مقارنة بين موبايلات شاومي ريدمي Note 5 و 5 Plus و S2 – مين الأفضل ؟!
بقيت بستغرب جدا لما الاقي واحد لسه مش عارف موبايلات شاومي , وتلاقيه اصلا مش عارف ينطق الكلمة , معقولة انت في 2018 وفاكر ان الموبايلات عبارة عن ايفون وسامسونج بس ؟
شركة شاومي نشات في 2010 في الصين وارباحها طالعة زي الصاروخ , في 2017 ارباحها كانت 18 مليار دولار !
واحنا ف المقالة ديه هنتكلم عن أحدث 3 موبايلات ليهم في مصر وكلهم في الفئة المتوسطة بشاشات كبيرة بالابعاد الجديدة , وال 3 موبايلات هما ع الترتيب من الأفضل للأقل من وجه نظرنا هما Xiaomi Redmi Note 5 ثم Xiaomi redmi 5 Plus ثم اخر موبايل تم الاعلان عنه وهينزل مصر قريب وهو Xiaomi Redmi S2 , خلينا نتكلم عن اهم حاجات بتبص عليهم لما بتشتري موبايل وهما , قوة التصميم و المعالج والبطارية والشاشة والكاميرا الامامية والخلفية .
واحنا هدفنا في المقالة ديه انك تبقا عارف الفروقات الجوهرية بين ال 3 موبايلات خصوصا ان فرق الاسعار ما بينهم مش كبيرة علشان تعرف تحدد هتشتري مين فيهم ؟
التصميم :
- موبايل Xiaomi Redmi Note 5 بيجي بوزن 181 جرام مع تخانة 8.1 مم مع تصميم معدني قوي .
- موبايل Xiaomi Redmi 5 Plus بيجي بوزن 180 جرام مع تخانة 8.1 مع تصميم من المعدن مع جزئين من البلاستيك .
- موبايل Xiaomi Redmi S2 بيجي بوزن 170 جرام مع تخانة 8.1 مم مع تصميم من البلاستيك القوي .
مش محتاجه كلام , تفوق جزء متانة التصميم لصالح الريدمي نوت 5 .
المعالج :
- معالج النوت 5 هو Snapdragon 636 ثماني النواة الي اسرع 40% من سناب 625 .
- معالج الريدمي 5 بلس هو Snapdragon 625 .
- معالج الريدمي S2 هو Snapdragon 625 .
بردة التفوق هنا هيبقا للنوت 5 .
البطارية :
- بطارية النوت 5 هي 4000 مللي أمبير .
- بطارية الريدمي 5 بلس هي 4000 مللي أمبير بردة .
- بطارية ريدمي S2 هي 3080 مللي أمبير .
سعة بطاريات النوت 5 زي الريدمي 5 بلس بس النوت 5 أفضل علشان المعالج موفر اكتر في استهلاك الطاقة .
الشاشة :
- شاشة النوت 5 حجمها 5.99 بوصة IPS بدقة FHD+ عليها طبقة حماية كورنج جوريلا مع انحناء بسيط ع الاطراف 2.5D .
- شاشة شاومي ريدمي 5 بلس هي هي النوت 5 .
- شاشة الريدمي S2 حجمها 5.99 بوصة IPS بدقة HD+ ومن غير طبقة حماية ومن غير 2.5D .
بردة التفوق هنا للنوت 5 مع الريدمي 5 بلس , بس خلي بالك في مستخدمين كتير أكدوا ان شاشة الريدمي 5 بلس أفضل من ناحية الجودة والالوان من النوت 5 , اختلاف المصنع الي مخرج الشاشة رغم انها المفروض نفس المواصفات , بس ممكن الفرق ده متاخدش بالك منه لو مستخدمتش الموبايلين سوا .
الكاميرا الخلفية :
- كاميرا النوت 5 مزدوجة 12+5 ميجا بيكسل بفتحة عدسة f/1.9 وهي اوسع عدسة وهتلاقيها بتطلع احسن صور وكمان فيها مثبت بصري علشان تصوير الفيديو يبقا ثابت ومش بيتهز .
- كاميرا الريدمي 5 بلس 12 ميجا بيكسل بفتحة عدسة f/2.2 ورغم كدا هي الوحيدة الي بتصور فيديو 4k .
- كاميرا الريدمي S2 مزدوجة 12+5 ميجا بيكسل بفتحة عدسة f/2.2 وفيها مثبت بصري الكتروني علشان تاخد احسن ثبات في تصوير الفيديو ومع ذلك التصوير الفيديو 1080p بس .
احسن صور هتاخدها من الريدمي نوت 5 , واحسن جودة فيديو هتاخدها من ريدمي 5 بلس , واحسن ثبات فيديو هيبقا من الريدمي S2 .
الكاميرا الامامية :
- كاميرا النوت 5 بدقة 13 ميجا بيكسل بفتحة عدسة f/2.0
- كاميرا الريدمي 5 بلس بدقة 5 ميجا بيكسل بفتحة عدسة f/2.0
- كاميرا الريدمي S2 بدقة 16 ميجا بيكسل بفتحة عدسة f/2.0 .
هتاخد احسن اداء من الكاميرا الامامية من الريدمي S2 ثم النوت 5 , الريدمي 5 بلس ضعيف بالنسبة ليهم .
الاسعار :
- الصفقة الرابحة هنا لنوت 5 بسعر 3666 جنية للنسخة 32 جيجا , برغم انك ممكن تلاقيها اغلى 200 جنية في المحلات ومع ذلك بردة السعر ممتاز , وسعر النسخة 64 جيجا حوالي 4250 جنية وبردة ممكن تبقا اغلى 200 جنية ف المحلات .
- سعر الريدمي 5 بلس 3150 جنية للنسخة 32 جيجا و 3650 جنية للنسخة 64 جيجا .
- السعر الريدمي S2 هو 3099 جنية للنسخة 32 .
لو تاخد بالك الاسعار قريبة جدا من بعض يعني السعر بيبدأ من S2 اول نسخة 3099 جنية وتفضل تزود 500 ف 500 لحد اما توصل لاعلى حاجه النوت 5 النسخة 64 جيجا , واحنا ف موبيزل بنرشحلكم النوت 5 في الاختيار الاول ثم الريدمي 5 بلس .
Comments