مقارنة بين Oppo Reno 2 و Honor 20 Pro – حيرة المعالج الرائد والشاشة الأموليد !

استنينا نعرف تسعير Oppo Reno 2 علشان نعملكم له مراجعة و علشان كلام كتير اتقال عليه قولنا نحط الرينو 2 جنب واحد من أفضل الموبايلات اللي انتوا شايفينها بنفس سعره و هو Honor 20 Pro , علشان تقدر تعرف فعلا سعر الـ Reno 2 مبالغ فيه ولا لا ؟

وكمان هل الكاميرات الخاصة بهاتف Reno 2 تقدر تنافس كاميرات الـ Honor 20 Pro اللي الكاميرات بتاعته مصنفه من أحسن 10 كاميرات في العالم ؟

التصميم :-

الفئة السعرية بتاعة 10 الاف جنية أكيد هتلاقي تصميمات محترمة جدا و شيك جدا.

الرينو 2 الظهر من الزجاج بحماية من جوريلا الجيل الخامس وكمان الاطار من الألمونيوم.

والاونر 20 برو بردوا تصميم الظهر من الزجاج و الفريم من الألومنيوم و مفيش اعلان رسمي عن طبقة الحماية عليه بس هو عليه اكيد طبقة حماية بردة.

بالنسبة بقي للشياكة و مين التصميم الأحلى دي مش هقدر احكم فيها لأني واقع قدام أحلى تصميمين شوفتهم الفترة الأخيرة علشان كده انت اختار المناسب ليك.

بس في بعض الحاجات بتخليني محتار ما بينهم أول حاجة هي بروز الكاميرات الكبير في الاونر 20 برو و دي حاجة ممكن تقفلك شوية من التصميم و ليه اشتريته و اسيب الرينو 2 اللي تصميم الكاميرات مدفون جوا الظهر ومفيش أي بروز.

بالرغم من أن الموبايلين بيجي معاهم جراب فاكيد بروز الكاميرا مش من الحاجات اللي هتضايقك جامد بس بصراحة الجراب الجلد اللي جاي مع الرينو 2 أشيك و أجمد و خامة نظيفة أوي أحسن من الجراب الشفاف اللي جاي مع الاونر 20 برو.

بالنسبة للمسكة في الايد فهاتف Honor 20 Pro من أجمد الموبايلات في المسكة في الايد لأن حجم شاشته صغير و أقصر من الرينو 2.

اخر جزئية في التصميم هي اسلايدر السيلفي الموجود في موبايل اوبو و اللي يعتبر تكلفة زيادة في الرينو 2 وهي من أحد أسباب رفع سعره و اللي طبعا بتخلي الشاشة كاملة وبتقدم شكل جميل للموبايل.

اختبرنا اسلايدر السيلفي قبل كدا وقولنا عليه أنه متين ومفيش فيه أي مشاكل و كل دا بقي مش موجودة في الهونر 20 برو اللي اكتفوا أنهم يحطوا السيلفي في خرم أو ثقب في الشاشة.

الشاشة :-

وهنا Oppo Reno 2 اكتسح بشاشة سوبر أموليد بحجم 6.5 بوصة بدقة Full HD Plus بجودة 1080*2400 بيكسل مع 401 بيكسل لكل بوصة و أبعاد 20:9 و كمان بدون أي نوتش أو خرم في الشاشة و عليها حماية جوريلا الجيل السادس وعليها اسكرينة للحماية.

انما ال 20 برو للأسف شاشته IPS LCD بحجم 6.24 بوصة بدقة Full HD Plus بجودة 1080*2340 بيكسل مع كثافة بيكسلات 412 بيكسل لكل بوصة بأبعاد 19:9 و لا يوجد أى كلام رسمى عن حماية الشاشة و لكن قامت الشركة بتركيب سكرينة بلاستيك للحماية على الشاشة مسبقا و لسه شركة HONOR بتستخدم ال Punch hole و هى مناسبة للأشخاص اللى مش بيحبوا شكل النوتش و خايفين من فكرة موتور الكاميرا السيلفي Pop up و يمكنك الغائه من الاعدادات و يظهر ربدلا منه شريط أسود و تظهر الاشعارات بجانب ال Hole.

الحواف حول الشاشة أقل في الـ Reno 2 و اللي يعتبر واحد من أفضل الموبايلات من ناحية نسبة استحواذ الشاشة من جسم الجهاز.
عموما فرق الألوان واضح وصريح بين الموبايلين ,الرينو 2 يتفوق بشاشته الأموليد وتشبعها للألوان الأكتر و اللي بيظهر جدا في تشغيل فيديوهات فيها ألوان بين الموبايلين.

السطوع تحت الشمس كويس في الموبايلين بس الرينو 2 أعلى بفرق بسيط لو هيكونوا جمب بعض.

الاداء :-

هاتف اوبو رينو 2 بمعالج Snapdgragon 730G وده معالج فئة متوسطة عليا بتكنولوجيا 8 نانو تردده بيوصل لحد 2.2 جيجا هرتز … انما موبايل Honor 20 Pro بمعالج هواوي الرائد كيرن 980 بتكونولوجيا 7 نانو و اللي بيتحط في موبايلات فلاج شيب غالية و تردده بيوصل لـ 2.6 جيجا هرتز.

بص من الاخر كدا صعب جدا تحس ان واحد من الموبايلات دي هيقصر معاك في الاستخدام العادي الاتنين ممتازين و أدائهم حلو جدا جدا.

بس لما حطيت الاونر 20 برو جمب الرينو 2 , فرق المعالج ظهر معايا في سرعة فتح البرامج اللي كان أسرع بفرق بسيط جدا في الاونر 20 برو.

ولما ندخل ع الأداء الرسومي هنلاقي موبايل Honor 20 Pro بمعالج Mali-G76 MP10 يتفوق في أنه بيشغل أي لعبة علي أعلى اعدادات جرافيك يعني PUBG بيشغلها علي Ultra HDR اللي هو مفيش أحسن من كدا انما الرينو 2 بيشغلها على High HD بس بمعالج Adreno 618.

و Fortenite بتشتغل على EPIC اللي هي أعلى اعدادات جرافيك في الاونر 20 برو انما في اوبو رينو 2 بيشغلها على اعدادات جرافيك متوسطة و ده بيعكس الفرق في قوة المعالج الرسومي في الموبايلين.

بس خلي بالك قبل ما انسى ان شاشة الرينو 2 الأموليد تجربتها في الألعاب أحلى و ألوانها أحلى من الاونر 20 برو اللي بيقدملك أداء أعلى بس مش بنفس جودة ألوان شاشة الرينو.

عوامل الامان و حماية الخصوصية :-

الرينو 2 مع بصمة مدمجة بالشاشة سريعة جدا و مفيش فيها أي مشاكل … بس أنا شخصيا حبيت أكتر بصمة Honor 20 Pro المدمجة بزر الـ Power أنا حسيت أنها عملية و مريحة أكثر.

الـ Face Unlock سريع وممتاز في الموبايلين برغم ان الرينو الاسلايدر بيطلع علشان يتعرف علي وشك الا أنه سريع جدا و قدر يبقا بنفس سرعة الـ Honor 20 Pro.

الصوت :-

صوت الرينو 2 أعلى و تفاصيله أكتر عن الاونر 20 برو.

أما بالنسبة لصوت سماعات المكالمات بردوا أعلى وأفضل في الرينو 2.

وبالنسبة لسماعات الاذن فللأسف الاونر 20 برو مفيش فيه مدخل 3.5 ملم لسماعات الأذُن و الاتنين هيطلعوا صوت محترم لو حطيت ليهم سماعة نظيفة و كويسة.

خواص أخري :-

الرينو 2 مفيش فيه لمبة اشعارات لكن فيه خاصية Screen off clock بتشتغل على الشاشة الاموليد وبتعرض الساعة و نسبة البطارية و لو جالك مكالمة أو رسالة هيظهرلك ايقوناتهم علي الشاشة المطفية و بقية البرامج لا .. ايقوناتهم مبتظهرش.

الاونر 20 برو مفيهوش الميزة ديه بس فيه لمبة اشعارات صغيرة أوي كدا و نورها ضعيف شوية بس أحسن من مفيش.

هاتف الـ Honor 20 Pro يتفوق في أكثر من حاجة تانية زي مستشعر الضوء و التقارب اللى موجودين حقيقين في الاونر 20 برو و شغالين بكفاءة بدون أي تهنيجات سخيفة.

انما الرينو 2 مفيش فيه مستشعرات حقيقية بيعتمد علي ذكاء السوفت وير و اللي بنسبة 90% كان بيقوم بدوره مظبوط بس ساعات بردوا كان بيهيس و ممكن ميقفلش الشاشة علي ودنك و انت بتعمل مكالمة.

واخيرا بالنسبة لقوة الشبكة , الشبكة ممتازة وقوية في الموبايلين مفيش موبايل فيهم فيه أى مشاكل في الشبكة.

البطارية :-

الاتنين بطاريتهم 4000 مللي أمبير و الاتنين بيتسحملوا متوسط 6 أو 7 ساعات شاشة مفتوحة في استخدام متوسط لمدة يوم.

الرينو 2 معاه شاحن 20 واط و الاونر 20 برو معاه شاحن فائق السرعة 22.5 واط.

سيبك من الارقام دي الاتنين بيشحنوا البطارية بالكامل لحد 100% في ساعة ونص ويمكن أقل كمان و بكده الاتنين ممتازين و زي بعض في نقطة البطارية.

الكاميرات :-

الرينو 2 بـ 4 كاميرات الأساسية 48 ميجا بيكسل مع فتحة عدسة 1.7 و فيها مثبت بصري و الثانية 13 ميجا بيكسل مع فتحة عدسة 2.4 لل Zoom و الثالثة 8 ميجا بيكسل مع فتحة عدسة 2.2 للتصوير الواسع Ultrawide و الأخيرة 2 ميجا بيكسل Mono ملهاش لازمة.

انما الـ 20 برو اربع كاميرات بردوا الأساسية 48 ميجا بيكسل مع فتحة عدسة 1.4 و بتدعم مثبت بصري والثانية 8 ميجا بيكسل مع فتحة عدسة 2.4 للـ Zoom و كمان فيها مثبت بصري والثالثة 16 ميجا بيكسل مع فتحة عدسة 2.2 للتصوير الواسع Ultrawide و الأخيرة 2 ميجا بيكسل للتصوير ال Macro.

و السيلفي في الرينو 2 موجود في اسلايدر بجودة 16 ميجا بيكسل مع فتحة عدسة 2.0 وكمان فيه فلاش.

و الاونر 20 برو سيلفي 32 ميجا بيكسل مع فتحة عدسة 2.0 موجود في خرم الشاشة.

قبل ما انسى الرينو 2 بيدعم جوجل كاميرا و اللي بتطلع نتايج ممتازة انما ال 20 برو ملقتش جوجل كاميرا مناسبة.

بعد ما صورنا كتير بالموبايلين من الاخر الاوبو رينو 2 افضل في نتائج الصور بالكاميرا الخلفية في الاضاءات العالية انما مع انخفاض اضاءة يتفوق الاونر 20 برو بالنايت مود المذهل الخاص بيه وفتحة العدسة الواسعة.

بالنسبة للسيلفي فالوضع معكس الاونر 20 برو يتفوق في الاضاءات المرتفعة انما مع انخفاض الاضاءة يتفوق الاوبو رينو 2.

تقدر تشوف الصور المتصورة بالموبايل وكمان عينات الفيديوهات من فيديو المقارنة في اخر المقالة.

أسعار الهواتف :-

هاتف Reno 2
سعره 9600 جنيه مصري للنسخة 256 جيجا مع 8 جيجا رام وينفع تركب شريحتين اتصال أو شريحة وكارت.

هاتف Honor 20 Pro
سعره دلوقتي وصل لحوالي 9700 جنيه مصري للنسخة 256 جيجا مع 8 جيجا رام وينفع تركب شريحتين اتصال ومينفعش تركب كارت ميموري.

الموبايلين بيجي معاهم سماعات في العلبة و كمان جراب وبيجوا في العلبة متركب على الشاشات سكرينة ومعاهم شواحن سريعة بوصلاتهم.

رأيي موبيزل النهائي :-

الاتنين يعتبروا نفس السعر لنفس المساحة والرام … و اللي واضح جدا تفوق الاوبو رينو 2 في الشاشة الأموليد الكاملة و مدخل السماعات الـ 3.5 ملم وان مفيش بروز كاميرات والصوت اعلى.

انما الـ Honor 20 Pro يتفوق في انه بمعالج رائد بيقدم اداء افضل على المدى البعيد وكمان فيه مستشعر تقارب حقيقي الي بيقفل الشاشة على ودنك وانت بتعمل مكالمة واخيرا بدون فكرة اسلايدر السيلفي لو خايف منها.

و الكاميرات انت تقرر مين احسن من وجه نظرم .. لما تشوف الصور فى مراجعتنا على الـ YouTube في أخر المقالة.

اقرأ أيضا .. مراجعة Oppo Reno 2F .

فيديو المقارنة على اليوتيوب :-