. وأكيد فورت نايت مش شغالة بشكل رسمي.
ولو رجعت لمُراجعتنا القديمة اللي فيها معالجات G80 وG70 هتلاقينا بنقول ان المعالج ده بيسخن شوية مع الألعاب .. وده الطبيعي بتاعه.
ومن الأخر كدا .. الأداء هنا معقول على موبايل أقل من 3000 جنية .. بس مش نقلة نوعية مقارنتًا بالموبايلات الموجودة بالفعل في السوق.
عوامل الأمان وعناصر اخرى :-
بعد ما عرفتك مُشكلتي مع مكان البصمة .. بس لو وصلت ليها بصباعك هتفتح بسرعة من غير اي مشاكل.
والـFace Unlock كمان سرعته مقبوله .. بس تحسه بيتاخر شوية بسبب الواجهة.
الموبايل اكيد فيه Dark Mode وفيه عمل نُسختين من كل البرامج .. ديه اساسيات في واجهة شاومي.
بس اللي مش لاقيله تفسير، لمبة الإشعارات اللي اتشالت من الموبايل ده .. كانت موجودة في الـNote 8 وفي الـNote 9S والـNote 9 Pro .. هي جت على ده يا شاومي ؟
الموبايل فيه مستشعر الـIR Blaster وفيه مايكروفون إضافي .. مفيش تنازلات هنا .. والمُستشعرات بتاعت الموبايل شغالة كلها تمام .. ومُستشعر التقارب بتاع المكالمات شغال كويس جدًا مش بيعلق وللاسف برده مفيش تسجيل مكالمات.
صوت الموبايل جاي من سماعة واحدة تحت على اليمين .. الصوت كويس لو هتقارنه بالمنافسين بس مقارنتًا بالـNote 8 القديم فالصوت أقل بفرق ملحوظ.
وصوت سماعات المكالمات عالي ومُمتاز وصوت سماعات الأذن كويس جدًا.
بالنسبة للشبكة .. شبكة الموبايل هنا مش بتسقط ومُستقرة جدا .. بس يمكن يكون المدى بتاعها مش قوي اوي .. يعني اديها 7 من 10 مثلًا .. ومعتقدش انها هتتسبب في مشكلة معاك.
وبالمناسبة قوة الشبكة مش بعدد الشرط اللي ظهرالك فوق .. لا هي بالتجربة الفعلية مكالمات وMobile Data في الأمكان اللي تغطيتها ضعيفة.
قوة الـWiFi في الـNote 9 ده فيها تحسن كبير عن الـNote 8 .. بس برده ده مش اقوى WiFi في الفئة السعرية ديه.
البطارية :-
الموبايل جاي ببطارية كبيرة حجمها 5020 مللي أمبير .. بطارية ضخمة وبتترجم لأداء مُحترم حوالي 9 ساعات شاشة مفتوحة .. يمكن اداءها يكون احسن من بطارية الـNote 9S كمان.
الموبايل المفروض بيدعم شحن سريع 18 واط ومعاه شاحن 22.5 واط .. فانا قولت هيشحن زي الـNote 9S بسرعه بقى في ساعتين إلا رُبع .. لا للأسف شحن في اكتر من ساعتين ونص .. وجربت زمن الشحن أكتر من مرة وبرده نفس النتيجة .. هل ده بسبب المعالج الميدياتيك مثلا ؟!
والموبايل كمان بيدعم الشحن العكسي ( تقدر تشحن موبايل تاني عن طريق الموبايل ده ) بقوة 9 واط عن طريق وصلة OTG الي الموبايل بيدعمها.
الكاميرات :-
الموبايل جاي بـ4 كاميرات في الظهر .. الأساسية 48 ميجا بيكسل بفتحة عدسة F/1.8، والعدسة التانية 8 ميجا بيكسل للتصوير الواسع فتحة عدسة F/2.2 .. والتالتة 2 ميجا بيكسل ماكرو والاخيرة 2 ميجا بيكسل للعزل.
والسيلفي هنا بيجي بدقة 13 ميجا بيكسل مع فتحة عدسة F/2.3 .. وهو موجوده في ثُقب في أعلى يسار الشاشة.
للأسف ملاقيتش نسخة Google Camera شغالة كويس على الموبايل ده بسبب ان المعالج ميدياتيك .. ومعرفش لسه هيظهرله نسخه ولا لأ .. فإعتمادي كان على سوفت وير الكاميرا بتاع شاومي في التجربة.
الكاميرا بصراحة أدائها مُرضي جدا .. يعني هي قدمت المُتوقع منها .. مُعالجة الصور بقت احسن كتير من الـNote 8 القديم .. التفاصيل مظبوطة .. الألوان مظبوطة مش مصفرة زي ما كان الـNote 8 بيعمل.
العدسات الـWide Angle والـMacro اللي هنا مفيهاش جديد .. تقليدية جدًا .. مفيهاش عنصر ابهار.
وعلشان نقدملك تجربة واقعية فعلًا للكاميرا، فا احنا هنقارن الكاميرا بالـNote 8 القديم علشان نشوف التطوير .. وهنقارنه كمان بالـNote 9S اللي جاي بكاميرا زيه بدقة 48 ميجا بيكسل.
نبدأ بالـNote 8 .. وهتلاحظ فرق مُعالجة الألوان اللي واضح جدًا انها احسن في الـNote 9 .. وكمان الصور مش بتصفر كدا زي ما كان الـNote 8 بيعمل .. وكمان في تحسن واضح في معالجة الـNight Mode للصور.
اما مع الـNote 9S فهتلاقي تفوق واضح لكاميرا الـNote 9S الخلفية .. واللي مش معنى انها 48 ميجا بيكسل إنها هتديلك نفس الكفاءة .. في عوامل تانية كتيره مختلفة خلت الـ9S أفضل بكتير من ناحية الكاميرات.
بالنسبة للكاميرا السيلفي بقى فا السيلفي محصلوش تطوير كبير عن الـNote 8 القديم وهو مش مُميز خالص .. بيطلع صور عادية جدًا .. الي حدٍ ما ألوانها بهتانة ولون البشرة مش مظبوط .. ومع الإضاءات الداخلية والضعيفة هتلاقي التفاصيل مش حلوة.
مقارنتًا مع الـNote 8 مش هتلاقي اي فرق محسوس كبير بين سيلفي الموبايلين .. واصلًا سيلفي الـNote 8 مكنش حلو .. كلكم عارفين.
اما مُقارنتًا مع سيلفي الـNote 9S .. فالـ9S في حته لوحده خالص وافضل بكتير.
بالنسبة لتصوير الفيديوهات بموبايل Redmi Note 9 .. فهو بيصور فيديوهات بجودة 1080p .. مفيش للأسف تصوير فيديوهات 4K زي النوت 8 .. وكمان الثبات الالكتروني مش كويس وهتحس بهزة في تصوير الفيديوهات مع الحركة.
تجربة الكاميرات الكامله موجوده في فيديو المراجعة تقدر تشوفه في اخر المقاله.
سعر الموبايل :-
الموبايل بيجي في السوق المصري بنسختين وأسعارهم الرسمية :-
- النسخة الأولى بمساحة تخزين 64 جيجا مع 3 جيجا رام بسعر 2777 جنية
- النسخة الثانيه بمساحة تخزين 128 جيجا مع 4 جيجا رام بسعر 3099 جنية
وطبعًا بينفع تركب كارت ميموري بحجم 512 جيجا مع شريحتين إتصال في نفس الوقت.
الرأي النهائي :-
مميزات Redmi Note 9 مُقارنتًا بالمُنافسين :-
- كاميرا قوية
- شاشة FHD+ بثقب في الشاشة
- بطارية قوية جدًا
- شكل تصميم جديد
- مستشعر الـIR مع مايكروفون إضافي
عيوب Redmi Note 9 مُقارنتًا بالمُنافسين :-
- كاميرا سيلفي مش حلوة
- مفيش دعم لجوجل كاميرا
- الشاحن مش سريع
نقاط تفوق Note 8 القديم على Note 9 :-
- الخامات الخارجية الزُجاجيه الأفخم
- لمبة الإشعارات
- صوت مُجسم عالي جدًا
- تصوير الفيديوهات بجودة 4K
وبإختصار، موبايل Redmi Note 9 العادي موبايل كويس تحت الـ3000 جنية .. بس لو زودت فلوس شوية واشتريت الـNote 9S هتاخد تجربة كاميرات وأداء وشاشة وخامات وسرعة شحن افضل بفرق واضح.
اما بالنسبة للأعطال والشكاوي اللي بتظهر .. فحقيقي احنا في موبيزل اي حاجة بتظهر معانا بنقولها علاطول في المراجعات .. ااحنا جربنا 3 موبايلات مُختلفين Note 8 قبل كدا ومظهرش فيهم حاجة .. وبنجرب دلوقتي الـ3 موبايلات من سلسلة Note 9 الجديدة .. وعمومًا لو ظهر فيهم حاجة هنبلغكم علاطول.
مراجعة الـ Redmi Note 9 Pro :-
بالنسبة للي بيسألوا عن مراجعة Redmi Note 9 Pro .. فالموبايل ده نسخة طبق الأصل من Note 9S .. ممكن ترجع لـ مراجعة Note 9S وتشوفها.
الفرق بس ان الـNote 9 Pro احسن شوية في الكاميرا الخلفيه في الـNight Mode والبطارية بتشحن أسرع في حوالي ساعة وربع وبيدعم الـNFC وأقل نسخة 6 جيجا رام مع إستقرار أكتر في الواجهة .. ده المُلخص كده، والمراجعة بتاعت نوت 9 برو قريب جدا خلال أيام معدودة.
Comments