لو محتار بين موبايل Realme 5 و موبايل Xiaomi Note 8 .. في مقارنة النهاردة هنشوف كل واحد أحسن في ايه علشان تقدر تشتري الموبايل الأفضل بالنسبة لاستخدامك .. لأن الموضوع بقا مُحير شوية بعيدا عن المواصفات الأداء الفعلي حاجة تانية خلينا نشوف!
التصميم :-
الريلمي 5 بتصميم من البلاستيك مع نقشة diamond cut اللمعة الموبايل شكله من بعيد حلو جدا بس لما تيجي تمسكه هتحس ملمسه رخيص شوية و ده طبيعي علشان الفئة السعرية اللي هو فيها و بيجي بأبعاد الهاتف 164.4×75.6×9.3 ملم مع وزن 198 جرام.
إنما اللي جميل هنا التصميم الزجاجي من شاومي في الفئة السعرية دي .. شاومي نوت 8 جاي يكمل ورا أخوه شاومي نوت 7 بتصميم زجاجي محترم جدا و يعتمد عليه وبيدي انعكاس بسيط مع تغيير الاضاءة عليه طبعا الفريم من البلاستيك علشان لو كان من المعدن فاكيد كان هيبقا مش عملي وهيتخربش بسرعة و بيجي بأبعاد 158.3×75.3×8.4 ملم و وزن 190 جرام.
لما نيجي نتكلم عن الوزن والحجم فالريلمي 5 أكبر و أتقل من النوت 8 بفرق ملحوظ بسبب البطارية الأكبر والشاشة الأكبر و علشان ريلمي تحسن شوية من تجربة الاستخدام فهي عملت انحناءات في ظهر الريلمي 5 علشان تحسن مسكته شوية علي عكس النوت 8 العادي اللي شاومي محتاجتش تعمل في ظهره انحناءات بسبب أصلا أن حجمه مش كبير في الإيد.
بروز الكاميرات أكبر شوية في الشاومي عن الريلمي بس الجراب اللي جاي مع الموبايلين بيقدر يغطي البروز ده و لو ان الاطمئنان الأكتر للبروز الأقل اللي موجود في الريلمي.
يعني من الاخر، الشاومي يكسب في الخامات الزجاج والحجم الأصغر و الريلمي يكسب في بروز الكاميرات الأقل.
الشاشة :-
Xiaomi note 8 بيجي بشاشة بحجم 6.3 بوصة من نوع IPS LCD بدقة Full HD+ و جودة 1080*2340 بيكسل مع كثافة بيكسلات 409 بيكسل إنما ال Realme 5 بيجي بشاشة بحجم 6.5 بوصة أكبر شوية وللأسف دقتها HD+ بجودة 720*1600 بيكسل مع كثافة بيكسلات 269 بيكسل لكل بوصة بأبعاد 20:9 وبردوا الشاشة نوعها IPS LCD.
والموبايلين فيهم نوتش Drop water محطوط فيهم السيلفي في الشاومي تقدر تلغي النوتش إنما الريلمي متقدرش تلغي النوتش.
الحواف حول الشاشة في الاتنين قريبة جدا من بعض يعني مش هتحس بأن في واحد أحسن من التاني. ألوان الشاشة أحسن شوية والـ HDR أحسن شوية في شاشة الريلمي عن الشاومي يعني الفرق مش كبير والسطوع تحت الشمس قريب جدا في الاتنين يمكن بس سطوع الشاومي أعلى بفرق بسيط.
طبعا فرق دقة الشاشة بيظهر معاك في الألعاب دا لو هتركز أوي و طبعا يظهر معاك لو هتشغل فيديوهات بجودة أعلى من HD.
بالنسبة للحماية على الشاشة،الشاومي بيجي بحماية جوريلا الجيل الخامس من غير اسكرينة و الريلمي بحماية جوريلا الجيل التالت وكمان عليه اسكرينة.
يعني من الأخر، شاشة الريلمي أكبر و ألوانها أحسن بفرق بسيط بس مقدرش انسى أن الشاومي يكسب طبعا في دقة الشاشة الأعلى.
الاداء :-
الموبايلين فيهم نفس المعالج سناب دراجون 665 لكن الأداء مش واحد لأن في سوفت وير مختلف بيفرق جدا في أداء الجهاز و هنا أحب اقولك أن النوت 8 العادي وقت تجربتنا له مكنش لسه السوفت وير مستقر أوي و ساعات كنت بحس بتنهيجات خفيفة في التنقل بين البرامج أو حتى لو جه مكالمة أثناء أي لعبة تقيله زي Call of duty على الموبايل بحس أنه بيهنج ثانية كدا ومش بيستجيب بسرعة معايا وديه كلها مشاكل سوفت وير ممكن تتحل بتحديث قريب و تحديث واجهة شاومي MIUI 11 هيوصل قريب وشاومي بتقول انها حلت كل مشاكلها في التحديث ده.
إنما الريلمي بواجهة Color OS مفيش أي مشاكل أو تهنجيات قابلتنا و أثناء تجربة الموبايل ده.
من الاخر الاتنين زي بعض بس حاليا سوفت وير ريلمي يتفوق على الشاومي لأول مرة تقريبا بسبب استقراره الزيادة مش أكتر.
بالنسبة للأداء الرسومي الاتنين زي بعض بمعالج رسومي Adreno 610 و هنا لعبة PUBG بتشتغل على جرافيك متوسطة في الموبايلين و Call of duty شغالة على أعلى اعدادات جرافيك بدون أي مشاكل و السخونية قريبة جدا من بعض الاتنين أصلا مش بيسخنوا جامد.
عوامل الامان و حماية الخصوصية :-
الاتنين فيهم بصمة خلفية سريعة جدا مفيش واحد أسرع من التاني بس الاختلاف هنا في حجم مستشعر البصمة، في الشاومي البصمة أصغر شوية من الريلمي يعني ممكن تحط صباعك في الشاومي ومتجيش ع البصمة احيانا بسبب صغر حجمها.
بالنسبة ل face unlock فهو سريع وممتاز في الموبايلين مفيش وواحد أسرع من التاني.
أهم فرق في السوفت وير بين الاتنين هو أن الشاومي بيقدر يعمل نسختين من كل البرامج إنما الريلمي بيعمل نسختين من برامج السوشيال ميديا بس.
بالنسبة للاشعارات في الريلمي أيقونات الاشعارات بتظهر جمب النوتش بس من غير لمبة اشعارات.
إنما الشاومي أيقونات الاشعارات مش بتظهر جمب النوتش حتى و انت مفعل الاوبشن ومنتظرين تحديث يحل المشكلة دي بس متعوضة بلمبة اشعارات بتنور باللون الأبيض.
بالنسبة للمستشعرات فالاتنين فيهم كل المستشعرات وشغالين زي الفل بس الشاومي يتفوق في وجود مستشعر IR اللي بتقدر تتحكم منه في الأجهزة المنزلية.
الصوت :-
النوت 8 صوته أعلى بشكل ملحوظ ومجسم أكتر بكتير من الريلمي 5 و صوت سماعة المكالمات في الاتنين ممتازين و بالنسبة لصوت سماعات الاذن الريلمي يتفوق بفرق بسيط.
بالنسبة لقوة الشبكة في الريلمي أحسن بفرق ملحوظ في تشغيل النت عليه في الأماكن اللي مفيهاش شبكة النوت 8 مش يبقدر يلقط نت إنما في المكالمات الاتنين قريبين من بعض في الأماكن اللي شبكتها ضعيفة.
البطارية :-
الشاومي ببطارية 4000 مللي أمبير بتقدر تستحمل معاك لحد 7 أو 8 ساعات شاشة مفتوحة إنما الريلمي بطارية 5000 مللي أمبير بتقدر توصل لحد 10 ساعات شاشة مفتوحة.
بالنسبة لزمن الشحن الشاومي بيجي بشاحن 10 واط مع دعم الشحن السريع لو هتشتري شاحن أسرع مع مدخل USB Type C والبطارية بتشحن في ساعتين وربع.
إنما الريلمي للأسف بيجي بمنفذ micro USB و شاحن 10 واط والبطارية بسبب حجمها الكبير بتتشحن لحد 100% في حوالي 3 ساعات وربع.
كده الريلمي بيديلك وقت استخدام فعلي أكتر بس علي حساب زمن الشحن الأطول ومنفذ الشحن الأقدم.
الكاميرات :-
الاتنين بيجوا بكاميرا خلفية رباعية، الريلمي العدسة الرئيسية 12 ميجا بيكسل مع فتحة عدسة 1.8 والشاومي 48 ميجا بيكسل مع فتحة عدسة 1.8 لكنها بتصور ب 12 ميجا بيكسل وبتعمل دمج بيكسلات و الاتنين فيهم عدسات wide angel و macro و عزل زي بعض.
و بالنسبة للسيلفي الاتنين بجودة 13 ميجا بيكسل مع فتحة عدسة F/2.0 و تصوير فيديو بجودة 1080 بيكسل مع 30 لقطة فى الثانية.
نزلنا جوجل كاميرا واشتغل بكفاءة على الاتنين.
منقدرش نقول واحد أحسن من التاني لأن النتائج الي حد ما مش ثابته كل موبايل أحسن في حاجة بس يعني في وجه نظر موبيزل الاتنين دول فعلا بيقدموا أفضل كاميرات في الفئة السعرية اللي تحت ال 3000 جنية بدون أي منافس حاليا.
عدسة التصوير الماكرو احسن شوية في الشاومي عن الريلمي .. اما العدسة الـ Wide Angle الاتنين زي بعض.
وعموما الاداء العام بعد تجربة تصوير كتير .. ممكن تشوف الصور المتصورة في فيديو المقارنة في أخر المقالة .. من الأخر الشاومي نوت 8 يكسب في الكاميرا الخلفية سواء تصوير صور عادية او فيديوهات بفرق بسيط عن ريلمي 5 .. والريلمي 5 يكسب في الكاميرا السيلفي خصوصا بليل عن النوت 8 من شاومي.
محتويات صندوق الهاتف :-
علبة ريلمي 5 فيها الموبايل ومتركب على الشاشة سكرينة و الشاحن بقوة 10 واط وكابل الشحن وجراب سيلكون شفاف لحماية الهاتف.
ملحوظة : صندوق الهاتف لا يحتوي على سماعات الأُذن Earphones.
أما علبة الشاومي فيها الـ Xiaomi Note 8 بدون سكرينة والشاحن بقوة 10 وات وكابل الشحن USB Type C وجراب شفاف لحماية ظهر الهاتف.
ملحوظة: صندوق الهاتف لا يحتوي على سماعات الأُذن Earphones.
أسعار الموبايلات :-
موبايل Realme 5 :
متوفر بنستخين
الأولى 64 جيجا بايت و 3 جيجا رام بسعر 2500 جنيه
و الثانية 128 جيجا بايت و 4 جيجا رام بسعر 3300 جنيه
موبايل Xiaomi Note 8 :-
متوفر بثلاث نسخ
الأولى 32 جيجا بايت و 3 جيجا رام بسعر 2500 جنيه
و الثانية 64 جيجا بايت و 4 جيجا رام بسعر 3000 جنيه
و الأخيرة 128 جيجا بايت و 4 جيجا رام بسعر 3330 جنيه
رأي موبيزل النهائي :-
تشتري الريلمي 5 لو بتدور على أداء مستقر مع بطارية أكبر و شاشة أكبر و سيلفي أحسن و محتاج مساحة أعلى بسعر أقل لأن الريلمي 5 أقل نسخة 64 جيجا بايت مش 32 جيجا بايت زي النوت 8 و أخيرا تكون بتدور علي شبكة مستقرة وممتازة.
تشتري الشاومي نوت 8 لو انت بتدور علي شاشة بدقة أعلى مع تصميم زجاجي لمبة اشعارات ومستشعر IR و كاميرا خلفية أحسن شوية و صوت أعلى و أكيد مدخل USB Type C و دعم للشحن السريع.
أقرا أيضا :- مقارنة بين Realme 5 Pro و Xiaomi Note 8 Pro – ملوك الفئة المتوسطة !
Comments