في كتير مننا بيدور على تابلت محترم .. ويكون في الفئة المتوسطة .. وأكيد ميكونش غالي أوي .. وفي نفس الوقت ميكونش رخيص أوي .. لإن أكيد السعر القليل بيترجم لمواصفات قليله وتجربه مش لطيفة أوي .. خير الأمور الوسط .. طب لو التابلت في الفئة المتوسطة وبيجي بمعالج قوي ؟
النهاردة معادنا مع تابلت جديد في الفئة المتوسطة من هواوي وصل قريب في السوق المصري وهو الـHuawei Matepad .. التابلت ده فيه مُميزات قوية أهمها المعالج .. وأكيد فيه عيوب .. هنعرف عنه كل حاجه في المراجعة النهارده !
التصميم :-
التابلت ده وزنه 450 جرام .. وزن مقبول جدًا على تابلت بالإمكانيات دي من ناحية الشاشة العملاقة والبطارية الضخمة اللي هنتكلم عنهم كمان شوية.
وكمان الوزن ده جاي برده بسبب الخامات المُستخدمه .. لإن هنا الخامات مُحترمة جدًا .. ظهر معدن مع فريم معدن .. مفيش هنا أي تنازلات .. وفي نفس الوقت التخانة بتاعته 7.4 ملم .. علشان يبقى رفيع ولذيذ كده في الإستخدام.
مش محتاجه كلام، مفيش تابلت بالحجم ده هتستخدمه بأيد واحدة .. ده محتاج أيد تالته علشان توصل لكل طرف في الشاشة العملاقة بتاعته.
عندي تعقيب بسيط على زرار الباور بتاع التابلت ده إنه فوق مش على الجنب .. مكان أخدت وقت على ما اتعودت عليه .. كان الأفضل يكون من الجنب.
التابلت معهوش جراب في العلبة بتاعته .. علشان يقدروا يقللوا من سعره على قد ما يقدروا .. لإن إنت عارف جراب التابلت الـSmart بيبقى غالي شوية .. تقدر تشتريه لوحده .. وهتلاقي في السوفت وير Options الـSmart Cover تقدر تفعله لما تجيب الجراب الذكي.
الشاشة :-
وهنا يبدأ الإبهار .. شاشة عملاقة 10.4 بوصة من نوع IPS LCD بدقة نقدر نقول عليها FHD+ .. الدقة بالظبط 1200×2000 بيكسل، وبيترجم لكثافة بيكسلات 224 بيكسل لكل بوصة .. حواف الشاشة دائرية علشان تليق مع حواف التابلت الدائرية.
الشاشة هنا محترمة جدًا جدًا فوق ما تتخيل .. شاشة نظيفة فعلا بتطلع ألوان مُحترمة .. سطوع مُحترم تحت الشمس بيوصل لـ 470 شمعة.
وكمان تقدر تتحكم في درجة حرارة الألوان من Setting الشاشة .. وهتلاقي الـDark Mode برده موجود .. ووضع راحة العين اللي بيقلل الأشعة الضارة موجود.
من الأخر الشاشة عجبتني جدًا .. وتكاد تكون أفضل من الشاشة الـTFT LCD الموجودة في تابلت سامسونج الـTab S6 Lite واللي بالمناسبة التابلت الهواوي ميت باد أرخص منه.
مفيش سكرينه على شاشة التابلت .. بس سهل تركبله سكرينه عند أي محل عادي.
الأداء :-
المعالج المستخدم هنا هو الكيرن 810 تكنولوجيا 7 نانو .. معالج قوي ومحترم وده نفس المستخدم في الـNova 7i اللي كلكم عارفين أداءه المُمتاز .. ونوع الذاكرة الداخلية eMMC .. مش UFS 2.1 .. كان الأفضل لو كان UFS 2.1.
المهم .. أداء التابلت ده هو الأفضل بسعره .. أيوة الأفضل بسعره زي ما بقولك كده .. مفيش أي تقصير في المهام اليومية ولا في أي تهنيجات أو تقطيعات ولو بسيطة ممكن تقابلك .. حقيقي أداء تقدر تعتمد عليه.
التابلت جاي بأندرويد 10 والإعتماد فقط على خدمات هواوي والـApp Gallery اللي بيتطور بسرعه .. مفيش هنا خدمات جوجل ولا في Play Store.
بس كلام بيني وبينك .. موضوع خدمات جوجل مش هيقصر معاك أوي في تابلت .. ممكن يكون عائق في موبايل .. إنما في التابلت لأ .. لان إستخدامه مُختلف كتير عن إستخدامات الموبايل.
وعمومًا أنا سطبت عدد كبير جدًا من البرامج من تطبيق Petal Search مُحرك بحث هواوي الجديد اللي بيساعدك تحمل البرامج بتاعتك بسهوله وكأنه بديل Google Search بس بصورة أسهل بكتير.
ندخل على الأداء الرسومي .. ببجي بتشتغل على High HD .. واللعبة بتشتغل كويس جدًا بدون أي تهنيجات أو تقطيعات .. كول اوف ديوتي بتشتغل على اعدادات جرافيك Very High واللعبة برده بتشتغل كويس جدًا.
طبعا حجم الشاشة الكبير والوزن التقيل بيخلوا تجربة الألعاب مش سهله .. بس هي تجربة فريده من نوعها .. ولكن كلام بيني وبينك .. التابلت مش معمول للألعاب .. ممكن يكون معمول لألعاب الأطفال اكتر.
وهنا في Kids Corner .. التطبيق اللي بتقدر من خلاله تسمح لطفلك إنه يلعب عدد ساعات مُعينه وألعاب مُعينه من غير ما تضر عينه .. كنت شرحته بالتفصيل في مراجعة تابلت Huawei Mediapad T8.
عوامل الأمان وعناصر اخرى :-
مفيش بصمة .. الإعتماد على الـFace Unlock واللي سرعته متوسطة ولا هي صاروخ ولا هي بطيئة اوي.
الشاشة الكبيرة اللي هنا لازم نستغلها صح في فتح أكتر من تطبيق في نفس الوقت وهنا في إضافة قوية في السوفت وير اللي هي الـMulti Window.
تقدر تختار تطبيق يفتح كـ Pop Up فوق تطبيق تاني .. أو تعمل Split Screen وتقسم الشاشة بالنسبة اللي إنت عايزها بين تطبيقين مفتوحين .. من غير الـOption ده كان هيبقى الشاشة الكبيرة ديه ملهاش لازمة .. فـ كويس جدًا إنه موجود.
التابلت ده بيدعم الـm Pen بتاع هواوي .. بس للأسف مش بيجي في العلبة علشان يقدروا يقللوا سعره .. هتفهم أكتر في أخر المراجعة !
مستشعر الدوران شغال كويس في التابلت هنا وبيعمل Rotate بسرعه .. مستشعر الضوء شغال كويس .. مفيش جيروسكوب معرفش ليه .. ومفيش مستشعر مقاربه لإن اصلًا مفيش سماعة مكالمات.
التابلت كمان فيه لمبة اشعارات بتنور بأكتر من لون.
الـSpeaker بيفتح لوحده لما يجيلك مكالمة .. وخلي بالك بقى في 4 ميكروفونات في الطرف العلوي للتابلت .. يعني اللي بيكلمك هيسمعك بكل كفاءة حرفيًا.
مش بس كده .. التجربة الصوتية هنا مُحترمة لاقصى درجة .. التابلت بيجي بـ4 سماعات بيشتغلوا مع بعض Stereo .. والـSound System ده من Harman Kardon.
حرفيًا انت هتاخد أعلى صوت Stereo مُجسم في الفئة السعريه دي من تابلت .. أعلى من اللاب توب .. وممكن يبقى في علو سبيكر غالي محترم .. عجبني جدًا جدًا صوت التابلت هنا .. أنا ممكن أستخدمه علشان الصوت بس.
مفيش مدخل 3.5 ملم للأسف بس في وصله تحويل من تايب سي لـ3.5 ملم بتيجي في العلبة علشان تقدر تركب سماعات الأذن بتاعتك .. والشبكات فالـWiFi والمكالمات تمام جدًا متقلقش من النقطة دي.
البطارية :-
معاك شاشة عملاقة وسماعات قوية .. ومعالج شديد .. لازم التجربة تكمل ببطارية ؟ طيب ايه رأيك في بطارية 7250 مللي أمبير.
مع الإستخدام العادي هتوصل معاك لحد 14 ساعة شاشة مفتوحة .. ولو إستخدام تقيل هتوصل لـ9 ساعات شاشة مفتوحة .. بطارية قوية والمعالج الموفر اللي هنا بيساعد البطارية في إنها تستحمل أكتر وأكتر.
منفذ الشحن USB Type C .. والشاحن المرفق في العلبة مكتوب عليه 10 واط .. فأنا قولت اكيد هيشحن في وقت طويل بقى.
انا شحنت التابلت وشحن معايا في 3 ساعات وربع .. وده وقت أنا شايفه كويس جدًا على حجم البطارية الضخمة اللي هنا .. وميقلش أي حاجة عن المنافسين.
الكاميرات :-
زي ما بقول دايمًا التابلت مش للتصوير .. الكاميرا الخلفية 8 ميجا بيكسل معاها فلاش .. الكاميرا السيلفي 8 ميجا بيكسل وهي دي اللي تهمك علشان لو هتعمل Video Call.
سوفت وير الكاميرات طبعًا فاضي مفيهوش غير Photo و Beauty مفيش Portrait.
وعمومًا بالنسبه لمستوى كاميرات التابلت .. فالكاميرات هنا أدائها معقول جدًا .. لإنك أكيد مش هتصور بيه في إضاءة ضعيفة .. هو مش معمول علشان كده ولا معمول علشان التصوير اصلًا ديه قاعده عامة في التابلت.
سعر التابلت :-
السعر الرسمي 5750 جنية للنسخة 64 جيجا مع 4 جيجا رام.
وبينفع تركب شريحة اتصال وكارت ميموري مع بعض في نفس الوقت.
الرأي النهائي :-
مميزات Huawei Matepad 10.4 :-
- تصميم فخم
- شاشة ضخمة ألوانها محترمة وسطوعها عالي
- أداء قوي بالنسبة للسعر
- صوت مُمتاز جدًا جدًا
- بطارية قوية
عيوب Huawei Matepad 10.4 :-
- مكان زُرار الباور الجديد
- مفيش جراب ولا قلم
- مفيش خدمات جوجل
- مفيش مدخل 3.5 مللي
تابلت Samsung S6 Lite بالنسبة لـ Huawei MatePad :-
- معالج أضعف
- صوت Stereo من سماعتين فقط
- شاشة TFT بجودة أقل
- كاميرا سيلفي أضعف
فمجملًا تابلت هواوي أقوى في المواصفات بشكل ملحوظ .. ونازل في فئة سعرية فاضية تمامًا وأقل بحبه حلوين من الـS6 Lite وأعتقد انهم قاصدين ميحطوش الجراب والقلم في العلبة علشان يفضل تحت سعر الـ6000 جنية.
Comments